Ela Hloko Boprofeta
“Re na le litaba tsa boprofeta, tse tiisitsoeng ka ho fetisisa, ’me le etsa hantle ha le li ela hloko, joale ka lebone le bonesitsoeng nqalong e lefifi.”—2 PETROSE 1:19.
1. Jesu o ile a senola eng e makatsang, ho latela Mattheu 16:21-28?
TŠEBELETSO ea Jesu ea lefatšeng e ne e le haufi le ho fela. Haufi le Cesarea Filipi, ka leboea ho Galilea, ‘Mora enoa oa motho’ o ne a boleletse barutuoa ba hae hore lefu la hae le haufi le hore o tla khutla ka khanya ea Ntat’ae. Eaba o re ho bona: “Ka ’nete ke re ho lōna: Ba bang ba teng ho ba emeng mona ba ke keng ba utloa ho shoa, ba e-so ho bone Mor’a motho a e-tla ’musong oa hae.” (Mattheu 16:21-28) E ne e le ho re’ng ho rialo?
2. (a) Mantsoe a Jesu a phethahalitsoe joang ponong e bonoeng ke Petrose, Jakobo le Johanne? (b) Hona ho ne ho tšoantšetsa ketsahalo efe e khanyang ea boprofeta?
2 Ho e ka bang matsatsi a tšeletseng hamorao, Jesu a ea le Petrose, Jakobo le Johanne thabeng e telele, mohlomong Hermone ea mokoloko oa Anti-Lebanone. Mona ha etsahala mohlolo! Jesu a fetoloa sebopeho ka pel’a mahlo a bona, a bonahala ka khanya e khōlō. Ponong, Moshe le Elia ba bonoa ba bua le eena. Moshe le Elia hobane’ng? Jesu ka ho hlakileng o tsebahatsoa ka Mangolo e le “Moprofeta eo” ea tšoantšelitsoeng ka Moshe. ’Me mosebetsi o tšoanang le oa Elia o amana haufi le ’Muso oa Molimo oo Jesu a busang ho oona. (Liketso 3:22, 23; Deuteronoma 18:15-19; Malakia 4:5) Ho ne ho loketse, he, hore ba bonoe ba e-na le Jesu mona ponong ena ea ho tla ha hae khanyeng ea kamoso ea ’Muso oa hae.—Mattheu 17:1-5.
3. Ke mantsoe afe a Jehova a hatisitseng bohlokoa ba pono?
3 Hape ke ho loketseng hore e be lentsoe la Jehova le ile la utloahala le e-tsoa leholimong, le re: “Enoa ke Mora oa ka ea ratoang, eo ke khahlisoang ke eena.” Eaba Molimo o phaella ka mantsoe a reng: “Mo utloeng.”
4. (a) Ke hobane’ng ha ketsahalo eo e lokela ho re susumetsa kajeno? (b) 2 Petrose 1:19 e bua ka ‘litaba life tsa boprofeta’?
4 Ketsahalo eo e tšabisang e ile ea sia baapostola bao ka maikutlo afe? E lokela ho re ama joang kajeno? Hoo e ka bang lilemo tse 30 hamorao, Petrose o ne a ntse a hopola pono eo ka khanya eohle ea eona. A re: “Re na le litaba tsa boprofeta, tse tiisitsoeng ka ho fetisisa.” ‘Litaba life tsa boprofeta’? E, boprofeta bo kang ba Daniele 7:13, 14, boo joale bo ileng ba tiisoa ke phetoho—boprofeta bo buang ka ho tla ha Mora oa motho khanyeng ea matla a ’Muso!—2 Petrose 1:16-19; bona le Esaia 9:6, 7.
5. “Litaba” tseo li ile tsa eketsoa ka eng ea bohlokoa?
5 Ka nako eo “litaba tsa boprofeta” li ne li akarelletsa le boprofeta ba Jesu Kreste ka sebele. Har’a bona e ne e le boprofeta ba ’Muso ka “ho fela ha lefatše,” boo le bona bo ne bo tšoantšetsa “Mor’a motho a e-tla ka maru a leholimo, ka matla a maholo le ka khanya e kholo” ka nako ea tsieleho e khōlō ho tsohle ea lefatše. (Mattheu 24:3-14, 30, 31) Hamorao, “litaba tsa boprofeta” li ne li tla akarelletsa boprofeta bo matla ba ’Muso boo Jesu Kreste ea tlotlisitsoeng a bo senoletseng moapostola Johanne ea tsofetseng, bo kang bo ngotsoeng ho Tšenolo 1:12-16; 5:5-10; 11:15-17 le 14:14, 15.
Ela Hloko!
6. Ke hobane’ng ha litaba tsa boprofeta li lokela ho ba le matla a maholo ho rōna kajeno?
6 Haeba Petrose le bo-mphato ba hae ba ile ba susumetsoa hakaalo ke pono eo ea boprofeta, e lokela ho ba le matla a makaakang ho rōna kajeno! Ha e le mona joale Mor’a motho a tlile khanyeng ea hae, ho lula teroneng ea khanya ea ’Muso oa hae maholimong, ruri ke nako ea hore re ‘mo utloe.’ Re etsa hantle haholo ha re ela hloko litaba tsa boprofeta joaloka ‘leseli le khanyang lefifing,’ re le lumella ho khantša lipelo tsa rōna.—2 Ba-Korinthe 4:6.
7. (a) Pauluse o hatisa bohlokoa ba boprofeta joang? (b) Ke hobane’ng ha ka ho khethehileng re lokela ho bo ela hloko kajeno?
7 Moapostola Pauluse le eena o hatisitse bohlokoa ba hore re tebise molaetsa oa boprofeta lipelong tsa rōna. A ngolla Bakreste ba Baheberu hore “Molimo . . . o buile hangata mehleng ea khale, le ka mekhoa e mengata, le bo-ntat’a [bona] ka baprofeta,” empa ‘mehleng ea qetello (ea tsamaiso ea lintho ea Sejode)’ o buile le bona ka Mora. Lentsoe leo la boprofeta le builoeng ke Jesu e ne e le la bohlokoa haholo. Ha le eloa hloko, le ne le tla isa polokong. “Ka baka leo,” Pauluse o re “e ka khona re ele ka ho fetisisa litaba tsee re li utloileng hloko.” (Ba-Heberu 1:1-4; 2:1) Joale, ‘qetellong ea tsamaiso eohle ea lintho ea lefatše,’ re na le mabaka ’ohle a ho utloa litaba tsa Jesu.—Mattheu 24:3, 35; bapisa Esaia 55:6-11.
8. Litaba tsa boprofeta li lokela ho re susumetsa joang, hona ka molemo ofe?
8 Ho hatisoe hore ho ela hloko ha rōna litaba tsa boprofeta e se ke ea e-ba feela ka morero oa ho rua tsebo. Oo hase morero oa rōna! Litaba tseo li lokela ho re susumelletsa ho etsa thato ea Molimo, haholo-holo hona joale, “mehleng ea bofelo.” (Esaia 2:2, 3) Ha a buisana le Jehova Molimo, mopesaleme o itse: “Lentsoe la hao ke lebone la maoto a ka, ke leseli tseleng ea ka.” Lentsoe leo le re nolofaletsa ho tsoela pele re tsamaea leseling la ’nete le katamelanong ea bohlokoa le Molimo oa rōna. Le re alositse hore re se khutlele lefatšeng la Satane. (Pesaleme ea 119:105; Jobo 29:3, 4) Ho rua molemo oa kamehla litabeng tsa boprofeta, re tlameha ho hlaolela lerato le tebileng bakeng sa Bibele, re tebisa molaetsa ’ohle oa eona lipelong tsa rōna. Kahoo ka linako tsohle re tla susumelletsoa ho etsa thato ea Molimo le ho ipoloka leratong la oona.—Mareka 12:29-31; 1 Johanne 4:16; Juda 20, 21.
Mehlala ea Boprofeta
9. (a) Ke hobane’ng ha re re tlaleho ea Bibele hase histori e shoeleng? (b) Ke letsatsi lefe la liphetetso le tšoantšetsoang moo?
9 Bibele e hlalosa ka ho qaqa ho hoholo tsela ea boithatelo ea Iseraele ea boholo-holo. Ka lebaka la’ng? ‘Hore e be litemoso ho rōna ba hlahetsoeng ke mehla ea bofelo.’ Hona ho lokela ho kenya ka ho rōna tšabo ea bomolimo, e se re ra “ba le pelo e mpe ea ho se lumele, e [re] lahlisang Molimo o phelang.” (1 Ba-Korinthe 10:11; Ba-Heberu 3:12; Jobo 28:28) Tlaleho ea Bibele hase histori e shoeleng! E fana ka mehlala le likomelo tsa boprofeta tse bontšang hore Jehova Molimo o tla boela a iphetetsa empa e le ka tekanyetso e khōloanyane ho feta mehleng ea Iseraele e koenehileng. Kotlo ea Molimo sechabeng seo se koenehileng ka 607 B.C.E., hape le ka 70 C.E., ke tšoantšetso ea kamoo haufinyane, bohale ba hae bo tukang bo tla tšolleloa haholo-holo holim’a Bojakane. Re etsa hantle ha re ela hloko litaba tseo tsa boprofeta!—Jeremia 7:28, 32-34; Mattheu 24:3-22.
10, 11. (a) Ke ho bapisa eng le eng ho re thusang ho ananela hore ruri ena ke ‘mehla ea qetello’? (b) Mekha ea bokoenehi ea Bojakane e phethahalitse boprofeta ka ho khetheha joang?
10 Ha ho ea ka hanang hore re kene “mehleng ea qetello” ea tsamaiso ea puso ea Satane ea lefatše. U saletsoe feela ke ho bapisa lefatše la kajeno le mantsoe a moapostola Pauluse a ho 2 Timothea 3:1-5, 13 ho ananela ’nete eo. ’Me haholo-holo har’a mekha ea bolumeli ba bokhelohi ba Bojakane e ferekaneng ke moo re fumanang batho ba nang le “sebopeho sa borapeli, empa e le ba latotseng matla a jona.” Ha ba na molaetsa oa ’nete oa pholoho.—Bapisa Mattheu 7:21-23.
11 Mekha e mengata ea bokoenehi e Bojakaneng e lumellana hantle le tlhaloso ea moprofeta oa Jehova, ha a ne a re: “Sechaba sa ka se entse libe tse peli: ba ntlhobohile, ’na [Jehova Molimo] ke leng seliba sa metsi a kollang, ’me ba icheketse mamena, mamena a ngamohileng, a se nang ho boloka metsi.” (Jeremia 2:13) Ke ’nete hakaakang hore mekha ea bokoenehi ea Bojakane e lahlile Morena ’Musi ea phahameng Jehova le metheo e lokileng e ngoliloeng ka Lentsoeng la hae! Ba bile ba hloile le ho bitsa lebitso la hae. Ho e-na le hoo, ba icheketse mamena a ngamohileng,” ba retelehela likhopolong le maikutlong a batho le ho polotika le lefatše. Linaheng tse ngata likereke tsa bona li shoa ke ho haelloa ke batšehetsi kaha batho ha ba fumane metsi a nyorollang a ’nete ho tsona. Leha ho le joalo, ha ho bapisoa, ho na le khatholoho e ngata ea moea e fumanoang har’a ba sebeletsang Jehova ka bokhabane.—Esaia 55:1, 2; 65:13, 14.
Se Boleloang ke Baeta-pele ba Lefatše
12. Ke hobane’ng ha e le lefeela ho tšepa baeta-pele ba batho bakeng sa pholoho?
12 Hase Bibele feela e lemosang ka thipitlo ea lefatše. Mongoli-kakaretso oa hona joale oa Machaba a Kopaneng o boletse hore ka lekhetlo la pele paleng ea motho hona joale re “mopatisaneng oa tlokotsi le pholoho.” Lengolong le ngotsoeng khale hoo e ka bang ka 1958, eo e neng e le Mookameli oa U.S. Harry Truman o itse: “Joale re talimane le thipitlo e feletseng. . . . Thipitlo eo e haufi haholo ntle leha baeta-pele ba baholo ba lefatše ba ka e thibela.” Empa na ka lilemo tse fetileng tse 25 “baeta-pele ba baholo” ba kile ba sisinyeha ho thibela thipitlo e feletseng? Ho e-na le hoo, hona joale ba sebelisa ho feta lidolara tse millione ka motsotso lihlomong tsa bodiabolose tse bolaeang. Ke ka “baeta-pele ba baholo” joalo moo mopesaleme a ngotseng: “Le se ke la itšepela marena, leha e le bana ba batho ba sitoang ho pholosa motho.”—Pesaleme ea 146:3.
13, 14. (a) Baeta-pele ba bolumeli ba ile ba supa tšepo efe ea bohata? (b) Ho latela Esaia, tšepo ea sebele ke efe?
13 Lichaba li ke ke tsa e-ba le matla a ho thethefatsa boemo bo kotsi. Le hoo ho thoeng ke Machaba a Kopaneng, ho ipakile hore haholo-holo ke lebala la likomang tsa mekha ho feta ho ba boemeli ba ho haha khotso le tšireletseho. Bapapa Paul VI le John Paul II ba kile ba hlaha ka pel’a Machaba a Kopaneng, ka hlompho e khōlō. Ba bolela hore sehlopha seo ke ‘tšepo ea ho qetela ea khotso le tumellano’ ea batho. Empa na ho joalo?
14 Litabeng tsa hae tsa boprofeta Jehova o bua ka tšepo ea sebele. O entse hore Esaia a profete ho tsoaloa ha mora ea neng a tla fetoha “Morena oa Khotso.” Enoa ke Kreste Jesu, ea tšoantšetsoang ka Morena Davida oa boholo-holo. Boprofeta bo tsoela pele ho re ka Jesu: “Hore a holise ’muso, le ho tlisa khotso e sa feleng teroneng ea Davida le ’musong oa hae; o tla o tiisa, a o tšehetse ka toka, le ka ho loka, joale le ka ho sa feleng. Cheseho ea Jehova oa makhotla e tla etsa hoo.” (Esaia 9:6, 7) Empa cheseho ea Jehova e tla tlisa “khotso e sa feleng” joang?
“’Muso oa Molimo o Haufi”
15. Jesu o hatisitse tšepo ea ’Muso joang?
15 E moholo ho Davida, Jesu Kreste, o profetile lintoa tse akaretsang le tsieleho e tla hlahisoa ke tsona lekholong la rōna la lilemo la bo20. A hla a bolela liketsahalo tse tšabehang, tsieleho ea lichaba, ho lebella ka tšabo lintho tse tlelang lefatše. Eaba o re: “Etlare ha tseo li qala ho hlaha, emisang lihloho, ’me le lelale holimo, hobane topollo ea lōna e tla be e atametse. . . . Ha le bona tseo li hlaha, le tsebe hoba ’muso oa Molimo o haufi.” (Luka 21:10, 11, 25-31) ’Muso oa Molimo! Ke eo pheko bakeng sa mathata a batho. Ho theosa le lilemo, na ha rea rapela hore ’muso oo o tle? Ke seo Jesu a re laetseng hore re se etse, a re: “Joale lōna, rapelang joalo, le re: Ntat’a rōna ea maholimong, lebitso la hao a le ke le khethehe; ho tle ’muso oa hao; thato ea hao e etsoe lefatšeng, joale ka ha e etsoa leholimong.”—Mattheu 6:9, 10.
16. Ke ka kutloisiso efe ’Muso oa Molimo o ‘leng haufi’?
16 Litaba tsa boprofeta joale li re bolella hore “’muso oa Molimo o haufi.” Empa ka kutloisiso efe? Moprofeta oa Molimo Daniele o-oa hlalosa. Kamor’a ho hlalosa mebuso kapa lipuso tsa batho “nakong ea bofelo,” o re: “Mehleng ea marena ao, Molimo oa leholimo o tla hloma ’muso o ke keng oa senyeha ka ho sa eeng kae, ’me borena ba oona bo ke ke ba fetela ho sechaba se seng; o tla robaka o felise mebuso eo kaofela, empa oona o tla ba teng ka ho sa feleng.” (Daniele 12:4; 2:44) Ka hona lefatše ha le chesoe ke koluoa ea libetsa tse kotsi tse bolaeang batho kaofela. Ho e-na le hoo, ’Muso oa Molimo o felisa batho ba khopo le lichaba lefatšeng la rōna, o lokisetsa puso ea kamehla ea lefatše lohle mahetleng a “Morena oa khotso.”—Esaia 9:6.
Ho Phethahatsoa Phetetso ea Molimo
17. Mohoo oa hore “ho khotso, ho iketliloe!” etlaba pontšo ea eng?
17 Boprofeta ba Bibele bo supa mehleng ea rōna. Bo re bontša se tlang haufi. “Hobane taba tsohle tse ngoliloeng pele, li ngoliloe ho re ruta, hore, ka ho mamella le ka ho tšelisoa ke Mangolo, re tle re be le tšepo.” (Ba-Roma 15:4) Litaba tsa boprofeta li tšoantšetsa Machaba a Kopaneng, ‘tšepo ea ho qetela ea motho bakeng sa khotso,’ le sebata se ’mala oa sekarelata. E, a ka ’na a feneketsa khotso ea mofuta o mong o itseng le ho kopanela mohoong oa hore “Ho khotso, ho iketliloe!”—tumellanong le motheo oa oona le phethahatsong ea boprofeta bo ho 1 Ba-Thessalonika 5:3. Empa joale Jehova o tla khanna “linaka” tsa ntoa tsa Machaba a Kopaneng ho harola “BabyIona e moholo,” bolumeli ba bohata, boo mekha ea bokoenehi ea Bojakane e leng karolo e nyatsehang haholo ea bona. Joale, ha “linaka” tseo li retelehela ho loana le Konyana Jesu Kreste, ka ho futuhela lipaki tse ratang khotso tsa Jehova, sabole ea Molimo ea kahlolo e tla theohela holim’a lichaba tseo le makhotla a tsona, ’me “ba ke ke ba phonyoha.”—Tšenolo 17:3-6, 12-17.
18. (a) Ka litaba tsa boprofeta, ho tla etsahala joang ka lichaba tseo tse tla hlasela batho ba Molimo? (b) Molimo o tla qetella o felisitse litaba joang?
18 Lihlomo tsa lichaba tsa “nuclear” li ke ke tsa li sireletsa ‘ntoeng eo ea letsatsi le leholo la Molimo o matla ’ohle,’ ntoa ea Harmagedone. (Tšenolo 16:14, 16) Haeba lihlomo tseo tse tšosang bohle li ka sebelisoa, li tla thusa feela hore lichaba li bolaeane. Mehleng ea Morena Josafate ea molemo oa Juda, makhotla a sera a tsoela pele ho ea hlasela batho ba Molimo bao ho neng ho bonahala ba sa sireletsoa. Empa Jehova, ka moprofeta oa hae, a re ho bona: “Se tšabeng, ’me le se ke la tepeletsoa ke sera se seholohali seno, hobane ntoa hase ea lōna, ke ea Molimo.” Jehova a chehela lira tseo leraba, hoo ‘ba ileng ba timetsana,’ ho fihlela ba fela nyele. (2 Likronike 20:15-23; bapisa le Baahloli 7:22; Ezekiele 38:21-23; Zakaria 14:13.) Qetello ea litaba e tla laeloa ke “Morena oa marena” ea beiloeng teroneng oa Molimo le makhotla a hae a mangeloi, a tla felisa lira tsa oona ho fihlela ho moleleri oa ho qetela. Le eena Satane le bademona ba hae ba tla kenngoa sekoting.—Tšenolo 19:11-16, 21; 20:1-3.
19. (a) Re lokela ho ithuta eng ho Genese 18:23-33? (b) Ke bafe feela ba tla bolokoa ‘mahlomoleng a maholo’?
19 Leha ho le joalo, na hase ntho e sisimosang hore Jehova a ripitle tsamaiso ee eohle ea lefatše, ho se karolo leha e le efe ea eona e tla tsosolosoa? Mohlomong ba bang ba ikutloa joalokaha Abrahama a ile a ikutloa ka Sodoma le Gomorrha, hore ha feela batho ba lokileng ba 50, kapa 45, kapa 30, kapa 20, kapa le bona ba 10 ba ka fumanoa moo lefatšeng, “moahloli oa lefatše lohle” a se ke a ba fiella kaofela. (Genese 18:23-33) Empa litaba tsa boprofeta li hlakisa hore lefatše la Satane le khopo ka ho fetisisa le hore le tla felisoa ka ho feletseng! (Jeremia 25:31-33; Sofonia 3:8) Batho feela ba tla pholosoa ‘mahlomoleng ao a maholo,’ kamoo Jesu a boletseng ke ‘batho’ ba ineetseng ba bakhethoa ba hae le metsoalle ea bona e kang linku. Ha ho ba bang ba baloang ba lokile mahlong a Jehova.—Mattheu 24:21, 22; 25:31-33, 46; Johanne 10:16; Habakuke 3:1, 2, 12, 13.
20. Re le Lipaki tsa Jehova, re lokela ho falimehela ho etsa joang mehleng ee e qetellang?
20 Litaba tsa boprofeta ba Jehova li ntse li “itlhahanela” ho ea phethahatsong ea tsona ea ho qetela. Re ‘li lebelle.’ (Habakuke 2:3) Ka baka leo, re le Lipaki tsa Jehova, re ke re bolele ka sebete “letsatsi la liphetetso tsa Molimo ao rōna” le ho ‘bua re sa tšabe’ joaloka baapostola ba Jesu ho tšelisa ba llang ka litaba tse molemo tsa poloko. (Esaia 61:1, 2; Liketso 4:8-13, 18-20) Hape, a re beng seli ho ela hloko mantsoe a Jesu: “Le iponele, hore lipelo tsa lōna li se ke tsa imeloa ke ho ja le ho noa hampe, le ke lipelaelo tsa bophelo bona, ’me letsatsi leo la le tšoara sehlōhō, hobane le tla oela ba ahileng lefatšeng lohle joale ka sefi. Falimehang ke hona, ’me le rapele ka mehla, le tle le neoe tokelo ea ho phonyoha ho tseo tsohle tse tla etsahala, le ea ho ema pel’a Mor’a Motho.”—Luka 21:34-36.
U ka arabela joang?
◻ Re ithuta eng ho 2 Petrose 1:16-19 le mangolo a amanang le eona?
◻ Ke melemo efe eo re e fumanang ka ho ‘ela hloko litaba tsa boprofeta’?
◻ Ho profetoa hore ke eng e haufi, hona ke hobane’ng ha re sa lokela ho tšoha?
◻ Ha “letsatsi la liphetetso” la Molimo le atamela, re lokela e be re etsa joang?
[Setšoantšo se leqepheng la 21]
“Ntoa hase ea lōna, ke ea Molimo”