Lipotso Tse Tsoang ho Babali

▪ Timothea oa Pele 4:10 e bitsa Molimo “’Moloki oa mefuta eohle ea batho, haholo ba tšepahalang.” (“NW”) Empa, na motho leha e le ofe ea sa tšepahaleng o tla bolokeha?

Che. Taba ke hore poloko e tšepisitsoe batho ba sebelisang tumelo ea bona.

Moapostola Pauluse o ne a elelitse Timothea hore molemo oa borapeli ke “pallo ea bophelo ba joale le ea bo tlang ho tla.” (1 Timothea 4:6-8) Eaba joale Pauluse o ngola taba ena e latelang: “Ka baka la sena re sebetsa ka matla, kahobane re beile tumelo ea rōna ho Molimo o phelang, eo e leng ’Moloki oa mefuta eohle ea batho, haholo ba tšepahalang.”—1 Timothea 4:10.

Molimo o nea batho bohle monyetla oa poloko. Pauluse o ngolile sena: “Hobane Molimo o mong feela, le ’Muelli mahareng a Molimo le batho o mong, e leng Jesu Kreste motho, ea ineetseng ho ba topollo ea bohle.” (1 Timothea 2:5, 6) Empa ke mang ea tla arabela topollong eo, a khetha bophelo, e seng lefu? (Deuteronoma 30:19, 20) Batho ba bang ba hana molaetsa oa Bokreste oa poloko. Ba bang ba amohela ‘peō’ hore e mele le ho hōla ho se ho kae, empa hamorao ba lumella lithahasello tse bonahalang kapa likameho tse ling ho kena pakeng tsa bona le poloko.—Mattheu 13:3-8.

Le hoja Molimo o beile ka pele ho e mong le e mong monyetla oa poloko, qetellong lintho li tla paka hore haholo “ba tšepahalang” ke bona ba amohelang poloko. Ka hona moapostola Petrose oa khothatsa: “Ha ho le joalo banab’eso, le mpe le tiee matla ke hona ho tiisa ho bitsoa le ho khethoa ha lōna; hobane ha le ka etsa joalo, ke moo le ke keng la khopjoa le ka mohla o le mong.”—2 Petrose 1:10; Johanne 3:16.