Na U Ananela Lefa la Hao?

“Phehellang ho ba le khotso . . . Iponeleng, . . . Ho se ke ha e-ba e mong e leng mofebi, leha e le ea etsang litaba tsa Molimo bosaoana, joale ka Esau, ea neng a bapatse ka boholo ba hae ba ho tsoaloa, a reka sejonyana se le seng feela.”—BA-HEBERU 12:14-16.

1, 2. (a) Lefa ke eng? (b) Ho hlaha lipotso life mabapi le lefa le leholo?

BATHO ba ’nile ba le bolaeloa. Ba bang ba shoa ba e-so ho le fumane. Ba bangata, ha ba le fumane, ba le qhalanya. Ke eng? Ke lefa. ’Me hangata ho ee ho be joalo ha ho e-na le thepa e jeoang lefa.

² Bibele e bua ka (ma)lefa ka makhetlo a 229, ’me hangata e le ha e bua ka tokelo ea setša kapa ea thepa. Empa leha ho le joalo, Lentsoe la Molimo le boetse le bua ka lefa le phahameng ho feta leha e le lefe le ka siuoang ke motho ea shoang. ’Me lefa leo le phahameng ke leo u ka le fumanang, haeba u sa le nyelise. Lefa lee ke lefe? Ke mang ea fanang ka lona? Ke hobane’ng ha le lahlehela ba bang? Re ka bontša ho le ananela joang?

Lefa Lee ke Lefe?

3. Lefa la Bokreste ke lefe, hona le fanoa ke mang?

³ Ha Bajode ba Antioke ba hana molaetsa oa moapostola Pauluse oa poloko, a retelehela ho bao e seng Bajode, “ba-lichaba.” “Ba thaba, ba tlotlisa lentsoe la Morena; ’me bohle ba neng ba khethetsoe bophelo bo sa feleng ba lumela.” (Liketso 13:45-48) E, lefa ke bophelo bo sa feleng. Ho palo e fokolang ke “lefa le sa boleng, le se nang sekoli, le sa omelleng, . . . leholimong.” Ke mang ea fanang ka lona? Petrose o re ke “Molimo, Ntat’a Morena oa rōna Jesu Kreste.”—1 Petrose 1:3, 4.

4. Ke lefa lefe le ka fumanoang ke batho ba bangata?

⁴ Empa ho thoe’ng ka bongata bo boholo ba batho ba se nang tšepo ea leholimo? Lefa la bona e ka ba bophelo bo phethahetseng e le karolo ea “lefatše le lecha,” mokhatlo o mocha oa batho ba lopolotsoeng ka sehlabelo sa Jesu Kreste. Le fana ka monyetla oa bophelo bo sa feleng qitikoeng e nchafalitsoeng le e sa silafatsoang. (Tšenolo 11:18; 21:3, 4; Johanne 17:3) U ikutloa joang ka ho lebella lefa le joalo? Haeba u se u ntse u le lebelletse, na u le ananela ka ’nete?

Ho Nyefola le ho Ananela Tokelo ea ho Tsoaloa

5, 6. (a) Esau le Jakobo e ne e le bo-mang? (b) Ke eng e neng e ikhetha ka lefa la bona, ’me le ne le tšoanetse mang pele?

⁵ Ho utloisisa hamolemo taba ena ea ho ananela lefa, a re ke re hlahlobeng ka bokhutšoaane mohlala oa bana ba motho ba babeli. E mong o ne a ananela melemo ea moea haholo, ha e mong a ile a felloa ke kananelo e joalo ’me qetellong a lahleheloa ke lefa la bohlokoa haholo. E ne e le Jakobo le Esau, bara ba mafahla ba mopatriareka oa Moheberu, Isaaka.

⁶ Ntat’a bona moholo Abrahama o shoele ha ba le lilemo li 15. Lefa le bonahalang leo a le sietseng mora oa hae Isaaka le ne le akarelletsa mehlape e meholo ea liphoofolo le tšimo e neng e e-na le lehaha la setša sa mabitla sa lelapa. (Genese 25:5-10) Leha ho le joalo, tšobotsi ea bohlokoa haholo ea lefa e ne e se thepa kapa ntho leha e le efe e bonahalang. E ne e le tšepiso eo Jehova a neng a e etselitse Abrahama ’me a e pheta hape ho Isaaka: “Lichaba tsohle tsa lefatše li tla itlhohonolofatsa lelokong la hao.” (Genese 22:18; 25:24-26; 26:2-5) Hona ha senola hore Messia, “peō” e tšepisitsoeng ho Genese 3:15, o ne a tla tla ka lesika la bana ba Abrahama kamoso. Kaha Esau e ne e le eena lefahla le leholo, lefung la ntat’ae, Isaaka, o ne a tla ba le tokelo ea molao ea tšepiso ena le karolo tse peli tsa lefa. Joale taba ke hore, Na o ile a ananela lefa la hae?

7. Esau le Jakobo ba ne ba fapana joang ka kananelo le ka botho? (Genese 26:34, 35; 28:6-9)

⁷ Ha mafahla a ntse a hōla, botho ba oona bo sa tšoaneng ba ’na ba totobala. Esau e ne e le setsomi se sa luleng, “motho oa naha,” ha Jakobo e ne e le “motho ea se nang molato” ea “phelang bophelo bo tsitsitseng.” (Genese 25:27, The Jerusalem Bible; New World Translation; The New English Bible) Ka tsatsi le leng ha Jakobo a phehile linaoa, Esau a tla a e-tsoa naheng a khathetse, a lapile. “Eaba Esau o re ho Jakobo: Ak’u mphe hle, ke je bofubelu boo, hobane ke khathetse!”—Genese 25:30.

8. Jakobo o ile a kōpa ngoan’abo eng e neng e sa lebelloa, ’me Esau a itšoara joang?

⁸ Ntlheng ena Jakobo a etsa kōpo e tsotehang ho lefahla la hae, a re: “Nthekisetse boholo ba hao pele.” (Genese 25:31) O ne a kōpa boholo ba lefa la Esau ha Esau a reka sekotlolo sa sejo se le seng! Na u nahana hore Jakobo o ne a ka ba le tšepo ea ho atleha ka tokisetso eo ea ho bapatsa? Ho bonahala a ne a nahana hore o tla atleha. Hobane’ng? Hobane o ne a bona litšekamelo tsa ngoan’abo le hore na o nka litaba joang. Na o ne a fositse? Esau, ka ho totobetseng a feteletsa boemo ba ’mele oa hae, a arabela: “Ke se ke ea shoa, ’me boholoane boo bo tla nthusa’ng?”—Genese 25:32.

9. Esau o fapana joang le ngoan’abo tabeng ea lefa?

⁹ Thekisetsano ea tiisoa ka kano, ’me Jakobo a ngoathela ngoan’abo bohobe le moapeho oa linaoa. Esau a ja eaba o-oa ikela, “ho se khathatso.” Joale tlaleho e bululetsoeng e hlalosa ka ho toba: “Kahoo Esau a bontša kamoo a neng a nka tokelo ea hae ea ho tsoaloa hanyenyane kateng.” (Genese 25:33, 34, NE) Ha ho bapisoa le Esau, Jakobo o ne a nketse tokelo ea ho tsoaloa holimo hakaakang! O ne a sa tonela thepa mahlo—setša sa mabitla le liphoofolo tse itseng. O ne a batla ha peō e tšepisitsoeng ea Messia e tla ka lesika la hae. O ne a batla lefa la moea.—Bapisa Mattheu 6:31-33.

Na U ka Rekisa Lefa la Hao?

10. (a) Pauluse o ile a etsa tlhaloso efe e khahlang ka Esau? (b) Kamano ke efe pakeng tsa bofebe le ho rekisa ha Esau tokelo ea hae ea ho tsoaloa?

¹⁰ Lilemo tse ka bang makholo a 19 hamorao moapostola Pauluse a sebelisa mohlala oa Esau ho lemosa Bakreste ba pele, a re: “Phehellang ho ba le khotso le batho bohle, . . . Iponeleng, hore e mong a se ke a haelloa ke mohau oa Molimo, . . . Ho se ke ha e-ba e mong e leng mofebi, leha e le ea etsang litaba tsa Molimo bosaoana, joale ka Esau, ea neng a bapatse ka boholo ba hae ba ho tsoaloa.” Ke hobane’ng ha mona Pauluse a lekanya mofebi le liketso tsa Esau? Hobane ho ba le kelello e kang ea Esau ho ka isa ho hlōleheng ho ananela litaba tsa Molimo le ho isa libeng tse tebileng haholoanyane, tse kang bofebe.—Ba-Heberu 12:14-16.

11. Ho etsahetse joang ka Bakreste ba bang mehleng ea kajeno?

¹¹ Na ka linako tse ling u lekeha hore u bapatse ka lefa la hao la Bokreste, bophelo bo sa feleng, ka ntho e ’ngoe ea nakoana e kang ‘sejonyana se le seng sa linaoa’? Na e be, mohlomong ka ho se hlokomele u nyelisa “litaba tsa Molimo”? Ka mohlala, linakong tse morao tjena, Bakreste ba bang ba oetse sefing sa bolokolohi ba kajeno ba boitšoaro. Ho bonahala ba e-na le takatso e sa mamelleng ea Esau ea ho khotsofatsa tlala ea nama. Joalokaha Esau a itse ho Jakobo: ‘Potlaka, mphe bofubelu boo ke je,’ na ha ho tšoane leha bona ba itse: ‘Potlaka! Ke hobane’ng ha re lokela ho emela lenyalo le hlomphehang?’—Genese 25:30; bapisa Genese 34:1-4.

12. (a) Ba bang ha baa bontša ho ananela litaba tsa Molimo joang? (b) Leha ho le joalo, ba bang ba nkile bohato bofe?

¹² Kahoo ho etsahetse’ng? Takatso ea ho khotsofatsa botona kapa botšehali ka eng kapa eng e fetohile ‘sejonyana se le seng sa linaoa’ ho bona. Ka lebaka leo, ba nyelisitse litaba tsa Molimo, ho akarelletsa kamano ea bona le Jehova Molimo le Jesu Kreste. Ba nyelisitse botšepehi, bokhabane le bohloeki. Ba sentse lefa la bona. Leha ho le joalo, ba bang ho bana hamorao ba ile ba khanneloa pakong ea sebele ’me ho totobetse hore ba khutletsoe ke boemo ba bona le Molimo.—Bapisa Pesaleme ea 51.

Ba Bang ba Lihuoa ke Eng?

13. Ke lintlha life tse ka fokolisang litekanyetso tsa rōna tsa moea?

¹³ Ke eng e bakang litšekamelo tsee tsa boitšoaro bo bobe? Na e be mohlomong batho baa ba lumella hore litekanyetso tsa bona tsa moea li fokolisoe? Lintho li ngata tse ka bang le phello e bolotsana tseleng eo re nahanang ka eona—metsoalle le beng ka rōna ba sa kopaneleng metheo ea rōna, le bona batho ba fokolang moeeng ka phuthehong, moea o hlephileng mosebetsing, boithabiso bo belaetsang le lintho tseo re li balang, ho batla lerato sebakeng sesele ho ba sa lumelang. Lintho tsena kaofela li ka isa boitšoarong bo bobe. Na e be tse ling tsa lintho tsena li ama litekanyetso tsa hao hona joale?—2 Ba-Korinthe 6:14; 2 Ba-Thessalonika 3:6.

14. Ke kotsi efe e teng boithabisong bo bong ba kajeno?

¹⁴ Ka mohlala, na u ee u iphumane u shebelletse thelevishene kapa baesekopo tse khothalletsang kapa tse bileng li buellang boitšoaro bo bobe? Re tlameha ho lumela hore libaesekopo tsena li ka thabisa nama ea rōna e fokolang—joaloka setsokotsane se hlaselang ba sa eleng seli. Li ka ba le phello e khukhunelang monahanong oa hao. Hona ho bonoa ka ho hlaka tšusumetsong e matla e sebelisoang ke basodoma boithabisong ba lefatše. Ba ntšelitse pele libaesekopo le lipapali tse lokafatsang bosodoma. Ka lebaka leo, seo nakong e fetileng se neng se nkoa e le likamano tsa botona le botšehali tse feteletseng hona joale se khabisitsoe e le “mokhoa o mong oa bophelo”! Ho fihletsoe boemo boo moapostola Pauluse a bo hlalositseng: “Ba timeletsoe ke kutlo eohle, ba ineetse bohlola, ba tle ba etse manyala ’ohle ka takatso e se nang ho kholoa.”—Ba-Efese 4:19; 1 Ba-Korinthe 6:9-11.

15. Re ka qoba maraba a boitšoaro bo bobe joang?

¹⁵ Pheko ke efe? Balehela ‘khaphatseho eo ea bohlola’! Bibele e-ea eletsa: “Batlang ho hotle, e seng ho hobe, . . . Hloeang ho hobe, le rate ho hotle.” Ke eo, he, teko ea sebele—ho hloea bobe ka ketso.—1 Petrose 4:4; Amose 5:14, 15.

16. Pauluse o beetse Bakreste tekanyetso efe?

¹⁶ Ha re e-na le khopolo ea Kreste, na ha rea lokela ho ba le letsoalo ka pefo e se nang mabaka, bobatana bo kulisang le boitšoaro bo bobe ka ho feletseng tse bontšoang boithabisong bo bongata ba kajeno? Ha e le hantle, tekanyetso ea rōna e lokela ho ba efe? Pauluse o-oa arabela: “Tsohle tsee e leng tsa ’nete, tsohle tse hlomphehang, tsohle tse lokileng, tsohle tse hloekileng, tsohle tse ratehang, tsohle tse botumo bo botle, tsohle tseo bokhabane bo bong le poko e ’ngoe e leng teng ho tsona, le ke le hopole tsona.”—Ba-Fillipi 4:8.

17. (a) Bootsoa ke eng? (b) Ba bang ba silafalitse likelello tsa bona joang? (c) Tsela e bohlale ke efe?

¹⁷ Ruri ho molemo ebile ke tšireletso ho utloa keletso ea moapostola. Ka bomalimabe ba bang ‘ba tsoela pele ho nahana ka’ TV, libaesekopo le libuka tse buang ka bootsoa.a Ka lebaka lena, ba silafalitse likelello tsa bona le lipelo ka boitšoaro bo bobe le mekhoeng e litšila ea likamano tsa botona kapa botšehali. Ho ka be ho bile molemo hakaakang hoja ba ile ba sebelisa keletso ea moapostola: “Banab’eso, le se ke la ba bana hlalefong [litabeng tsa moea], le mpe le be bana lonyeng”!—1 Ba-Korinthe 14:20.

Re ka Hōlisa Kananelo ea Rōna Joang?

18. Ke eng e ka sebeletsang e le tšireletso le ho re thusa ho ananela lintho tse halalelang?

¹⁸ Ha motho a e-na le kamano e haufi le batsoali ba hae, kamano ena e etsa hore a ele hloko lerato le metheo ea bona, kahoo o leka kahohle hore a se soabise lelapa. Ho joalo ka kamano ea rōna le Jehova. Empa kamano eo re ka e matlafatsa joang? Ka ho tseba Molimo ka katamelo e haufi. Boithuto ba rōna ho tebileng ba botho ba Lentsoe la Molimo bo tla re thusa ho mo tseba le ho mo rata hantle hoo re tla hanela moleko ofe kapa ofe. Joalokaha Davida a boletse ho Pesaleme ea 23, kamehla re tla ikutloa hore Molisa oa rōna, Jehova, o na le rōna. Ekaba bothoto bo bokaakang hore re etse phoso e khōlō empa Molisa a ntse a le haufi hakaale!—Ba-Heberu 4:13.

19, 20. (a) Ke mathata afe a mabeli a teng maloka le boithuto ba botho? (b) Ke hobane’ng ha ho bonahala eka nako ea boithuto ba botho e-ea fokola kajeno?

¹⁹ Leha ho le joalo, ho na le mathata a mabeli a maholo. Taba ea pele ke hore, ho ba bangata, boithuto ba botho ke moroalo. Ka lebaka la litsamaiso tse haelloang tsa thuto, batho ba bangata kajeno ba bala ka thata. Ho bona, ho ithuta ho hloka boiteko. Empa ntho e ’ngoe le e ’ngoe bophelong e nang le molemo o sa feleng e hloka boiteko. Na ha ho tšoanele boiteko boo re bo etsang ho tseba Jehova, Morena ’Musi oa bokahohle, Ntat’a rōna le Molimo oa mosa o sa tšoanelang?—Mattheu 6:9; Jakobo 4:8.

²⁰ Bothata ba bobeli ke hore ho bonahala eka nako ea ho ithuta e-ea haella. Empa mohlolo ke hore lilemong tse fetileng tse 30 kapa 40 ho ne ho bonahala nako e le teng—nako ea ho qoqa, ho bala, ho ngola mangolo, ho tsamaea ho ikhatholla le le lelapa, ho nahanisisa. Ke hobane’ng ha lintho li fetohile? Ho bonahala eka nako ea rōna e felloa ke matla. Ha e le hantle hangata letsatsi ha le sa tšoanela lihora tse 24. Hobane’ng? Hobane “lesholu” le kene ka malapeng a mangata ’me le nkile boholo ba nako ea bohlokoa. Na u tseba “lesholu” leo? E, ke thelevishene, ka tšusumetso ea eona e kotsi. Phuputso e ’ngoe e bontša hore “lelapa le itekanetseng hantle la Amerika le shebella thelevishene lihora tse 7 le metsotso e 22 ka letsatsi.” Hoo e batla e le karolo e le ’ngoe ho tse tharo tsa letsatsi! Ka karolelano, u senya nako e kae u shebelletse TV ka letsatsi? Ka letsatsi, lefatšeng lohle, lihora tsa bohlokoa tse libillione tsa bophelo li lahloa ha batho ba tonetse TV mahlo. Ke ’nete hore, mananeo a mang a hloekile, aa thabisa kapa aa ruta. Empa le oona a ka ja nako. Leraba la TV le eka haholo.

21. (a) Ba bang ba ka ’na ba e-ba le bothata bofe? (b) U nahana hore pheko ke efe?

²¹ Bakreste ba ka qoba ho utsoetsoa ke “lesholu” lee joang? Ka hore feela ba laole nako ka hloko. Lekanyetsa nako eo u shebellang TV ka eona. Bea lintho tsa bohlokoa ka tatelano—batho le likamano ke tsa bohlokoa haholo ho feta TV. Ka mohlala, na u tenoa ke batho ba fihlang feela ba sa lebelloa nakong ea lenaneo la hao leo u le ratang la TV? Hona na u fumana ho le thata ho koala TV, leha lenaneo le tena kapa le le lebe? Haeba u ikutloa joalo u tsebe hore u na le bothata.—1 Ba-Korinthe 9:24-27.

22. Re ka rekolla nako ea ho shebella TV joang bakeng sa lintho tse ling?

²² U ka nka mehato efe ho rekolla lihora tseo tsa bohlokoa bakeng sa boithuto ba botho le likamano? Hlokomela mananeo a tšoanelang ho shebelloa ke Mokreste ’me u a shebelle hafeela ho se letho le leng la bohlokoa ho feta moo leo u ka le etsang. Ba bang ba bile ba nkile boemo bo matla haholo—ho se be le TV ho hang lapeng. Eo ke taba ea motho ka mong. Empa ruri ha baa lapa moeeng ka lebaka la ho hloka thelevishene.—Ba-Efese 5:15, 16.

23, 24. Re ka etsa joang ho bontša kananelo ea ’nete bakeng sa lefa la rōna? (Ba-Heberu 11:26)

²³ E be joale re ka etsa joang haeba re batla ho boloka lefa la rōna la bohlokoa, le hore re se ke ra le rekisa ka ‘sejonyana se le seng sa linaoa’? Nepisisa hore na lintho tsa bohlokoa haholo ke life bophelong ba Bokreste. Iketsetse lipakane ’me u li khomarele. U be seli ho haba ho fumana neo ea bophelo bo sa feleng, joalokaha moapostola Pauluse a ‘ile a phehella pakane ea moputso oa pitso ea holimo.’ Joaloka Jakobo, bontša kananelo e tebileng bakeng sa lefa. Joaloka Moshe, ‘lebella ka matla ho lefuoeng ha moputso.’—Ba-Filippi 1:9, 10; 3:13, 14; Ba-Heberu 11:24-26.

²⁴ Re ka itšusumetsa joang hore re etse seo sohle? Ka ho khothalla ho ithuta Bibele. E sebelise kamehla bophelong ba hao. U be teng kamehla libokeng tsa Bokreste ’me ha u le moo u ele hloko ka ho fetisisa. Rata se lokileng ’me u hloee se sebe. Che, u se nyelise lefa la hao e le hore u khotsofatse takatso e ’ngoe e potlakileng ea nama. Lefa la hao, bophelo bo sa feleng, bo molemo ho feta ‘sejonyana leha e le sefe se le seng sa linaoa,’ ho sa tsotellehe hore na se ka sebopeho sefe sa kajeno!—Ba-Heberu 10:24, 25; 12:12-16.

[Mengolo o botlaaseng ba leqephe]

Na u sa Hopola?

◻ Lefa la Bokreste ke eng?

◻ Esau o nyelisitse tokelo ea hae ea ho tsoaloa joang?

◻ Ke kotsi efe e teng kajeno ho Bakreste ka lefa la bona?

◻ Re ka atolosa kananelo ea rōna ka litsela life tse sa tšoaneng?

[Setšoantšo se leqepheng la 9]

Na u ka rekisa lefa la hao ka ‘sejonyana se le seng sa linaoa’?