Na U ka Itokisetsa Tlhoriso Hona Joale?
“Ha ba ntlhorisitse, ba tla le hlorisa le Iōna.”—JOHANNE 15:20.
1, 2. Ke bohato bofe bo neng bo sa lebelloa bo nkuoeng ke mebuso e meng khahlanong le Lipaki tsa Jehova?
INAHANE u phomotse betheng hoseng ha letsatsi le leng. U ntse u ipotsa hore na u tsohe kapele kapa u phomole ho se hokae. Empa pele, u bulela sea-le-moea sa hao hore u utloe litaba tsa hoseng. Hang-hang seboholi se bua taba e etsang hore u phaphame. Se phatlalatsa tsebiso ena: “Molao oa ’muso o bontša hore mokha o tsejoang e le Lipaki tsa Jehova o thibetsoe ka molao naheng eohle.” Ha u sa ikutloa u batla ho phomola!
2 Taba ena, kapa e tšoanang le eona, e bile phihlelo ea Bakreste linaheng tse ling mehleng ena. Hangata, ho ee ho ntšoe litemoso ka se tlang ho etsahala. Empa ka linako tse ling thibelo e hlaha ka ho tsometsa. Na sena se lokela ho re makatsa?
3. Jesu Kreste o bile le liphihlelo life tse sa tšoaneng ka 33 C.E.?
3 Ha ho hlokahale hore ho be joalo. Lintho tse joalo li ne li etsahale lekholong la pele la lilemo. Hopola kamoo Jesu Kreste a neng a kene Jerusalema a kalletse esele, mathoasong a lehoetla la 33 C.E. Ka thabo batho ba mo rorisa, ba ala likobo tsa bona tseleng ka pele ho eena. Empa matsatsi a se makae hamorao ha etsahala eng? Jesu o ne a le nyeoeng ka pele ho Ponse Pilato, ’me mokhopi o tsoang motseng oo o lapetseng mali oa hoeletsa: “Ha a thakhisoe! . . . Ha a thakhisoe!” (Mattheu 21:6-9; 27:22, 23) Boemo bo fetohile ka tšohanyetso hakaakang.
4. Re le balateli ba Jesu, re tlameha ho lebella tšoaro efe?
4 Ka baka leo, ha rea lokela ho makala haeba linaheng tse ling kajeno boemo bo fetoha ’me tlhoriso e hlaha ka ho tsometsa. Hopola, haeba ka ’nete-nete re le balateli ba Jesu, re tlameha ho lebella tlhoriso. (Johanne 15:20) Hona ho totobatsa bohlokoa ba mantsoe a Jesu, “Lebellang.”—Mattheu 24:42.
5. Ke lipotso life tseo re lokelang ho li nahanela?
5 Re ka etsa sena joang? Na ho na le tsela eo re ka itokisetsang bomalimabe leha e le bofe bo ka re oelang?
Lokisa Mohopolo le Pelo ea Hao
6, 7. (a) Ke hobane’ng ha ho le thata ho etsa litokisetso tse bonahalang bakeng sa tlhoriso? (b) Ke tokisetso efe e bohlokoa haholo eo re ka e etsang bakeng sa tlhoriso?
6 Ho thata ho lokisetsa tlhoriso ka tsela e bonahalang kahobane ha u tsebe hore na boemo e tla ba bofe. Pele e etsahala, ha u tsebe hore na e be thibelo e tla ba e thata hakae kapa e tla ba e sa qobelleng haholo, kapa hore na ke eng e tla thibeloa. Mohlomong ho tla haneloa mosebetsi oa ho bolela ka ntlo le ntlo feela, kapa liboka. Ka linako tse ling mokhatlo o ngolisitsoeng ka molao oa Lipaki tsa Jehova o ka felisoa, kapa mohlomong batho ba itseng ba hlahleloa hang-hang. Mohlomong re ka nahana libaka tse ling tseo libuka li ka patuoang e le hore li sebelisoe ha li hlokahala. Empa ho feta moo, ha ho letho le lekaalo le bonahalang leo re ka itokisetsang Iona.
7 Leha ho le joalo, u ka lokisa mohopolo le pelo ea hao, ’me sena se bohlokoa haholo. Tsepamisa mohopolo oa hao tabeng ea hore na ke hobane’ng ha tlhoriso e lumelletsoe le hore ke hobane’ng ha u huleloa pel’a babusi. Hore “e be bopaki,” ho itsalo Jesu. (Mattheu 10:16-19, TLP) Haeba pelo ea hao e itokiselitse ho lula e tšepahala ka ho feletseng ho sa tsotellehe se hlahang, Jehova a ka u senolela tsela e bohlale ea ho sebetsa litaba ha maemo a hloka hoo. Ka hona, re ka itokisa joang moeeng bakeng sa tlhoriso?
U Sebelisana le Batho Joang?
8. Ke hobane’ng ha Pauluse a ne a ka bolela hore ‘o ne a thabela mahlapa’?
8 Moapostola Pauluse o itse: “Ka baka leo, ke thabela bofokoli, mahlapa, litsietsi, litlhoriso, le mahlomola, ka baka la Kreste.” (2 Ba-Korinthe 12:10, TLP) Na Pauluse o ne a thabela ho hlapaoloa? Che. Hangata tlhoriso e ne e akarelletsa mahlapa, ’me haeba Pauluse o ne a lokela ho mamella mahlapa ka baka la thoriso ea lebitso la Molimo, o ne a thabela ho etsa hoo.
9. Hona joale re ka itokisetsa ho mamella “mahlapa . . . ka baka la Kreste” joang?
9 Le rōna re ka lebella hore ka linako tse ling re tla tlameha ho mamella “mahlapa . . . ka baka la Kreste.” Batho ba ka re hlapaola, esita le ho re hlokofatsa ’meleng. Na re tla mamella? Hona joale re italima joang? Na re inka ka ho teba haholo ’me re khopisoa kapele ke mahlapa a sebele kapa a inahaneloang? Haeba ho joalo, ke hobane’ng re sa hlaolele “mamello . . . bonolo le boitšoaro”? (Ba-Galata 5:22, 23, TLP) E tla ba koetliso e ntle haholo ea bophelo ba Bokreste hona joale, ’me e tla boloka bophelo ba hao linakong tsa tlhoriso.
U Talima Tšebeletso ea Tšimo Joang?
10. Ke bohato bofe ba Mangolo bo nepahetseng boo re lokelang ho bo nka ha mosebetsi oa rōna oa boboleli o thibeloa?
10 Hangata ntho ea pele e thibeloang ke ho bolela phatlalatsa “litaba tse molemo.” Empa leha ho le joalo ho bolela le ho etsa barutuoa ho bohlokoa haholo mehleng ena ea qetello. Ntle ho moo batho ba ka ithuta ka ’Muso oa Molimo joang? Ka baka leo, boikutlo bo nepahetseng tlas’a thibelo e joalo ke bo boletsoeng ke baapostola, ha baetapele ba Sejode ba ne ba leka ho thibela mosebetsi oa bona oa boboleli. (Liketso 5:28, 29) Likarolo tse ling tsa boboleli ba rōna li ka thibeloa. Empa, mosebetsi o lokela ho etsoa ka tsela e ’ngoe. Na u tla ba le sebete sa ho tsoela pele u bolela tlas’a khatello ea tlhoriso?
11, 12. U ka lekanya joang haeba u tla ba le matla a hlokahalang a ho tsoela pele u bolela ha u hlorisoa?
11 U talima joang mosebetsi oa boboleli hona joale? Na u lumella litšitiso tse sa reng letho ho kena-kenana le tšebeletso ea hao ea tšimo le ho u etsa hore u se tsoe kamehla? Haeba ho joalo, u tla itšoara joang tlas’a thibelo? Na u tšaba motho hona joale? Na u ithaopela ho bolela ka ntlo le ntlo seterateng seo u lulang ho sona? Na u boi ho sebetsa u le mong? Linaheng tse ling, ha batho ba babeli ba sebetsa hammoho bangata ba hohela mahlo a batho. Ke hobane’ng ha ka linako tse ling u sa sebetse u le mong libakeng tseo ho sireletsehileng ho etsa joalo? E tla ba koetliso e molemo.
12 Na u kopanela mosebetsing oa limakasine oa seterateng? Na u na le sebete le moea oa ho qalisa menyetla ea ho fana ka bopaki bo sa rereloang? Na u sebetsa libaka tsa khoebo? Na u boi ho atamela batho ba ruileng kapa ba maemo a phahameng? Haeba u kopanela mofuteng o le mong feela oa boboleli, u tla etsa joang haeba mofuta oo oa boboleli o thibeloa?
13. Hona joale u ka etsa eng ka tšebeletso ea hao e le hore u be ea loketseng hamolemo ho bolela linakong tsa tlhoriso?
13 Na ho na le bofokoli boo u bo elelloang ho uena? Hona joale ke nako ea hore u bo lokise. Ithute ho itšetleha ka Jehova le ho ba mosebeletsi ea tšoanelehang haholo. Ka hona u tla ba ea loketseng hamolemo ho fana ka boboleli hona joale le ea loketseng hamolemo ho phehella boboleli linakong tsa tlhoriso.
Na U Motho ea ka Tšepuoang?
14, 15. (a) Ke Bakreste ba mofuta ofe ba lekholong la pele la lilemo bao e tlamehang e be e bile tšusumetso e matlafatsang ha tlhoriso e qala? (b) Mohlanka oa Jehova kajeno a ka etsisa Bakreste bao ba pele joang?
14 Mangolong a Segerike a Bokreste ho qotsitsoe batho bao e neng e le litšiea tsa phutheho. Ka mohlala, Onesifore ka sebete a thusa Pauluse ha a le botlamuoeng Roma. (2 Timothea 1:16) Foibe o ile a babatsoa ka baka la mosebetsi oa hae o khothetseng phuthehong ea Cenkrea. (Ba-Roma 16:1, 2) Banna le basali ba joalo e tlameha e be e bile tšusumetso e matlafatsang hakaakang ha tlhoriso e qala. Ba lula ‘ba falimehile, ba tiile tumelong, ba etsa ka senna, ba matlafetse.’—1 Ba-Korinthe 16:13.
15 Bakreste bohle, haholo baholo, ba lokela ho hōla le ho ba matla joaloka Bakreste ba pele. (1 Timothea 4:15) Ithute ho boloka makunutu le ho etsa liqeto metheong ea Mangolo. Ithute ho lemoha litšoaneleho tsa Bokreste ho ba bang hore u tsebe ba ka tšepuoang tlas’a khatello. Ka matla a Jehova sebeletsa ho ba tšiea phuthehong ea heno, u be motho ea thusang ba bang ho e-na le hore kamehla e be uena ea thusoang.—Ba-Galata 6:5.
U ka Phelisana le ba Bang Joang?
16, 17. Ho sebelisa Ba-Kolosse 3:12, 13 ho ka u thusa joang ho itokisetsa tlhoriso hona joale?
16 Moapostola Pauluse o re khothalitse: “E-bang le kutloelo-bohloko, le mosa, le boikokobetso, le bonolo, le boiphapanyo. . . . Le mamellane, ’me le tšoarelane [ka bolokolohi].” (Ba-Kolosse 3:12, 13, TLP) Na ho bonolo hore u etse joalo? Kapa na u tenoa ke ho se phethahale ha batho ba bang ho sa hlokahale? Na u khopiseha kapele kapa u-ua nyahama? Haeba ho joalo, sebeletsa ntlheng eo ho itokisetsa kamoso.
17 Linaheng tseo liboka li thibetsoeng, kamehla Bakreste ba bokana hammoho ka lihlotšoana. Maemong a joalo, mefokolo ea bona e totobala haholo ho ba bang. Ka hona ke hobane’ng ha u sa qalise hona joale ho ithuta ho mamella mefokolo ea ba bang, joalokaha le bona ba mamella ea hao? U se nyatse ba bang le ho ba nyahamisa. Hape, ithute ’me u rute le bana ba hao ho hlompha thepa ea batho ba bang ha le le Lithutong tsa Buka ea Phutheho. Tlas’a tlhoriso, hlompho e joalo e tla hōlisa likamano tsa khotso.
Na U Motho ea Ratang Litaba?
18. Ke ka baka la’ng ha re itšireletsa haeba re tseba feela boitsebiso boo re lokelang ho bo tseba?
18 Ka tlhaho, ba bang ho rōna ba rata litaba haholo. Ha re rate “ho fetoa ke litaba.” Na u joalo? Haeba u joalo, ak’u nahane ka sena: Ka linako tse ling, ha mosebetsi oa Lipaki tsa Jehova o thibetsoe, ba boholong ba leka ho fuputsa tlhophiso ea Lipaki le ho fumana mabitso a balebeli ba ikarabellang. Haeba u tseba lintho tsena, u ka hlokofatsoa ’meleng ka sepheo sa ho u qobella hore u ntše litaba tsena. ’Me haeba feela u ka senola litaba tse joalo, mosebetsi oa baena ba hao o tla ba kotsing e khōlō. Ka baka leo, ka linako tse ling u-ua itšireletsa ka hore u tsebe feela boitsebiso bo hlokahalang e seng ho feta moo.
19. Ke eng se tla u thusa hona joale ho qoba ho senola makunutu ha u hlorisoa?
19 Na u ka ikoetlisetsa seo hona joale? E. Ka mohlala, haeba ho na le nyeoe ea komiti ea boahloli phuthehong, batho ba lokela ho khotsofatsoa ke seo baholo ba fumanang se loketse ho ba bolella sona ’me ba se leke ho phenyekolla ho fumana lintlha tse ling tsa nyeoe eo. Basali le bana ba baholo ha ba lokela ho leka ho ba qobella hore ba ba bolelle makunutu. Ka litsela tsohle re lokela ho ithuta ho se ‘itšunye litabeng tse sa re ameng.’—2 Ba-Thessalonika 3:11, NW.
Na U Seithuti sa Bibele?
20, 21. Ho ithuta Bibele ka bokhothali hona joale ho tla u thusa joang ha mosebetsi o se o thibetsoe?
20 Bibele ke motheo oa matla a moea a Mokreste. E mo nea likarabo lipotsong tse ngata tsa bohlokoa le ho mo senolela bohlale ba Molimo. (2 Timothea 3:14-16) Bakreste bohle ba lumela sena, empa Bibele e nka sebaka sefe bophelong ba hao? Na u e bala kamehla le ho e lumella ho ba motataisi oa hao nthong tsohle tseo u li etsang?—Pesaleme ea 119:105.
21 Hangata ho ba thata ho sebelisa libuka tsa rōna tsa Bibele ha mosebetsi o thibetsoe. Ka linako tse ling ho be thata ho fumana le Bibele ka boeona. Maemong a joalo, moea o halalelang o tla re hopotsa lintho tseo re ithutileng tsona nakong e fetileng. Empa o ke ke oa u hopotsa lintho tseo u sa ithutang tsona! Ka baka leo, haeba u ithuta haholo hona joale, kelello ea hao le pelo li tla ba le letlotlo le lengata le bolokiloeng ho tsona leo moea o halalelang o tla u hopotsa tsona ka linako tse thata.—Mareka 13:11.
Na U-ua Rapela?
22. ‘Ho tiisetsa thapelong’ e ka ba thuso joang ha u itokisetsa tlhoriso?
22 Potso ena e bohlokoa haholo ha re nahana ka tlhoriso. Bibele e-ea eletsa: “Tiisetsang thapelong.” (Ba-Roma 12:12, TLP) Thapelo ke puisano e tobileng le Jehova Molimo. Re ka sebelisa eona ho kōpa matla a ho mamella mathata le ho etsa liqeto tse nepahetseng, le ho haha kamano ea botho le Jehova Molimo. Esita le haeba bahanyetsi ba re amoha libuka tsa rōna, Libibele, botsoalle ba rōna le Bakreste ba bang, ha ho mohla ba tla re amoha tokelo ea thapelo. Esita le chankaneng e lefifi, Mokreste a ka iteanya le Molimo. Sebelisa ka ho shoetseng tokelo ea thapelo, ke tsela e molemo ea ho itokisetsa boemo leha e le bofe bo ka re oelang holimo nakong e tlang.
Na U Tšepa Bolaoli?
23. Ke ka baka la’ng ha u hōlisa ho tšepa baholo ba khethiloeng le “mohlanka ea khabane, ea bohlale”?
23 Ho bohlokoa ho haha tšepo bolaoling. Baholo ka phuthehong ke karolo ea tokisetso ea Molimo ho re sireletsa. Baholo ba lokela ho itšoara ka tsela e tla etsa hore ba tšepjoe, ’me phutheho eohle e lokela ho ithuta ho ba tšepa. (Esaia 32:1, 2; Ba-Heberu 13:7, 17) ’Me habohlokoa haholo, re lokela ho tšepa “mohlanka ea khabane, ea bohlale.”—Mattheu 24:45-47.
24. Re ka etsa eng ho itokisetsa litlhaselo tsa mashano tsa lira tsa batho ba Jehova?
24 Lira li ka jala mashano ka mokhatlo o hlophisitsoeng oa Molimo. (1 Timothea 4:1, 2) ’Naheng e ’ngoe, Bakreste ba bang ba thetsoa hore ba lumele hore Sehlopha se Busang sa Lipaki tsa Jehova se lahlile Bokreste, ha bona ba khomaretse botšepehi ba bona. Tsela e molemo ea ho itokisetsa litlhaselo tse joalo ke ka hore re hlaolele lerato le tiileng ho baena ba rōna le ho ithuta ho tšepa tokisetso ea Jehova ea lintho.—1 Johanne 3:11.
U ka Hlōla
25. Ke eng se tla re thusa ho hlōla ha re hlorisoa?
25 Moapostola ea tsofetseng Johanne, kamor’a hore a hlorisoe o re: “Hobane hohle ho tsoetsoeng ke Molimo ho hlōla lefatše, ’me hlōlo e hlotseng lefatše ke tumelo ea rōna.” (1 Johanne 5:4) U ke ke ua hlōla ka matla a hao. Satane le lefatše la hae ba matla ho u feta. Empa ha ba matla ho feta Jehova Molimo. Ka baka leo, haeba re mamela litaelo tsa Molimo, re rapella moea oa oona ho re tšehetsa le ho itšetleha ka oona ka ho feletseng ho re nea matla a ho mamella, re tla hlōla.—Habakuke 3:13, 18; Tšenolo 15:2; 1 Ba-Korinthe 15:57.
26. Esita le haeba hona joale u sa hlorisoe, u lokela ho etsa eng?
26 Linaheng tsohle, ho na le Bakreste ba hlorisoang, e bang ke balekane ba bona ba lenyalo ba bahanyetsi kapa ka litsela tse ling. Linaheng tse ling, bahlanka ba Molimo ba hlokofatsoa ke melao ea ’muso. Empa haeba hona joale u e-s’o hanyetsoe kapa u e-s’o be le mathata a sa tloaelehang, hopola hore tsena li tla u hlahela neng le neng. Jesu o boletse hore ho hlorisoa ha Bakreste e tla ba karolo ea pontšo ea mehla ea bofelo; ka baka leo, re lokela ho e lebella. (Mattheu 24:9) Ke hobane’ng ha u sa itokisetse hona joale? Ikemisetse ho itšoara ka tsela e tla rorisa Ntat’ao oa leholimo, Jehova Molimo, ho sa tsotellehe hore ke eng se larileng ka pele.—Liproverbia 27:11.
U Arabela Joang?
◻ U ka etsa litokisetso tsa mofuta ofe bakeng sa tlhoriso hona joale?
◻ U ka etsa eng ho hōlisa matla a hlokahalang hore u tsoele pele u bolela ha u hlōrisoa?
◻ Ho sebelisa Ba-Kolosse 3:12, 13 hona joale ho tla re thusa joang ha re hlorisoa?
◻ Ke hobane’ng ha u hōlisa ho tšepa baholo ba khethiloeng le “mohlanka ea khabane, ea bohlale”?
◻ U ka ba mohlōli tlhorisong joang?