Na u Araba ka Bohale?

“Karabo e bonolo e thethefatsa bohale, empa polelo e hlabang ea bo leotsa.” Eo ke polelo ea Liproverbia 15:1.

Ha u khentšitsoe ke motho e mong, na u susumelletseha ho iphetetsa le ho ‘mo tšolela’? Hoo ho ka lebisa liphellong tse tebileng.

Motseng oa New York, ngoanana e monyenyane o ile a tla hae kamor’a khang ea popota ka tšebeletso e sa khotsofatseng moo ho rekisoang pizza ’me a bolella ntat’ae taba eo. Ntate oa hae o ile a khutlela moo ho ea buisana le mong’a lebenkele. Khang ea tsoha ’me mong’a lebenkele la pizza o ile a thunya monna eo a ba a ’molaea.

Na ho latela keletso ea maele a kaholimo ho ka be ho thusitse boemong bo kang boo? Nahana ka ketsahalo e amang Abigaile le Davida, joalokaha e ngotsoe ho 1 Samuele 25:2-35. Davida o ne a le lekhatheng la ho etsa phoso e tebileng ha a fumana tlaleho e mpe ho bahlankana ba neng ba tsoa ho Nabale, monna oa Abigaile. Mali a se nang molato a ka be a ile a tšoloha. Karabo e bonolo ea Abigaile hammoho le boikokobetso le liketso tsa hae tse mosa li ile tsa felisa bohale bo tukang malakabe ba Davida le banna ba hae.