Ho Nyarela ka Litabeng

Litholoana Tsa Bolumeli

Ho hoeba ka bolumeli ho tlisitse “tšenyeho, boitšoaro bo bobe le mefuta e meng ea ho hloka taolo likerekeng tsa rōna,” ho boletse moruti oa Kereke ea Methodist Nigeria. Daily Times ea Nigeria e tlalehile hore moruti eo o lumela hore kereke e tlatselitse keketsehong ea tlolo ea molao sechabeng sa Nigeria ka “ho kōpa chelete le ho amohela limpho tsa batlōli ba molao le matona a sechaba a etsang tsenyo.” Hape o boletse hore boitšoaro bo bobe ba baetapele ba bolumeli le litho tsa kereke bo fetotse kereke “sebaka sa bosaoana, qhekello, le liketso tse mpe tsa boitšoaro.”

Femi Abbas, moqolotsi oa litaba tsa Islame, o bontšitse hore ho eketseha ha tlōlo ea molao ho amana le bolumeli bo ratang khoebo. Ha a ngola ho National Concord ea Nigeria, o boletse hore baetapele ba lihlopha tsena ba fumana balateli ba bona ka “lipuo tse monate, tse bohlale le matla,” ’me a bolela hore “ba ipatile ka tumelo.”

Empa litholoana tse joalo li tlameha ho kotuloa haeba bolumeli bo beha hlokomelo e khōlō linthong tse bonahalang. Li paka bonnete ba boprofeta ba Bibele hore “mehleng ea qetello” batho e ne e tla ba “ba ratang leruo, . . . ba tla ba le sebopeho sa borapeli, empa e le ba latotseng matla a jona.” ‘Ba ke ke ba mamela thuto ea pholoho, empa ka baka la ho hlohlona ha litsebe tsa bona, ba tla ipokella baruti ba lumellanang le litakatso tsa bona.’ Ka lehlakoreng le leng, bolumeli ba ’nete bo tla beha tlhokomelo e khōlō litabeng tsa moea ho e-na le linthong tse bonahalang. Bo tla khothalletsa batho bao bophelo ba bona bo botle bo ba etsang baahi ba molemo le bahlanka ba tšepahalang ba Molimo.—2 Timothea 3:1-5; 4:3; Matheu 6:19-21, 33; 7:16-21.

Ho Phekola Matšoao a Lefu, E Seng Lefu ka Bolona

“Banana ba Brithani ba ka Neoa Lithibela-kemaro Ntle ho Tumello ea Batsoali,” ke kamoo sehlooho sa litaba ho The New York Times se neng se baleha kateng. Sehlooho sa senola sena: “Vouto ea ba 3 ho ba 2, ea Ntlo ea Marena e boletse hore batsoali ha ba na taolo e feletseng baneng ba bona le hore molao o lokela ho boloka bohato le maikutlo a fetohang a sechaba.” Ka baka la qeto eo, lingaka tsa Brithani li se li lumelloa ka molao ho nea banana ba ka tlase ho lilemo tse 16 lithibela-kemaro ntle ho tumello ea batsoali ba bona. Molao ona o ntšitsoeng ke Palamente la Brithani o ile oa rorisoa ke Mokha oa Basebetsi, Lekhotla la Meriana ea Brithani, le makhotla a mang a thero ea malapa.

Sepheo sa molao oo ke ho ‘laola kemaro e sa batleheng har’a bacha le ho ntšuoa ha limpa.’ Empa na katamelo e joalo bothateng bo hōlang ha se ho phekola feela “matšoao a lefu”? Na hase pontšo ea linako tsa rōna hore e be baetsi ba molao ba ntše molao oo ka tsela e sa tobang o khothalletsang “lefu” la boitšoaro bo litšila har’a bacha, o tšehetsoang ke lingaka le mekhatlo ea kahisano naheng e ithorisang ka lineano tsa Bokreste?

Tsela e molemohali ea ho sireletsa banana hore ba se bonahatse “matšoao” a likemaro tse sa batleheng le ho ntšuoa ha limpa ke ho ba ruta melemo ea boitšoaro e tla ba sireletsa boitšoarong bo litšila. Letlotlo le lekiloeng la melemo e joalo ke Bibele, le bontša ba tlamehang ho fana ka pheko ea “lefu” lena—batsoali ba ikarabellang ka boitšoaro ba bana ba bona.—Baefese 5:5; 6:1-4.

Bophelo Pele ho Tsoalo

“Le pele re nahana, likutlo tsa lesea le e-s’o tsoaloe li qala ho iponahatsa; ’me le pele haholo ho lumeloa sena, libōpeho le matla a boko li qala ho hōla.” Ho behile bangoli ba bukana Life Before Birth, e hatisitsoeng ka 1984 Repaboliking e Kopaneng ea Jeremane ke Letona la Kopano ea Bacha, Lelapa le Bophelo. Ba bua ka lesea le e-s’o tsoaloe e le bophelo “qalehong ea bona e nyenyane haholo,” ba bua ka “likamano tsa pele tsa ngoana le batsoali ba hae tse bōpehang ka pōpelong.” Ba bolela hore le hoja bahlalefi ba bangata ba ne ba lumela hore lesea le es’o tsoaloe le feta boemong ba ho iphetola, ho hōla ho tloha seleng e le ’ngoe ho fihlela e e-ba hlapi le ho phela metsing pele le fetoha motho, thuto ena e qheletsoe hōle kahobane “bohlalefi bo hatela pele.” Ba bolela hore ‘ha ho sa le ba tsekang taba ea hore bophelo bo e-s’o tsoaloe hase bophelo ba motho. Motho ha a fetohe motho ka lekhetlo la pele ha a tsoaloa.’

Litšibollo tsena li lumellana le kamoo ’Mōpi a talimang lesea le e-s’o tsoaloe kateng—ke sepheli se felletseng. Mohlanka oa Molimo Davida ha a bua ka ’Mōpi oa hae o ngolile: “U ntohile popelong ea ’mè. Ke u boka ka baka la mohlolo oa pōpeho ea ka . . . mahlo a hao a bone moloho oa tsona; matsatsi a ka a ngoliloe kaofela hammoho bukeng ea hao.”—Pesaleme ea 139:12, 13, 14, 16.