Ho Nyarela ka Litabeng

AIDS—E Lefisa ha Boima

Litsi tsa Taolo ea Mafu U.S. li lekanyetsa hore tefo ea sepetlele ka letsatsi bakeng sa bakuli ba AIDS ke R1 660—e pheta habeli tefo ea bakuli ba bang. Litsebi li lekanyetsa hore tefo e feletseng ea ho phekola mokuli a le mong oa AIDS e ka ba R200 000. Chelete ena hammoho le bakuli ba bangata ba AIDS li khathatsa sepetlele le mafapha a tšireletso ea bophelo.

Mokhatlo oa Sepetlele oa Amerika o bitsa ho ngatafala ha AIDS “bomo e chehiloeng” bakeng sa Iipetlele tsa sechaba, hobane kapelenyana litefo Ii tla fihla ho liranta tse likete tse millione ka selemo. Motsamaisi e mong oa tšireletso ea bophelo o elelitse: “Ke talima sena e le kotsi e mpe ka ho fetisisa ea bophelo le khoebo ea tšireletso ea bophelo eo naha e kileng ea thulana le eona.” Ke mang ea tla lefa chelete ena e boima?

Bakuli ba bangata ba AIDS ke basodoma le makhoba a lithethefatsi, ka baka la boitšoaro ba bona bo sa tsotelleng. Empa ha se bona ba tla lefa litšenyehelo tsena. Ho e-na le hoo, ’muso le bahlokomeli ba mekhatlo ea tšireletso ea bophelo ba bolela hore batho ba lefang tšireletso le lekhetho ba tla qobelloa ho lefa makhetho a boima. Ho ekelletsa moo, “thuto, tšireletso ea sechaba le chelete ea sechaba li kotsing,” ho hlokometse New York Post.

Nakong e fetileng, bakuli ba AIDS ba kenoeng ke lefu ka baka la boitšoaro ba bona, ho ka etsahala hore ba ne ba soma boitšoaro bo hloekileng ba Bibele ka sepheo sa ho khotsofatsa takatso ea bona e mpe. Empa ba ka be ba phemme bohloko bo bongata le ho jarisa ba bang boima ba litefo ha feela ba ne ba phemme tsela e joalo ea bophelo! Leha ho le joalo, nako e sa le teng ea hore leha e le mang ea etsang tse joalo a retelehele litekanyetsong tsa boitšoaro tse bululetsoeng tsa Bibele tse fanoeng ke ‘Ea u rutang se u tšoanelang, Ea u tsamaisang ka tsela eo u tšoanetseng ho tsamaea ka eona.’—Esaia 48:17.

Khotso le Tšireletseho—Na li Haufi?

Mongolo o tsejoang haholo o ngoliloeng leboteng le mabapa le mohaho oa Machaba a Kopaneng o baleha tjena: “Ba tla tea liphehla tsa bona tsa ntoa mehoma, le marumo a bona ba a tee lisekele; sechaba se seng ha se sa tla hlola se futuhela sechaba se seng ka lerumo, ha ba sa tla hlola ba ithuta ho loana.” Machaba a Kopaneng, a tšepang ho phethahatsa mantsoe ana a boprofeta, a entse khoeletso ea hore 1986 ke “Selemo sa Machaba sa Khotso.” Na Machaba a Kopaneng a na le lebaka la ho lumela hore a tla atleha sepheong sa oona sa ho boloka “khotso le tšireletseho tsa machaba?”

Ho sa tsotellehe hore na Machaba a Kopaneng a tlatsetsa hakae mohoong oa “khotso le tšireletseho,” khotso leha e le efe e entsoeng ke batho e theiloe motheong o senyehang. (1 Ba-Thessalonika 5:3) Ho hakanngoa hore chelete ea sesole e se e tla ba lidolara tse trillione ka selemo lefatšeng lohle. Ho tloha Ntoeng ea II ea Lefatše, chelete e sebelisetsoang lihlomo tsa nuclear, e seng tse tloaelehileng, e lekanyetsoa ho lidolara tse litriollione tse tharo ho ea ho tse ’nè—taba e joalo ha ea lebelloa ha e le moo Machaba a Kopaneng a etsa khoeletso ea khotso le tšireletseho! Ha e le hantle, Vernon Walters, lenģosa la U.S. Machabeng a Kopaneng, o boletse hore “Machaba a Kopaneng a suthetse hōle le karolo ea oona ea ho rarolla khohlano,” ’me sena se bolaile litebello tsa ba neng ba lumela hore “Machaba a Kopaneng a tla etsa ho eketsehileng tharollong ea khohlano.”

Empa leha ho le joalo, mantsoe a qotsitsoeng pelenyana ho Esaia 2:4 a tla phethahatsoa—empa e seng ka 1986, kapa leha e le hore a tla phethahatsoa ke mokhatlo oa batho. Ho e-na le hoo, hautšoane khotso le tšireletseho tsa sebele li tla tlisoa ke ’muso oa leholimo, ’me moetapele oa oona ea sa bonahaleng ke “Morena oa khotso” ka sebele.—Esaia 9:6, 7.

Ho Iphetetsa ka Lihlomo tsa Nuclear—Na ke Phetetso ea Molimo?

Na ho sebelisoa ha lihlomo tsa nuclear ho lōkafatsa ho iphetetsa tlhaselong ea lihlomo tsa nuclear? E, ho lumetse Free Church ea Scotland khatisong ea morao ea makasine oa kereke, The Monthly Record. Sehlooho sa eona se boletse hore boiphetetso bo joalo e tla ba bopaki bo feletseng ba “phetetso e lokileng ea bohale ba Molimo” ka baka la “taelo ea Molimo ea ho halefela ba khopo.” Record e bolela hore bopaki boo bo akarelletsa khoeletso ea hore kahlolo ea Molimo e tla ba holimo ho “sechaba . . . se hlaselang pele ntoeng ea nuclear.”

Ke ’nete hore ho tla tla “letsatsi la liphetetso tsa Molimo oa rōna.” (Esaia 61:1, 2) Empa phetetso ea Molimo lichabeng tse bokeletseng lihlomo tsa ntoa e tla bonahatsoa ka nako e ratoang ke oona le ka tsela e khethoang ke oona. Ho ena le bohale ba lichaba tsa lefatše, ‘bohale ba oona’ ke bona bo tla “senya ba senyang lefatše.” Joang? Ka ho romela “Morena oa marena,” Jesu Kreste, ‘ho tla ahlola le ho loana ka ho loka.’ ’Muso oa hae oa maholimo o “tla robaka o felise mebuso eo kaofela.”—Tšenolo 11:18; 19:11-21; Daniele 2:44.