Ho Nyarela ka Litabeng
Tokelo ea ho Etsa Qeto
Na litokelo tsa lelapa li qhelela thōko maikutlo a bolumeli ao motho a kholisehileng ka oona? Che, ho boletse lekhotla la molao la setereke la Ōita, Japane. Motho e moholo ha a “etse letho le hanoang ke molao ha a hana litšelo tsa mali ka baka la tumelo ea hae,” ho boletse lekhotla.
Monna ea neng a ameha nyeoeng o ne a tsoile seso lesapong la serope leotong le letšehali, ’me o ne a lokela ho khaoloa leoto kaofela. O ile a lumela hore a buuoe, haeba feela ba ke ke ba sebelisa mali. Sepetlele sa hana ho mo buoa se sa sebelise mali. Batsoali ba monna eo ea lilemo li 34 eo e leng Paki ea Jehova ba ne ba tšohile hore mora oa bona ea ba hlokometseng botsofaling ba bona o tla shoa, eaba ba isa taba khotla ba bolela hore ba na le tokelo ea botsoali. Le hoja lekhotla le ne le hlonepha tokelo ea bona ea “ho phela ka thabo e le lelapa le ho lebella tšehetso le tlhokomelo ea mora oa bona nakong e tlang,” la latola hore “‘litokelo tsa lelapa’ ha li qhelele thōko maikutlo a bolumeli” a motho e mong. (Khabareng, o ile a buuoa ka katleho ntle ho mali.)
Ke taba ea bohlokoa hore Mokreste a hlokomele batsoali ba hae le ‘ho sebelisa boineelo ba bomolimo ho ba ntlo ea hae,’ empa leha ho le joalo seo se tlameha ho etsoa tumellanong le litaelo tsa Mangolo. (1 Timothea 5:4, 8, NW) Joaloka ha ho sa nepahala hore motho a utsoe e le hore feela a hlokomele lelapa la hae, ka hona ha hoa nepahala mahlong a Molimo hore motho a hlokomele lelapa la hae ka hore a hlokomolohe melao ea Oona e mabapi le ho halalela ha mali. Mangolo a re khothalletsa “ho tela . . . mali.”(Liketso 15:20, 28, 29; bapisa Levitike 17:10-12.) Mabakeng a joalo batho ba tšabang Molimo ba tla ‘utloa Molimo e le ’musi ho feta batho.’—Liketso 5:29, NW.
Mekhoa e Meng e Fokolang
Keketseho e tšosang ea bacha ba emarelang matšeo e qobella mebuso ea United States ho hlahlobisisa bothata bona. Ka mohlala, ’muso o mong o ntšitse molao o tlamang batsoali “ho lefella litšenyehelo tsohle” haeba mora kapa morali oa bona ea ka tlase ho lilemo tse 18 a fetoha motsoali. O tšepa hore mohato ona o tla khothalletsa batsoali ba bacha ho natsa haholoanyane thibelo ea kemaro li sa tloha. Leha ho le joalo, mebuso e meng e lumela hore molao oo o tla khothalletsa bacha ho ntša limpa. E buella thupelo litabeng tsa botona kapa botšehali e lefelloang ke ’muso le lithibela-kemaro bakeng sa bacha ba kopanelang liphate.
Mehato eo e mpa feela e le mekhoa e meng e fokolang. Hobane’ng? Hobane ha e felise sesosa, e leng, ho kopanela liphate pele ho lenyalo. Setsebi se seng litabeng tsa likemaro tsa bacha se itse: “Mahlong a lithaka, ho bohlokoa haholo hore bana ba kopanele liphate. Ha ho ea batlang ho ba moroetsana.” (Makasine oa Time) Ho hana ho sebelisa Bibele ke sesosa se seholo sa “boikutlo ba bolokolohi,” ho boletse Emory Davis thutong ea hae Univesithing ea Rutgers.
Tharollo ke eng? Mangolo a bea litaba ka ho hlaka: Lentsoe la Molimo le hanela batho ba sa nyalanang ho kopanela likobo. Bafebi ha “ba ka ke ba rua lefa la ’muso oa Molimo,” ho bolela 1 Ba-Korinthe 6:9. Batsoali ba lokela ho jala litaba tsena lipelong tsa bana ba bona. (Deuteronoma 6:6, 7) Lebaka? Morena Salomone ea bohlale o itse: “Ruta mohlankana tsela eo a tšoanetseng ho e tsamaea; le mohla a tsofalang, a ke ke a e kheloha.”—Liproverbia 22:6.
Litho tsa Chache
“Hoa soabisa ka sebele!” ho boletse Robert Runcie, mobishopo e moholo oa Kereke ea Engelane, mabapi le litlhahlobo tse neng li entsoe ka litho tsa kereke, peho ea litlhahlobo tseo e ne e hatisitsoe morao tjena ho Rural Anglicanism. Lebaka? Kahobane lenane la litho tsa baruti le theiloe ho tloha ho 17,5 lekholong ka 1950 ho ea ho 7,4 lekholong ka 1980. Tlhahlobo eo e bontša “boemo bo se nang tšepo,” ho boletse The Times ea London, e mpa e bontša tšekamelo e ’nileng ea e-ba teng maemong a boruti.
Lebaka le leng le leholo le fanoeng ka ho fokotseha hona ha litho tsa Chache ke ho ikarola ha bacha kerekeng. Mananeo a ho thabela botsoalle a etselitsoeng bacha a ka ’na a fetola tšekamelo ena, kamoo ho boletseng peho. Empa, moapostola Pauluse o boletse haholo ka karolo ea moea bophelong ba motho. A khothalletsa mohlankana Timothea ‘ho hahamalla ho lōka, tumelo,’ le “boineelo ba bomolimo.”—2 Timothea 2:22; 1 Timothea 4:7, 8.