Tšobotsi e Ncha ea Bohlale ba Bomolimo
“EABA Molimo o re ho Moshe: ‘KE TLA IPAKA HO BA SEO KE TLA IPAKA HO BA SONA.’ ’Me a phaella: ‘Seo u tla se bua ho bana ba Iseraele ke sena, “KE TLA IPAKA HO BA o nthomile ho lōna.”’” (Exoda 3:14, NW) Jehova o ile a hlalosetsa Moshe hore le pele ho mona le bahlanka ba Hae ha baa ka ba utloisisa bohlokoa bo feletseng ba lebitso la Hae. Ke Molimo oa morero ’me kamehla o phethahatsa thato ea oona. Ha maemo a ho hloka, o ka fetola mokhoa oona ho finyella morero oa oona. O bohlale bo joalo!
Satane ka boeena ha a ka a ananela seo lebitso la Molimo le se bolelang. E ka ’na eaba o ne a tseba ka sefate sa bophelo tšimong ea Edene. Haeba o ne o isitse Adama le Eva ho sona, hoo ho ne ho ka ’na ha bonahala ho ka bea Jehova tsietsing: hore na o tla boloka lentsoe la hae la hore sebe se ne se tla bolela ho shoa ha bona kapa ho boloka lentsoe la hae ka sefate sa bophelo. (Genese 2:9; 3:1-6) Leha ho le joalo, Satane o ne a tla soetseha.
Joale Molimo oa qala ho bontša bohlale bo neng bo sa lebelloa ke bara ba oona ba moea bo sa kang ba senoleloa bona pele. (Bapisa Ba-Efese 3:10.) A qala ho hlahisa letoto la lipolelo le liketsahalo tseo kamor’a nako e telele li neng li tla bontša ka ho babatsehang bohlale ba oona bo boholo le matla a oona bakeng sa ho phethahatsa morero oa oona o sa feleng, oo e neng e le hore lefatše le tlale ka batho ba thabileng le ba tšepahalang ba neng ba ka phela ka ho sa feleng Paradeiseng. (Genese 1:27, 28) Nako le nako Molimo o ne o tla thibela boiteko ba Satane ba ho sitisa.
Lekunutu le Halalelang lea Senoleha
Hang-hang kamor’a bofetoheli ba pele, Molimo oa nka bohato. Oa lulisa lekhotla kapele-pele bakeng sa banyalani ba molato ’me oa ba ahlolela lefu ka lebaka la ho se utloe. Ho thoe’ng ka ho ja ha Adama le Eva tholoana ea sefate sa bophelo? “Eaba Jehova Molimo o re: Bonang, motho o fetohile a be joale ka e mong oa rōna, o tseba botle le bobe; ’me joale, a se ke a isa letsoho la hae, a nka le litholoana tsa sefate sa bophelo, a li ja, ’me a phela ka mehla. Jehova Molimo a mo leleka tšimong ea Edene.”—Genese 3:17-23.
Nakong ena Molimo o boetse oa nka mosebetsi oa Moevangeli, kapa ’Moleli oa litaba tse molemo. Oa bolela boprofeta ba pele: “Eaba Jehova Molimo o re ho noha: . . . Ke tla bea hloeano mahareng a hao le mosali, le mahareng a peō ea hao le peō ea hae; peo eo e tla u khoba hloho, ’me u tla e lōma serethe.” (Genese 3:14, 15) Makholo a lilemo hamorao moapostola Pauluse o ile a hlalosa: “Ka ha libōpuoa li beiloe pusong ea bosaoana, e seng ka ho rata ha tsona, empa e le ka baka la ea li beileng tlas’a eona, li ntse li e-na le hoo li ka ho tšepang.”—Ba-Roma 8:20, Testamente e Ncha, 1948.
E, kamorao ho moo motho o ne a tla tlamelloa ka ho se nang thuso lefung leo a le futsitseng ho Adama, empa Molimo o ne o phatlalatsa morero oa oona oa ho pholosa bana ba utloang ba Adama. Empa, ‘motheo oa tšepo’ eo e ne e le ofe? O ne o ka pholosa batho joang ’me oa ’na oa tšoarella kahlolong ea oona ea lefu ka lebaka la sebe? Hona e ne e tla ba bohlale bo patiloeng ba Molimo; ho ne ho akarelletsa “sephiri [se halalelang] se ’nileng sa patoa mehleng eohle le melokong eohle.” (Ba-Kolosse 1:26; 1 Ba-Korinthe 2:7, 8) Le hoja batho ba tšepahalang ba khale ba sa ka ba utloisisa sephiri seo, ba ne ba e-na le tšepo ea hore ka tsela e ’ngoe Molimo o ne o tla ba pholosa. Le mangeloi a ne a thahasella ho ithuta kamoo Jehova a neng a tla phethahatsa morero oa hae! (1 Petrose 1:10-12) Na u utloisisa sephiri see se halalelang?
Ba Lopolotsoe ka Topollo
Butle-butle ka makholo-kholo a lilemo, Jehova o ile a eketsa boitsebiso tšepisong ea hae ea pele. O ile a tšepisa Abrahama ea tšepahalang peō eo ka eona mahlohonolo a neng a tla tlela batho bohle ba utloang. (Genese 22:15-18) O ile a senola ka Jakobo hore peō eo e ne e tla ba morena ea tsoang lelokong la Juda. (Genese 49:10) Nakong ena batho ba Molimo ba ne ba lumela tsohong ea bafu, le hoja ba ne ba sa utloisise ka botlalo hore na e tla etsahala joang. (Jobo 14:14, 15; Ba-Heberu 11:19) Qetellong, Molimo oa tšepisa Davida hore Morena ea tlang, kapa Messia, e ne e tla ba setloholo sa Davida ’me o ne a tla busa ka ho sa feleng.—2 Samuele 7:16.
Baprofeta bohle ba ile ba eketsa makumane a kutloisiso sephiring se halalelang, empa batho ba ne ba ke ke ba utloisisa ka ho feletseng. Qetellong, nako ea ho hlaha ha Messia ea fihla, ’me joale, qetellong, bohlale bona bo ekelitsoeng ka mokhoa o moholo ba Molimo ba hlaka haholoanyane. Bo ne bo likoloha ho Jesu Kreste le tokisetso ea bophelo ba hae ba botho bo phethahetseng e le topollo e lekanang bakeng sa batho. Ka hoo e le motheo, morero oohle o khanyang oa Jehova ka ’Muso o ne o tla tsoela pele. Na u utloisisa topollo?
Ho Ba-Roma, likhaolo ea 5 le ea 6, Pauluse o e hlalosa hantle. Ho Ba-Roma 5:12 o hlalosa sebe sa rōna seo re se futsitseng le lefu. O tsoela pele ho bontša kamoo phello ea sebe se le seng feela se entsoeng ke Adama ea phethahetseng le ea ho lahlela bana ba hae bophelo e neng e ka lokisoa ka bophelo ba motho e mong ea phethahetseng. Boo bo ipakile e le bophelo ba “Jesu Kreste motho.” (Litemana 15-21; bona le 1 Timothea 2:5, 6.) Ke ka baka la’ng ha Jesu a ne a ka fana ka topollo ee? Kaha e ne e le Mora oa Molimo, Jesu o ne a ‘halalela, a se na molato, a se na letheba a le ka hosele ho baetsalibe.’ (Ba-Heberu 7:26; Luka 1:32, 33) Ha ho hlokahale hore re leke ho hlalosisa liphatsa tsa lefutso tsa tsoalo ea Jesu. Lengeloi Gabriele le ile la tiisetsa ’mè oa Jesu, Maria, le rōna, hore ha ho letho le ka sitang Molimo. (Luka 1:37) Kahoo Jesu, le hoja a tsoetsoe ke motho ea motšehali ea tsoang ho Adama, e ne e le Mora oa Molimo—ha e le hantle motho ea phethahetseng. Mali a hae, kapa bophelo ba hae, e ne e le ba bohlokoa ho feta mali a liphoofolo tse se nang palo tse neng li entsoe sehlabelo ke baprista ba Aarone ba Iseraele tempeleng Jerusalema. E ne e le “Konyana ea Molimo e tlosang libe tsa lefatše.”—Johanne 1:29; 3:16.
Na Molimo o ne o ka etsa tokisetso ee ka Jesu eaba o ntse o lokile? Haeba Molimo o tsoselitse Mora oa oona bophelong ka letsatsi la boraro, ho etsahetse’ng ka topollo? Pauluse o re tiisetsa hore Molimo o lokile. Mamela ha a bea mabaka: “Ba mpa ba beoa ba lokileng ke mohau oa oona feela [hobane ke mpho], ka topollo e leng ho Jesu Kreste; eo Molimo o ’meileng e sa le pele hore e be pheko ho ba lumelang maling a hae, o tle o bonahatse ho loka (hobane ka ho mamella ha oona, Molimo o ile oa tlolisa libe tsa pele tsa batho mahlo) ha oona, kamoo Molimo o nong o lesitse libe tsa pele mehleng ea boiphapanyo ba oona. E bile hore o bonahatse ho loka ha oona mehleng ea joale, hore e tle e be o lokileng le o beang ea nang le tumelo ho Jesu ea lokileng.” (Ba-Roma 3:24-26) Joale, hoo ho bolela eng? Hore feela Jesu, e le motho ea phethahetseng oa nama le mali, o hlile a shoa e le motho ’me nameng o shoele ka ho sa feleng. O shoele “hang bakeng sa nako eohle ha a iketsa sehlabelo.” (Ba-Heberu 7:27, NW) Kahoo topollo e tiisitsoe. Jesu o shoele nameng; ka letsatsi la boraro “o phelisitsoe ka nģeng ea moea.”—1 Petrose 3:18.
Selekane se Secha le Pōpo e Ncha
Joale re bona karolo e ka sehloohong ea sephiri se halalelang. Ho tšepahala ha Jesu ho isa lefung ho mo tšoanelehisa ho ba Moprista ea Phahameng le Morena oa Jehova. Ka mali a hae a tšolohileng o tiisa selekane se secha. Selekane sena se secha se lokela ho hlahisa metsoalle ea leholimo e tlang ho busa le Jesu e le marena le baprista. (Tšenolo 5:9, 10; 20:4, 6) E etsa sechaba se secha, “’mōpuoa e mocha,” ’me ka sebele hoo ke ntho e ’ngoe!—Ba-Galata 6:15, 16.
Nahana: Molimo ka Kreste Jesu o khetha palo ea baemeli har’a batho, banna le basali. Ka molao a ka ba bolela ba lokile ’me a ba bitsa ho ba bara ba moea. Ka nako e loketseng ea Molimo kamor’a lefu la bona, o ba tsosetsa ho ea leholimong ’me o ba fa ho se shoe, feela joalokaha Molimo o putsitse Jesu. (1 Petrose 1:3, 4) O tšepa “’mōpuoa e mocha” oa oona le botšepehi ba hae ho oona hakaakang! Ke karabelo e ntle hakaakang ho ea ba qositseng ka bohata ka pel’a Jehova! (Tšenolo 12:10) Le hoja bona le Jesu Kreste ba ke ke ba e-shoa, ha ho mohla ba tla hloka botšepehi ho Jehova. Empa hoo hase phetho.
Lefatše la Paradeise
Kreste Jesu, le metsoalle ea hae ea marena a leholimo le baprista, ba tla bona hore morero oa Jehova bakeng sa motho le lefatše o phethoa ka botlalo nakong ea Puso ea hae ea Lilemo tse Sekete. Ha Jesu a sebelisa melemo ea sehlabelo sa hae, o tla tsosa bafu le baphonyohi ba bofelo ba tsamaiso ena e khopo ba tla etsoa ba phethahetseng. Ka nako e tšoanang, lefatše le tla etsoa paradeise. Bohle ba tla hana boiteko ba ho qetela ba Satane ba ho ba senya ka nako eo ba tla fuoa bophelo ba botho bo phethahetseng ka ho sa feleng. Satane le letšoele lohle la hae le khopo ba tla felisoa ka ho sa feleng. Khotso le bonngoe li tla rena pōpong eohle, li tumisa borena ba Jehova ka botlalo le puso ea hae ka lerato. Mangeloi le batho ba tla be ba bontšitse lerato le tšepahalang ho ’Mōpi oa bona le Molimo oa bona.—Tšenolo, khaolo ea 20.
Joale re ka utloisisa sephiri se halalelang hamolemo. Joale re bona bohlale ba Jehova bo fetang le boqapi ba hae ba pōpo lefatšeng la limela le liphoofolo. Re na le lebaka le letle la hore: “A boliba ba monono, le ba bohlale, le ba tsebo ea Molimo! Likahlolo tsa oona ha li hlalohanngoe hakakang! . . . Hobane ntho tsohle li tsoa ho eena, li eme ka eena, ’me li etsetsoa eena. Ho eena e be khanya ka ho sa feleng. Amen!”—Ba-Roma 11:33-36.
[Setšoantšo se leqepheng la 7]
Phello ea sebe se le seng ka Adama ea phethahetseng le ho lahleheloa ke bophelo ha hae e ka lokisoa. Joang? Ka bophelo ba motho e mong ea phethahetseng, ba Jesu