Ke Hobane’ng ha re Lokela ho Tšaba Molimo, Eseng Batho?
“HO TSǍBA batho ho isa sefing; empa ea tšepang Jehova o beiloe phahameng.” (Liproverbia 29:25) Ka mantsoe ana maele a boholo-holo a re lemosa ka mofuta oa tšabo oo ka sebele e leng chefu ea kelello—ho tšaba batho. Ho tšoantšoa le sefi. Hobane’ng? Hobane phoofotsoana, e kang pela, e sitoa ho ithusa ha e tšoasitsoe ke sefi. E batla ho baleha, empa sefi se lula se e tšoasitse. Ha e le hantle, phoofotsoana eo e robeha litho.
Haeba re tšoasitsoe ke ho tšaba batho, re tšoana le pela eo. Re ka ’na ra tseba seo re lokelang ho se etsa. Re ka ’na ra batla le ho se etsa. Empa tšabo e re kenya botlamuoeng. Re robeha litho ’me re sitoa ho nka khato.
Sefi sa ho Tšaba Batho
Nahana ka mehlala e meng ea mehleng ea Bibele ea ba ileng ba tšoasoa ke sefi sa tšabo. Mehleng ea Joshua, banna ba 12 ba ile ba romeloa ho ea hloela lefatše la Kanana pele ho phutuho eo Baiseraele ba neng ba e rerile. Lihloela li ile tsa khutla ’me tsa tlaleha hore lefatše leo le nonne ’me le ruile, feela joalokaha Molimo o ne o boletse. Empa lihloela tse leshome li ne li tšositsoe haholo ke matla a baahi ba lona. Ka hona, li tšoasitsoe ke ho tšaba batho, li ile tsa fa Baiseraele tlaleho e fetellelitsoeng ka matla ana ’me tsa etsa hore sechaba sohle se tšoasoe ke tšabo. Baiseraele ba ile ba hana ho mamela taelo ea Molimo ea ho kena Kanana le ho ikhapela lefatše leo. Ka baka leo, nakong ea lilemo tse 40 tse latelang, moloko oohle oa batho ba batona ba baholo oa nako eo, haese ba seng bakae bao e neng e le mekhelo, o ile oa shoella lefeelleng.—Numere 13:21–14:38.
Jonase ke e mong oa ba neng ba tšaba batho. Ha a ne a abetsoe ho ea bolela motseng o moholo oa Ninive, o ile “a tloha ho balehela Tarshishe, hole le sefahleho sa Jehova.” (Jonase 1:3) Hobane’ng? Baninive ba ne ba tumme ka hore ke batho ba khopo le ba mabifi, ’me ha ho pelaelo hore Jonase o ne a tseba seo. Ho tšaba batho ho ile ha etsa hore a balehe ka tsela e ’ngoe e sa eeng Ninive. Ke ’nete, qetellong o ile a amohela kabelo ea hae empa e bile feela ka mor’a hore a amohele taeo e sa tloaelehang e tsoang ho Jehova.—Jonase 1:4, 17.
Esita le marena a ka ’na a tšaba batho. Ka lekhetlo le leng, Morena Saule ka ho toba o ile a hlompholla taelo e hlakileng e tsoang ho Molimo. Boikemelo ba hae e bile bofe? “Ke sitiloe, hobane ke tlōtse molomo oa Jehova le taba tsa hao; empa ke ne ke tšaba sechaba.” (1 Samuele 15:24) Makholo a lilemo hamorao, ha Jerusalema e ne e hlasetsoe ke Bababylona, Jeremia, moprofeta ea tšepahalang, o ile a eletsa Morena Tsedekia hore a inehele ’me ka hona a pholose Jerusalema tšollong e ngata ea mali. Empa Tsedekia o ile a hana. Hobane’ng? O ile a bolella Jeremia: “Ke mpa ke tšabana le ba-Jode ba ineetseng ba-Kalde, e se re ka neeloa matsohong a bona, ba bapala ka ’na.”—Jeremia 38:19.
Qetellong, esita le moapostola o ne a ka tšaba. Letsatsing leo Jesu a neng a tla shoa ka lona, o ile a lemosa balateli ba hae hore kaofela ba ne ba tla mo furalla. Leha ho le joalo, ka sebete Petrose o ile a bolela: “Morena, ke itokisitse ho ea le uena teronkong, leha e le lefung.” (Luka 22:33; Mattheu 26:31, 33) Mantsoe ao a ile a ipaka a fosahetse hakaakang! Lihora tse seng kae feela hamorao, ka tšabo Petrose o ile a latola hore o ne a e-na le Jesu kapa hona hore oa mo tseba. O ile a hlōloa ke ho tšaba batho! E, ka sebele ho tšaba batho ke chefu ea kelello.
Ke Mang eo re Lokelang ho mo Tšaba?
Re ka hlōla tšabo ea batho joang? Ka hore sebakeng sa eona ho kene tšabo e nepahetseng ka ho fetisisa. Mofuta ona oa tšabo o ile oa khothalletsoa ke eena moapostola Petrose, ha a ne a re: “Tšabang Molimo.” (1 Petrose 2:17) Lengeloi le ileng la bonoa ke Johanne ho Tšenolo le ile la ntša mohoo o eang ho batho: “Tšabang Molimo, isang khanya ho oona.” (Tšenolo 14:7) Morena ea bohlale Salomone le eena o ile a khothalletsa tšabo e joalo, ha a ne a re: “Bofello ba taba tseo kaofela ke jona: Tšaba Molimo, u boloke litaelo tsa oona, hobane, ke eona tšoanelo eohle ea motho.” (Moeklesia 12:13) E, ho tšaba Molimo ke tlamo.
Ho tšaba Molimo ho tlisa melemo. Mopesaleme oa boholo-holo o ile a bina: “Ruri, poloko ea [Jehova] e haufi le ba [mo] tšabang.” (Pesaleme ea 85:9) Maele a Bibele a boetse aa hatisa: “Ho tšaba Jehova ho atisa litšiu.” (Liproverbia 10:27) E, ho tšaba Jehova ke ntho e nepahetseng, e molemo. U ka ’na ua re, ‘Empa ka sebele, Jehova ke Molimo o lerato. Ke hobane’ng ha re lokela ho tšaba Molimo o lerato?’
Na re Lokela ho Tšaba Molimo o Lerato?
Hobane tšabo ea Molimo hase tšabo e hlokisang tšepo, e tepelletsang, e tšoarang batho maemong a itseng. Ke mofuta oa tšabo oo ngoana a ka ikutloang a e-na le ’ona ho ntat’ae, le hoja a rata ntat’ae ’me a tseba hore le ntat’ae oa mo rata.
Ka sebele ho tšaba Molimo ke tlhompho e tebileng bakeng sa ’Mōpi e hlahisoang ke ho hlokomela hore eena ka ho felletseng o na le ho loka, toka, bohlale, le lerato. E akarelletsa tšabo e nepahetseng ea ho halefisa Molimo hobane ke Moahloli ea Phahameng ea nang le matla a ho putsa le a ho otla. Moapostola Pauluse o ngotse: “Ke ntho e tšabehang ho oela matsohong a Molimo o phelang.” (Ba-Heberu 10:31) Lerato la Molimo hase ntho e lokelang ho nkoa habobebe, kapa hona hore kahlolo ea oona e lokela ho khelloa fatše. Ke ka lebaka leo Bibele e re hopotsang: “Qalo ea bohlale ke ho tšaba Jehova.”—Liproverbia 9:10.
Leha ho le joalo, re lokela ho hopola hore le hoja Jehova a e-na le matla a ho otla ba sa mo mameleng—’me hangata a ’nile a ho etsa—ha aa nyoreloa mali ’me ha a sehlōhō ka tsela leha e le efe. Ka sebele ke Molimo o lerato, joaloka motsoali ea lerato, ka linako tse ling ka nepo oa halefa. (1 Johanne 4:8) Ke ka baka leo ho loketseng hore re o tšabe. Hoo ho etsa hore re mamele melao ea oona, e entsoeng molemong oa rōna. Ho mamela melao ea Molimo ho tlisa thabo, ’me ka mehla ho se e mamele ho tlisa liphello tse mpe. (Ba-Galata 6:7, 8) Mopesaleme o ile a bululeloa ho bolela: “Tšabang Jehova, lōna bakhethoa ba hae, hobane ha ho letho le hlokoang ke ba mo tšabang.”—Pesaleme ea 34:9.
Ke Mang eo u mo Tšabang?
Ho tšaba Molimo ho re thusa joang ho hlōla ho tšaba batho? Batho ba ka ’na ba re soma kapa ba ba ba re hlorisetsa ho etsa se nepahetseng, e leng ho re tlisetsang khatello. Empa tšabo e hlomphehang ea Molimo e tla re hatella ho khomarela tsela e nepahetseng, kaha ha re batle ho o halefisa. Ho feta moo, lerato la Molimo le tla re susumelletsa ho etsa se thabisang pelo ea oona. Ho phaella moo, rea hopola hore Molimo o re putsa ka ho enneng ha re etsa se nepahetseng, e leng ho etsang hore re ’ne re tsoele pele ho o rata ’me ho etsa hore re batle ho etsa thato ea oona. Kahoo, ho talima Molimo ka tsela e leka-lekaneng ho re thusa ho hlōla tšabo leha e le efe ea batho eo re ka ’nang ra ba le eona.
Ka mohlala, ba bangata ba hatelloa ho etsa se fosahetseng ka baka la ho tšaba hore na metsoalle ea bona e nahana eng. Bacha ba ka ’na ba tsuba sekolong, ba sebelisa puo e mpe, ba ithorisa ka phihlelo ea botona le botšehali (ea sebele kapa e inahaneloang), kapa ba ba ba leka joala kapa lithethefatsi. Hobane’ng? Hase hobane ka mehla ba batla ho etsa joalo, empa hobane ba tšaba seo metsoalle ea bona e tla se bua haeba ba itšoara ka ho fapaneng. Ho mocha, ho songoa le ho tlokoa ho ka ’na ha e-ba thata ho mamelleha joaloka mahloriso a sebele.
Motho ea hōlileng le eena a ka ’na a utloa khatello ea ho etsa se fosahetseng. Mohlomong mookameli mosebetsing o bolella mohiruoa hore a fetelletse sekoloto sa moreki kapa hore a tlatse foromo ea lekhetho ea k’hamphani ka bolotsana e le hore a fokotse sekoloto sa lekhetho. Mokreste a ka ’na a ikutloa hore haeba a sa mamele, o tla lahleheloa ke mosebetsi oa hae. Ka hona, ho tšaba batho ho ka ’na ha mo hatella hore a etse se fosahetseng.
Mabakeng ao ka bobeli, tšabo e nepahetseng ea Molimo le ho hlompha melao ea oona li ne li ka thibela Mokreste ho tepelletsoa ke ho tšaba batho. ’Me lerato la Molimo le ne le tla mo thibela ho kenella liketsong tseo Molimo o li hanetseng. (Liproverbia 8:13) Ho feta moo, tumelo ea hae ho Molimo e ne e tla mo tiisetsa hore haeba a itšoara ka tsela eo letsoalo la hae le koetlisitsoeng ka Bibele le mo lumellang, Molimo o ne o tla mo tšehetsa ho sa tsotellehe hore na phello e ka ba efe. Moapostola Pauluse o ile a hlalosa tumelo ea hae ka mantsoe ana: “Nka etsa tsohle ka Kreste ea mphang matla.”—Ba-Filippi 4:13.
Bibele e fana ka mehlala e mengata ea banna le basali ba neng ba tšepahala ho Jehova esita le tlas’a liteko tse boima ka ho fetisisa. “Ba tšoenyehile ka litšomo, . . . le ka litlamo, le ka literonko. Ba tlepelitsoe ka majoe, ba sehliloe ka lisaga, ba lekiloe, ba bolailoe ka bohale ba lerumo.” (Ba-Heberu 11:36, 37) Empa ha baa ka ba lumella ho tšaba batho ho laola likelello tsa bona. Ho e-na le hoo, ba ile ba phehella tsela e tšoanang e bohlale eo hamorao Jesu a ileng a e nea barutuoa ba hae: “Le se ke la tšaba ba bolaeang ’mele, ba mpa ba se na matla a ho bolaea moea; le mpe le tšabe [Molimo] ea nang le matla a ho bolaela moea le ’mele [“Gehenna,” NW].”—Mattheu 10:28.
Ho latela keletso ena ea Jesu ea ho tšaba Molimo ho e-na le batho ho ile ha boela ha nolofaletsa Bakreste ba pele ho mamella mathata a mefuta eohle, liteko, le mahloriso “ka baka la litaba tse molemo.” (Filemone 13, NW) Moapostola Pauluse ke mohlala o hlokomelehang oa sena. Lengolong la hae la bobeli le eang ho Bakorinthe, o bontša kamoo ho tšaba Molimo ho ileng ha mo matlafatsa hore a mamelle maemo a teronko, lichapo, ho tlepetsoa ka majoe, ho robeheloa ke likepe, likotsi tse fapa-fapaneng mebileng, ho se robale bosiu, tlala, lenyora, serame, le ho hloka liaparo.—2 Ba-Korinthe 11:23-27.
Ho tšaba Molimo ho ile ha boela ha matlafatsa Bakreste bao ba pele ho mamella mahloriso a boima tlas’a ’Muso oa Roma, ha ba bang ba ne ba bile ba akheloa ka lebaleng la lipapali la libatana. Mehleng e Bohareng, balumeli ba sebete ba ne ba chesoa pontšeng ho fihlela ba e-shoa kaha ba ne ba ke ke ba sekisetsa tumelo ea bona. Ntoeng ea ho qetela ea lefatše, Bakreste ba ile ba ikhethela ho tšoenngoa le ho shoela likampong tsa mahloriso ho e-na le ho etsa lintho tse halefisang Molimo. Ho tšaba Molimo ke tšusumetso e matla hakaakang! Ka sebele, haeba ho ile ha matlafatsa Bakreste ho hlōla ho tšaba batho tlas’a maemo a lekang hakaalo, ho ka re matlafatsa tlas’a boemo leha e le bofe boo re ka iphumanang re le ho bona.
Kajeno, Satane Diabolose o etsa sohle seo a ka se khonang ho re hatella ho etsa lintho tse halefisang Molimo. Ka hona Bakreste ba ’nete ba lokela ho ba le boikemisetso bo tšoanang le bo ileng ba bontšoa ke moapostola Pauluse ha a ne a ngola: “Ha e le rōna, ha re batho ba koenehang ho ea timela; empa re ba tiisang tumelo ho pholosa meea ea rōna.” (Ba-Heberu 10:39) Ho tšaba Jehova ke mohloli oa sebele oa matla. Ka thuso ea hona, e se e ka “re ka re ka tšepo: Morena ke mothusi oa ka, nke ke ka tšoha letho; motho a ka nketsa’ng?”—Ba-Heberu 13:6.
[Setšoantšo se leqepheng la 7]
Ho tšaba Molimo ho ile ha matlafatsa Pauluse hore a mamelle lintho tsohle, ho akarelletsa lichapo, ho kenngoa teronkong, esita le ho robeheloa ke sekepe.—2 Ba-Korinthe 11:23-27