Ho Thabela ’Mino—Senotlolo ke Sefe?

BOITŠOARO bo bobe bo tebileng le borapeli ba litšoantšo li ne li etsoa lefatšeng la boholo-holo. Kahoo, moapostola Pauluse o ile a ho fumana ho hlokahala ho fana ka keletso e matla haholo ka boitšoaro ba Bokreste. O ile a ngolla phutheho ea Efese: “Joale, seo ke se bolelang, seo ke se tiisang Moreneng, ke re: Le se hlole le phela joale ka ba-lichaba ba bang, ba eang ka bosaoana ba likelello tsa bona; bao mehopolo ea bona e leng lefifing, ’me ba hole le bophelo ba Molimo ke ho se tsebe ho leng ho bona, ka baka la bothata ba lipelo tsa bona.”—Ba-Efese 4:17, 18.

Na hape hase tlhaloso e ntle ea tsela eo lintho li leng ka eona kajeno? Hona ho akarelletsa lefapha la ’mino. Boholo ba ’mino oa kajeno bo bontša mokhoa o leng ‘hole le bophelo ba bomolimo.’ Hangata mantsoe a bontša ‘bothata ba pelo,’ ho hloka mosa kapa kutloelo-bohloko.

Empa Pauluse o ile a ntšetsa keletso ea hae pele ka ho re: “Kutlo ea bona ea botle le bobe e kile ea fifala, ba itahletse kamanong ea botona le botšehali ’me ka matla ba phehella mosebetsi o sa hloekang oa mefuta eohle.”—Ba-Efese 4:19, The Jerusalem Bible.

‘Ho phehella ka matla mosebetsi o sa hloekang’ hona ho bontšoa haholo ’minong oa kajeno. Mantsoe le sepheo sa ’mino ke ho khotsofatsa moloko o qoetseng kamanong ea botona le botšehali, pefong, lithethefatsing, le boithabisong. Bakreste ba lokela ho talima maraba a joalo joang? Hlokomela mantsoe a Pauluse: “Joale ho hang hase tsela eo le ithutileng ka eona ho Kreste, ntle leha e le hore le hlōlehile ho mo utloa hantle ha le rutoa seo ’nete e leng sona ho Jesu.”—Ba-Efese 4:20, 21, JB.

“Phetoho ea Moea” ea Hlokahala

Re ka sebelisa keletso ee joang tabeng ea ’mino o bontšang moea oa lefatše? Ho seo, haeba re e-na le “khopolo ea Kreste,” ke hore, haeba re e-na le boikutlo ba hae ba kelello, re ke ke ra rata ho mamela ’mino oa ‘lefatše, oa bophoofolo, oa bodemona.’—1 Ba-Korinthe 2:16; Jakobo 3:15, NW.

Empa u ka ’na ua botsa, ‘Nka fetola tatso ea ka ea ’mino joang?’ Pauluse o boetse oa thusa, hobane o re: “U tlameha ho tela tsela ea hao ea khale ea bophelo; u tlameha ho behella botho ba hao ba khale ka thōko, e leng bo silafatsoang ke ho latela litakatso tsa bohata. Kelello ea hao e tlameha ho nchafatsoa ke phetoho ea moea.”—Ba-Efese 4:22, 23, JB.

Karabelo ke eo, ho nchafatsoa ha kelello ke phetoho ea moea. Hona ho akarelletsa ho fetang feela tatso ea rōna ’minong. Ho hloka ho rutoa hape, ho phahamisoa ha litekanyetso le melemo. Ho bolela ho fetola tsela eo re nahanang ka eona, tekanyetso e fapaneng ea ho ahlola lintho. Hape ho akarelletsa ho sheba lintho ka tsela eo Molimo le Kreste ba li talimang ka eona. Joalokaha Pauluse a ho hlalositse ka ho hlaka hakana: “Empa leha le e-ja, leha le e-noa, leha le etsa ntho efe le efe, etsang tsohle ho tlotlisa Molimo ka tsona.”—1 Ba-Korinthe 10:31.

Boholo ba ’mino oa kajeno ha bo tlise thoriso ho Molimo. Ho fapana le hoo, o qhela litekanyetso tseo Bakreste ba li emelang le tseo ka baka la tsona ba bangata ba ’nileng ba ikemisetsa ho shoela lichankaneng le likampong tsa mahloriso. Kahoo, ke hobane’ng ha re lokela ho ho nka e le boitelo haeba re lokela ho fetola tatso ea rōna ea ’mino e le hore re se ke ra ‘rata lefatše kapa lintho tse lefatšeng’?—1 Johanne 2:15-17.

’Mino o Motle—Senotlolo ke Sefe?

Haeba, ka lebaka la ho hlompha ha rōna melao-motheo ea Mangolo, re hana ’mino o hlephisang boitšoaro, re ka o nkela sebaka ka eng? Ke hobane’ng ha re sa hlahlobe mafapha a macha a ’mino? E ka ’na ea e-ba a thabisang haholoanyane le a hahang ho feta ao re neng re a rata nakong e fetileng. Ka mohlala, eo e kileng ea e-ba sebini sa ’mino oa rock o buile sena ka liphetoho tseo a li entseng:

“Ke ile ka lokela ho etsa boiteko ho tloha ’minong o bobebe oa rock ho ea mofuteng o amohelehang o tloaelehileng oa ’mino le ’minong o tebileng oa classic. Empa eitse ha ke hlokomela hore ho ne ho e-na le ha bohlokoa ho oona le hore ke ne nke ke ka hlola ke khema le moea oa ’mino o mongata oa kajeno, o ile oa e-ba bonolo haholoanyane le ho khotsofatsa haholoanyane. E bile o hahang ka potlako. Ke ile ka hlokomela hore ke ’nile ka fetoa ke ntho e monate ka lebaka la leeme la pele leo ke neng ke e-na le lona ka mefuta ea ’mino o mong.”

’Mino oa classic o pharaletse haholo, hammoho le oa sebaka ka seng le ’mino e meng ea kajeno, e nang le merethetho e monate, mantsoe a hloekileng, ’me o sa bontše filosofi e khahlanong le litekanyetso tsa Bibele. Senotlolo ke ho fumana le ho thabela ’mino o ke keng oa susumetsa monahano oa rōna ka ho fosahetseng, ’mino o ‘lokileng, o hloekileng, o botumo bo botle, o bokhabane, le o tlotlehang.’—Ba-Filippi 4:8.

Karolo ea ’Mino Bophelong ba Mokreste

Ho ba bang, tsela e ’ngoe ea ho thabela ’mino o monate ke ka ho bina kapa ka ho ithuta ho letsa seletsa. Thabo e khōlō e ka fumanoa ha motho a bina a le mong le ka sehlopha e le lelapa le metsoalle. Leha ho le joalo, joaloka linthong tsohle, ho leka-lekana hoa hlokahala. Boikhathollo kapa ho fetisa nako le ka mohla ha lia lokela hore Mokreste a nahane ka tsona a sa khaotse bophelong ba hae. Haeba hoo ho ka ha etsahala, esita le ’mino o hahang, ka lebaka la ho feteletsoa, o ka ba le liphello tse babang. Joale Mokreste o tla ba kotsing ea ho ba ea “ratang menate ea nama, e seng Molimo.”—2 Timothea 3:4.

’Mino e boetse ke karolo e tlatsetsang ea borapeli ba rōna ho Jehova. Iseraeleng oa boholo-holo, Asafe le bana babo ba ile ba bina: “Rorisang Jehova, le rapele lebitso la hae; tsebisang har’a lichaba liketso tsa hae tse phahameng. ’Mineleng, le ’minele lithoko, le nahane mehlolo ea hae kaofela.” E, ’mino o ka rorisa Molimo le ho mo thabisa.—1 Likronike 16:8, 9.

Lipina tsa ’Muso tse sebelisoang ke Lipaki tsa Jehova Liholong tsa tsona tsa ’Muso li theiloe litemaneng tsa Bibele, lipesalemeng, lithapelong, le lithutong. Na re ke ke ra boetse ra thabela ’mino oo o halalelang ka ho teba? Hape na ha rea lokela ho bontša thabo ea rōna ka ho bina lipina tsee ka maikutlo le ka cheseho? Esita le linakong tse ling ntle ho liboka tsa Bokreste, na re ke ke ra hlasimolla bophelo ba rōna ka litokisetso tse ntle tsa lipina tsee tse bitsoang Kingdom Melodies?

Sehlopheng sena sa ’mino, kaofela libini ke Lipaki tsa Jehova. Ba bang ke litsebi ho letseng lihlopheng tse khōlō tsa ’mino tse binang ka liletsa tse ngata. Ba bang, ho akarelletsa le eo e kileng ea e-ba sebini sa rock se boletsoeng ka holimo, ke batho ba bacha ba nang le talenta ba thabelang mefuta e mengata ea ’mino o hlomphehang. Ha ba ikutloe eka ba lahleheloa ke letho ka lebaka la ho hana ’mino o bontšang maikutlo a lefatše, a bodemona. Mohlala oa bona o motle o bontša hore le rōna, haeba re lumella litekanyetso tsa Bibele ho busa khetho ea rōna, re ka fumana thabo e hahang e ngata ’minong, oa lefatše le o halalelang.—Ba-Efese 5:18-20.

[Lebokose le leqepheng la 28]

“’Mino oa rock o na le boipiletso bo le bong feela, boipiletso ba boqaba, takatsong ea botona le botšehali—e seng lerato, e seng eros, empa takatso ea botona le botšehali e sa hlaoleloang le e sa rutoang. . . . Bacha baa tseba hore rock e na le morethetho oa kamano ea botona le botšehali.”—The Closing of the American Mind, ea Allan Bloom.