Molao oa Gauda—Ke Eng?
“BONA! Ha ke khathatse baahisani ba ka. Ho ea ka ’na, ba ka etsa seo ba se batlang. Empa, ho hlakile hore haeba ba ne ba le bothateng, ke ne ke tla etsa seo nka se khonang ho thusa.” Na ao ke maikutlo a hao? Ha likoluoa li hlaha, liketso tse mosa le tse hlokang boikhabi li ka ’na tsa e-ba ngata, e leng ho atisang ho makatsa ba bangata. Empa na hoo ho lekane?
Haeba u motsoali, ha ho pelaelo hore u ’nile ua lemosa bana ba hao hore ba qobe ho qholotsa bao ba bapalang le bona. Ba bangata ho rōna re na le maoma a bocheng ba rōna a bontšang hore ho hlokomoloha tataiso eo ho tlisa boiphetetso. E, re ithutile bohlale ba molao oa boitšoaro o theiloeng ke rafilosofi oa Bochabela Confucius: “Seo u sa batleng ha se etsoa ho uena, u se ke ua se etsa ho ba bang.” Leha ho le joalo, na ua hlokomela hore ena ke phetolelo e tlaasana feela, e fanang ka thibelo ea se tsejoang e le Molao oa Gauda?
Molao oa ho Nka Bohato ba Pele
Ho latela Webster’s New Collegiate Dictionary, “molao oa gauda” o hlalosoa e le “molao oa boitšoaro bo amoheloang o supang Mattheu 7:12 le Luka 6:31 le o bolelang hore motho o lokela ho etsa ba bang seo a neng a tla rata hore ba mo etse sona.” Talima lebokose le botlaaseng ba leqephe lena ’me u hlokomele kamoo liphetolelo tse fapaneng tsa Bibele tsa Mattheu khaolo ea 7, temana ea 12 li lumellang leseli la molao-motheo ona o tataisang ho khanya.
Ka kōpo hlokomela hore le hoja mantsoe a fapana ho ea ka liphetolelo, molao oo o khothalletsa ho nka bohato ba pele. Ha e le hantle, pejana Thutong ea Thabeng Jesu o ile a hlalosa: “Kōpang, ’me le tla neoa; batlang, ’me le tla fumana; kokotang, ’me le tla buleloa. Hobane e mong le e mong ea kōpang, oa neoa; ea batlang oa fumana, ’me ho buleloa ea kokotang.” (Mattheu 7:7, 8) Ho kōpa, ho batla, ho kokota, kaofela ke liketso tsa ho nka bohato ba pele. Jesu o ile a tsoela pele: “’Me joale, ntho tsohle tseo le ratang hore batho ba le etse tsona, ba etseng tsona le lōna.”—Mattheu 7:12.
Bibele e bontša hore barutuoa ba Jesu le bona ba ne ba buella ho phela ka molao oona ona. (Ba-Roma 15:2; 1 Petrose 3:11; 3 Johanne 11) Leha ho le joalo, ka masoabi boemo bo teng ba likamano tsa batho bo bontša hore batho ka kakaretso, e-bang ba ipitsa Bakreste kapa che, ha ba o latele. Na see se bolela hore molao oo oa boitšoaro bo amohelehang ha e sa le oa bohlokoa? Na mohlomong o se o siiloe ke nako?
[Lebokose le leqepheng la 3]
“Etsa batho ba bang sohle seo u neng u tla rata hore ba u etse sona.”—The Holy Bible, e fetoletsoeng ke R. A. Knox.
“Tšoara batho ba bang hantle feela kamoo u neng u tla rata hore ba u tšoare kateng.”—The New Testament in Modern English, ea J. B. Phillips.
“Eng kapa eng eo u batlang hore ba bang ba u etse eona ’me ba u etsetse eona, ka tsela e tšoanang le uena u ba etse eona ’me u ba etsetse eona.”—The Amplified New Testament.
“Etsetsa ba bang ntho e ’ngoe le e ’ngoe eo u batlang hore ba u etsetse eona.”—The New Testament in the Language of Today, ea W. F. Beck.
“Ka hona, lintlheng tsohle tšoara batho ba bang kamoo u neng u tla lakatsa hore ba u tšoare kateng.”—The Four Gospels, e fetoletsoeng ke E. V. Rieu.
“U tlameha ho tloaela ho sebelisana le ba bang kamoo u neng u tla rata hore ba sebelisane le uena kateng.”—The New Testament, ea C. B. Williams.