Khotso ea Lefatše—Ha e le Hantle e Tla Bolela Eng?

KHOTSO ea lefatše e reriloeng ke Molimo e tla akarelletsa ho hongata ho feta ho khaotsa ho sebelisa lihlomo kapa ho etsa hore lintho li eme tsi! ka baka la ho ba le libetsa tsa nuclear tse lekanang lefatšeng lohle. Sena se pakoa ke tsela eo Bibele e sebelisang lentsoe “khotso” ka eona.

Ka mohlala, ka Mangolong a Seheberu (“Testamente ea Khale”) lentsoe le emelang khotso ke sha·lohmʹ. Mofuta o mong oa lentsoe lena o sebelisitsoe ho Genese 37:14 (NW), moo mopatriareka Jakobo a bolellang mora oa hae Josefa: “Bona hore na banab’eno ba sireletsehile ’me ba phela hantle le hore na mohlape o sireletsehile ’me o phela hantle, ’me u khutlisetse molaetsa ho ’na.”a Sha·lohmʹ e sebelisitsoe hape ho Genese 41:16 (NW), moo e fetoletsoeng e le “boiketlo.”

Ka hona, kutloisisong ea Bibele, khotso ea sebele ha e akarelletse feela ho emisa ha bora empa e boetse e akarelletsa bophelo bo botle, tšireletseho, le boiketlo. Tokollo ea rōna e fetileng e bontšitse hore batho ha ba khone ho rarolla qaka ea hore na khotso e ka tlisoa joang. Ke Jesu Kreste feela, “Morena oa khotso,” ea tla rarolla qaka eo le ho tlisa khotso ea sebele lefatšeng. (Esaia 9:6, 7) Ka mohlala, nahana ka seo Bibele e se profetang Pesalemeng ea 72:7, 8 mabapi le puso ea enoa: “Mehleng ea hae, ea lokileng o tla atleha, ’me khotso e ea ’ne e ate ho isa ha khoeli e lesa ho ba teng. O tla busa ho nka leoatleng le leng ho isa leoatleng le leng, le ho nka nōkeng ho isa lipheletsong tsa lefatše.” Nahana—bophelo bo botle, tšireletseho, le boiketlo lefatšeng ka bophara! Ha ho tumellano ea lipolotiki eo le ka mohla e neng e ka finyella hoo. Ke ’Muso oa Molimo feela o ka ho etsang, ’me o tla finyella ho hong ho eketsehileng. Bibele e re fa lipono tse ’maloa tse thabisang tsa boprofeta hore re bone khotso ena ea lefatše ea ka moso. A re ke re nahaneng ka tse ling tsa tsona.

Ho Lahla Lihlomo Lefatšeng Lohle—Tsela ea Molimo!

Pesaleme ea 46:8, 9 e re: “Tlong, le bohe liketso tsa Jehova, kamoo a sentseng lefatše kateng. O felisitse lintoa le ho isa pheletsong ea lefatše, o robile liqha, a robakanya marumo, a chesa makoloi a ntoa mollong.” Mantsoe ‘seqha,’ ‘lerumo,’ le ‘koloi ea ntoa,’ ke lintho tse tšoantšetsang mofuta ofe kapa ofe oa sebetsa sa ntoa kapa mechini ea ntoa. Ka hona Jehova o fetela ka ’nģane ho ho lekanyetsa lihlomo kapa esita le hona ho lahla lihlomo ka ho felletseng. O felisa ka ho phethahetseng libetsa tsa nuclear, likanono, litanka, lintho tse betsang metsu e tukang, metsu e menyenyane e tukang, liqhomane tsa polastike, merathatha, lithunya tse nyenyane—eng kapa eng e neng e ka sokela khotso ea lefatše lohle!

Leha ho le joalo, libetsa ka botsona feela ha li bake ntoa. Hangata, metso ea ntoa e hlaha sebōpehong sa lehloeo, sa meharo, kapa se mabifi sa batho ba sa phethahalang. (Bapisa le Jakobo 4:1-3.) Ka hona ’Muso oa Molimo o tla hlasela sesosa sena seo e leng motso oa ntoa ka ho felisa litšobotsi tsa botho bo bobe joalo bathong. Joang? Ka lenaneo la lefatšeng lohle la thuto. “Lefatše le tla tlala tsebo ea Jehova, joale ka ha metsi a aparetse leoatle.”—Esaia 11:9.

Kaha ba tla be ba ‘rutiloe ke Jehova,’ batho ba ke ke ba hlola ba bona liphapang tsa merabe e le motheo oa khohlano, bora, kapa ho nyelisana. (Johanne 6:45, NW) “Molimo ha o ee ka tšobotsi,” ’me baahi ba lefatše ba tla bonahatsa ho se ee ka tšobotsi ha oona. (Liketso 10:34) ’Muso o tla boela o felise lintho leha e le life tse ka bakang khohlano ea lichaba ka ho felisa meeli e arolang lichaba. ‘Ho tloha leoatleng le leng ho isa ho le leng le ho isa lipheletsong tsa lefatše,’ bohle ba tla ikanela ho tšepahala ka boithaopo le ka teboho pusong ea Kreste.—Pesaleme ea 72:8.

E le hore khotso e joalo e tle e tšoarelle, ’Muso o tla boela o felise tšusumetso e ’nileng ea e-ba e arolang ka ho fetisisa historing ea batho: bolumeli ba bohata. (Sofonia 2:11) Batho ba tla kopana borapeling ba bona ba Molimo o le mong oa ’nete. (Esaia 2:2, 3) Ho tla rena boena ba lefatše ka bophara!

Khotso ka Lapeng

Leha ho le joalo, khotso ea lefatše e ne e tla ba le molemo ofe haeba malapa a batho ka bomong e ne e le lebala la ntoa la mahlapa, mantsoe a hlabang, ’me ka mehla ho ntse ho etsoa litšokelo. Bona ke bona boemo ba malapa a mangata kajeno. Malapa a mang a patile bora bo tebileng ka lesira la ho khutsa ho hlokang botsoalle.

Ka hona khotso ea ’nete e tlameha ho akarelletsa kutloano ka lapeng. Tlas’a lenaneo la thuto la ’Muso, banna le basali ba tla rutoa ho sebelisana ka lerato le tlhompho. (Ba-Kolosse 3:18, 19) Bana ba tla rutoa hore ‘ba utloe batsoali ba bona nthong tsohle.’ (Ba-Kolosse 3:20) Ho ke ke ha e-ba le bacha ba marabele ba tla ferekanya le ho tšoenya batsoali ba bona. Kutlo e tla ba ntho e tloaelehileng, tšebelisano-’moho e be molao. E tla ba ntho e thabisang ho bona bana ’me ho ba teng ha bona e tla ba monyaka.

Kajeno likhatello tsa moruo li eketsa likhohlano tsa malapa haholo, kaha hangata batsoali ka bobeli ba tlameha ho nka mejaro e boima ea mosebetsi oa boipheliso. Empa tlas’a bobusi ba Kreste, malapa a tla imolloa mejarong e sithabetsang ea lichelete—lirente tse phahameng ka mokhoa o tšosang, litefello tsa likalimo tse phahameng haholo, makhetho a nyolohang, ho hloka mosebetsi. Mosebetsi o khotsofatsang, o phephetsang o tla ba mongata. ’Me ha ho ea tla hloka moo a lulang teng. Hlokomela kamoo boprofeta bo ho Esaia 65:21-23 bo totobatsang linnete tsena: “Ba tla haha matlo, ba lule ho ’ona . . . Ba ke ke ba haha matlo, osele a lula teng, leha e le ho hloma merara, osele a je tholoana tsa eona . . . bakhethoa ba ka ba tla bona mesebetsi ea matsoho a bona e tsofalla ho bona. Ba ke ke ba sebeletsa lefeela, ba ke ke ba tsoala bana ’me ba lahleheloa ke bona kapele; hobane e tla ba leloko le hlohonolofalitsoeng ke Jehova, ’me bana ba bona ba tla ’ne ba lule le bona.”

Nahana ha u se u phela tikolohong e ke keng ea u hlasela ka lipono, melumo, le menkho ea ho senyeha ha metse e meholo! Nahana ha u se u phela serapeng se setalana—serapa sa hao—se lenngoeng ka mokhoa o phethahetseng, se khabisitsoeng, seo joang ba sona bo kutiloeng hantle. Nahana ha u se u phefumoloha moea o hloekileng ka ho khathollang; u se u sa utloe marata a tsoelo-pele ea kajeno, empa u utloa melumo e monate, ea tlhaho. Ke ’nete hore ba bang ba batho ba lehlohonolo ba se ba ntse ba thabela tekanyo e itseng ea lintho tsena. Empa tlas’a ’Muso oa Molimo, maemo a bophelo ba khotso a tla thabeloa ke bohle. Ho ke ke ha e-ba le mafutsana, ba lapileng, kapa ba maemong a tlaase.—Pesaleme ea 72:13, 14, 16.

Bibele e tsoela pele ho tšepisa hore “empa ba babe ba tla khaoloa.” (Liproverbia 2:22) Seo se bolela ho felisoa ha tlōlo ea molao. Haeba ngoan’a hao e monyenyane ka ho fetisisa a e-tsoa ho ea bapala, ho ke ke ha hlokahala hore u tšoenyehe ka batho ba hleka-hlekang kapa ba koetelang bana ba ipatileng mafifing, likoloi tse khannoang ke bakhanni ba tahiloeng tse tsoang taolong, kapa lihlopha tse ntseng li nyolosa li theosa tsa bacha ba hlantšoang ke lithethefatsi. Bana ba hao ba tla bapala ba sireletsehile ka ho phethahetseng ’me ho se kotsi ea letho.

Khotso le Boiketlo ba Hao ba Botho

Qetellong, ho na le tšobotsi e ’ngoe ea boiketlo ba botho. Esita le maemo a Paradeise ha a thōlise bohloko ba kankere kapa ho opeloa ho tlisoang ke serame sa masapo. Ka hona khotso ea ’nete e tlameha ho akarelletsa ho felisoa ha boloetse, ho kula, le lefu. Na ntho e joalo e ka etsahala? Ha a sa ntsane a le lefatšeng, ka makhetlo-khetlo Jesu Kreste o ile a bontša matla a hae holim’a mafu a batho. (Mattheu 8:14-17) A le boemong ba hae bo phahameng leholimong, Kreste o tla khona ho etsa mehlolo lefatšeng ka bophara! Bibele ea tšepisa: “Ke moo mahlo a lifofu a tla tutuboloha, litsebe tsa ba thibaneng litsebe li bulehe. Sehlotsa se tla tlōla joale ka khama, leleme la semumu le tla bina.”—Esaia 33:24; 35:5, 6.

Leha ho le joalo, phutuho ea Kreste khahlanong le masoabi a batho e ke ke ea fella moo. Moapostola Pauluse oa hlalosa mabapi le borena ba Kreste: “Hobane e ka khona a buse, a tle a be a bee lira tsohle ka tlas’a maoto a hae. Sera se tlang ho felisoa morao-rao ke lefu.” (1 Ba-Korinthe 15:25, 26) Sena se bolela ho etsolla tšenyo eohle eo lefu le e tlisitseng holim’a batho ho tloha qalong feela. Joalokaha Jesu Kreste ka boeena a hlalositse: “Nako ea tla, eo bohle ba mabitleng ba tla utloa lentsoe la [Kreste], ’me ba tla tsoa ho ’ona.” (Johanne 5:28, 29) Ka hona ba limillione tse se nang palo ba kileng ba phela ’me ba shoa ba le masoabing ba tla fumana monyetla oa ho kopanela khotsong ea lefatše e tlang.

Na u tla kopanela ho eona? Lipaki tsa Jehova li u khothalletsa hore u ithute ho eketsehileng ka seo Bibele e se rutang ntlheng ena.b Tebello ea khotso ea lefatše ke e thabisang haholo, ke ea sebele haholo hore e ka hlokomolohuoa. Kholiseha hore haeba u ikitlaetsa ho ithuta le ho sebelisa Lentsoe la Molimo, ‘Molimo oa khotso o tla ba le uena’—ka ho sa feleng!—Ba-Filippi 4:9.

[Mongolo o botlaaseng ba leqephe]

[Setšoantšo se leqepheng la 5]

Jehova o tla felisa lintoa “ho isa pheletsong ea lefatše”

[Tlhaloso ea Moo Setšoantšo se Nkiloeng Teng]

USAF Official Photo

[Setšoantšo se leqepheng la 6]

Banna le basali ba tla rutoa ho sebelisana ka khotso