Toro ea Khotso ea Lefatše—Pono e Fosahetseng

TŠEPO ea ho fumana katleho litebellong tsa khotso ea lefatše e ntse e phahama haholo. Lesakaneng la hae la litaba koranteng ea The Toronto Star, Carol Goar o ngotse: “Litumellano tsa khotso li ntse li eketseha ho tloha Afghanistan ho ea Angola. Likhohlano tsa libaka tse neng li bonahala eka li ke ke tsa rarolloa likhoeling tse seng kae tse fetileng li bontša matšoao a ho kokobela. ’Me Machaba a Kopaneng a boetse a tsosolosoa ka mokhoa o khothatsang.” Goar o re sena se tlisitse “tšepo e akaretsang lefatšeng lohle.” Taba e ngotsoeng ke mohlophisi ho USA Today ka ho tšoanang e phatlalalitse: “Khotso ea hlaha lefatšeng lohle.”

Ho hlokomelehang ka ho khethehileng morao tjena ke seo UN Chronicle e se hlalositseng e le “ho theoa ha likamano tse mofuthu ho ntseng ho tsoela pele pakeng tsa Soviet Union le United States.” Ho ntšoa ha mabotho, liketsahalo tse makatsang Europe Bochabela, ho bua ka phokotso ea mabotho le lihlomo—liphetoho tsena li tsositse tšepo ea hore e ka ’na eaba qetellong mebuso e meholo ka ho fetisisa e emisa tlhōlisano ea lihlomo. Lefatšeng leo ho lona ho tlalehoang hore litšenyehelo tsa sesole li honya liranta tse fetang libillione tse 2,2 moruong ka selemo, ena ke tebello e thabeloang ka ho fetisisa.

Leha ho le joalo, ho na le menyetla e mekae ea hore toro ea motho ea khotso ea lefatše e tla phethahala? Esita le bashebelli ba nang le tšepo e khōlō ka ho fetisisa ea ho atleha ba lumela hore ho na le lekhalo le leholo ho tloha phokotsong ea lihlomo ho ea phelisong ea lihlomo. Ho lahloa ha lihlomo tsa nuclear ho ne ho tla hloka tekanyo ea ho tšepana eo ho e-song ho be le e tšoanang le eona. Empa, ka masoabi mebuso e meholo ka ho fetisisa e na le histori e telele ea ho se tšepane. Joalokaha ho profetiloe ka Bibeleng, ena e bile mehla eo ho eona batho ba ipakileng e le “ba hanang ho boelanngoa le ba bang [“ba robang litumellano,” King James Version].”—2 Timothea 3:3, TLP.

Ntle le moo, hase e mong le e mong ea kholisehileng hore pheliso ea libetsa tsa nuclear e ne e tla tlisa khotso. Esita le haeba lichaba li ne li ka susumelletsoa ho felisa pokello ea tsona ea libetsa tsa nuclear, libetsa tse tloaelehileng li ntse li ka bolaea ka katleho e khōlō. Ntoa ea I le ea II ea Lefatše li fana ka bopaki bo tiileng ba ’nete ena. Ho feta moo, tsebo ea saense e hlokahalang ho bōpa libetsa tsa nuclear hape e ne e tla be e ntse e le teng—e loketse e bile e letetse letšoao la pele la likhohlano tsa lipolotiki. Ba bang ba kang setsebi sa saense ea lipolotiki Richard Ned Lebow, ba bile ba pheha khang: “Mohlomong ho boloka libetsa tse seng kae tsa nuclear ho hlile ho boloka batho ba le hlokolosi.”

Empa hafeela libetsa tsa nuclear li ntse li le teng, ho tšoenyeha ka thipitlo ea nuclear ho tla etsa hore polelo leha e le efe ea ho finyella khotso e be bosoasoi; boemo e tla ba bo tšoanang mabapi le ho tsoela pele ha mathata a sa amaneng le ntoa a amohang ba limillione khotso bophelong ba bona ba letsatsi le letsatsi. Mongoli-kakaretso oa Machaba a Kopaneng Javier Pérez de Cuéllar o ile a bua ka “tlokotsi ea baahi ba habo rōna ba limillione ba hlokang matlo kapa ba phelang maemong ao ho hang a sa sireletsehang ka ho lekaneng. Bothata bo ntse bo mpefala joalo-joalo.” UN Chronicle e tsoela pele ho tlaleha hore ho fokola ha moruo ho hlasela “likarolo tse peli ho tse tharo tsa batho, maemong a mang ka bofutsana le bofuma tsa boemo bo ke keng ba khetholloa ho mahlomola a tlisoang ke ntoa.” Ho thoe’ng ka boemo ba baphaphathehi ba lefatše bao ho hakanngoang hore ba limillione tse 12? Na phokotso ea lihlomo kapa esita le hona ho lahla lihlomo ka ho felletseng ho tla tlisa khotso bophelong ba bona?

Ka ho hlakileng, toro ea motho ea khotso ea lefatše ke pono e fosahetseng—e shebang litaba hakhutšoanyane, e sa pharallang, e lekanyelitsoeng. Na ho na le tebello e molemonyana ea khotso? Ka sebele e teng. Tokollong e fetileng ea makasine ena, re ile ra bona hore Bibele e fana ka tšepo e tiileng ea khotso.a Haufinyane Jesu Kreste, e le Morena oa ’Muso oa Molimo, o tla tlisa khotso e fetang hōle litebello leha e le life tsa batho. Empa ha e le hantle khotso ee e tla bolela eng bakeng sa batho? Sehlooho se latelang se tla hlalosa sena.

[Mongolo o botlaaseng ba leqephe]