Baboleli ba ’Muso Baa Tlaleha
◻ “TLHORISO e kholo” khahlanong le phutheho ea pele ea Bokreste e ile ea sebeletsa ho qhalanya barutuoa ba bangata ba Kreste. (Liketso 8:1, TLP) Leha ho le joalo, tlhoriso ena e ile ea etsa ho sa lebelloang hobane ba neng ba qhalantsoe “ba ne ba tsamaea ba ntse ba bolela lentsoe.” (Liketso 8:4) Filippi o ile a tsoela pele ho bolela, ’me “bongata ba e-ba pelo e le ’ngoe ho mamela.” (Liketso 8:6) Joalokaha tlhoriso e ile ea etsa ho sa lebelloang lekholong la pele la lilemo, e ile ea etsa joalo le motseng o mong Thailand e ka leboea.
Pula-maliboho e khethehileng ea Lipaki tsa Jehova e ile ea qala ho bolela motseng ona, empa pele batho ba motse ba ne ba sa mamele. Leha ho le joalo, ha e bua le moruti oa moo, batho ba ile ba atamela ho tla mamela. Ba bang ba ile ba hlokomela hore Paki e ne e tseba Bibele ho feta moruti oa bona, kahoo ba qala ho ithuta Bibele le pula-maliboho eo le hoja ba bang ba ne ba ba hlekefetsa. Makau a mang a bona a ile a bolaoa, bophelo ba pula-maliboho ba sokeloa, ’me ntlo ea monna e mong ea thahasellang e ile ea chesoa. Monna eo a re: “Ba ka chesa ntlo ea ka, empa ba ke ke ba chesa pelo ea ka.” Bao ba ithutang le Paki ba ne ba palama libaesekele sebaka se selelele ho ea kopanela libokeng tse Holong ea ’Muso. Ba bane ba bona ba ile ba kolobetsoa, ’me ba bang ba tšeletseng ba ntse ba kopanela libokeng hammoho le bona.
Moputso oa Botšepehi
◻ Baena Zambia ba entse botumo bo botle ba botšepehi, ’me sena se felletse ka mahlohonolo ho bona, esita le ho thusa ba bang ho khetholla ’nete. Moholo, eo e leng pula-maliboho ea ka mehla, o ne a nkile leeto ka bese ’me a utloa khaitseli e mong oa Paki ka beseng a bua le ba bang ka tsoho. Moeti e mong o ile a ’motsa: “Ke hobane’ng ha lōna Lipaki le bolela hore bolumeli ba lōna ke bona feela ba ’nete?” Moena o ile a kenella moqoqong ’me a bolella moeti eo hore Jehova o tla putsa Lipaki tsa hae hobane li ruta ’nete e tsoang Bibeleng.
Ka morao ho nako ea har’a mpa ea bosiu leetong lena le lelelele, bese e ile ea fihla moo ho hlahlobjoang makoloi. Pula e ne e na haholo. Lesole le leng le ile la kena ka beseng ’me la botsa hore na ho na le Lipaki tsa Jehova ka hare. Li ne li le tharo. Eaba le re: “Ke hantle, lōna Lipaki le sale le lutse, lōna ba bang kaofela tsoang le mekotla ea lōna.” Ba bang bohle ba tsoela puleng, ’me ka morao ho tlhahlobo, ba khutla ka lithoto tsa bona le liaparo li re tee!
Ha ba boetse ba le ka beseng, lesole la re: “Lebaka leo ke lumelletseng Lipaki ho sala ke hore ke batho ba tšepahalang. Re bile le liphihlelo tse ngata ’me re fumane hore ke tsona feela tse tšepahalang; ha re li botsa se ka mekotleng ea tsona, li re bolella ’nete.” Ha bese e ntse e tsamaea, moena o ile a botsa: “Bolumeli ba ’nete ke bofe?” Motho e mong a arabela: “Bo sa kolobisoeng ke pula.”
E, botšepehi bo thusa ho khetholla bolumeli ba ’nete, ’me ka sebele bo na le meputso ea bona!