Ho Tlisa Khanya Libakeng tse Hōle Bolivia
KA LEBOEA le ka bochabela ho lithaba tse phahameng tsa Bolivia ho na le libaka tsa mabalane tse motsitsa tse chesang haholo, tse nang le limela tse khahlehang. Libaka tsena li arotsoe ke linōka tse metsi a loebehlanang tse tsoelipanang har’a mefero le har’a masaba-saba. Ebe ho bolela litaba tse molemo tsa ’Muso libakeng tse hōle hakaalo ho joang?
Nahana u le ka seketsoaneng se seholo, se entsoeng ka kutu ea sefate e hopuoeng ’me se tsamaisoa ka enjine e ka morao. Ena e bile phihlelo ea basebeletsi ba tšeletseng ba nako e tletseng ba Trinidad, motse o karolong ea Bolivia e bitsoang El Beni. Ba ne ba ile ba rera leeto lena e le hore ba ka paka metseng e pel’a nōka eo ho hang “litaba tse molemo tsa ’muso” li neng li e-s’o fihle ho eona. (Mattheu 24:14, NW) Ka mor’a ho feta har’a metsi a mangata a hlakileng, seketsoana sa bona se ile sa qala ho tsamaea molapong o entseng mochophoro o lebang Nōkeng ea Mamoré.
E mong ea neng a le sehlopheng seo o pheta tjena: “Re ne re se re batla re fihlile Mamoré ha re fumana hore karolo ea ho qetela ea molapo oo e ne e omile. Ha re tsoa ka sekepeng, re ile ra iphumana re tetebela seretseng ho fihla liropeng! Mosali oa ka o ile a lahleheloa ke lieta tsa hae ha a leka ho itokolla. Empa ka thuso ea batho ba fetang ka tsela, re ile ra atleha ho hula seketsoana seo se boima ho se ntša seretseng le ho se hulela moo ho seng tebe-tebe. Ka mor’a lihora tse peli tsa mosebetsi o boima, re ile ra fihla Mamoré.
“Joale re ile ra tsamaisa seketsoana habobebe ho nyolosa nōka, eo mathōkong a eona ho neng ho e-na le mabōpo a phahameng a nang le limela tse ngata tsa moo ho chesang haholo. Ha li utloa molumo oa enjine, likhulu tse khōlō li ile tsa theoha likutung tsa lifate tse neng li phaphametse ka holim’a metsi, ha ka linako tse ling li-dolphin tse khahlehang li ne li hlahela ka holim’a metsi. Sebaka sa pele seo re ileng ra ema ho sona se ile sa bonahala ka mosi o lopallang o tsoang mollong o pel’a lebōpo o beselitsoeng ho leleka likokoanyana. Ka mor’a ho kenya seketsoana sa rōna ka har’a makala a lohakaneng, re ile ra qoqa le batho ba nang le botsoalle ka mahlohonolo a tlang a ’Muso. E le ho bontša kananelo, ba ile ba re fa litholoana le mahe a mangata.
“Ha letsatsi le ntse le e-ea, re ile ra emisa libakeng tse ling ho jala lipeō tse eketsehileng tsa ’nete. Re ile ra fihla San Antonio ho se ho fifetse. Baahi ba motse ba ne ba se ba robetse. Leha ho le joalo, ha molaetsa oa hore ho tla bontšoa filimi o ntse o hasoa, mabone a ile a qala ho khantšoa. Ho ile ha qhanehoa pere e hulang kariki bakeng sa ho tlisa thepa ea rōna motseng. Batho ba bangata ba ile ba tloaelana le Lipaki tsa Jehova ka ho bona filimi le ka ho kopana le tsona ka seqo.
“Letsatsing le hlahlamang re ile ra tsoela pele ho etela libaka tse ncha. Lebōpong le phahameng, basali ba ne ba ntse ba hlatsoa liaparo tsa bona, esita le ngoana, ka har’a likhetla tse khōlō tsa likhulu. Le ka mohla ba ne ba e-s’o utloe molaetsa oa rōna o hlahang Bibeleng. Sebakeng se seng litlhapi tse nyenyane li ile tsa qhomela holimo ka ntle ho metsi pel’a seketsoana, ’me tse ngata li ile tsa oela ka har’a seketsoana. Kahoo ka mor’a ho bontša filimi, re ile ra ja tlhapi e halikiloeng pele re il’o robala. Qetellong ea leeto, lingoliloeng tse ngata li ne li setse sebakeng sena se hōle, ’me re ne re khotsofetse hore re thusitse ba bangata ho utloa litaba tse molemo ka lekhetlo la pele.”—Bapisa le Ba-Roma 15:20, 21.
Bopaki ba Tataiso ea Mangeloi
Joale ipone u le thōmong ea ho batla motho e mong motseng oa batho ba 12 000, oo u o etelang ka lekhetlo la pele. U tseba ho fokolang feela ka ntle ho lebitso la hae. Eo e bile phephetso e ileng ea tobana le basebeletsi ba babeli ba nako e tletseng ha ba fihla Guayaramerín ba tšepile ho fumana motho eo pele a neng a kile a ithuta Bibele ’me a kopanela libokeng motseng o mong empa joale a se a falletse motseng ona. Ka mor’a ho beha lintho hantle, banyalani bao ba bo-pula-maliboho ba ile ba rera ho otlolla maoto ho theohela sebakeng sa boikhathollo, moo ho neng ho e-na le matšoele a batho a jelang litafoleng kapa a iqoqela feela. Hang-hang monna e mong o ile a atamela banyalani bana ’me a qala moqoqo. Ba ile ba ’motsa hore na o tseba mosali eo ba ’matlang. O ile a re: “Che, empa mohoehali oa ka ke e mong oa Lipaki tsa Jehova.” Kaha ho ne ho sa tsebjoe ho e-na le Lipaki motseng oo, ba ile ba nahana hore e ka ’na eaba o ferekane.
Leha ho le joalo, letsatsing le hlahlamang ba ile ba etela mosali enoa ea hōlileng, ea neng a se a sa tsohe liphateng ka lebaka la leoto le robehileng. O ile a re: “Ke e mong oa Lipaki tsa Jehova, empa ha ke e-s’o kolobetsoe.” Ha a botsoa hore na o rutiloe ’nete ke mang, o ile a supa setšoantšo se leboteng sa setloholo sa hae ’me a re: “Ke eena ea nthutileng ’nete.” Ba ne ba sitoa ho kholoa mahlo a bona! E ne e le eena mosali e mocha eo ba neng ba ntse ba ’matla! Ba ile ba botsa: “Ke hobane’ng ha mokhoenyana oa hao a itse ha a mo tsebe?” O ile a arabela: “O se a nyetsoe hona joale, ’me mokhoenyana o tseba lebitso la hae la bosali feela.” Setloholo seo se ne se le sieo ka nako eo, empa ka mor’a moo thuto ea Bibele e ile ea khannoa ka ngollano. Phello ea e-ba efe? Eena le nkhono’ae ba ile ba tsoela pele ho isa ntlheng ea ho kolobetsoa. Ntlo ea bona e ile ea sebeletsa joaloka Holo ea ’Muso bakeng sa phutheho e hōlang, ’me joaloka mosebeletsi oa nako e tletseng, mosali eo e mocha o tlisitse ba bangata ka hare ho mokhatlo o hlophisitsoeng oa Jehova.
Ho Bolela Khubung ea Libaka tse Chesang Haholo
Hape, nahana ha sefofane seo u se palameng se theohela fatše tselaneng ea lifofane e metseng joang San Joaquín, hare-hare khubung ea libaka tse chesang tsa Bolivia. U ikutloa u sa phutholoha ha u nahana ka seoa se makatsang seo lilemo tse peli pejana se ileng sa bolaea karolo ea bohlano ea baahi motseng ona.
Banyalani ba bo-pula-maliboho ba tsoang Trinidad ba tlileng ka sefofane ba ne ba se ba ile ba latsoa lerato la ho amohela baeti la batho ba moo. Monna oa hlalosa: “Puisano ea Bibele eo re ileng ra ba le eona leetong la rōna la sefofane e ile ea etsa hore re memeloe ho ea lula lelapeng la motho e mong, ntle le ho lefa. Batho bao re fihletseng ha bona ba bile ba re fa lijo ka theko e tlaase, ho re nolofaletsa ho nehelana ka nako eohle ea rōna mosebetsing oa rōna oa boboleli. Nakoana re fihlile, re ile ra bolelloa hore re itlalehe setsing sa masole hang-hang. Ha ofisiri ea sesole e ithuta hore ha re bafetoheli empa re Lipaki tsa Jehova, e ile ea bontša thahasello e sa tloaelehang ’me ea amohela Bibele, haesita le lingoliloeng tsa Bibele le lipeeletso tsa limakasine tsa Molula-Qhooa le Tsoha! Ka mor’a moo, hoo e ka bang e mong le e mong motseng o ile a mamela ka hloko tšepiso ea Bibele ea bophelo bo phethahetseng bokamosong bo seng bo le haufi.”—Tšenolo 21:4.
Basebeletsi ba bane ba nako e tletseng ba ne ba batla ho tloha San Joaquín ho ea San Ramón, empa mokhoa feela o neng o fumaneha oa ho tsamaea e ne e le sekosekara. Ba ile ba sebelisa mabokose a libuka joaloka litulo. Ka nakoana e khutšoanyane mabokose ana a ile a senyeha ka lebaka la ho tlōla le ho khohlopeha ho matla ha sekosekara se koahetsoeng, se nang le mabili a phahameng a lehong. Esita le likhoho tse neng li palame li ile tsa bonahala li tšoeroe ke molikoa-likoane ka lebaka la ho tsamaea ha sekosekara.
Ka mor’a ho qeta lihora tse leshome ba ntse ba fohla lihlahla, ba ile ba fihla moo ho neng ho se na leha e le mohlala feela o bontšang tsela, ’me ho ne ho se ho fifala. Moqhobi o ile a tšosa sehlopha se palameng ha a re, “Ke nahana hore re lahlehile!” Ba palameng ba ile ba qala ho ipotsa hore, ‘Re ka lula joang lihlahleng tsena tse tletseng linoha le liphoofolo tse hlaha tse kotsi?’ ha moqhobi a eketsa, “Empa le se ke la khathatseha. Liphoofolo tsena li se li ile tsa nka leeto lena pele.” Ho ile ha fela ha ipaka ho le joalo. Pele hora e fela li ile tsa tsoa har’a lihlahla ’me tsa hlahella hona San Ramón!
Mona le teng ho ile ha qetoa matsatsi a mangata ho tsebahatsoa ka Paradeise e tlang ho bao le ka mohla ba neng ba e-s’o ka ba utloa ka eona. Ho ne ho se Lipaki tse neng li lula moo; leha ho le joalo ho na le ntho e ileng ea etsahala e ileng ea fetola seo.
Moromuoa oa K’hatholike o ne a ile a sala Lipaki morao ha li ntse li e-ea ka ntlo le ntlo. Ho ile ha etsahala hore a fapane le tsona ka litsela eaba li mo fumana lehaeng le latelang leo li ileng tsa fihla ho lona. Li makalitsoe ke botsoalle ba hae, li ile tsa mo siela buka ’Nete e Isang Bophelong bo sa Feleng. Le hoja eena ka boeena a ne a hlile a sa thahaselle, o ile a fa molamo oa hae buka ena, ’me molamo oa hae o ile a bala litaba tse ka har’a eona ka cheseho, a ithuta ho ea pele, ’me hamorao a fetoha Paki e kolobelitsoeng.
Boemo bo Tšosang Linōkeng tse Libakeng tse Chesang Haholo
Joale ipone u le karolong ea mokhanni oa seketsoana ka nōkeng u se tsamaisa metsing a kotsi, a loebehlanang. Mafika a sa bonahaleng, mabōpo a seretse, le likutu tsa lifate, hammoho le ho hlaha ha koeetsa e khōlō ka tšohanyetso, ke tse seng kae feela tsa likotsi. Litlhapi tse nyenyane tse lomang tse bitsoang li-piranha, litlhapi tse bitsoang li-electric eel, le litlhapi tse bitsoang li-stingray li teng ka bongata metsing ana. Tseo ke liphephetso tse neng li tobane le baena ba Riberalta ba neng ba e-na le mosebetsi oa ho pakela baahi ba pel’a nōka sebakeng seo.
E le hore ba ka fihla libakeng tsena tse ka thōko, ba ile ba etsa seketsoana se bitsoang Luz de los Ríos (Khanya ea Linōka). Nakong ea ketelo ea molebeli oa setereke le molebeli oa potoloho, ho ile ha etsoa qeto ea hore ho etsoe teko ea ho tsamaisa seketsoana. Tsohle li ile tsa ikela hantle haholo ho fihlela ha marulelo a haka lekala le lepelletseng. Metsi a phallang ka matla a ile a tjekisa sekepe hore se thule sefate se oeleng. Joaloka sabole, lekala le robehileng le motsu le ile la phunya lehlakore la seketsoana—la batla le khokhothela mosali oa molebeli oa setereke! Metsi a ile a qala ho kena, seketsoana sa phethoha, sa lahlela bapalami ba sona ka har’a metsi a bilohang. Molebeli oa setereke le mosali oa hae ba ne ba sa tsebe ho sesa! Ba thusoa ke ba neng ba tseba ho sesa, ba ile ba fihla moo ho omileng ba sireletsehile. Empa seketsoana se ile sa nyamela ka ho felletseng. Matsatsi ka mor’a moo se ile sa bonoa lik’hilomithara tse hlano ho theosa le nōka. Thepa eohle, ho kopanyelletsa le mabokose a 20 a lingoliloeng, e ne e lahlehile.
Ba Lekala la Likepe la Bolivia ba ile ba thusa ho se ntša metsing, ’me ka mor’a ho lokisoa ka libeke-beke, seketsoana se ne se boetse se loketse ho phetha leeto la sona la pele. Leeto leo le tšosang le ile la qala ka maemo a seng matle a leholimo le bothata ba enjine.
Sebakeng sa pele seo baena ba ileng ba emisa seketsoana ho sona, ba ile ba thulana le sehlopha sa Baevangeli ba neng ba soma: “Seketsoana sa lōna se senyenyane ha se na thuso nōkeng ena!” Boiteko ba ho bontša li-slide moo bo ile ba senngoa ke jenereithara e sa sebetseng hantle. Ha Lipaki li se li khutletse nōkeng hape, li ile tsa utloa hore ho na le liketsoana tse ling tse neng li ile tsa tla ka libuela-hōle tse ileng tsa lemosa ka ho tla ha “baprofeta ba bohata.” Ka ho hlakileng, ona e ne e le mosebetsi oa Baevangeli. Leha ho le joalo, o ile oa phahamisa khahleho ea batho feela.
Le hoja ketelo eo e ile ea felisa melaetsa ea bohata e hasoang ke baprofeta bao ka sebele e leng ba bohata, baena ba ile ba ikutloa ba tšohile, hobane ka pele ho bona ho ne ho sa ntsane ho larile leeto la matsatsi a 21 la ho ea fihla Fortaleza.
Ha ba le tseleng ba ile ba pakela morena oa morabe o hōle; o ile a mamela ka hloko. Ka puo ea Bibele e ileng ea fanoa ke e mong oa bo-pula-maliboho, sehlopha sa batho ba llang ba neng ba le sebakeng se ka thōko se tlositsoeng lifate le lihlahla se ile sa tšelisoa ke tšepo ea ’nete ka bafu. Monna e mong ea hōlileng ea nang le litelu tse telele tse tšoeu o ile a hlalosa kananelo ea hae e tsoang botebong ba pelo, ’me o ile a botsa hore na o ne a ka etsa peeletso ea makasine oa rōna bakeng sa lilemo tse leshome joang! Fortaleza, batho ba 120 ba ile ba rua molemo lenaneong la li-slide la Mokhatlo.
Bo-pula-maliboho bana ba ile ba ikutloa ba khotsofetse hakaakang hore ebe ba ile ba tlisa khanya ea ’nete libakeng tse hōle! Ka sebele, ha ho tsela e ’ngoe e sireletsehileng le e khotsofatsang ea ho sebelisa bophelo ba motho ho feta ea ho sebeletsa ’Mōpi oa bophelo ka bobona, Jehova Molimo.—Pesaleme ea 63:3, 4.
[’Mapa/Litšoantšo tse leqepheng la 26]
(Ha u batla ho bona boitsebiso bo hlophisitsoeng hantle, sheba sengoliloeng)
BOLIVIA
Guayaramerín
Riberalta
Fortaleza
San Joaquín
San Ramón
Trinidad
San Antonio