Bacha—Na le Tla Feta Teko ea Botšepehi ba Bokreste ka Katleho?
“HA U nahane ka boitšoaro bo bobe e le ho hloka botšepehi. U mpa feela u ithabisa. Ke ’nete hore, ua tseba hore haeba batsoali ba hao kapa baholo ba ne ba ka tseba taba eo, ho ne ho ka baka masisa-pelo le mathata a mangata. Empa ha u ntse u ithabisa, u thibela menahano eo kaofela hore e ka ba teng kelellong ea hao.”
Mohlankana ea qotsitsoeng ka holimo o ne a tsoela pele ho etsa bohlola ka lekunutung. O ne a phela bophelo bo habeli, a thetsa batsoali ba hae le phutheho ea Bokreste. O ne a sa lemohe hore ka nako eo o ne a hlōloa ke teko ea botšepehi ba Bokreste.
Likete tsa bacha ba Bakreste li hlōtsoe ke liteko tsa botšepehi tse tšoanang le tsena. ’Me hoa makatsa! Satane Diabolose o ‘loantša’ batho ba Molimo, o etsa sohle seo a ka se khonang ho senya botšepehi ba bona. (Tšenolo 12:17) Ka ho khethehileng o entse bacha bahlaseluoa ba “liketso tsa bolotsana” tsa hae. (Ba-Efese 6:11, Kingdom Interlinear) Ka hona ho hloka boiteko ba sebele le boikemisetso hore re lule re tšepahetse.
Ha e le hantle botšepehi ke eng? Mangolong a Seheberu, lentsoe le neng le sebelisoa pele-pele bakeng sa “botšepehi” le bontša tlamahano e lerato le motho ka morero o itseng. (Pesaleme ea 18:25) Ha le hlalose kamano e fokolang e ka felisoang habonolo empa le bua ka tlamahano e sa senyeheng ho fihlela morero oa eona o mabapi le motho eo o phethahetse. Mangolong a Segerike, lentsoe la pele-pele bakeng sa “botšepehi” le na le mohopolo oa khalalelo, toka, kapa tlhompho.
Kahoo botšepehi bo akarelletsa kamano e lokileng le Molimo. Ba-Efese 4:24, (BPN) e re bolella hore re “apare botho bo bocha, bo bōpiloeng . . . ka ho loka le ka khalalelo ea ’nete.” Na u rata ho tšepahala ho Jehova? Joale u tlameha ho hlaolela tlamahano e tšepahalang le eena, tlamo e sa senyeheng, boikemisetso ba ho mo thabisa ka liketso tsohle tsa hao. U tlameha ho khomarela litekanyetso tse lokileng tsa Jehova—ho sa tsotellehe hore na ho ipiletsa hakae ho etsa ka tsela e ’ngoe esele!
Likhatello tse Etsang Hore ba se ke ba Tšepahala
Hoa babatseha hore ebe, bongata ba bacha ba ka har’a Lipaki tsa Jehova ba loanela ho lula ba tšepahetse, phello ke hore ba thabela letsoalo le hloekileng. Leha ho le joalo moapostola Pauluse o ile a profeta hore “matsatsing a ho qetela,” ho se tšepahale e ne e tla ba tšoaneleho eo batho ka kakaretso ba tla ba le eona. (2 Timothea 3:1, 2, NW) Hoa soabisa hore ebe ba bang ba bacha ba Bakreste ba lumelletse lefatše lena le se nang botšepehi ho ba ‘hatella hore ba tšoane le lona.’ (Ba-Roma 12:2, Phillips) Satane o finyelletse see joang?
Khatello ea lithaka ke e ’ngoe ea libetsa tse sebetsang tsa Satane. Batho ba bangata ba rata hore batho ba bang ba nahane hantle ka bona, ’me Satane o tseba hore na a ka sebelisa joang takatso ena ea tlhaho. Ka baka la ho rata ho talingoa ke ba bang e le ba etsang lintho tse tloaelehileng, bacha ba bang ba Bakreste ba ile ba kopanela moqoqong o seng motle, boitšoarong bo bobe, ho tsubeng, le botahoeng—esita le tšebelisong e mpe ea lithethefatsi—ba entse tsena tsohle hore feela ba amoheloe ke lithaka tsa bona.
Satane o batla hore re ‘itšoare tumellanong le litakatso tsa nama ea rōna, re ntse re etsa lintho tse ratoang ke nama.’ (Ba-Efese 2:3, NW) O tseba hantle hore na khoheli ea takatso ea likamano tsa botona le botšehali e ka ba matla hakae nakong ea “palesa ea bocha.” (1 Ba-Korinthe 7:36) ’Me o batla hore u inehele litakatsong tseo. Ba bang ba bacha ba Bakreste ba mo fa monyetla ba sa hlokomele ka ho bala lingoliloeng tse tsosang takatso ea likamano tsa botona le botšehali, ho shebella libaesekopo, le li-video kapa ka ho pholla litho tsa botona le botšehali ho li khotsofatsa. Hamorao, lintho tsena, hangata li isa liketsong tse tebileng tsa ho se tšepahale. Na lefatše la Satane le u ‘hatelletse hore u tšoane le lona’ ho tse ling tsa lintho tsee?
Ho Phela Bophelo bo Habeli
Kaha ho etsa phoso e tebileng e joaloka bohlola ka bohona e le phoso e tebileng haholo, bacha ba bang ba tsebelana mathata a bona. Ba tšoana le “banna ba se nang ’nete,” bao ho builoeng ka bona ho Pesaleme ea 26:4, (NW) “ba patang seo ba leng sona.” Bacha ba joalo ba phela bophelo bo habeli, ba itšoara ka tsela e itseng ha ba na le batsoali ba bona kapa Bakreste ba bang ba hōlileng moeeng le ka e ’ngoe e fapaneng ha ba na le lithaka tsa bona.
Leha ho le joalo, ho phela bophelo bo habeli, ho hlōleha ho phetha morero oa hona ’me ho kotsi. Liketso tse fosahetseng tse sa thibeloeng hangata li isa liketsong tse ling tse fosahetseng. ’Me le hoja qalong letsoalo la e mong le ka ’na la khathatseha, ha a ntse a phehella ho etsa phoso ka nako e telele, letsoalo la hae le tla sebetsa hanyenyane phosong. E mong a ka ’na a hla a ‘khaotsa ho utloa bohloko’ ha a etsa phoso.—Ba-Efese 4:19, Kingdom Interlinear.
Boemong bona ho ba thata haholo hore a bolele phoso ea hae e le hore a fumane thuso. Ho etsahala joalo haholo-holo haeba bacha ba bang ba Bakreste ba ameha phosong. Hangata ho ba le boikutlo ba ho tšepahala bo lebisitsoeng ’nģeng e fosahetseng. Mocha ea qotsitsoeng qalong ea sehlooho sena o hlalositse: “U elelloa seo u se etsang, ’me u tseba hore se fosahetse. E le hore ba bang ba amehang ba se ke ba kena khathatsong, u lumela hore ha u na ho bolella mang kapa mang.”
Le hoja motho a ka ’na a ‘pata seo a leng sona’ ho batsoali ba hae kapa phuthehong, a ke ke a se patela Jehova. “Ha ho sebopuoa se seng pepeneneng ho oona; empa tsohle li hlobotse, li senohile mahlong a eo re nang le litaba le eena.” (Ba-Heberu 4:13) Bibele ea re tiisetsa: “Ea patang libe tsa hae a ke ke a ba le katleho.” (Liproverbia 28:13, BPN) Ha nako e ntse e ea phoso e tla senoleha. Ha ho motho ea ka fetang Jehova ka bohlale. Liproverbia 3:7 e re: “U se ke ua ipona bohlale. Tšaba Jehova, u sesefe bobe.” Hape, hopola hore, “mahlo a Jehova a linģalong tsohle, a qamaka ba babe le ba batle.”—Liproverbia 15:3.
Mocha eo ho builoeng ka eena ka holimo, hammoho le ba bang ba bangata ba amehang tabeng ea ho etsa liphoso lekunutung, ba ile ba fumanoa, ’me eena le metsoalle ea hae ba ile ba lokela ho lelekoa phuthehong ea Bokreste. Hamorao ba ile ba hlaphoheloa moeeng ’me ba khutlisetsoa ka phuthehong. Ho ntse ho le joalo, eo e bile tsela e thata hakaakang ea ho ithuta se boleloang ke botšepehi!
‘Ho Lokisa Litaba’ le Molimo
Ho thoe’ng haeba e mong a se a ipakile a sa tšepahale ka tsela e itseng, mohlomong ka ho etsa ketso e itseng e fosahetseng? Ho bonolo ho ithetsa le ho latola tlhokahalo ea ho lokisa litaba. Mocha e mong eo ka lekunutung a ileng a kopanela bohloleng o itse: “Ke ile ka eketsa nako ea tšebeletso ea ka ea tšimo, ke nahana hore sena se ka koahela phoso ea ka ka tsela e itseng.” Sechaba se itaolang sa Iseraele ka ho tšoanang se ile sa leka ho thabisa Jehova ka mahlabelo. Empa Jehova o ile a hana boinehelo bo joalo ba boikaketsi. O ile a ba phehella: “Itlhatsoeng, le itlhoekise; tlosang bolotsana ba liketso tsa lōna pel’a mahlo a ka, lesang ho etsa hampe.” Jehova o ne a ka amohela mahlabelo a bona feela ka mor’a hore ba ‘lokise litaba le eena.’ Le kajeno ho joalo bakeng sa ofe le ofe ea ka ’nang a ameha phosong.—Esaia 1:11, 15-18.
Ha ho ea ka lokisang litaba le Jehova habonolo feela ka ho tšepa e mong oa lithaka tsa hae. Lebaka le leng la sena, ke hore hase ka mehla lithaka li fanang ka thuso e molemohali, kaha hangata lia tšoana tabeng ea ho ba le phihlelo e lekanyelitsoeng bophelong. Habohlokoa haholoanyane, li ke ke tsa u tšoarela sebe sa hao. Ke Molimo feela o ka etsang seo. Kahoo “tšollela pelo ea hao” ho oona ka ho o bolella libe tsa hao. (Pesaleme ea 62:8, NW) Le hoja e ka ’na eaba u soabetse boitšoaro ba hao ka ho teba, kholiseha hore Jehova “o tšoarela haholo.”—Esaia 55:7.
U tla hloka thuso e eketsehileng. Mocha e mong oa Mokreste ea ileng a fumana molemo thusong e joalo oa eletsa: “Etsa hore batsoali ba hao ba tsebe, etsa hore baholo ba tsebe hang-hang—qalong feela.” Mohlomong batsoali ba hao ba boemong bo botle ba ho u thusa. “Fana ka pelo ea hao” ho bona, ba lumelle ho tseba botebo ba mathata a hao. (Liproverbia 23:26, NW) Ba ka etsa tokisetso ea hore u fumane thuso e eketsehileng ho baholo ba phutheho ha ho hlokahala.—Jakobo 5:14, 15.
Ho Bonahatsa Botšepehi ba ’Nete—Joang?
Ha e le hantle, ho ka ba molemo hore le ka mohla u se oele boitšoarong bo sa tšepahaleng ho tloha qalong. Pesaleme ea 18:26, (BPN) ea re bolella: “Ho ea tšepahalang, [Jehova] ua tšepahala; ho ea se nang koli, u hloka koli.” Jehova o hlohonolofatsa haholo bao ka botšepehi ba bolokang litekanyetso tse phahameng tsa boitšoaro.
Leha ho le joalo, ho na le litsela tse ling, tseo ka tsona botšepehi ba rōna bo ka ’nang ba behoa tekong. Ka mohlala, a re re mohlomong motsoalle e mong oa hao o qalile ho nka tsela e sa lokang. Na u tla lumella botšepehi bo lebisitsoeng ’nģeng e fosahetseng ho motsoalle eo oa hao hore e be ba bohlokoa ho feta botšepehi ba hao ho Jehova? U ka bontša lerato ka ho atamela motsoalle eo oa hao le ho mo phehella hore a bolelle batsoali ba hae kapa baholo taba ena. Bolella motsoalle oa hao hore haeba a sa etse joalo ka mor’a nako e loketseng, u tla lokela ho etsa seo ka bouena. Liproverbia 27:5, (NW) e re: “Khalemelo ea pontšeng e ntle ho feta lerato le patoang.” Ka ho thusa motsoalle oa hao ka tsela ena, o bontša eseng feela hore botsoalle ba hao ke ba sebele empa hape le ho teba ha botšepehi ba hao ho Jehova.
Ho sa tsotellehe hore na teko ke efe, matla a ho bontša botšepehi a tlisoa ke ho ba le kamano ea botho e matla le Jehova. Thapelo e nang le moelelo le thuto ea botho e etsoang ka mafolo-folo lia hlokahala hore re thabele kamano e joalo. Hoa thahasellisa hore bacha bohle ba entseng liphoso ba boletsoeng pele, ba ile ba lumela hore mekhoa ea bona ea ho rapela le ea thuto ea bona ea botho e ne e fetohile tloaelo feela—’me ha nako e ntse e ea ba ile ba khaotsa ho li etsa. Ba ile ba khaotsa ho nka Jehova e le motho oa sebele, ’me kapele ha latela boitšoaro bo litšila. Na u matlafatsa kamano ea hao le Jehova e le hore u ka lula u tšepahetse ka thapelo le ka thuto ea botho?
Ke ’nete hore ka linako tse ling u ka ’na ua ipotsa hore na ebe u lahleheloa ke ho hong ha u sa be teng menyakeng. Moroetsana e mong o itse: “Ka linako tse ling ho bonahala eka batho ba lefatše ba nyakalletse, empa ha u se u kenelletse boemong bona, u ka bona hore hase monyaka ho hang.” O ne a bua ho tsoa phihlelong, o ile a kopanela boitšoarong bo bobe ba likamano tsa botona le botšehali, bo felletseng ka hore a ime le ho ntša mpa. Hona joale o re: “Ho ba linneteng ke tširelo,”—e leng thuto eo a ithutileng eona ka thata. Pesaleme ea 119:165, (NW) e re hopotsa hore: “Khotso e ngata ke ea ba ratang molao [oa Molimo].”
Ka baka leo, etsa sohle seo u ka se khonang ho lula u tšepahala. Sebeletsa ho haha kamano e tšoarellang le Jehova. Hloea se leng sebe ’me u khomarele se leng molemo. (Ba-Roma 12:9) Pesaleme ea 97:10, (NW) e re bolella hore: “Lōna barati ba Jehova, hloeang se leng sebe. O lebela liphefumolohi tsa ba tšepahalang ba hae; o ba lokolla letsohong la ba khopo.” Joaloka mocha oa Mokreste, u tla fumana molemo tšireletsong ea Jehova le ho thabela bophelo bo sa feleng haeba u feta teko ea botšepehi ba Bokreste ka katleho.