“Nthuse Moo ke Haelloang ke Tumelo!”
“Ntat’a ngoana e monyenyane o ne a ntse a re: ‘Ke na le tumelo! Nthuse moo ke haelloang ke tumelo!’”—MAREKA 9:24, NW.
1. Ke eng e ileng ea susumelletsa ntate e mong ho hooa, “Nthuse moo ke haelloang ke tumelo”?
NTAT’A moshanyana ea kenoeng ke modemona o ne a eme pel’a Jesu Kreste. Monna eo o ne a laba-labela hakaakang hore ngoan’a hae e monyenyane a phekoloe! Barutuoa ba Jesu ba ne ba hlokile tumelo e lekaneng ho leleka modemona, empa ntate eo o ile a hooa: “Ke na le tumelo! Nthuse moo ke haelloang tumelo!” Ka matla ao a a fuoeng ke Molimo, Jesu o ile a leleka modemona, ’me ntle le pelaelo seo se ile sa matlafatsa tumelo ea ntat’a moshanyana eo.—Mareka 9:14-29, NW.
2. Mabapi le tumelo, ke ka litsela life tse peli Bakreste ba sa hlajoeng ke lihlong?
2 Joaloka ntate ea neng a tletse tšepo oa moshanyana eo, mohlanka ea tšepahalang oa Jehova ha a hlajoe ke lihlong ho re: “Ke na le tumelo!” Basomi ba ka ’na ba latola matla a Molimo, ba latola hore Lentsoe la oona ke ’nete, esita le hona hore o teng. Empa Bakreste ba ’nete ba bolela ba sa qea-qee hore ba lumela ho Jehova Molimo. Leha ho le joalo, ha ba buisana le Ntat’a bona oa leholimo ka thapelo boinotšing, batho bona bana ba ka ’na ba ipiletsa: “Nthuse moo ke haelloang ke tumelo!” Ba etsa sena ba sa hlajoe ke lihlong, kaha baa tseba hore esita le baapostola ba Jesu Kreste ba ile ba kōpa: “Re ekeletse tumelo.”—Luka 17:5, BPN.
3. Ke eng e hlokomelehang mabapi le kamoo Johanne a sebelisitseng lentsoe “tumelo” ka teng Kosepeleng ea hae, hona ke hobane’ng ha see se loketse?
3 Ka ho khetheha Mangolo a Segerike a Bakreste a bolela ho hongata ka tumelo. Ha e le hantle, Kosepele ea Johanne e sebelisa mantsoe a fapa-fapaneng a Segerike a amanang le “tumelo” ka makhetlo a fetang 40 lekholong khafetsa ho feta Likosepele tse ling tse tharo ha li kopantsoe hammoho. Johanne o ile a hatisa hore ho ba le tumelo ha hoa lekana; ho e bontša ke habohlokoahali. Ha a ngola hoo e ka bang ka 98 C.E., o ile a bona tšusumetso e kotsi ea bokoenehi e se e ntse e nanarela Bakreste ba fokolang tumelong. (Liketso 20:28-30; 2 Petrose 2:1-3; 1 Johanne 2:18, 19) Kahoo ho bontša tumelo, ho e paka ka liketso tsa boinehelo ba bomolimo, e ne e le habohlokoahali. Linako tse mahlonoko li ne li larile ka pele.
4. Ke hobane’ng ha ho se letho leo batho ba nang le tumelo ba ka hlōlehang ho le etsa?
4 Tumelo e etsa hore Bakreste ba khone ho sebetsana le mathata leha e le afe. Jesu o ile a bolella barutuoa ba hae hore hoja ba ne ba e-na le “tumelo e ka ka hlaku ea mosetareda,” ha ho letho leo ba neng ba ke ke ba khona ho le etsa. (Mattheu 17:20) Ka tsela eo, o ne a hatisa matla a tumelo, e leng tholoana ea moea o halalelang. Ka hona Jesu o ne a sa hatise seo batho ba ka se etsang, empa o ne a hatisa seo moea oa Molimo, kapa matla a sebetsang, o ka se etsang. Ba tataisoang ke oona ha ba hōlise litšitiso le mathata a manyenyane ho a fetola lithaba tsa tonanahali. Ho sebelisa bohlale boo moea oa Molimo o fanang ka bona ho ba thusa ho talima lintho ka tsela e nepahetseng. Esita le mathata a tebileng aa fokotseha ha a loantšoa ka matla a tšehetsang a tumelo.—Mattheu 21:21, 22; Mareka 11:22-24; Luka 17:5, 6.
Ho Rapella Hore Tumelo e se ke ea Fokola
5-7. (a) Jesu o ile a fana ka temoso efe mabapi le tumelo ha a theha Sehopotso? (b) Ke joang tumelo ea Petrose e ileng ea etsa hore a khone ho matlafatsa baena ba hae?
5 Ka 33 C.E., Jesu o ile a keteka Paseka hammoho le barutuoa ba hae ka lekhetlo la ho qetela. Ka mor’a hore a leleke Judase Iskariota, o ile a theha mokete oa Sehopotso, a re: “Ke le nea ’muso, joale ka ha Ntate a ’neile oona . . . Simone! Simone! bona, Satane o le qetse hore a le hlokole joale ka koro; empa ’na ke u rapeletse hore tumelo ea hao e tle e se ke ea fela. Joale, uena, etlere hobane u bake, u tiise banab’eno.”—Luka 22:28-32.
6 Jesu o ile a rapella hore tumelo ea Simone Petrose e se ke ea fela. Le hoja ka ho itšepa ho tlōlisang Petrose a ne a ile a ithorisa ka hore le ka mohla a ke ke a latola Jesu, nakoana ka mor’a moo o ile a mo latola hararo. (Luka 22:33, 34, 54-62) Ha e le hantle, joalokaha ho ne ho boletsoe esale pele, ha Molisa a bolaoa linku li ile tsa qhalana. (Zakaria 13:7; Mareka 14:27) Leha ho le joalo, ha Petrose a hlaphoheloa ka mor’a ho oela lerabeng la tšabo, o ile a matlafatsa baena ba hae ba moea. O ile a hlahisa taba ea hore ho koaloe sekheo sa Judase Iskariota ea sa tšepahaleng. A sebeletsa e le ’muelli oa baapostola ka Pentekonta ea 33 C.E., Petrose o ile a sebelisa senotlolo sa pele sa “linotlolo” tseo Jesu a neng a mo file tsona, a bulela Bajode tsela ea ho fetoha litho tsa ’Muso. (Mattheu 16:19; Liketso 1:15–2:41) Satane o ne a batla baapostola e le hore a ba hlokole joaloka koro, empa Molimo o ile oa etsa bonnete ba hore tumelo ea bona ha e fokole.
7 Nahana hore na Petrose o ile a ikutloa joang ha a utloa Jesu a re: “Ke u rapeletse hore tumelo ea hao e tle e se ke ea fela.” Nahana! Morena le Monghali oa Petrose o ne a rapelletse hore tumelo ea Petrose e se ke ea fokola. ’Me ha ea ka ea fokola, kapa ea fela. Ha e le hantle, ka Pentekonta, Petrose le ba bang e ile ea e-ba bona ba pele ba ileng ba tlotsoa ka moea o halalelang hore e be bana ba Molimo ba moea, ba nang le tebello ea ho ba majalefa hammoho le Kreste khanyeng ea leholimo. Ha moea o halalelang o se o sebetsa holim’a bona ka tekanyo e khōlō ka ho fetisisa, ba ne ba ka bonahatsa litholoana tsa oona, ho akarelletsa tumelo, ho feta leha e le neng pele. Eo e ile ea e-ba karabelo e babatsehang hakaakang kōpong ea bona: “Re ekeletse tumelo”!—Luka 17:5, BPN; Ba-Galata 3:2, 22-26; 5:22, 23.
Ho Tobana le Liteko tse Larileng ka Pele ka Tumelo
8. Mokhatlo o hlophisitsoeng o re file temoso efe e nakong mabapi le ho phethahatsoa ha 1 Ba-Thessalonika 5:3 (NW)?
8 Phethahatsong ea boprofeta ba Bibele, haufinyane re tla utloa mohoo oa “Khotso le tšireletseho!” (1 Ba-Thessalonika 5:3, NW) Na e be see se ka leka tumelo ea rōna? E, hobane re kotsing ea ho hlahuoa lesumatha ke katleho eo ho ka ’nang ha bonahala eka lichaba li e finyelletse ea ho tlisa khotso. Empa re ke ke ra kopanela moeeng oa batho ba joalo ba phatlalatsang khotso haeba re hopola hore Jehova Molimo ha a sebelise mokhatlo leha e le ofe oa lefatše lena ho finyella seo. O na le tsela ea hae ea ho tlisa khotso ea ’nete, ’me sena o tla se etsa feela ka ’Muso oa hae o tlas’a Jesu Kreste. Kahoo, katleho leha e le efe eo lichaba li ka ’nang tsa ba le eona ea ho tlisa khotso, e tla be e le ea motsotsoana e bile e le e thetsang feela. Ho re thusa ho lula re itebetse ntlheng ena, “mohlanka ea khabane, ea bohlale” o tla tsoela pele ho phatlalatsa litemoso tse nakong e le hore phatlalatso ea boikaketsi ea “Khotso le tšireletseho” e tla etsoa ke lichaba tsa tsamaiso ena ea khale ea lintho e se ke ea hlaha bahlanka ba Jehova lesumatha.—Mattheu 24:45-47.
9. Ke hobane’ng ha ho timetsoa ha Babylona e Moholo ho tla hloka hore re be le sebete le tumelo?
9 Mohoo oa “Khotso le tšireletseho!” e tla ba letšoao la “timetso ea tšohanyetso” e tla oela Babylona e Moholo, e leng ’muso oa lefatše oa bolumeli ba bohata. (Tšenolo 17:1-6; 18:4, 5) Sena le sona se tla leka tumelo ea Bakreste. Ha bolumeli ba bohata bo heleha ’me bo sala e se e le lithako feela, na Lipaki tsa Jehova li tla lula li tiile tumelong? Ka ho hlakileng li tla lula li tiile. Ketsahalo ena—eo batho ba bangata ba tla beng ba sa e lebella eo hape ba ke keng ba e utloisisa—e ke ke ea tlisoa ke motho. Batho ba tlameha ho tseba hore ha e le hantle ke kahlolo e tsoang ho Jehova, ho halaletsa lebitso leo bolumeli ba bohata bo ’nileng ba le nyefola ka nako e telele. Empa batho ba ka tseba joang haeba ho se ea ba bolelletseng? ’Me ke bo-mang bao ho ka lebelloang hore ba tla ba bolella ka ntle le Lipaki tsa Jehova?—Bapisa le Ezekiele 35:14, 15; Ba-Roma 10:13-15.
10. Tlhaselo ea Gogo ho batho ba Jehova e tla ba teko ea tumelo joang?
10 Lipaki tsa Jehova tse tlotsitsoeng hammoho le metsoalle ea tsona e nang le tšepo ea lefatšeng li ’nile tsa ba le sebete se hlokahalang ho bolella batho ba bang ka phethahatso e seng e le haufi haholo ea kahlolo ea Jehova khahlanong le Babylona e Moholo le tsamaiso eohle ea lintho ea Satane. (2 Ba-Korinthe 4:4, NW) Mosebetsing oa hae joaloka Gogo oa Magogo, o bontšang boemo bo nyelisehang boo a leng ho bona hona joale, Satane o tla bokella mabotho ’ohle a lefatše ho ea hlasela batho ba Molimo ka tlhaselo e matla ka ho fetisisa. Tumelo ea Lipaki tsa Jehova matleng a Molimo a ho li sireletsa e tla lekoa. Empa re ka ba le tumelo ea hore joalokaha Lentsoe la Molimo le boletse esale pele, Jehova o tla pholosa batho ba oona.—Ezekiele 38:16; 39:18-23.
11, 12. (a) Ke eng se ileng sa tiisa hore Noe le lelapa la hae baa bolokeha nakong ea Moroallo? (b) Ke eng seo ho ke keng ha hlokahala hore re tšoenyehe ka sona nakong ea mahlomola a maholo?
11 Kajeno ha re tsebe hantle hore na Jehova o tla sireletsa batho ba hae joang ‘mahlomoleng a maholo,’ empa lena hase lebaka la ho belaella hore o tla ba sireletsa. (Mattheu 24:21, 22) Boemo boo bahlanka ba Molimo ba kajeno ba leng ho bona bo tla tšoana le boo Noe le lelapa la hae ba ileng ba iphumana ba le ho bona nakong ea Moroallo. Ba koaletsoe ka har’a areka ’me ba pota-potiloe ke metsi a loebehlanang a timetso, mohlomong ba ile ba hlolloa ke pontšo ena ea matla a Molimo ’me e tlameha e be ba ile ba rapela ka tieo. Ha ho pontšo ea Mangolo ea hore ba ne ba tšoenyehile ’me ba ntse ba ipotsa: ‘Na e be areka ee e hlile e tiile ka ho lekaneng hoo e tla tšoarella ho feta matleng aa a timetso? Na e be re na le lijo tse lekaneng ho fihlela Moroallo o fela? Na e be re tla khona ho sebetsana ka katleho le maemo a fetohileng lefatšeng ka mor’a moo?’ Liketsahalo tse ileng tsa latela li ile tsa bontša hore matšoenyeho a joalo e ne e tla be e le a se nang motheo.
12 Ho tiisa hore Noe le lelapa la hae ba tla bolokeha, ho ne ho hlokahala hore ba bontše tumelo. Sena se ne se bolela ho latela litaelo le tataiso tsa moea o halalelang oa Molimo. Mahlomoleng a maholo, re tla tlameha ho latela tataiso ea moea o halalelang le ho utloa litaelo tseo Jehova a fanang ka tsona ka mokhatlo oa hae o hlophisitsoeng. Joale re ke ke ra ba le lebaka la ho tšoenyeha le ho botsa: ‘Litlhoko tsa rōna tsa moea le tsa lintho tse bonahalang li tla khotsofatsoa joang? Ho tla etsoa tokisetso efe bakeng sa batho ba hōlileng kapa ba hlokang tlhokomelo kapa phekolo e khethehileng ea meriana? Jehova o tla etsa joang hore re khone ho pholoha ho kena lefatšeng le lecha?’ Ka tumelo e matla, bahlanka bohle ba Jehova ba tšepahalang ba tla tlohella sohle matsohong a hae a tšoanelehang.—Bapisa le Mattheu 6:25-33.
13. Hang ha mahlomola a maholo a qaleha, ke hobane’ng ha re tla hloka tumelo e kang ea Abrahama?
13 Hang ha mahlomola a maholo a se a qalile, ntle le pelaelo tumelo ea rōna ho Molimo e tla matlafala haholo. Ka holim’a tsohle, re tla bona hore Jehova o phethahatsa seo a boletseng hore o tla se etsa. Re tla iponela ka mahlo a rōna phethahatso ea kahlolo ea hae! Empa na rōna ka bomong re tla ba le tumelo e lekaneng ho lumela hore ha Molimo o felisa ba khopo, o tla boloka batho ba oona? Na re tla tšoana le Abrahama, ea neng a e-na le tumelo ea hore ‘Moahloli oa lefatše lohle o tla etsa se lokileng,’ a ke ke a felisa ba lokileng hammoho le ba khopo?—Genese 18:23, 25.
14. Ke lipotso life tse lokelang ho re susumelletsa ho hlahloba tumelo ea rōna le ho sebetsa ka thata hore re e matlafatse?
14 Ke habohlokoa hakaakang hore re matlafatse tumelo ea rōna hona joale! Ha e le mona bofelo ba tsamaiso ena e khopo ea lintho bo se bo le haufi hakana, a re lumelleng moea oa Molimo hore o re susumelletse “liketsong tse halalelang tsa boitšoaro le liketsong tsa boinehelo ba bomolimo.” (2 Petrose 3:11-14, NW) Joale nakong ea mahlomola a maholo re ke ke ra ngongoreha ka litaba tse kang: ‘Na e be kea tšoaneleha hore nka amohela tšireletso ea Jehova? Na e be nka be ke entse ho eketsehileng tšebeletsong ea hae? Na kannete ke sebelelitse ho apara “botho bo bocha” ka thata ka ho lekaneng? Na e be ke motho oa mofuta oo Jehova a o batlang lefatšeng le lecha?’ Lipotso tse joalo tse phenyang maikutlo li lokela ho re susumelletsa ho hlahloba tumelo ea rōna le ho sebetsa ka thata ho e matlafatsa hona joale!—Ba-Kolosse 3:8-10, BPN.
Tumelo e ka re Folisang
15. Ke eng seo ka linako tse ling Jesu a neng a se bolella batho bao a ba phekotseng, empa ke hobane’ng ha see se sa tšehetse ho phekola ka tumelo ho etsoang kajeno?
15 Jesu ha aa ka a lekanyetsa mesebetsi ea hae ea ho phekola batho ’meleng ho batho ba nang le tumelo feela. (Johanne 5:5-9, 13) Kahoo mosebetsi oa hae ha o tšehetse thuto eo e seng ea Mangolo ea ho phekola ka tumelo. Ke ’nete hore ka linako tse ling Jesu o ile a bolella batho bao a ba phekotseng: “Tumelo ea hao e u folisitse.” (Mattheu 9:22, BPN; Mareka 5:34, BPN; 10:52, BPN; Luka 8:48, BPN; 17:19, BPN; 18:42, BPN) Empa ka ho bolela sena, o ne a mpa a supa ’nete e totobetseng: Haeba batho bao ba kulang ba ne ba haelloa ke tumelo matleng a Jesu a ho phekola, ba ka be ba sa ka ba tla ho eena hore a tl’o ba phekola.
16. Jesu o laola lenaneo lefe la phekolo kajeno?
16 Kajeno Jesu Kreste o laola lenaneo la phekolo ea moea, ’me batho ba ka holimo ho 4 000 000 ba se ba le mocheng oa ho rua molemo ho lona. Joaloka Lipaki tsa Jehova, ba thabela bophelo bo botle ba moea ho sa tsotellehe ho kula leha e le hofe ha ’mele hoo e ka ’nang eaba ba na le hona. Bakreste ba tlotsitsoeng har’a bona ba na le tšepo ea leholimo, ’me ba ‘talimile linthong tse sa bonahaleng tse ke keng tsa e-ba le bofelo.’ (2 Ba-Korinthe 4:16-18; 5:6, 7) ’Me Bakreste ba nang le tšepo ea lefatšeng ba talimile ka tebello e khōlō liketsong tse babatsehang tsa ho phekoloa ’meleng tse tla ba teng lefatšeng le lecha la Molimo.
17, 18. Ke tokisetso efe ea Jehova e hlalositsoeng ho Tšenolo 22:1, 2, (BPN) ’me ke joang ho hlokahalang tumelo hore re tle re rue molemo ho eona?
17 Moapostola Johanne o ile a bua ka litokisetso tsa Molimo tsa bophelo bo sa feleng mantsoeng ana a hlahang ho Tšenolo 22:1, 2 (BPN): “Lengeloi la mpontša nōka ea metsi a bophelo, e benyang joaloka lehakoe, e kollang teroneng ea Molimo le ea Konyana. Bohareng ba lebala la motse oo, lipakeng tsa makala a mabeli a nōka, ho metse sefate sa bophelo, se behang litholoana ha leshome le metso e ’meli ka selemo, e leng hanngoe ka khoeli e ’ngoe le e ’ngoe, ’me mahlaku a sona a phekola lichaba.” “Metsi a bophelo” a akarelletsa Lentsoe la Molimo la ’nete le tokisetso e ’ngoe le e ’ngoe ea Jehova ea ho phekola batho ba utloang sebe le lefu le ho ba fa bophelo bo sa feleng motheong oa sehlabelo sa Jesu sa topollo. (Ba-Efese 5:26; 1 Johanne 2:1, 2) Ha balateli ba Jesu ba tlotsitsoeng ba 144 000 ba sa ntsane ba le lefatšeng, ba noa tokisetso ea Molimo ea bophelo ka Kreste ’me ba bitsoa “lifate tse khōlō tsa ho loka.” (Esaia 61:1-3, NW; Tšenolo 14:1-5) Ba behile litholoana tsa moea tse ngata haholo lefatšeng. Ha ba se ba tsoselitsoe leholimong, nakong ea Puso ea Kreste ea Lilemo tse Sekete, ba tla kopanela ho abeng litokisetso tsa topollo tse tla ‘phekola lichaba’ sebe le lefu.
18 Haeba re e-na le tumelo e matla litokisetsong tsena tsa Molimo, re tla ba le boikemisetso bo boholoanyane ba ho latela tataiso ea moea oa oona e le hore re kopanele ho tsona. Ka ho hlakileng phetheho ea ’mele e tla tla ha motho a bontša tumelo ho Kreste ’me a etsa tsoelo-pele moeeng. Le hoja motho a tla be a phekotsoe mefokolo e meholo ka mohlolo, o tla atamela phethehong haholoanyane ha a ntse a tloaela ho etsa se nepahetseng. O tla kopanela tokisetsong ea Molimo ea phekolo ka sehlabelo sa Kreste ka mehla. Kahoo tumelo e tla ba le tšusumetso ho phekoloeng ha rōna le ho etsoeng batho ba phethahetseng ka tsela ea nama.
‘Ho Bolokeha ka Tumelo’
19. Ke hobane’ng ha e le habohlokoahali hore re lule re tiile tumelong?
19 Ho fihlela ha ho qaleha ha lefatše le lecha la Molimo ho felisa lefifi la lefatše le khopo la kajeno ka ho sa feleng, ke habohlokoa hakaakang hore bahlanka ba Jehova ba lule ba tiile tumelong! Batho ba ‘hlokang tumelo’ ba tla lahleloa ka “letšeng le tukileng hampe la mollo le sebabole,” e leng lefu la bobeli. Bonyane sena se tla etsahala ka mor’a teko ea ho qetela bofelong ba Puso ea Kreste ea Lilemo tse Sekete. (Tšenolo 20:6-10; 21:8) Moputso oa ba tsoelang pele ho bontša tumelo le ba tla pholoha ho thabela bokamoso bo sa feleng e tla ba o hlohonolofalitsoeng hakaakang!
20. Ba-Korinthe ba pele 13:13 e tla ba le moelelo o khethehileng joang bofelong ba Puso ea Kreste ea Lilemo tse Sekete?
20 Joale mantsoe ana a Pauluse a hlahang ho 1 Ba-Korinthe 13:13 (BPN) a tla ba le moelelo o khethehileng: “Joale tsena tse tharo, e leng tumelo, le tšepo, le lerato, li tla ’ne li be teng, empa e kholo ho tsona ke lerato.” Ho tla be ho se ho sa hlokahale hore re bontše tumelo ea hore tšepiso ea boprofeta e ho Genese 3:15 e tla ba ntho ea sebele kapa ho tšepa hore e tla phethahatsoa. Seo se tla be se se se etsahetse. Joaloka baboloki ba botšepehi, re tla tsoela pele ho tšepa Jehova, ho lumela ho eena le ho Mora oa hae, le ho ba rata joaloka ba phethahalitseng boprofeta bona. Ho feta moo, lerato le tebileng le teboho e tlohang botebong ba pelo bakeng sa poloko ea rōna li tla etsa hore re khomarele Molimo ka boinehelo bo ke keng ba senngoa ka ho sa feleng.—1 Petrose 1:8, 9.
21. Ke eng seo re lokelang ho se etsa kajeno e le hore re tle re ‘bolokehe ka tumelo’?
21 Ka mokhatlo oa hae o hlophisitsoeng o bonahalang, Jehova o entse litokisetso tse babatsehang bakeng sa ho matlafatsa tumelo. Li sebelise ka botlalo. Kopanela ka mehla libokeng tsa batho ba Molimo ’me u nke karolo ho tsona. (Ba-Heberu 10:24, 25) Ithute Lentsoe la oona le likhatiso tsa Bokreste ka mafolo-folo. Kōpa Jehova ka tieo hore a u fe moea oa hae o halalelang. (Luka 11:13) Etsisa tumelo ea ba etelletseng pele ka boikokobetso ka phuthehong. (Ba-Heberu 13:7) Hanela liteko tsa lefatše. (Mattheu 6:9, 13) E, tebisa kamano ea hao ea botho le Jehova ka hohle kamoo u ka khonang. Ka holim’a tsohle, tsoela pele ho bontša tumelo. Joale u ka ba har’a ba khahlisang Jehova le ba tla bolokeha, hobane Pauluse o itse: “Le bolokehile ka mohau, ka tumelo; ha ho tsoe ho lōna, ke mpho ea Molimo.”—Ba-Efese 2:8.
Likarabelo tsa Hao ke Life?
◻ Ke liteko life tsa tumelo tse larileng ka pel’a rōna ka ho toba?
◻ Tumelo ea rōna e ka re folisa ka litsela life tse peli?
◻ Ho latela 1 Petrose 1:9, re tlameha ho boloka tumelo halelele hakae?
◻ Re fuoe litokisetso life bakeng sa ho matlafatsa tumelo ea rōna?
[Setšoantšo se leqepheng la 15]
Joaloka ntate eo Jesu a ileng a phekola mor’a hae, na uena ka bouena u ikutloa u hloka tumelo e eketsehileng?
[Setšoantšo se leqepheng la 17]
Tumelo e kang ea Noe le lelapa la hae e tla be e hlokahala bakeng sa ho pholoha ‘mahlomoleng a maholo’