Pōpo e Ncha ea Etsoa!

MORENA SALOMONE ea bohlale o kile a re: “Ha ho ho hocha leha ho le hong tlas’a letsatsi.” (Moeklesia 1:9) Hoo ke ’nete ka qitikoe ea lefatše leo re phelang ho lona, empa ho thoe’ng ka sebaka se seholo sa pōpo ea Jehova ea moea? Sebakeng seo, ea moholo ho feta Salomone, ha e le hantle, eo e neng e le motho e moholo ka ho fetisisa ea kileng a phela, e ile ea e-ba pōpo e ncha e hlahelletseng. Hoo ho etsahetse joang?

Ka selemo sa 29 sa Mehla e Tloaelehileng ea rōna, motho ea phethahetseng, Jesu, o ile a itlhahisa ho Johanne Nōkeng ea Jordane hore a mo kolobetse. “Eitse Jesu ha a kolobelitsoe, a phakisa a tsoa metsing, ’me hang, maholimo a phetleloa eena; a bona Moea oa Molimo o theoha o ka leeba, o tla holim’a hae. ’Me ha utloahala lentsoe le tsoang maholimong, le re: Enoa ke Mora oa ka ea ratoang, eo ke khahlisoang ke eena.” (Mattheu 3:16, 17) Ka hona, motho Kreste Jesu e ne e le oa pele pōpong e ncha, a tlotsitsoe ho etsa thato ea Molimo. Hamorao, motheong oa lefu la hae la sehlabelo, Jesu e ile ea e-ba ’Muelli oa selekane se secha pakeng tsa Molimo le sehlopha se khethiloeng sa batho. E mong le e mong oa bona ea e-ba “pōpo e ncha,” e tsoetsoeng ka moea oa Molimo ho ea tšepong ea leholimo, ka tebello ea ho busa le Jesu ’Musong oa hae oa leholimo.—2 Ba-Korinthe 5:17, NW; 1 Timothea 2:5, 6; Ba-Heberu 9:15.

Ka makholo a lilemo, Bakreste bana ba tlotsitsoeng, ba tsoetsoeng ka moea ba ’nile ba bokana bonngoeng le Kreste joaloka phutheho ea ’nete ea Bakreste, eo ka boeona e leng pōpo e ncha. Molimo o ile a e khetha lefatšeng lena ka morero, joalokaha moapostola Petrose a bolela: “Ha e le lōna, le moloko o khethiloeng, le baprista le marena, le mofuta o halalelang, le sechaba se ruiloeng, le tle le bolele lithoko tsa ea le bitsitseng lefifing ho le kenya leseling la hae le hlollang.” (1 Petrose 2:9) Joaloka Kreste Jesu, pōpo ea pele e ncha ea Molimo, pōpo ena e ncha e latelang e na le tlamo e ka sehloohong ea ho bolela litaba tse molemo. (Luka 4:18, 19) Litho tsa eona tseo qetellong li tla finyella palo ea 144 000, ka bomong li tlameha “ho apara motho e mocha, ea bōpiloeng ka setšoantšo sa Molimo, ho lokeng le khalalelong ea ’nete.” (Ba-Efese 4:24; Tšenolo 14:1, 3) Hona ho hloka hore ba hlaolele “tholoana ea Moea,” e hlalositsoeng ho Ba-Galata 5:22, 23, ’me ka botšepehi ba hlokomela bolebeli ba bona.—1 Ba-Korinthe 4:2, BPN; 9:16.

Ho thoe’ng ka pōpo ena e ncha mehleng ea kajeno? Ka selemo sa 1914, joalokaha linako tsa Bibele li bontša, mantsoe a Tšenolo 11:15 a ile a phethahatsoa: “Mebuso ea lefatše e fetohile ’muso oa Morena oa rōna [Jehova] le oa Kreste oa hae, ’me o tla busa ka ho sa feleng.” Bohato ba pele ba Kreste e le Morena e mocha ea behiloeng e ne e le ho lihela Satane le mangeloi a hae a mademona tlaase tikolohong ea lefatše ka ntle ho leholimo. Hona ho ile ha tlisa ‘malimabe ho ba ahileng lefatšeng,’ e le ka sebōpeho sa ntoa ea pele ea lefatše le matšoenyeho a tsamaisanang le eona.—Tšenolo 12:9, 12, 17.

Hona hape ho ile ha sebeletsa e le tlhokomeliso ho ba setseng ba pōpo e ncha lefatšeng ho re ba tlameha ho nka karolo ho phethahatseng boprofeta ba Jesu: “Evangeli ena ea ’muso [o hlomiloeng] e tla boleloa lefatšeng lohle, e tle e be bopaki ho lichaba tsohle; ’me e tla ba hona bofelo bo hlahang.” “Bofelo” boo ke eng? Jesu o tsoela pele ho hlalosa: “Mohlang oo, mahlomola a tla ba maholo, ha e sa le le tšimolohong ea lefatše, ho fihlela joale, tsietsi e kalo ha e e-so ho ka e e-ba teng, ’me ha e ka ke ea boela ea e-ba teng le ka mohla o le mong. Le hojane matsatsi ao a se ke a khutšofatsoa palo, ho no ho ke ke ha phonyoha motho; empa ka baka la bakhethoa, matsatsi ao a tla khutšofatsoa.”—Mattheu 24:3-14, 21, 22.

Moea oa Jehova o ile oa susumeletsa batlotsuoa bao ba pōpo ea hae e ncha hore ba tšoarehe phutuhong ea boboleli e batsi ka ho fetisisa ho feta tsohle tse bileng teng lefatšeng lena. Ho tloha liketeng tse ’maloa ka 1919, palo ea bahoeletsi bana ba ’Muso ba chesehang e ile ea eketseha ho ba ba ka bang 50 000 mahareng a bo-1930. Joalokaha ho ile ha profetoa, “tumo ea bona e ile ka lefatšeng lohle, ’me lipolelo tsa bona li utloahetse ho fihlela lipheletsong tsa lefatše.”—Ba-Roma 10:18.

Na ba setseng ba pōpo e ncha e tla ba bona feela ba bokeletsoeng bakeng sa pholoho? Che, hobane boprofeta bo boletse hore mangeloi a Molimo a tla tšoara meea ea matšoenyeho a maholo ho fihlela ho phethoa ho bokelloa eseng feela ha Baiseraele bana ba moea ba eang leholimong empa hape le ho bokelloa ha ba bang, “bongata bo boholo ba batho, bao ho seng motho ea ka tsebang ho bo bala, ba lichaba tsohle, le ba mefuta eohle, le ba merabe eohle, le ba lipuo tsohle.” Phello ea bona e tla ba efe? E, e tla ba “ba tsoang mahlomoleng a maholo” ba sa tsoa kotsi ho thabela bophelo bo sa feleng lefatšeng la paradeise!—Tšenolo 7:1-4, 9, 14.

Ho thabisang ke hore bongata bona bo boholo, bo bokelletsoeng ho tsoa linaheng tse 229, bo eketsehile ho fihlela ho Lipaki tse mafolo-folo tse ka bang 4 500 000. Ba bangata ba ntse ba tla, joalokaha ho bontšoa ke ba bileng teng Sehopotsong sa lefu la Jesu ba 11 431 171 ka April 17, selemong se fetileng. Ho limillione tsena tsohle, ke feela ba 8 683, ba ipolelang ho ba ba setseng lefatšeng ba pōpo e ncha, ba jeleng litšoantšetso tsa Sehopotso. Bao ba sehlopheng sena se senyenyane ba ne ba ke ke ba phethahatsa mosebetsi oa boboleli oa kajeno o moholo ka bobona. Limillione tsa ba etsang bongata bo boholo hona joale li sebetsa mahetla a bapile le bona ho phethahatseng mosebetsi ona. (Sofonia 3:9, NW) Ho feta moo, litho tse koetlisitsoeng hantle tsa bongata bo boholo hona joale li etsa mosebetsi oa tsamaiso le mesebetsi e meng e nang le boikarabelo li sebelisana le Sehlopha se Busang sa ba tlotsitsoeng sa Iseraele oa moea, feela joalokaha Banethinime bao e neng e se Baiseraele ba neng ba sebetsa le baprista ho lokiseng marako a Jerusalema.—Nehemia 3:22-26.

Pōpo ea “Maholimo a Macha le Lefatše le Lecha”

Ke thabo e kaakang e tsamaisanang le ho bokelloa hona! Ho feela joalokaha Jehova a itse ho tla ba ka teng: “Ke ea bōpa maholimo a macha le lefatše le lecha, tse fetileng ha li sa tla hlola li hopoloa, li ke ke tsa khutlela mehopolong. Empa le tla ba le thabo le nyakallo e sa feleng ka seo ke eang ho se bōpa, hobane bonang, ke ea bōpa Jerusalema e be motse oa thabo, le sechaba sa oona e be sechaba se khotšeng thabo. Ke tla etsa Jerusalema thabo ea ka, sechaba sa ka ke se etse lehlohonolo la ka; lentsoe la lillo ha le sa tla hlola le utloahala teng, leha e le lentsoe la pokollo.” (Esaia 65:17-19) Qetellong, maholimo a macha a pōpo ea Jehova a tla etsoa ke Kreste Jesu le litho tse tsositsoeng tse 144 000 tsa pōpo e ncha tse rekiloeng har’a batho lilemong tse makholo a 19 tse fetileng. A khanya haholo ho feta ’muso leha e ka ba ofe oa lefatše o ileng oa busa Jerusalema ea sebele, esita le oa mehla ea Salomone. E kopanyeletsa Jerusalema e Mocha, motse oa leholimo, o hlalosoang ka botle ba ’ona bohle bo khanyang ho Tšenolo khaola 21.

Jerusalema e Mocha ke monyaluoa oa moea oa Kreste, balateli ba hae ba tlotsitsoeng ba 144 000, ba kopanang le Monyali leholimong ka mor’a lefu la bona le ho tsosetsoa moeeng. Ho Tšenolo 21:1-4 ba bontšoa ba “theoha leholimong ho Molimo,” hona ho bolela hore, ba sebelisoa ke eena ho fetisetseng mahlohonolo ho batho mona lefatšeng. Ka tsela ena boprofeta boa phethahatsoa: “Bonang tabernakele ea Molimo e har’a batho; o tla aha le bona; e tla ba lichaba tsa oona, ’me Molimo o tla ba le bona ka sebele sa oona, e be Molimo oa bona. Molimo o tla hlakola meokho eohle mahlong a bona; lefu ha le sa tla hlola le e-ba teng; ’me ha ho sa tla ba masoabi, leha e le ho bokolla, kapa bohloko; hobane tsa pele li fetile.”

Re ka leboha hakaakang bakeng sa pōpo ea Molimo ea maholimo ao a macha! Ho fapana le mebuso ea nakoana, e senyehileng eo ka nako e telele e ileng ea hlasela batho, tokisetso ena ea Molimo ea ’muso e tla ba ea ka ho sa feleng. Pōpo e ncha le bana ba eona ba moea, bongata bo boholo, ba thabela tšepiso e eketsehileng ea Molimo: “Hobane joale ka ha maholimo a macha, le lefatše le lecha lee ke seng ke tla le bōpa, a tla hlola a le teng pel’a ka, ho bolela Jehova, leloko la lōna le lebitso la lōna le tla ’ne le be teng pel’a ka.”—Esaia 66:22.

“Lefatše le lecha” le qaleha ka bana bana ba ba tlotsitsoeng ba pōpo e ncha. Ke mokhatlo o mocha oa batho o tšabang Molimo lefatšeng. Lehloeo, tlōlo ea molao, pefo, tšenyeho, le boitšoaro bo hlephileng mokhatlong oa batho kajeno ka sebele li hatisa tlhoko ea ho fetohela ka ho feletseng mokhatlong o mocha oa lefatše, o sebetsang tlas’a tsamaiso ea maholimo a macha a rerang ho etsa molemo. Ke seo Jehova a se rerileng. Joalokaha a bōpile maholimo a macha, kahoo o bōpa le lefatše le lecha ka ho bokella bongata bo boholo joaloka karolo ea bohlokoa ea mokhatlo o nang le khotso oa lefatše le lecha. Mokhatlo ona feela o tla pholosoa o phela o ‘tsoa mahlomoleng a maholo.’—Tšenolo 7:14.

Re ka lebella eng ka mor’a mahlomola a maholo? Ha a bua le baapostola ba hae, ba pele ba etsang maholimo a macha a tlang ho busa lefatše le lecha, Jesu o ile a tšepisa: “Ka ’nete kea le bolella, ke re: Nchafalong ea tsohle, mohla Mor’a motho a lulang teroneng ea khanya ea hae, lōna ba ntatetseng, le tla lula le lōna literoneng tse leshome le metso e ’meli.” (Mattheu 19:28) Bohle ba 144 000 ba Jerusalema ena e Ncha ba tla kopanela le Jesu ho ahlōleng batho. Joale lerato le tla nka sebaka sa boithati le lehloeo joaloka motheo oo mokhatlo oa batho o hahuoeng ho oona. Mathata a meloko, merabe, le bochaba a tla be a felisitsoe. Tsoho e tla tsoela pele ho khutlisa ba ratoang. Batho ba tšepahalang ba libillione e tla ba lelapa le le leng le leholo le kopaneng, le phahamiselitsoeng bophelong bo sa feleng lefatšeng le fetotsoeng paradeise.

Hona e ke ke ea e-ba Sebaka se inahaneloang sa phetheho kapa Sebaka se inahaneloang se setle moo bophelo bo finyellang phetheho. E tla ba pōpo ea nako e sa feleng—“re lebeletse, ka pallo ea oona, maholimo a macha le lefatše le lecha moo ho loka ho ikahetseng teng”! (2 Petrose 3:13) Ka sebele, ena ke tebello e tsotehang, tšepiso e babatsehang ka ea itseng, “Bonang, ntho tsohle ke li etsa tse ncha,” ’me a ba a phaella ka polelo e susumetsang tumelo: “Lipolelo tseo li tiile; ke tsa ’nete.”—Tšenolo 21:5.