Ba Pholohile Mahlomola a Maholo ba Phela
“Ke ba tsoang mahlomoleng a maholo; ba hlatsoitse liaparo tse telele tsa bona, ba li soeufalitse maling a Konyana.”—TŠENOLO 7:14.
1. Ke bo-mang ba tla amohela ba tsositsoeng tsohong ea lefatšeng?
HA BA limilione bao ho seng motho ea ka tsebang ho ba bala ba tsosoa ‘tsohong ea ba lokileng le ea ba sa lokang,’ ba ke ke ba tsosetsoa lefatšeng le feela. (Liketso 24:15) Ba tla tsohela tikolohong e ntlafalitsoeng hantle ’me ba fumane hore ba lokiselitsoe bolulo, liaparo, le lijo tse ngata. Ke bo-mang ba tla etsa litokisetso tsee tsohle? Ho hlakile hore ho tla ba le batho ba phelang lefatšeng le lecha pele tsoho ea lefatšeng e qala. Ke bo-mang? Bibele e bontša hore ke ba tla pholoha mahlomola a maholo a tlang. Lithutong tsohle tsa Bibele, ha ho pelaelo hore ena ke e ’ngoe ea tse thahasellisang ka ho fetisisa—ea hore ba bang ba tšepahalang ba tla pholoha mahlomola a maholo ba phela ’me ha ba sa tla hlola ba e-shoa. Tšepo ena e pakoa hamolemo ka Mangolong a Halalelang.
Joaloka Mehleng ea Noe
2, 3. (a) Ke ho tšoana hofe ho bontšitsoeng pakeng tsa mehla ea Noe le ea rōna? (b) Ho pholoha Moroallo ha Noe le lelapa la hae ho bontša eng?
2 Ho Mattheu 24:37-39, Jesu Kreste o ile a bapisa mehla ea Noe le mehla ea qetello, eo hona joale re iphumanang re le ho eona. O ile a re: “Empa joalo ka ha ho bile mehleng ea Nooe, le ho tleng ha Mor’a motho ho tla ba joalo. Hobane joalo ka mehleng e bileng teng pele ho moroallo oa metsi, ha batho ba ne ba e-ja, ba e-noa, ba nyala, ba nyalisa, ha ba ha fihla tsatsi leo Nooe a keneng arekeng ka lona; ha ba ka ba lemoha, ha ba ha fihla moroallo, ’me ba nkoa bohle ke oona: ho tla ba joalo le ho tleng ha Mor’a motho.”
3 Moroallo oa lefatše lohle o ile oa hoholella bohle ba sa kang ba ela hloko molaetsa oa Molimo oa temoso. Leha ho le joalo, ha oa ka oa hoholella Noe le lelapa la hae. Ba ile ba ‘kena arekeng,’ joalokaha Jesu a ile a bolela. Ka lebaka la boinehelo ba bona ba bomolimo, Jehova o ile a ba lokisetsa tsela ea ho pholoha. Petrose oa Bobeli 2:5, 9 e bua ka ho pholoha ha Noe le lelapa la hae ha e re: “[Molimo] oa boloka Nooe, ’moleli oa ho loka, e le eena oa boroba meno e le ’meli, mohla o tlisang moroallo holim’a lefatše la banyefoli; ke moo ho bonahalang hobane Morena o tseba ho loela barapeli molekong.” Jesu o ile a bapisa mehla ea Noe le mehla ea qetello ho bontša hore batho ka kakaretso ba ne ba sa tl’o ela hloko molaetsa oa Molimo oa temoso. Empa, ka ho etsa joalo o ne a boetse a tiisa hore Noe le lelapa la hae ba ile ba mamela Jehova Molimo, ba kena arekeng, ’me ba pholoha Moroallo o moholo. Ho pholoha ha Noe le lelapa la hae ho supa ho pholoheng ha bahlanka ba Molimo ba tšepahalang bofelong ba lefatše lena.
Mohlala oa Lekholong la Pele la Lilemo
4. Phethahatsong ea mantsoe a Jesu, ke liketsahalo life tse ileng tsa lebisa timetsong ea Jerusalema ka 70 C.E.?
4 Jesu o ile a boela a bua ka liketsahalo tse lokelang ho etsahala mehleng ea qetello ea lefatše lena. Ho Mattheu 24:21, 22, rea bala: ‘Hobane mohlang oo, mahlomola a tla ba maholo, ha e sa le le tšimolohong ea lefatše, ho fihlela joale, tsietsi e kalo ha e-so ho ka e e-ba teng, ’me ha e ka ke ea boela ea e-ba teng, le ka mohla o le mong. Le hojane matsatsi ao a se ke a khutsufatsoa palo, ho no ho ke ke ha phonyoha motho; empa ka baka la bakhethoa, matsatsi ao a tla khutsufatsoa.’ Mantsoe ana a phethahetse ka lekhetlo la pele lekholong la pele la lilemo la Mehla ea rōna e Tloaelehileng. Ka 66 C.E., motse oa Jerusalema o ile oa lika-liketsoa ke makhotla a Roma tlas’a Cestius Gallus. Mabotho a Roma a ile a ea bohōleng ba hore a cheke lebota la tempele ka tlaase, ’me Bajode ba bangata ba ne ba itokiselitse ho inehela. Leha ho le joalo, Cestius Gallus o ile a hula mabotho a hae ba sa lebella ebile e le ka lebaka le sa tsejoeng. Ha Bakreste ba bona Baroma ba checha, ba ile ba sebetsa tumellanong le mantsoe ao Jesu a ileng a a bua lilemo tse ngata pele: “Etlare ha le bona Jerusalema o teetsoe hare ke makhotla a lira, le tsebe hoba tšenyeho ea oona e se e atametse. Mohlang oo, ba leng Judea ba balehele lithabeng; ba har’a Jerusalema ba tsoe; ba naheng ba se ke ba kena teng.” (Luka 21:20, 21) Bajode ba fetohileng Bakreste, bakhethoa, hang-hang ba ile ba furalla motse oa Jerusalema o ahlotsoeng ’me ka tsela eo ba ile ba bolokoa timetsong e tšabehang e ileng ea o tlela kapele ka mor’a moo. Ka 70 C.E., mabotho a maholo a sesole a Roma a laoloang ke Molaoli Titus a ile a khutla. A ile a hloma litente ho pota Jerusalema, a lika-liketsa motse, ’me a o ripitla.
5. Mahlomola a Jerusalema a ile a khutsufatsoa ka kutloisiso efe ka 70 C.E.?
5 Rahistori oa Mojode Josephus o bolela hore Bajode ba 1 100 000 ba ile ba shoa, ha ba 97 000 ba ile ba pholoha ’me ba isoa botlamuoeng. Bapholohi bao ba Bajode bao eseng Bakreste ka sebele e ne e se “bakhethoa” ba boprofeta ba Jesu. Ha a bua le sechaba sa Bajode sa marabele, Jesu o ile a re: “Bonang, ntlo ea lōna e tla sala e le lesupi, hobane ke re ho lōna: Ho qala joale, ha le ka ke la hlola le mpona, ho be ho fihle mohla le tla re: Ho bokoe ea tlang ka lebitso la Morena!” (Mattheu 23:38, 39) Ha ho tlaleho ea hore Bajode bao ba neng ba thibeletsoe Jerusalema, motsotsong oa ho qetela ba ile ba amohela Jesu e le Messia, ea e-ba Bakreste, ’me ba amohela mohau oa Jehova. Empa, mahlomola a ileng a oela Jerusalema ka 70 C.E. a ile a khutsufatsoa. Lekhetlong la ho qetela makhotla a hlometseng a Roma ha aa ka a lika-liketsa motse ona ka nako e telele. Sena se ile sa etsa hore Bajode ba bang ba pholohe, hore feela ba romeloe likarolong tse sa tšoaneng tsa ’Muso oa Roma e le makhoba.
Bongata bo Boholo ba Bapholohi
6, 7. (a) Ke motse ofe o moholo oa bolumeli o sa ntsaneng o tla timetsoa, e le karolo ea mahlomola afe ao ho seng a lekanang le ’ona? (b) Johanne o ile a profeta eng ka mahlomola a maholo a tlang lefatšeng lee?
6 Le hoja timetso ea Jerusalema ka 70 C.E. e ile ea hla ea tlisa ‘mahlomola a maholo’ motseng oo oa bolumeli, phethahatso e khōlō ea mantsoe a Jesu e sa ntse e tla tla. Motse o moholo oa bolumeli, Babylona e Moholo, ’muso oa lefatše oa bolumeli ba bohata, o lokela ho latsoa mahlomola a maholo a bolaeang ao hang-hang a tla lateloa ke mahlomola ao ho seng a lekanang le ’ona a tlelang tsamaiso eohle ea lintho ea Satane. (Mattheu 24:29, 30; Tšenolo 18:21) Lilemo tse ka bang 26 ka mor’a timetso ea Jerusalema, moapostola Johanne, ho Tšenolo 7:9-14, o ile a ngola ka mahlomola ana a maholo a akaretsang lefatše lohle. O ile a bontša hore bongata bo boholo ba batho bo tla a pholoha.
7 Bapholohi bana, ba bitsoang “bongata bo boholo,” ba khetholloa ka bohato bo itseng bo tiileng boo ba bo nkang. Ho latela Tšenolo 7:14, e mong oa baholo ba 24 ba leholimong o ile a bolella Johanne: “Ke ba tsoang mahlomoleng a maholo; ba hlatsoitse liaparo tse telele tsa bona, ba li soeufalitse maling a Konyana.” E, bongata bo boholo bo tlotlisa Jehova e le mohloli oa poloko ea bona. Bo bontša tumelo maling a tšolotsoeng a Jesu ’me bo na le boemo bo lokileng ka pel’a ’Mōpi oa bona le Morena ea khethiloeng Jesu Kreste.
8. Ke kamano efe e ntle e leng teng pakeng tsa “bongata bo boholo” le masala a baena ba Jesu ba tlotsitsoeng?
8 Kajeno, litho tsa bongata bo boholo tse batlang e le limilione tse hlano li phela tlas’a boeta-pele bo mafolo-folo ba Morena oa leholimo Jesu Kreste. Li ikokobeletsa Kreste ’me li amana haufi-ufi le baena ba hae ba tlotsitsoeng ba sa ntseng ba le lefatšeng. Mabapi le tsela eo bongata bo boholo bo tšoarang bana ba tlotsitsoeng ka eona, Jesu o re: “Ka ’nete kea le bolella, ke re: Tseo le li entseng e monyenyane ho baena ba ka, le li entse ’na.” (Mattheu 25:40) Kahobane ntle ho boithati bo fana ka thuso ho baena ba Kreste ba tlotsitsoeng, bongata bo boholo bo ahloleloa ka hore bo entse Jesu ka boeena hamolemo. Sena se bo thusa ho ba le kamano e sireletsehileng le Jesu Kreste le Jehova Molimo. Bo filoe tokelo ea ho kopana le masala a tlotsitsoeng ho beng Lipaki tsa Molimo le bajari ba lebitso la hae.—Esaia 43:10, 11; Joele 2:31, 32.
Ho Lula ba Falimehile
9, 10. (a) Re lokela ho etsa eng ho boloka boemo ba rōna bo lokileng ka pel’a Mor’a motho? (b) Re lokela ho etsa joang hore re ‘falimehe’?
9 Bongata bo boholo bo tlameha ho boloka boemo ba bona ba ho loka ka pel’a Mor’a motho, e leng se hlokang hore bo lule bo falimehile ho fihlela qetellong. Jesu o ile a bolela sena ka ho hlaka ha a ne a re: “Le iponele, hore lipelo tsa lōna li se ke tsa imeloa ke ho ja le ho noa hampe, le ke lipelaelo tsa bophelo bona, ’me letsatsi leo la le tšoara sehlōhō; hobane le tla oela ba ahileng lefatšeng lohle joalo ka sefi. Falimehang ke hona, ’me le rapele ka mehla, le tle le neoe tokelo ea ho phonyoha ho tseo tsohle tse tla etsahala, le ea ho ema pel’a Mor’a motho.”—Luka 21:34-36.
10 E le hore re ka atleha ho ema pel’a Mor’a motho, re tlameha ho amoheloa ke eena, e leng se ke keng sa etsahala ha re itumella ho susumetsoa ke monahano oa lefatše lena. Monahano oa lefatše oa khelosa ’me o ka susumeletsa motho hore a inehele ka ho feteletseng menyakeng ea nama kapa a imeloe ke mathata a bophelo hoo a seng a sa batle lithahasello tsa ’Muso pele. (Mattheu 6:33) Tsela e joalo e fokolisa motho moeeng ’me e ka etsa hore a felloe ke thahasello boikarabelong ba hae mabapi le Molimo le ba bang. E ka ba ea sa kopaneleng tšebeletsong kapa a beha boemo ba hae ka phuthehong kotsing ka ho etsa sebe se tebileng, mohlomong esita le ho bonahatsa boikutlo ba ho se bake. Motho ka mong har’a bongata bo boholo o tlameha ho itebela. O tlameha ho ipoloka a arohile lefatšeng lena le sa tšabeng Molimo le mekhoeng ea lona.—Johanne 17:16.
11. Ke ho sebelisa melao-motheo efe ea Mangolo ho tla re thusa ho pholoha Armageddone?
11 Ho finyella seo, Jehova o lokiselitse seo re se hlokang ka Lentsoe la hae, moea oa hae o halalelang, le mokhatlo oa hae o hlophisitsoeng. Re tlameha ho sebelisa litokisetso tsena hamolemohali. Ho feta moo, re tlameha ho ba ba tšepahalang le ba ikokobeletsang Molimo haeba re lebeletse hore a re amohele. Taba ea pele ke hore re tlameha ho hlaolela lehloeo le matla bakeng sa se sebe. Mopesaleme o itse: “Ha ke lule le batho ba ratang leshano, ha ke etelane le baikaketsi. Ke hloile mokhatlo oa ba bolotsana, ha ke lulisane le batho ba babe. U se ke ua tlosa moea oa ka le baetsalibe, leha e le bophelo ba ka le ba batho ba mali.” (Pesaleme ea 26:4, 5, 9) Ka phuthehong ea Bokreste, ba bacha le ba hōlileng ka ho tšoanang ho hlokahala hore ba lekanyetse botsoalle ba bona le ba sa inehelang ho Jehova. Hore Molimo a re amohele, re leka ka matla ho hloka molato le ho hloka letheba lefatšeng. (Pesaleme ea 26:1-5; Jakobo 1:27; 4:4) Kahoo, re tla kholiseha hore ka Armageddone, Jehova a ke ke a re hoholella lefung hammoho le ba sa mo tšabeng.
Ba Bang ‘Ba ke ke ba Shoa le ka Mohla o le Mong’
12, 13. (a) Pele a tsosa Lazaro, Jesu o ile a bua mantsoe afe ao Maretha a sa kang a a utloisisa ka ho feletseng? (b) Mantsoe a Jesu a ne a sa bolele eng ka ‘ba ke keng ba shoa le ka mohla o le mong’?
12 Ho nahana ka ho pholoha bofelo ba tsamaiso ena ea lintho le monyetla oa hore re se hlole re e-shoa hoa thabisa. Ena ke tebello eo Jesu a re fileng eona. Pejana feela ho hore a tsose motsoalle oa hae ea shoeleng Lazaro, Jesu o ile a bolella Maretha khaitseli ea Lazaro a re: “Ke ’na tsoho le bophelo; ea lumelang ho ’na, leha a shoele, o tla phela. E mong le e mong ea phelang, ’me a lumetse ho ’na, a ke ke a shoa le ka mohla o le mong. Na u lumela hona na?” Maretha o ne a lumela tsoho, empa o ne a sa utloisise sohle seo Jesu a neng a se bua.—Johanne 11:25, 26.
13 Jesu o ne a sa bolele hore baapostola ba hae ba tšepahalang ba ne ba tla tsoela pele ho phela nameng le hore ba ne ba ke ke ba hlola ba e-shoa. Ho e-na le hoo, hamorao o ile a bontša hore barutuoa ba hae ba ne ba tla shoa. (Johanne 21:16-23) Ka sebele, ho tlotsoa ha bona ka moea o halalelang ka Pentekonta ea 33 C.E. ho ne ho bolela hore ba ne ba tla tlameha ho shoa e le hore ba ka amohela lefa la bona la leholimo e le marena le baprista. (Tšenolo 20:4, 6) Kahoo, ha nako e ntse e feta, Bakreste bohle ba lekholong la pele la lilemo ba ile ba shoa. Leha ho le joalo, Jesu o buile seo a se buileng ka morero. Mantsoe a hae mabapi le ho phela ntle le ho shoa le ka mohla o le mong a tla phethahala.
14, 15. (a) Mantsoe a Jesu ka ba bang ‘ba ke keng ba shoa le ka mohla o le mong’ a tla phethahala joang? (b) Boemo ba lefatše lee ke bofe, empa ba lokileng ba na le tšepo efe?
14 Taba ea pele, Bakreste ba tlotsitsoeng ba tšepahalang ba ke ke ba e-shoa ka ho sa feleng le ka mohla. (Tšenolo 20:6) Hape, mantsoe a Jesu a supa nakong e khethehileng ea ha Molimo a tla kenella litabeng tsa batho ’me a felise bokhopo ka ho feletseng lefatšeng, feela joalokaha a ile a etsa mehleng ea Noe. Ba tšepahalang ba tla fumanoa ba etsa thato ea Molimo ka nako eo Molimo a ke ke a ba ahlolela lefu. Ho e-na le hoo, joaloka Noe le lelapa la hae, ba tla ba le monyetla oa ho pholoha timetso ea lefatše. Tšepo e joalo e tiile, kaha e theiloe lithutong tsa Bibele ebile e tšoantšelitsoe ka mehlala. (Bapisa le Ba-Heberu 6:19; 2 Petrose 2:4-9.) Ho phethahala ha boprofeta ba Bibele ho bontša hore haufinyane lefatše la kajeno le entsoeng ka mokhatlo oa batho ba sa lokang le tla qetella le timelitsoe. Boemo bo leng teng hona joale bo ke ke ba fetoloa, hobane lefatše le khopo hoo le ke keng la lokisoa. Seo Molimo a se buileng ka lefatše la mehleng ea Noe e boetse ke ’nete le ka lefatše la kajeno. Lipelo tsa batho ba bangata haholo li tletse bokhopo, ’me menahano ea bona e mebe feela ka linako tsohle.—Genese 6:5.
15 Jehova o lumeletse batho hore ba buse lefatše ka makholo a lilemo ka ntle le hore a kenelle, empa nako ea bona e se e tla fela. Haufinyane Jehova o tla felisa bohle ba khopo ka ho feletseng lefatšeng, feela joalokaha Bibele e bolela. (Pesaleme ea 145:20; Liproverbia 2:21, 22) Leha ho le joalo, a ke ke a timetsa ba lokileng hammoho le ba khopo. Ha ho mohla Molimo a kileng a etsa ntho e joalo! (Bapisa le Genese 18:22, 23, 26.) A ka felisa ba lekang ka matla ho mo sebeletsa ka botšepehi, le ka tšabo ea bomolimo joang? Hoa utloahala hore barapeli ba Jehova ba tšepahalang ba tla beng ba phela ha mahlomola a maholo a qala ba tla fumana mohau mahlong a hae ’me ba ke ke ba timetsoa, hantle feela joalokaha Noe le lelapa la hae ba sa ka ba timetsoa ha lefatše le khopo la mehleng ea hae le felisoa ka moroallo. (Genese 7:23) Ba tla sireletsoa ke Molimo ’me ba tla pholoha bofelo ba lefatše lena.
16. Ho tla etsahala lintho life tse hlollang lefatšeng le lecha, eleng ho bolelang eng bakeng sa bapholohi?
16 Ebe joale ho etsahala eng? Lefatšeng le lecha, moloko oa batho o tla tšolleloa litlhohonolofatso tse folisang ha melemo ea sehlabelo sa Jesu sa thekollo e sebelisitsoe ka ho feletseng. Bibele e bua ka “nōka e ntle [ea tšoantšetso] ea metsi a bophelo, a hloekileng joalo ka kristale, e tsoang teroneng ea Molimo le Konyana. Mahareng a lepatlelo la motse le mabopong a nōka, ka mose o mong le o mong, ho na le sefate sa bophelo se behang litholoana haleshome le metso e ’meli, ’me se beha litholoana ka likhoeli tsohle; mahlaku a sefate seo ke a ho folisa ba-lichaba.” (Tšenolo 22:1, 2) Hoa hlolla ho bolela hore “ho folisa” ho akarelletsa ho hlōla lefu la Adama ka bolona! “O tla felisa lefu ka ho sa eeng kae; Morena Jehova o tla felisa meokho lifahlehong tsohle.” (Esaia 25:8) Kahoo, ba pholohang mahlomola a maholo ba pholohela lefatšeng le lecha ha ba tlamehe ho talimana le lefu le ka mohla o le mong!
Tšepo e Tiileng
17. Tšepo ea hore ba bang ba tla pholoha Armageddone ’me ‘ba ke ke ba shoa le ka mohla o le mong’ e tiile hakae?
17 Na re ka ba le kholiseho e feletseng tšepong ee e hlollang? Ha ho pelaelo! Jesu o ile a bontša ho Maretha hore ho tla ba le nako eo ka eona batho ba neng ba tla phela ba ke ke ba hlola ba e-shoa. (Johanne 11:26) Ho feta moo, khaolong ea 7 ea Tšenolo eo Jesu a e fileng Johanne, ho ile ha senoloa hore bongata bo boholo bo tsoa mahlomoleng a maholo, boa a pholoha. Na re ka lumela Jesu Kreste le tlaleho ea histori ea Moroallo oa mehleng ea Noe? Ha ho tika-tiko! Ho feta moo, Bibele e na le litlaleho tse ling tsa liketsahalo tsa ha Molimo a pholosa bahlanka ba hae ba phela ho pholletsa le linako tsa kahlolo le ho oa ha lichaba. Na ho ka lebelloa ho ka tlaase ho moo ho eena mehleng ee ea qetello? Na ho na le ntho eo ’Mōpi a ka hlōlehang ho e etsa?—Bapisa le Mattheu 19:26.
18. Re ka kholiseha joang hore re tla fumana bophelo lefatšeng le lecha la ho loka la Jehova?
18 Ka ho sebeletsa Jehova ka botšepehi hona joale, re kholisehile hore re tla fumana bophelo bo sa feleng lefatšeng la hae le lecha. Ho ba limilione bao ho seng motho ea ka khonang ho ba bala, bophelo lefatšeng leo le lecha bo tla tla ka tsoho. Empa, mehleng ea rōna, batho ba Jehova ba limilione—e, bongata bo boholo boo ho seng motho ea ka tsebang ho bo bala kapa ho bo lekanyetsa—bo tla ba le tokelo e khethehileng ea ho pholoha mahlomola a maholo bo phela. ’Me bo ke ke ba shoa le ka mohla o le mong.
Ka Kōpo Hlalosa
◻ Ho pholoha Armageddone ho ile ha boleloa esale pele joang mehleng ea Noe?
◻ Re tlameha ho etsa’ng e le hore re ka ema re tiile ha Jesu a tlil’o liha kahlolo ea Jehova?
◻ Ke hobane’ng ha re ka bolela hore ha ho hlokahale hore bapholohi ba Armageddone ‘ba shoe le ka mohla o le mong’?
[Setšoantšo se leqepheng la 15]
Bakreste ba ile ba pholoha mahlomola a Jerusalema