Liithuti Tsa Gileade—“Baromuoa ba Sebele!”
“MOROMUOA ke eng?” Potso ena e ile ea phahamisoa ke sehlooho sa baphatlalatsi sa koranta e ’ngoe hoo e ka bang lilemong tse mashome a mane tse fetileng. Mongoli o ile a beha mabaka a hore baromuoa ba ’nete e ne e le likofuto tsa ntlafatso ea maemo a bophelo le a moruo. Leha ho le joalo, ka Sontaha, la 5 March, 1995, Holong ea Kopano ea Lipaki tsa Jehova ea Jersey City, ka khatiso ho ile ha fanoa ka karabo e fapaneng haholo le ena. Ketsahalo e ne e le efe? Kabo ea mangolo sehlopheng sa bo98 sa Sekolo sa Bibele sa Gileade sa Watchtower—sekolo se rometseng baromuoa lefatšeng lohle!
Ka mor’a thapelo e bulang le pina, Albert D. Schroeder oa Sehlopha se Busang ka mofuthu o ile a amohela bohle ba 6 430 ba neng ba le teng. Litlhalosong tsa hae tse qalang, Moena Schroeder o ile a hlakisa lebaka leo ka lona liithuti tsa Gileade li fapaneng le batho ba bang ba ipitsang baromuoa. O ile a re: “Bibele ke buka e ka sehloohong ea ho ithuta Gileade.” Liithuti tsa Gileade li koetlisetsoa ho ba matichere a Lentsoe la Molimo, eseng batho ba sebetsanang le mathata a sechaba. Ka hona ba tšoaneleha ka ho ikhethang ho hlokomela litlhoko tsa moea tsa batho ba leng masimong a libakeng lisele.
Libui tse latelang li ile tsa ama libaka tse ’maloa tseo ho tsona liithuti tsa Gileade li fanang ka bopaki ba hore ke baromuoa “ba sebele.” Charles Molohan o ile a bua le bona sehloohong se reng “Tsoelang Pele le Beha Litholoana Tse Molemo Joaloka Baromuoa.” Ha a sebelisa mantsoe a moapostola Pauluse ho Ba-Kolosse 1:9, 10, (NW), Moena Molohan o ile a hopotsa liithuti hore likhoeli tsa tsona tse fetileng tse hlano Gileade li li thusitse hore li eketse “tsebo e nepahetseng ea Molimo.” Sena se ne se tla li thusa hore li behe litholoana ka litsela tse peli: ka ho bontša tholoana ea moea oa Molimo le ka ho arolelana linnete tsa Bibele le ba bang.
Daniel Sydlik oa Sehlopha se Busang o ile a latela ka sehlooho se tebileng se reng “Le se ke la Beha Bophelo ba Lōna Kotsing.” O ile a botsa potso ea Jesu: “Leha motho a ka rua lefatše lohle, ha a timeletsoe ke moea oa hae [soule ea hae, NW], ekaba o ruile’ng ka lona na?” (Mattheu 16:26) Moena Sydlik o ile a re: “Batho ba ’nile ba beha lisoule tsa bona kotsing bakeng sa ho fumana mokhoa oa bophelo o bonolo, le o mabotho-botho haholoanyane.” Leha ho le joalo, ba nang le tumelo e phelang ba ke ke ba sekisetsa ha ba tobane le liteko. Mantsoe a Jesu a bontša hore motho o lokela ho ikemisetsa ho “fana,” ke hore ho etsa boitelo, e le hore a ka fumana soule ea hae, kapa bophelo. Baromuoa ba bacha ba ile ba phehelloa hore ba fe Jehova sohle seo ba nang le sona, se molemohali, tšebeletsong ea hae!
Hamorao, William Van de Wall oa Komiti ea Lefapha la Tšebeletso o ile a bua sehloohong se reng “Moapostola Pauluse—Mohlala o Tšoanetseng ho Etsisoa.” Moena Van de Wall o ile a hlalosa: “Pauluse o ile a etella pele mosebetsi oa boromuoa lekholong la pele la lilemo.” Joale, ka ho loketseng, ho ile ha totobatsoa libaka tse ’nè tseo ho tsona moapostola Pauluse a behileng mohlala o motle bakeng sa baromuoa kajeno: (1) Kameho e tebileng ea Pauluse le lerato la hae ho batho, (2) katleho ea hae tšebeletsong, (3) ho hana ha hae ka boikokobetso ho iphahamisa, (4) ho tšepa ha hae Jehova ka ho feletseng.
“Etsa Hore Jehova a u Batlisise Kabelong ea Hao e Ncha” e bile sehlooho se ileng sa tšohloa ke Lyman A. Swingle oa Sehlopha se Busang. A sebelisa temana ea letsatsi, Pesaleme ea 139:16, Moena Swingle o ile a lumela hore joaloka baromuoa ba bacha, ba ne ba tla tobana le mathata likabelong tsa bona le hore Jehova o tseba tharollo. O ile a phehella: “E-eang ho eena, buisanang le eena ha le e-na le mathata. Batlang hore na thato ea hae ke efe.”
John E. Barr oa Sehlopha se Busang o ile a latela ka sehlooho se reng “Tumelo ea Lōna e Hōla ka ho Fetisisa.” (2 Ba-Thessalonika 1:3) Ho Luka 17:1, re bala hore Jesu o itse: “Ha e le hore likhopiso li se hlahe, ho ke ke ha etsoa.” Ba bang ba ’nile ba khopisoa ke botho ba baromuoa-’moho le bona. Empa Moena Barr o ile a khothalletsa baromuoa ho ba le tumelo e hlokahalang bakeng sa ho tšoarela. Ka sebele, ke moelelong oa taba ena barutuoa ba Jesu ba ileng ba kōpa: “Totisa tumelo ea rōna.” (Luka 17:2-5) Tumelo ea baromuoa e ka boetse ea lekoa ke liphetoho tse fapa-fapaneng tse amang tlhophiso. Moena Barr o ile a botsa: “Na re na le tumelo ea ho li amohela, kapa li tla fetoha litšitiso tse kang lithaba?”
Joale ho ile ha latela keletso ka barupeli ba babeli ba Gileade. Jack Redford o ile a khothalletsa liithuti ho boloka boikutlo bo nepahetseng. O ile a bua ka moromuoa ea ileng a tlohela kabelo ea hae ka lebaka la ho tlokoa ke baromuoa ba bang. Leha ho le joalo, Mangolo a re lemosa khahlanong le ho khopisoa ke lintho tse fokolang. (Moeklesia 7:9) O ile a khothatsa: “E-bang le boikutlo bo nepahetseng. Tšoarelang liphoso le ho se phethahale ha ba le potolohileng.”
Joale U. V. Glass, mongolisi oa Gileade, o ile a botsa: “Na le ikemiselitse ho tobana ka katleho le ‘nako le ketsahalo e sa lebelloang’”? (Moeklesia 9:11, NW) Moena Glass o ile a re: “Mokhoa oa rōna oa bophelo o tla ba le liphetoho kamehla, ’me tse ling li tla ferekanya haholo.” Baromuoa ba bang ba ile ba tobana ka tšohanyetso le ho fokolloa ke bophelo, ho kula, le mathata a lelapa, a ba tlamang ho tlohela likabelo tsa bona. Moena Glass o ile a re: “Ho sa tsotellehe hore na ketsahalo eo e sa lebelloang e ka ba eng, rea tseba hore Jehova oa e hlokomela ’me o amehile ka eona. Haeba re mo tšepa, rea tseba hore re tla hlōla!”
Puo e nang le sehlooho se reng “Ho Khetheloa Tšebeletso ea Boromuoa” e ile ea beha letoto la lipuo tsa hoseng sehlōhlōlong. Theodore Jaracz oa Sehlopha se Busang o ile a tšohla potso e phahamisitsoeng qalong, e leng hore na “Moromuoa ke eng?” Ha a araba, o ile a bua ka Liketso likhaolong tsa 13 le 14 mabapi le mosebetsi oa boromuoa oa Pauluse le Barnabase. Ka ho hlakileng, mosebetsi ona o ne o tsepamisitsoe tabeng ea ho ‘tsebahatsa litaba tse molemo,’ eseng ho rarolla mathata a sechaba. (Liketso 13:32) Moena Jaracz o ile a botsa: “Na ha le lumele hore Pauluse le Barnabase ba ile ba bontša seo moromuoa oa sebele a lokelang ho ba sona?” Joale ho ile ha bitsoa moromuoa ea nang le phihlelo oa Mexico, Robert Tracy bakeng sa ho pheta tse ling tsa liphihlelo tseo a bileng le tsona e le ’moleli oa evangeli.
Lenaneo la hoseng le ile la fihla tlhōrōng ha Moena Schroeder a abela liithuti tse 48 mangolo a diploma. Bamameli ba ile ba thabela ho utloa mabitso a linaha tse 21 tseo baromuoa ba abetsoeng ho ea ho tsona: Barbados, Benin, Bolivia, Central African Republic, Costa Rica, Côte d’Ivoire, Ecuador, Equatorial Guinea, Estonia, Guinea-Bissau, Honduras, Latvia, Leeward Islands, Mauritius, Mozambique, Nicaragua, Paraguay, Peru, Senegal, Taiwan, le Venezuela.
Ka mor’a khefu ea lijo tsa motšehare, bamameli ba ile ba boela ba kopana ’me ba thabela thuto e tletseng bophelo ea Molula-Qhooa, e neng e khannoa ke Robert P. Johnson oa Lefapha la Tšebeletso. Litho tsa sehlopha sa bo98 li ile tsa araba lipotso. E ile ea lateloa ke letoto le thabisang la lipuisano tsa lipotso le likarabo ka litho tsa basebetsi ba Gileade. Bamameli ba ile ba khothala haholo ha liithuti li pheta liphihlelo tsa tsona tsa tšimong le maikutlo a tsona ka likabelo tsa tsona tsa linaheng lisele.
Ka lilemo tse tšeletseng le halofo, Gileade e ’nile ea ba mehahong ea Mokhatlo oa Watchtower e Wallkill, New York. Leha ho le joalo, ka April 1995, sekolo se ile sa fallisetsoa Setsing sa Thuto sa Watchtower se secha se Patterson, New York. Lelapa la Bethele Wallkill le ile la ikutloa joang ka phetoho ee? Kabong ena ea mangolo ho ile ha buisanoa le ba ’maloa ba tsoang Wallkill. Lipolelo tsa bona tse amang maikutlo li ile tsa totobatsa hore kamehla ba tla hopola liithuti tsa Gileade. Ka ho hlakileng, banna le basali bana ba ikemiselitseng ke baromuoa ba sebele—ba ikokobelitse, ba itetse, ba amehile ka botebo ka ho thusa ba bang.
Ha kabo ea mangolo e fela, bohle ba leng teng ba ne ba kholisehile hore Sekolo sa Gileade se tla tsoela pele ka katleho se etsa seo se ’nileng sa se etsa ka lilemo tse 50—ho hlahisa baromuoa ba sebele!
[Lebokose le leqepheng la 18]
Lipalo Tse Amang Sehlopha:
Lenane la linaha tse emetsoeng: 8
Lenane la linaha tseo li abetsoeng ho ea ho tsona: 21
Lenane la liithuti: 48
Karolelano ea lilemo: 32,72
Karolelano ea lilemo ’neteng: 15,48
Karolelano ea lilemo tšebeletsong ea nako e tletseng: 10,91
[Setšoantšo se leqepheng la 18]
Sehlopha sa Bo98 se Abeloang Mangolo a Sekolo sa Bibele sa Gileade sa Watchtower
Lethathamong le ka tlaase mona, mela e baloa ho tloha ka pele ho ea ka morao, ’me mabitso a thathamisitsoe ho tloha ka letsohong le letšehali ho ea ka ho le letona moleng o mong le o mong.
(1) Eszlinger, A.; Mann, T.; Rivera, G.; Baruero, M.; Vaz, M.; Durga, K.; Silweryx, H.; Alvarado, D. (2) Toth, B.; Segarra, S.; Hart, R.; Rooryck, I.; Escobar, P.; Ejstrup, J.; Sligh, L.; Rivera, E. (3) Archard, D.; Snaith, S.; Marciel, P.; Koljonen, D.; Waddell, S.; Blackburn, L.; Escobar, M.; Archard, K. (4) Hart, M.; Toth, S.; Koljonen, J.; Bergman, H.; Mann, D.; Blackburn, J.; Park, D.; Vaz, F. (5) Segarra, S.; Sligh, L.; Leslie, L.; Bergman, B.; Baruero, W.; Alvarado, J.; Leslie, D.; Park, D. (6) Silweryx, K.; Eszlinger, R.; Waddell, J.; Snaith, K.; Durga, A.; Rooryck, F.; Ejstrup, C.; Marciel, D.