Matšeliso ho ba “Moea o Hlomohileng”

KAJENO, lefatše la Satane le “timeletsoe ke kutlo eohle.” (Ba-Efese 4:19; 1 Johanne 5:19) Bofebe le bohlola ke seoa. Linaheng tse ngata, manyalo a etsang karolo ea 50 lekholong kapa ka holimo ho moo a fella ka tlhalo. Bosodoma bo amoheloa hohle. Pefo ea likamano tsa botona le botšehali—peto—e hlaha khafetsa litabeng. Libuka le litšoantšo tsa bootsoa ke indasteri ea libilione tsa lidolara.—Ba-Roma 1:26, 27.

Ho hleka-hleka bana ba se nang molato ka likamano tsa botona le botšehali ho har’a boitšoaro bo nyonyehang ka mokhoa o feteletseng. Ho tšoana le bohlale ba lefatše la Satane, ho hleka-hleka bana ka likamano tsa botona le botšehali ke ketso ‘ea nama, ea batemona.’ (Jakobo 3:15) United States feela, makasine ea Time e re, “litlaleho tse fetang 400 000 tse fanoang ke matichere le lingaka mabapi le litlhaselo tse mabifi tsa likamano tsa botona le botšehali tse nang le bopaki, li beoa lifaeleng selemo le selemo ke ba boholong.” Ha bahlaseluoa ba ho hleka-hlekoa hona e e-ba batho ba baholo, ba bangata ba ntse ba e-na le maqeba a bohloko, ’me maqeba ao ke a sebele! Bibele e re: “Ea kulang o matlafatsoa ke moea [tšekamelo ea kelello, maikutlo le mehopolo e ka hare-hare] oa hae, moea o hlomohileng o ka phekoloa ke mang?”—Liproverbia 18:14, BPN.

Litaba tse molemo tsa ’Muso oa Molimo li ipiletsa ho batho ba mefuta eohle, ho akarelletsa le “ba robehileng lipelo” le ba “moea o tepeletseng.” (Esaia 61:1-4) Ha ho makatse ha ba bangata ba hlabehileng maikutlo ba arabela memong ena: “Ea nyoriloeng a a tle; le ea ratang, a nke feela metsi a bophelo.” (Tšenolo 22:17) Phutheho ea Bokreste e ka ba sebaka sa matšeliso ho bana. Ba thabela ho tseba hore haufi ho utloa bohloko e tla ba ntho ea nako e fetileng. (Esaia 65:17) Leha ho le joalo, ho fihlela ka nako eo, ba ka ’na ba hloka ho ‘tšelisoa’ le ho ‘tlamisoa’ maqeba. Ka ho loketseng Pauluse o ile a eletsa Bakreste: “Le tšelise ba pelo li tepeletseng, le tiise ba fokolang, ’me le be le mamello ho bohle.”—1 Ba-Thessalonika 5:14.

“Mehopolo e Hatellehileng”

Lilemong tsa morao tjena ba bang e bile ba “robehileng lipelo” ka mabaka ao ba bang ba a fumanang ho le boima ho a utloisisa. Ke batho ba baholo bao, motheong oa se hlalositsoeng e le “mehopolo e hatellehileng,” ba bolelang hore ba ile ba hleka-hlekoa ka likamano tsa botona le botšehali ha e sa le bana.a Ba bang ha ba be le monahano oa hore ba kile ba hleka-hlekoa ho fihlela ha, ka tšohanyetso, ba khutleloa ke liketsahalo tsa nako e fetileng le “mehopolo” ea ha motho e moholo (kapa batho ba baholo) a ne a ba hleka-hleka ha e sa le bana. Na leha e le ofe ka phuthehong ea Bokreste o na le menahano e ferekanyang eo? Linaheng tse ’maloa ho joalo, ’me bana ba inehetseng ba ka ’na ba ba le boikutlo ba ho tepella ka ho tebileng, ba ho halefa, ba ho ikutloa ba le molato, ba ho ba le lihlong kapa ba ho ba le bolutu. Joaloka Davida, ba ka ’na ba ikutloa ba le thōko le Molimo ’me ba hoeletsa: “Jehova, u emela’ng kathōko, u ipatela’ng mehleng ea matsoalo?”—Pesaleme ea 10:1.

Litšobotsi tse ngata tsa “mehopolo” ena ha li utloisisoe hantle ke litsebi tsa kelello. Leha ho le joalo, “mehopolo” ea mofuta oo e ka ama bomoea ba Bakreste ba inehetseng. Kahoo re talima ka kholiseho Lentsoeng la Molimo bakeng sa tataiso ea ho sebetsana le eona. Bibele e fana ka “kelello tabeng tsohle.” (2 Timothea 2:7; 3:16) E boetse e thusa bohle ba amehang hore ba tšepe Jehova, “Ntat’a mehauhelo, Molimo oa matšeliso ’ohle, o re tšelisang mahlomoleng ’ohle a rōna.”—2 Ba-Korinthe 1:3, 4.

Na ka Sebele e Etsahetse?

Lefatšeng, ho na le khang e khōlō mabapi le hore na “mehopolo” ena ke eng le hore na ke ho ea bohōleng bofe e emelang se hlileng se etsahetseng. Lipaki tsa Jehova ‘ha se tsa lefatše’ ’me ha li nke karolo qhoebeshanong ena. (Johanne 17:16) Ho ea ka litlaleho tse hatisitsoeng, ka linako tse ling “mehopolo” ena e ipakile e nepahetse. Ka mohlala, ka mor’a hore Frank Fitzpatrick ea sebetsanang le litaba tsa inshorense a “hopole” ha a ne a hleka-hlekoa ke moprista ea itseng, hoo e batlileng e e-ba ba lekholo ba bang ba ile ba itlhahisa ka tletlebo ea hore le bona ba ile ba hleka-hlekoa ke eena moprista eo. Ho tlalehoa hore moprista eo o ile a lumela hore o ile a ba hleka-hleka.

Leha ho le joalo, ke ho hlokomelehang hore batho ba bangata ha baa khona ho pakela “mehopolo” ea bona. Ba bang ba utloisitsoeng bohloko ka tsela ena ba ile ba hopola ka ho hlakileng ha motho ea itseng a ba hleka-hleka kapa ha tlheka-tlheko e ne e etsahala sebakeng se itseng se khethehileng. Leha ho le joalo, hamorao bopaki bo utloahalang bo fapaneng le seo bo ile ba hlakisa hore “mehopolo” eo e ne e ke ke ea e-ba ’nete.

Ho Fana ka Setšabelo

Leha ho le joalo, ke joang ho ka tšelisoang ba “moea o hlomohileng” ka lebaka la “mehopolo” e joalo? Hopola setšoantšo sa Jesu sa Mosamaria ea molemo. Monna e mong o ile a hlaseloa ke masholu, a mo otla, ’me a mo nkela lintho tsa hae. Ha Mosamaria a tsamaea ka tsela eo, o ile a utloela monna eo ea maqeba bohloko. O ile a etsa eng? Na o ile a tsekella ho utloa lintlha tsohle tse etsahetseng mabapi le kotlo eo? Kapa na Mosamaria eo o ile a batla tlhaloso ea masholu ao eaba kapele-pele o-oa a phallela? Che. Monna eo o ne a tsoile likotsi! Kahoo, ka bonolo Mosamaria eo o ile a tlamisa maqeba a hae ’me ka lerato a mo isa moo ho sireletsehileng, ntlong ea baeti e haufi moo a neng a ka khona ho hlaphoheloa a le hona teng.—Luka 10:30-37.

Ke ’nete hore ho na le phapang pakeng tsa maqeba a sebele le “moea o hlomohileng” o bakiloeng ke ho hleka-hlekoa ka likamano tsa botona le botšehali ho entsoeng bongoaneng. Empa bobeli ba tsona li utloisa bohloko bo boholo. Kahoo, se entsoeng ke Mosamaria ho Mojode ea maqeba se bontša se ka etsoang ho thusa Mokreste ’moho le rōna ea utloisitsoeng bohloko. Ntho ea pele e ka sehloohong ke ho mo tšelisa ka lerato le ho mo thusa hore a hlaphoheloe.

Diabolose o ile a utloisa Jobo ea tšepahalang bohloko, ka ho totobetseng a kholisehile hore bohloko ba maikutlo kapa ba ’mele bo tla senya botšepehi ba hae. (Jobo 1:11; 2:5) Ho tloha ka nako eo, Satane o se a lekile hangata ho sebelisa bohloko—ebang o bo etsa ka ho toba kapa che—ho fokolisa tumelo ea bahlanka ba Molimo. (Bapisa le 2 Ba-Korinthe 12:7-9.) Na re ka ba le pelaelo ea hore hona joale Diabolose o sebelisa tlhekefetso ea bana le “moea o tepeletseng” oa batho ba baholo ba bangata ba ileng ba feta har’a see (kapa ba khathatsoang ke “mehopolo” ea hore ba kile ba feta moo) e le ho leka ho fokolisa tumelo ea Bakreste? Joaloka Jesu ha a ne a hlasetsoe ke Satane, Mokreste ea utloang bohloko empa a hana ka matla ho tlohela botšepehi ba hae o re: “Tloha, Satane!”—Mattheu 4:10.

Lula U le Matla Moeeng

“Mohlanka ea khabane, ea bohlale” o hatisitse boitsebiso ho thusa ho sebetsana le bohloko ba moea le ba maikutlo bo bakiloeng ke tlhekefetso ea bana. (Mattheu 24:45-47) Phihlelo e bontša hore ea utloileng bohloko o-oa thuseha haeba a ka itšetleha ka ‘matla a Morena a sa sitoeng ke letho,’ a apara “lihlomo tsohle tsa Molimo.” (Ba-Efese 6:10-17) Lihlomo tsena li akarelletsa “’nete” ea Bibele, e pepesang Satane e le sera se fetisisang ’me e qhalanya lefifi leo eena le batšehetsi ba hae ba sebeletsang ho lona. (Johanne 3:19) Joale, ho na le “tšireletso ea sefuba, e leng ho loka.” Ea utloisitsoeng bohloko o lokela ho loanela ho khomarela ka matla litekanyetsong tse lokileng. Ka mohlala, ba bang ba na le tšusumetso e matla ea ho itematsa kapa ho etsa boitšoaro bo bobe. Ka linako tsohle ha ba hanela tšusumetso ena, baa hlōla!

Lihlomo tsa moea li boetse li akarelletsa “Evangeli ea khotso.” Ho buisana le ba bang ka merero ea Jehova ho matlafatsa ea buang hammoho le mang kapa mang ea mametseng. (1 Timothea 4:16) Haeba u le e mong oa ba “moea o hlomohileng,” ’me hoo ho u thatafaletsa ho bua ka litaba tse molemo, leka ho tsamaea le Mokreste e mong ha a etsa mosebetsi ona oa bohlokoa. ’Me u se ke ua lebala “thebe ea tumelo.” E-ba le tumelo ea hore Jehova o-oa u rata le hore o tla u buseletsa sohle se u lahlehetseng. Lumela u sa belaele hore Jesu le eena o-oa u rata, ’me o pakile sena ka ho u shoela. (Johanne 3:16) Kamehla Satane o ’nile a bolela ka bohata hore Jehova ha a tsotelle bahlanka ba hae. Leo ke le leng feela la mashano a hae a maholo, a lonya.—Johanne 8:44; Bapisa le Jobo 4:1, 15-18; 42:10-15.

Haeba bohloko ba pelo bo etsa hore ho be thata ho lumela hore Jehova o amehile ka uena, u ka thusoa ke ho tloaelana le ba bang ba lumelang ka tieo hore o-oa tsotella. (Pesaleme ea 119:107, 111; Liproverbia 18:1; Ba-Heberu 10:23-25) Se lumelle Satane ho u amoha moputso oa bophelo. Hopola hore “heleme ea poloko” ke karolo ea lihlomo; ho joalo le ka “lerumo la Moea.” Bibele e bululetsoe ke moea o halalelang, oo Satane a ke keng a o hlōla. (2 Timothea 3:16; Ba-Heberu 4:12) Mantsoe a eona a folisang a ka thoba bohloko ba maikutlo.—Bapisa le Pesaleme ea 107:20; 2 Ba-Korinthe 10:4, 5.

Qetellong, kamehla u rapelle matla a ho mamella. (Ba-Roma 12:12; Ba-Efese 6:18) Thapelo e tlohang pelong e ile ea tšehetsa Jesu ha a ne a le bohlokong bo otlang pelo ba maikutlo, ’me le uena e ka u thusa. (Luka 22:41-43) Na u thatafalloa ke ho rapela? Kōpa ba bang hore ba rapele le uena le hore ba u rapelle. (Ba-Kolosse 1:3; Jakobo 5:14) Moea o halalelang o tla tšehetsa lithapelo tsa hao. (Bapisa le Ba-Roma 8:26, 27.) Joaloka bokuli ba ’mele bo bohloko, ba bang ba nang le maqeba a maholo a maikutlo ba ka ’na ba se ke ba fola ka ho feletseng tsamaisong ena ea lintho. Empa ka thuso ea Jehova re ka mamella, ’me mamello ke tlhōlo, joalokaha ho bile joalo tabeng ea Jesu. (Johanne 16:33) “Lōna, sechaba, le itšepise ka [Jehova] ka mehla, le tšollele lipelo tsa lōna pel’a [hae]! Molimo ke setšabelo sa rōna.”—Pesaleme ea 62:8.

Ho Thoe’ng ka Mohleka-hleki ea Belaelloang?

Motho ea hleng a hleka-hleke ngoana ka likamano tsa botona le botšehali ke ’meti ’me o lokeloa ke ho talingoa a le joalo. Mang le mang ea hlasetsoeng ka tsela ena o na le tokelo ea ho qosa mohleka-hleki oa hae. Leha ho le joalo, qoso ha e-ea lokela ho etsoa ka lepotla-potla haeba e theiloe feela “mehopolong e hatellehileng” ea tlheka-tlheko. Tabeng ena, seo e leng sa bohlokoa ka ho fetisisa ke hore ea utloang bohloko a boele a fumane botsitso bo itseng ba maikutlo. Kamor’a nako e itseng, a ka ’na a ba boemong bo molemo ba ho lekanyetsa “mehopolo” ’me a etse qeto ea hore na ke eng seo a batlang ho se etsa ka eona haeba se le teng.

Nahana ka mohlala oa Donna. Ho tlalehoa hore o ne a e-na le bothata ba ho ja ’me a ea ho moeletsi e mong—eo kamoo ho bonahalang kateng, a neng a se na bokhoni. Kapele kamor’a moo, Donna o ne a qosa ntate oa hae ka hore o ile a mo hleka-hleka ka likamano tsa botona le botšehali ’me ntate oa hae o ile a isoa lekhotleng. Lekhotla la baahloli ha lea ka la fihlela tumellano, kahoo ntate eo ha aa ka a kengoa teronkong, empa o ile a tlameha ho lefa $100 000 (R360 000) e le tefiso ea litšenyehelo tsa lekhotla. Joale, kamor’a tseo tsohle, Donna o ile a bolella batsoali ba hae hore ha a sa lumela hore tlheka-tlheko eo e etsahetse!

Ka bohlale, Salomone o ile a re: “Se potlakele ho isa motho ka khotla.” (Liproverbia 25:8, BPN) Haeba ho e-na le lebaka le utloahalang la ho belaella hore mohlekefetsi ea belaelloang o ntse a tsoela pele ho hleka-hleka bana, ho ka ’na ha hlokahala hore ho fanoe ka temoso. Baholo ba phutheho ba ka thusa tabeng ea mofuta o joalo. Ntle ho moo, u iketle. Hamorao, u ka ’na ua khotsofalla ho tlohela taba eo. Leha ho le joalo, haeba u batla ho tobana le mohlekefetsi eo ea belaelloang (ka mor’a hore u lekanyetse pele hore na u tla ikutloa joang ka karabelo e ka ’nang ea fumaneha), u na le tokelo ea ho etsa joalo.

Nakong ea ha motho ea nang le “mehopolo” a fola, maemo a sa tloaelehang a ka ’na a hlaha. Ka mohlala, motho a ka ’na a ba le litšoantšo tse hlakileng ka kelellong tsa ha a ne a hleka-hlekoa ke e mong eo a mo bonang letsatsi le leng le le leng. Ha ho na melao e ka behoang bakeng sa ho sebetsana le taba ena. “E mong le e mong o tla jara phahlo ee e leng ea hae.” (Ba-Galata 6:5) Ka linako tse ling motho a ka ’na a ba le maikutlo a hore ho ameha mong ka eena kapa setho sa lelapa se haufi-ufi le eena. Hopola sebōpeho se sa kholiseng sa e meng ea “mehopolo e hatellehileng” ha ho tluoa tabeng ea ho khetholla ea belaelloang ka hore ke mohlekefetsi. Boemong bo joalo, hafeela taba e e-s’o ka e pakoa ka ho tiileng, ho ntšetsa pele ho kopana le lelapa—bonyane ka ho le etela ka linako tse ling, ho le ngolla kapa ho le letsetsa thelefono—ho tla bontša hore motho eo o leka ho latela tsela ea Mangolo.—Bapisa le Ba-Efese 6:1-3.

Baholo ba ka Etsa’ng?

Haeba baholo ba atameloa ke setho sa phutheho se utloisoang bohloko ke lintho tse etsahetseng nakong e fetileng kapa “mehopolo e hatellehileng” ea ha a hleka-hlekoa bongoaneng, hangata ba babeli ba bona ba abeloa hore ba fane ka thuso. Ka mosa baholo bana ba lokela ho khothalletsa motho ea utloisitsoeng bohloko hore nakong eo a lebise tlhokomelo ea hae ho sebetsaneng ka katleho le maikutlo a tepelletseng. Mabitso a leha e le bafe ba “hopoloang” e le bahleka-hleki a lokela ho bolokoa e le pinyane.

Mosebetsi o ka sehloohong oa baholo ke ho sebetsa joaloka balisa. (Esaia 32:1, 2; 1 Petrose 5:2, 3) Ka ho khetheha ba lokela ho hlokomela hore ba “apare . . . maikutlo a mohau, a molemo, a boikokobetso, a bonolo, a mamello.” (Ba-Kolosse 3:12) A ba ke ba mamele ka tsela e mosa ba ntan’o sebelisa mantsoe a folisang a tsoang ka Mangolong. (Liproverbia 12:18) Ba bang ba utloisitsoeng bohloko ke “mehopolo” e hlokofatsang ba bontšitse kananelo ea bona ho baholo ba ba etelang khafetsa kapa hona ho ba letsetsa thelefono e le hore ba ka tseba hore na ba ntse ba e-ea joang. Hase hore maeto a joalo a lokela ho nka nako e ngata haholo, empa a bontša hore mokhatlo o hlophisitsoeng oa Jehova o-oa tsotella. Ha ea utloileng bohloko a elelloa hore baena ba hae ba Bakreste ba mo rata e le kannete, a ka ’na a thuseha e le hore a ka hlaphoheloa ka tekanyo e khōlō ho tsitsiseng maikutlo.

Empa ho thoe’ng haeba ea utloileng bohloko a etsa qeto ea hore o batla ho qosa?b Joale baholo bao ba babeli ba ka mo eletsa ka hore, tumellanong le molao-motheo o ho Mattheu 18:15, o lokela hore eena ka boeena a atamele motho eo a mo qosang mabapi le taba eo. Haeba moqosi a se boemong bo botle maikutlong ba ho etsa sena lifahleho li talimane, seo se ka etsoa ka thelefono kapa mohlomong ka ho ngola lengolo. Ka tsela ena, moqosuoa o fuoa monyetla oa ho bua le Jehova ka ho tebileng mabapi le karabo ea hae qosong. A ka ’na a ba a khona ho hlahisa bopaki ba hore ha aa ka a hleka-hleka motho eo. Kapa mohlomong ea qositsoeng o tla lumela molato, ’me ho fihleloe poelano. Eo e tla ba tlhohonolofatso e kaakang! Haeba ho e-na le bopaki ba ho lumela molato, baholo bane ba babeli ba ka ntšetsa pele taba ba sebetsana le eona tumellanong le melao-motheo ea Mangolo.

Haeba qoso e latoloa, baholo ba lokela ho hlalosetsa moqosi hore ha ho na se seng se ka etsoang ka tsela ea boahloli. ’Me phutheho e tla tsoela-pele e talima ea qositsoeng e le motho ea hlokang molato. Bibele e bolela hore ho tlameha ho be le lipaki tse peli kapa tse tharo pele ho ka nkoa khato ea boahloli. (2 Ba-Korinthe 13:1; 1 Timothea 5:19) Esita le haeba batho ba fetang a le mong ba ka “hopola” tlhekefetso e entsoeng ke eena motho eo, boleng ba mehopolo ena ke bo sa tsitsang hore ho ka etsoa qeto ea boahloli haeba ho se bopaki bo bong bo ka e tšehetsang. Hona ha ho bolele hore “mehopolo” e joalo e talingoa e le ea bohata (kapa hore e talingoa e le ’nete). Empa melao-motheo ea Bibele e tlameha ho lateloa ha ho sebetsanoa le taba ka tsela ea boahloli.

Ho thoe’ng haeba moqosuoa—le hoja a hana phoso—a hlile a le molato? Na ka mantsoe a mang e se e le ha a “phonyohile”? Le hanyenyane! Taba ea hore na o molato kapa ha a na oona e ka siuoa ka ho sireletsehileng matsohong a Jehova. “Libe tsa batho ba bang li ee li bonahale pele, li ba etelle pele kahlolong, empa tsa ba bang tsona li ba latele.” (1 Timothea 5:24; Ba-Roma 12:19; 14:12) Buka ea Liproverbia e re: “Tšepo ea ea lokileng e tla fetoha thabo, empa tebello ea motho ea sa lokang e tla timela.” “Mohla ho shoang e mobe, tšepo ea hae ea timela.” (Liproverbia 10:28; 11:7) Qetellong, Jehova Molimo le Kreste Jesu ba fana ka kahlolo e sa feleng ka toka.—1 Ba-Korinthe 4:5.

Ho Hanela Diabolose

Ha lisoule tse inehetseng li mamella ho sa tsotellehe bohloko bo boholo ba ’mele kapa ba maikutlo, ke bopaki bo bokaakang ba matla a bona a ka hare-hare le lerato la bona ho Molimo! ’Me ke bopaki bo bokaakang ba ho matlafatsoa ke moea oa Jehova!—Bapisa le 2 Ba-Korinthe 4:7.

Mantsoe a Petrose a sebetsa ho ba joalo: “Hanang ho [Satane] ka ho tiea tumelong.” (1 Petrose 5:9) Ho etsa joalo ho ka ’na ha se ke ha e-ba bonolo. Ka linako tse ling, ho ka ba ha e-ba thata ho nahana ka ho hlakileng le ka ho utloahalang. Empa u se ke ua nyahama! Haufinyane, Diabolose ’moho le liketso tsa hae tse bolotsana o tla be a se a le sieo. Ruri re lapetse nako eo ka eona “Molimo . . . ka sebele sa oona . . . o tla hlakola meokho eohle mahlong a bona; lefu ha le sa tla hlola le e-ba teng; ’me ha ho sa tla ba masoabi, leha e le ho bokolla, kapa bohloko; hobane tsa pele li fetile.”—Tšenolo 21:3, 4.

[Mongolo o botlaaseng ba leqephe]