“Re Liheloa Fatše, Empa ha re Timele”
JOALOKAHA HO BOLETSE ULF HELGESSON
Ka July 1983, lingaka tse nkokametseng li ile tsa khotsa: “O tsohile!” Hlahala e bolelele ba lisenthimithara tse 12 e ne e tlositsoe mothapong oa ka oa mokokotlo ho buuoeng ho ileng ha nka lihora tse 15. Ke ile ka sala ke holofetse ka ho feletseng.
MATSATSI a seng makae hamorao, ke ile ka isoa sepetleleng se ka bang lik’hilomithara tse 60 ho tloha motseng oa heso oa Hälsingborg, ka boroa ho Sweden. Mono ke ile ka kenela lenaneo la phekolo ea ho nkhutlisetsa boemong ba pele. Physiotherapist e ile ea mpolella hore le tla ntlhoka ho hongata, leha ho le joalo ke ne ke laba-labela ho qalisa. Ke ne ke hlile ke batla ho boela ke tsamaea. Ka mafolo-folo a ho phehella lenaneo la lihora tse hlano ka letsatsi ke ikoetlisa, ke ile ka tsoela pele.
Khoeli hamorao ha molebeli ea tsamaeang a etetse phutheho ea rōna, eena le baholo ba bang ba Bakreste ba ile ba nka leeto le lelelele ho tla tšoarela seboka sa baholo ba phutheho kamoreng ea ka ea sepetlele. Ke ile ka thaba hakaakang ke pontšo ee ea lerato la boena! Baoki ba hlokomelang karolo eo ea sepetlele ba ile ba etsetsa sehlopha sohle lijo tse bobebe ka mor’a seboka.
Qalong lingaka li ne li makalitsoe ke tsoelo-pele ea ka. Ka mor’a likhoeli tse tharo ke ne ke khona ho lula ke otlolohile setulong sa ka sa likooa esita le ho ema metsotsoana e se mekae. Ke ne ke thabile ’me ke ikemiselitse ka ho feletseng hore ke boele ke tsamaee. Lelapa la ka le Bakreste-’moho le ’na ba ’nile ba nkhothatsa haholo ha ba nketetse. Ke ile ka khona le ho ea hae ka makhetlo ka nakoana e khutšoanyane.
Tšitiso ea Sebele
Leha ho le joalo, ka mor’a moo, ha kea ka ka hlola ke etsa tsoelo-pele ea letho. Kapele physiotherapist e ile ea mpolella molaetsa o utloisang bohloko: “U ke ke ua ntlafala ho feta mona!” Sepheo joale e ne e le ho ’matlafatsa e le hore nka itsamaisa ka setulo sa likooa. Ke ile ka ipotsa hore na ke tla etsahalloa ke eng. Mosali oa ka o tla khona joang? Le eena o ne a bile le tšebetso ea ho buuoa e khōlō ’me o ne a hloka thuso ea ka. Na ke ne ke tla hloka tlhokomelo ea sepetlele ka ho feletseng?
Ke ile ka tepella maikutlo haholo. Mokoka oa ka, sebete sa ka le matla a ka li ile tsa nyamela butle-butle. Matsatsi a feta, eaba ke ntse ke sa khone ho tsamaea. Ke ne ke sa holofala ’meleng feela empa maikutlong le moeeng ke ne ke le shoohlo. Ke ne ke ‘lihetsoe fatše.’ Kamehla ke ne ke italima ke le matla moeeng. Ke ne ke e-na le tumelo e metseng ka tieo ’Musong oa Molimo. (Daniele 2:44; Mattheu 6:10) Ke ne ke kholisehile ke tšepiso ea Bibele ea hore maloetse ’ohle le mefokolo a tla phekoloa lefatšeng le lecha la ho loka la Molimo le hore moloko ’ohle oa batho o tla khutlisetsoa bophelong bo phethahetseng teng. (Esaia 25:8; 33:24; 2 Petrose 3:13) Empa, hona joale ke ne ke ikutloa ke shoele litho e seng nameng feela empa hape le moeeng. Ke ile ka ikutloa ke ‘timetse.’—2 Ba-Korinthe 4:9.
Pele nka tsoela pele, e re ke u bolelle hanyenyane ka pale ea bophelo ba ka.
Lelapa le Thabileng
Ke hlahile ka 1934, ’me ke ne ke sa khathatsoe ke ho kula. Mathoasong a bo-1950, ke ile ka kopana le Ingrid, ’me ka 1958 ra nyalana, ra lula motseng oa Östersund, bohareng ba Sweden. Phetoho e khōlō bophelong ba rōna e bile ka 1963 ha re qala ho ithuta Bibele le Lipaki tsa Jehova. Ka nako eo re ne re e-na le bana ba bararo ba banyenyane—Ewa, Björn le Lena. Kapele lelapa lohle le ne le ithuta ’me le tsoela pele hantle tsebong ea linnete tsa Bibele.
Nakoana ka mor’a hore re qale ho ithuta, re ile ra fallela Hälsingborg. Ha re le moo, ’na le mosali oa ka ra inehela ho Jehova ’me ra kolobetsoa ka 1964. Thabo ea rōna e ile ea eketseha ha morali oa rōna e moholo, Ewa, a kolobetsoa ka 1968. Lilemo tse supileng hamorao, ka 1975, Björn le Lena le bona ba ile ba kolobetsoa, ’me selemong se latelang ke ile ka khethoa ho ba moholo ka phuthehong ea Bokreste.
Mosebetsi oa ka oa boipheliso o ne o ntumella ho hlokomela litlhoko tsa nama tsa lelapa la ka hantle. ’Me thabo ea rōna e ile ea eketseha ha Björn le Lena ba kenela tšebeletso ea nako e tletseng. Ka mor’a nakoana Björn o ile a memeloa ho sebeletsa ofising ea lekala ea Lipaki tsa Jehova e Arboga. Kamoo ho neng ho bonahala kateng, bophelo bo ne bo re tsamaela hantle. Joale, mathoasong a 1980, ’meleng ke ile ka qala ho utloa liphello tsa hlahala e ileng ea qetella e tlositsoe ka 1983 ha ke buuoa.
Ho Hlōla Kholofalo ea Moea
Ha ke ne ke bolelloa hore nke ke ka hlola ke tsamaea hape, ke ile ka lahleheloa ke tšepo ea bophelo. Ke ile ka boela ka fumana matla moeeng joang? Ho bile bonolo ho feta kamoo ke neng ke nahana kateng. Ke ile ka nka Bibele ea ka ’me ka qala ho bala. Ha ke ntse ke bala ka ho eketsehileng, ke ile ka fumana matla a eketsehileng a moea. Ka holim’a tsohle ke ile ka qala ho ananela bohlokoa ba Thuto ea Jesu ea Thabeng. Ke ile ka e bala ka makhetlo-khetlo ’me ka thuisa ka eona.
Ke ile ka boela ka ba le pono e thabileng ka bophelo. Ha ke ntse ke bala le ho thuisa, ke ile ka qala ho bona menyetla ho e-na le ho bona litšitiso. Ke ile ka boela ka ba le takatso ea ho abelana linnete tsa Bibele le ba bang, ’me ka khotsofatsa takatso ena ka ho pakela basebetsi ba sepetlele le batho ba bang bao ke kopanang le bona. Lelapa la ka le ile la ntšehetsa ka ho feletseng ’me la fumana koetliso ea kamoo le ka ntlhokomelang kateng. Qetellong ke ile ka tsoa sepetlele.
Qetellong ka ba hae. E bile letsatsi le thabisang hakaakang ho rōna bohle! Lelapa la ka le ile la etsa kemiso e neng e kopanyelletsa ho ntlhokomela. Mor’a ka Björn o ile a etsa qeto ea ho tlohela mosebetsi ofising ea lekala ea Lipaki tsa Jehova, ’me a tla hae ho tla thusa ka ho ntlhokomela. E ne e le ho tšelisang haholo ho bontšoa lerato le kameho joalo ke ba lelapa la ka.
Ho Sebetsana ka Katleho le Tšitiso e ’Ngoe Hape
Leha ho le joalo, nako ha e ntse e e-ea, bophelo ba ka ba ’na ba mpefala, ’me ke ne ke thatafalloa ke ho tsamaea. Qetellong, ho sa tsotellehe boiteko ba boitelo ba lelapa la ka, le ne le se le sa khone ho ntlhokomela ka ho eketsehileng lapeng. Kahoo ke ile ka nahana hore ho ne ho tla ba molemo ho ’na hore ke lule lehaeng la kokelo. Ho ne ho boetse ho bolela liphetoho le mekhoa e mecha. Empa ha kea ka ka lumella lintho tsena ho ba tšitiso ea tsoelo-pele ea ka moeeng.
Ha ho mohla ke ileng ka khaotsa ho bala Bibele le ho etsa lipatlisiso. Ke ile ka lula ke nahana ka seo nka se etsang, e seng ka seo nke keng ka se etsa. Ke ile ka thuisa ka mahlohonolo a moea ao Lipaki tsa Jehova kaofela ha tsona li nang le ’ona. Ke ile ka atametsoa haufi le Jehova ke thapelo ’me ka sebelisa monyetla o mong le o mong ho bolella ba bang.
Hona joale ke qeta masiu le karolo ea matsatsi a mang ke le lehaeng la kokelo. Linakong tsa motšehare oa mantsiboea le ka phirimana, ke ba hae kapa libokeng tsa rōna tsa Bokreste. Tšebeletso ea ’masepala e lokiselitse mokhoa oa ho tsamaea oa kamehla bakeng sa ho nkisa libokeng le ho nkhutlisa le oa ho nkisa hae le ho nkhutlisa. Lelapa la ka le itetseng, baena ba ka ka phuthehong le basebetsi ba lehae la kokelo ba ntlhokomela ka tsela e babatsehang.
Ho Etsa Seo Nka se Khonang
Ha ke ikuke ke le ea se nang thuso, ’me ba lelapa la ka, leha e le baena ba ka ba Bakreste ha ba ntšoare joalo. Ke hlokomeloa ka mokhoa o lerato, o ntumellang ho tsoela pele ke sebeletsa hamolemo ke le moholo. Ke tsamaisa Thuto ea Buka ea Phutheho beke e ’ngoe le e ’ngoe hammoho le thuto ea beke le beke ea Molula-Qhooa Holong ea ’Muso. Ke sitoa ho phetla maqephe a Bibele, kahoo motho e mong o abeloa ho nthusa ho a phetla ha re le libokeng. Ke tsamaisa liboka le ho nehelana ka lipuo ke ntse ke lutse setulong sa ka sa likooa.
Ka hona ke sa ntse ke khona ho etsa lintho tse ngata tseo ke neng ke thabela ho li etsa pele ho akarelletsa ho etsa maeto a bolisa. (1 Petrose 5:2) Ke etsa sena ha baena le bo-khaitseli ba tla ho ’na ho tla fumana thuso kapa keletso. Ke boetse ke sebelisa thelefono, ke nka bohato ba ho qala ka ho founela ba bang. Ho fella ka ho khothatsana. (Ba-Roma 1:11, 12) Motsoalle e mong o sa tsoa re: “Hang feela ha ke ikutloa ke nyahame, u-ua letsa ho nkhothatsa.” Empa le ’na ka ho tšoanang kea khothala ke ho tseba hore Jehova o hlohonolofatsa boiteko ba ka.
Pele ho liboka le kamorao ho tsona, ke ba le botsoalle bo botle le bana ka phuthehong. Kaha ke lula setulong sa ka sa likooa re bua hantle le bona re shebane ka mahlong. Ke ananela botšepehi ba bona le tsela eo ba tobang litaba ka eona. Moshemane e mong o kile a re ho ’na: “U sekooa se botle bo ikhethang!”
Ka ho lebisa tlhokomelo ho seo nka se etsang ho e-na le ho tšoenyeha ka seo nke keng ka khona ho se etsa, ke ’nile ka thabela ho sebeletsa Jehova. Ke ithutile ho hongata ho se nketsahalletseng. Ke hlokometse hore liteko tseo re fetang tlas’a tsona lia re koetlisa le ho re matlafatsa.—1 Petrose 5:10.
Ke ile ka hlokomela hore batho ba bangata ba phelang hantle ’meleng, ba sitoa ho ananela hore re tlameha ho nka ka botebo borapeli ba rōna ho Ntate oa rōna oa leholimo. Haeba re sa etse joalo, kemiso ea rōna ea ho ithuta, ea liboka le ea tšebeletso ea tšimo e ka fetoha feela mokhoa. Ke nahana hore litokisetso tsena li bohlokoa haholo bakeng sa ho pholoha bofelo ba lefatše lena ho kena lefatšeng leo Molimo a le tšepisitseng la Paradeise.—Pesaleme ea 37:9-11, 29; 1 Johanne 2:17.
Kamehla re lokela ho boloka tšepo ea bophelo lefatšeng le lecha le tlang la Molimo e phela lipelong tsa rōna. (1 Ba-Thessalonika 5:8) Ke boetse ke ithutile ho se inehele ntoeng khahlanong le tšekamelo leha e le efe ea ho nyahama. Ke ithutile ho talima Jehova joaloka Ntate ’me mokhatlo oa hae o hlophisitsoeng joaloka ’Mè. Ke hlokometse hore haeba re etsa boiteko, Jehova a ka sebelisa leha e le ofe oa rōna ho ba mohlanka oa hae ea molemo.
Esita leha ka linako tse ling ke ne ke ee ke ikutloe eka ke ‘lihetsoe fatše,’ ‘ha kea timetsoa.’ Ha ho mohla nkileng ka lahloa ke Jehova le ke mokhatlo oa hae o hlophisitsoeng, leha e le ke ba lelapa la ka kapa baena ba ka ba Bakreste. Ka lebaka la hore ke ile ka nka Bibele ’me ka qala ho e bala, ke ile ka boela ka fumana matla moeeng. Ke leboha Jehova Molimo, ea fanang ka “matla ao a tlōlisang” ha re tšepela ho eena.—2 Ba-Korinthe 4:7.
Ka kholiseho eohle le tšepo e feletseng ho Jehova, ke lebelletse bokamoso ka cheseho. Ke kholisehile hore haufinyane haholo Jehova Molimo o tla phethahatsa tšepiso ea hae ea ho tsosolosa paradeise mona lefatšeng hammoho le mahlohonolo ’ohle a babatsehang ao e tlang ho a tlisa.—Tšenolo 21:3, 4.