Ba Ile ba Fumana Khotso Lefatšeng le Ferekaneng

SEKOAHELO sa makasine ena se bontša ntoa e mahlo-mafubelu ea Bosnia le Herzegovina. Na khotso e ka ba teng tulong e joalo? Ka ho makatsang, karabo ke e. Ha Roma e K’hatholike, Orthodox e ka Bochabela le mokhatlo oa Mamosleme sebakeng seo se kotsi li loanela sebaka seo, batho ba bangata ba laba-labela khotso, ’me ba bang ba e fumane.

Ba ha Djorem e ne e le baahi ba Sarajevo, ’me e ne e le Lipaki tsa Jehova. Ka hare ho mofere-fere oohle o teng motseng oo, ka tloaelo ba ne ba etela baahisani ba bona ho arolelana le bona litaba tse molemo tsa ’Muso oa Molimo. (Mattheu 24:14) Hobane’ng? Hobane lelapa la ha Djorem le ne le tseba hore ’Muso ona ke oa sebele, hore o se o hlonngoe leholimong le hore ke oona feela tšepo e molemohali ea khotso bakeng sa moloko oa batho. Lipaki tsa Jehova li na le kholiseho e feletseng ho seo moapostola Pauluse a ileng a se bitsa “litaba tse molemo tsa khotso.” (Ba-Efese 2:17, NW) Ka lebaka la batho ba kang Bozo le Hena Djorem, ba bangata ba fumana khotso Bosnia le Herzegovina.

Khotso ea Sebele e Tlang

Ho na le ho hongata ho ka boleloang ka ba ha Djorem. Leha ho le joalo, pele, a re bueng ka banyalani ba bang ba ileng ba ba le tšepo ’Musong oa Molimo. Mabitso a bona ke Artur le Arina. Bona le bara ba bona ba banyenyane ba ne ba kile ba lula rephabliking e naheng eo pele e neng e le Soviet Union. Ha ntoa ea lehae e qhoma, Artur o ile a loanela lehlakore le leng. Leha ho le joalo, ka potlako o ile a ipotsa, ‘Ke hobane’ng ha ke loantša batho baa bao e neng e le baahisani ba ka?’ O ile a tloha naheng eo, ’me ka mor’a mathata a mangata o ile a fihla Estonia le lelapa la hae le lenyenyane.

Ha a etetse St. Petersburg, Artur o ile a kopana le Lipaki tsa Jehova ’me a hlolloa ke seo a ithutang sona ka ’Muso oa Molimo. Thato ea Jehova ke hore haufinyane ’Muso oa Molimo e tla ba oona feela o busang moloko oa batho. (Daniele 2:44) Joale lefatše e tla ba sebaka se renang khotso, ho se ho se na lintoa tsa mahae kapa ho se utloane ha machaba. Esaia o profetile ka nako eo: “’Me ha ho sa tla etsoa hampe, ha ho sa tla hlola ho senngoa thabeng eohle e halalelang ea ka, hobane lefatše le tla tlala tsebo ea Jehova, joalo ka ha metsi a aparetse leoatle.”—Esaia 11:9.

Ha a hlokomela setšoantšo sa lefatše le tlang la khotso leo Paki e neng e mo bontša lona thusong ea ho ithuta Bibele, Artur o ile a hlalosa hore o kile a phela sebakeng se tšoanang le seo. Leha ho le joalo, hona joale se sentsoe ke ntoa ea lehae. Ba khutletse Estonia, Artur le lelapa la hae ba ithuta ho eketsehileng ka ’Muso oa Molimo ka ho ithuta Bibele le Lipaki tsa Jehova.

Khotso ka Har’a Pherekano

Pesaleme ea 37:37 (NW), e re: “Talima ea hlokang molato, ’me u lebele ea lokileng, hobane bokamoso ba motho eo bo tla ba le khotso.” Ha e le hantle, khotso ea ea hlokang molato le ea ea lokileng mahlong a Molimo ha e ea lekanyetsoa bokamosong ba hae. O e thabela le hona joale. Hoo ho etsahala joang? Nahana ka phihlelo ea monna ea bitsoang Paul.

Paul o lula kampong ea baphaphathehi e hōle Ethiopia ka boroa-bophirimela, le hoja ha e le hantle a e-tsoa naheng ea boahelani. Ha a le naheng ea habo, o ile a kopana le e mong oa Lipaki tsa Jehova ea neng a sebetsa k’hamphaning ea oli, ’me monna enoa o ile a mo fa thuso ea ho ithuta Bibele, ’Nete e Isang Bophelong bo sa Feleng.a Paul ha aa ka a hlola a kopana le Paki eo hape, empa o ile a ithuta buka eo ka hloko. Ntoa ea lehae e ile ea mo balehisetsa kampong ea baphaphathehi e Ethiopia, ’me moo o ile a buisana le ba bang ka seo a ithutileng sona. Sehlopha se senyenyane se ile sa amohela sena e le ’nete. Motheong oa seo ba ithutileng sona, ka potlako ba ne ba ruta ba bang ka kampong eo.

Paul o ile a ngolla ntlo-khōlō ea Mokhatlo oa Watch Tower a kōpa thuso. Mosebeletsi ea neng a rometsoe a e-tsoa Addis Ababa o ile a hlolloa ke ho fumana batho ba 35 ba mo emetse, ba ikemiselitse ho ithuta ka ho eketsehileng ka ’Muso oa Molimo. Ho ile ha etsoa litokisetso tsa ho fana ka thuso motheong oa kamehla.

Ho ka boleloa joang hore batho ba kang Paul ba thabela khotso? Bophelo ba bona ha bo bonolo, empa ba na le tumelo ho Molimo. Ha ba angoa ke pherekano ea lefatše lena, ba sebelisa keletso ea Bibele: “Le se ke la belaella letho; empa nthong tsohle seo le se batlang, le ke le se tsebise Molimo ka thapelo le ka kōpo e nang le teboho.” Ka lebaka leo, ba na le khotsofalo e fumanoang seoelo kajeno. Mantsoe a moapostola Pauluse ho phutheho ea Bafilippi aa sebetsa ho bona: “Khotso ea Molimo, e fetisang kutloisiso eohle, e tla boloka lipelo tsa lona le mehopolo ea lōna ho Jesu Kreste.” Ka sebele, ba ikutloa ba e-na le kamano e haufi le Jehova, “Molimo oa khotso.”—Ba-Filippi 4:6, 7, 9.

Khotso ea Hona Joale

Morena oa ’Muso oa Molimo ea behiloeng teroneng ke Jesu Kreste, eo ka Bibeleng a bitsoang “Morena oa Khotso.” (Esaia 9:6) Moprofeta oa boholo-holo o ile a re ka eena: “O tla bolela khotso ho lichaba, a buse ho tloha leoatleng le leng ho isa ho le leng, le ho tloha nōkeng ho isa pheletsong tsa lefatše.” (Zakaria 9:10) Mantsoe a bululetsoeng joaloka ana a ile a e-ba le phello e tebileng bophelong ba monna ea bitsoang José.

Ka nako e ’ngoe José o ne a le teronkong. E ne e le sekhukhuni ’me o ile a tšoaroa nakong eo a neng a itokisetsa ho ea phatlola liahelo tsa sepolesa. O ne a nahana hore ke pefo feela e neng e tla etsa hore ’muso o ntlafatse boemo ba naha ea habo. Nakong eo a leng teronkong, Lipaki tsa Jehova li ile tsa qala ho ithuta Bibele le mosali oa hae.

Ka mor’a hore José a lokolloe, le eena o ile a ithuta Bibele, ’me ka potlako mantsoe a Pesaleme ea 85:8 a ile a sebetsa ho eena: “Ke tla mamela se boleloang ke Molimo Jehova; hobane o re, khotso e be ho sechaba sa oona, le ho bakhethoa ba hae.” Leha ho le joalo, temana eo e qetella ka temoso: “Ba mpe ba se ke ba khutlela bohlanyeng.” Kahoo, ea batlang khotso ea Jehova a ke ke a nahana ho itaola kapa ho etsa se khahlanong le thato ea Hae.

Kajeno, José le mosali oa hae ke basebeletsi ba Bakreste. Ba tataisetsa ba bang ’Musong oa Jehova oo e leng tharollo mathateng ao pele José a neng a leka ho a rarolla ka libomo tsa maiketsetso. Ba ikemiselitse ho tšepa Bibele, e reng: “Morena o tla fana ka tse molemo.” (Pesaleme ea 85:12, BPN) Ntle le tika-tiko, morao tjena José o ile a etela liahelo tseo a neng a rerile ho li ripitla. Hobane’ng? E le hore a ka bua le malapa a moo ka ’Muso oa Molimo.

Batho ba Khotso

Ho Pesaleme ea 37:10, 11, Bibele e re: “Ho se ho se hokae, ’me molotsana o tla ba sieo; u tla qamaka tulo tsa hae, empa o tla be a setse a le sieo; empa ba bonolo ba tla rua lefatše, ba iketle khotsong e kholo.” Ke tebello e khanyang hakaakang!

Leha ho le joalo, hlokomela hore khotso ea Jehova ke ea “ba bonolo” feela. Ba batlang khotso ho hlokahala ba ithute ho ba le khotso. Sena e bile ’nete ka Keith ea lulang New Zealand. Keith o ne a hlalosoa e le ea “matla ’meleng le bothong ba hae, a le mabifi a bile a le khang.” E ne e le setho sa kenke ’me a lula ntlong eo ka sebele e neng e le qhobosheane, eo lirapa tsa eona li neng li lebeloa ke lintja tse lebelang tse tharo ho thibela bahlaseli. Mosali oa hae, ’mè oa bana ba tšeletseng, o ne a mo hlalile.

Ha Keith a kopana le Lipaki tsa Jehova, litaba tse molemo li ile tsa e-ba le phello e tebileng ho eena. Kapele eena le bana ba hae ba ne ba kopanela libokeng le Lipaki. O ile a kuta moriri oa hae o molelele o neng o fihla thekeng ’me a qala ho bua ka ’Muso oa Molimo ho metsoalle ea hae ea pele. Ba bang ho bana le bona ba ile ba qala ho ithuta Bibele.

Joaloka limilione tsa ba pelo li lokileng ho potoloha lefatše, Keith o ne a qalile ho sebelisa mantsoe a moapostola Petrose: “Ea lakatsang ho rata ho phela le ho bona matsatsi a monate, . . . a khelohe bobe, ’me a etse ho molemo, a batle khotso, a e phehelle.” (1 Petrose 3:10, 11) Eo e neng e le mosali oa Keith o ile a lumela ho nyalana le eena hape, ’me hona joale Keith o ithuta ho ‘batla khotso le ho e phehella.’

Khotso ea Jehova e bile mopholosi oa bophelo ba ba bangata, ho akarelletsa eo e kileng ea e-ba moatlelete ea hlahetseng moo pele e neng e le U.S.S.R. Monna enoa o ile a hapa likhau litlhōlisanong tsa Liolimpiki, empa o ile a felloa ke tšepo ’me a retelehela lithethefatsing le joaleng. Ka mor’a lilemo tse 19 tse tletseng ka liketsahalo tse akarelletsang ho ahloleloa ho ea kampong ea ho qobelloa ho sebetsa ka thata lilemo tse tharo Siberia, leeto la ho ea Canada ka ho kena sekepeng ka bolotsana a sa lemohuoe, le ho okamela lebitla ka makhetlo a mabeli ka lebaka la ho lemalla ha hae lithethefatsi, o ile a rapela Molimo bakeng sa thuso ea ho fumana morero oa sebele oa bophelo. Thuto ea Bibele le Lipaki tsa Jehova tse buang Serussia e ile ea mo thusa ho fumana karabo lipotsong tsa hae. Joaloka ba bang ba limilione, kajeno, monna enoa o iphumanetse khotso ka boeena le khotso le Molimo.

Tšepo ea Tsoho

Qetellong, a re khutleleng ho Bozo le Hena Djorem, Sarajevo. Banyalani bana ba ne ba e-na le morali ea lilemo li hlano, Magdalena. Ka July selemong se fetileng, boraro ba bona ba ile ba bolaoa ke khaketla ea bomo e ileng ea phatloha ha ba ne ba tloha hae ho ea kopanela hape mosebetsing oa boboleli. Ho thoe’ng ka khotso eo ba neng ba ruta ba bang ka eona? Na khaketla e ileng ea nka bophelo ba bona e bontša hore ena e ne e se khotso ea sebele?

Le hanyenyane! Tsamaisong ena ea lintho, liketsahalo tse sehlōhō lia etsahala. Batho ba bolaoa ke libomo kapa likhaketla tsa tsona. Ba bang ba bolaoa ke bokuli kapa likotsi. Ba bangata ba bolaoa ke botsofali. Ba thabelang khotso ea Molimo ha baa lokoloha liketsahalong tse joalo, empa monyetla oa liketsahalo tse joalo ha o ba siee ba se na tšepo.

Jesu o ile a tšepisa motsoalle oa hae Maretha: “Ke ’na tsoho le bophelo; ea lumelang ho ’na, leha a shoele, o tla phela.” (Johanne 11:25) Ba ha Djorem ba ne ba lumela sena, joalokaha ho le joalo ka Lipaki tsohle tsa Jehova. ’Me ba ha Djorem ba ne ba e-na le tšepo ea hore leha ba ka shoa, ba tla tsosetsoa lefatšeng leo ka nako eo e tla beng e le sebaka sa sebele sa khotso. Jehova Molimo “o tla hlakola meokho eohle mahlong a bona; lefu ha le sa tla hlola le e-ba teng; ’me ha ho sa tla ba masoabi, leha e le ho bokolla, kapa bohloko; hobane tsa pele li fetile.”—Tšenolo 21:4.

Pejana feela ho hore a shoe, Jesu o ile a re ho balateli ba hae: “Ke le fa khotso ea ka. . . . Lipelo tsa lōna li se ferekane.” (Johanne 14:27) Re thaba le ba ha Djorem ba neng ba e-na le khotso eo le bao ka sebele ba tlang ho e thabela ka ho feletseng haholoanyane tsohong. Re thabela bohle ba rapelang Jehova, Molimo oa khotso. Ba joalo ba na le khotso ea kelello. Ba thabela khotso le Molimo. Ba hlaolela ho ba le khotso le ba bang. ’Me ba na le tšepo nakong e tlang ea khotso. E, ba fumane khotso, le hoja ba lula lefatšeng le ferekaneng. Ka sebele, ba rapelang Molimo ka moea le ka ’nete ba thabela khotso. E se e ka le uena u ka fumana khotso e tšoanang.

[Mongolo o botlaaseng ba leqephe]

[Litšoantšo tse leqepheng la 7]

Ba fumane khotso ho sa tsotellehe ho phela ha bona lefatšeng le ferekaneng