Baboleli ba ’Muso Baa Tlaleha
Ho Hasa Peō ea ’Muso ka Linako Tsohle
LENTSOE la Molimo, Bibele, le khothalletsa cheseho. Morena Solomone o itse: “Jala peō ea hao e sa le hosasa, matsoho a hao u se ke ua a neela sebaka mantsiboea; hobane ha u tsebe hoba ho tla mela ntho efe, kapa ena, kapa eno, kapa ha ekaba li tla mela hantle tse peli.”—Moeklesia 11:6.
Ketsahalong e ’ngoe le e ’ngoe e tšoanelehang, Lipaki tsa Jehova li jala “peō” ka ho bolela litaba tse molemo tsa ’Muso oa Molimo. Linaheng tse fetang 230 le lihlopheng tsa lihlekehleke, li tsoela pele ‘li sa khaotse ho ruta le ho bolela litaba tse molemo mabapi le Kreste, Jesu.’ (Liketso 5:42) Liphihlelo tse latelang li bontša kamoo Lipaki tsa Jehova li ‘sa kang tsa neela matsoho a tsona sebaka’ mosebetsing oa ho bolela.
◻ Rephabliking ea Cape Verde, e mong oa Lipaki tsa Jehova o ne a feta pel’a teronko ha a ntse a le tšebeletsong ea tšimo. Ka lebaleng la teronko, batšoaruoa ba bang ba ne ba hloeletse sefateng. Ha ba bona Paki eo tlaase, batšoaruoa ba ile ba kōpa hore ba fuoe limakasine. Paki eo e ile ea tlamella lejoe limakasineng tse ’maloa tsa Molula-Qhooa le Tsoha! ’me ea li akhela ka ’nģane ho lerako la teronko. Ka lebaka la thahasello ena, ho ile ha qalisoa lithuto tsa Bibele tse 12. Batšoaruoa ba bararo ba nehetse bophelo ba bona ho Molimo ’me ba itlhahisitse bakeng sa kolobetso ea metsing. Ka nako e fetang selemo joale, e mong oa batšoaruoa bao o ’nile a sebeletsa e le moevangeli oa nako e tletseng, kapa pula-maliboho. Leha ho le joalo, ba etsa tšebeletso ea tšimo joang teronkong? Ntho ea pele, teronko eo e arotsoe ka libaka. Joale libaka tseo li aroletsoe Lipaki tseo tse tharo ’me li sebetsoa ho tloha seleng e ’ngoe ho ea ho e ’ngoe. Baboleli bana ba ’Muso ba latella ba thahasellang joalo feela kaha Lipaki tsa Jehova li etsa lefatšeng ka bophara—ka ho etsa maeto a ho boela. Leha ho le joalo, phapang feela e teng ke ea makhetlo ao lithuto tsa Bibele li khannoang ka ’ona. Ho e-na le hore ho ithutoe Bibele hang feela kapa habeli ka beke, hora e le ’ngoe kapa ho isa moo, batšoaruoa ba bang ba ithuta letsatsi le leng le le leng! Ho feta moo, mookameli ea akaretsang oa teronko o file Lipaki tumello ea ho tšoarela liboka tsohle tsa phutheho ka har’a teronko.
◻ Mosali e mong oa Portugal o ile a fumana lefa la litokollo tse ngata tsa Watch Tower ka mor’a lefu la nkhono oa hae. Kaha e ne e se e mong oa Lipaki tsa Jehova, o ne a se na thahasello ea ho boloka libuka tseo. Leha ho le joalo, o ne a sa batle ho li senya. Ka letsatsi le leng o ile a bolella e mong oa Lipaki tsa Jehova ea neng a etetse ha hae nakong ea tšebeletso ea ntlo le ntlo ka laebrari eo. Paki eo e ile ea mo botsa hore na o na le leseli leha e le lefe ka bohlokoa ba sebele ba laebrari eo. Mosali eo o ile a arabela: “Ha e le hantle, ha ke tsebe bohlokoa ba tsona ba sebele, empa nka bo tseba joang?” Mosali eo o ile a amohela thuto ea Bibele, ’me ka potlako a qala ho nka laebrari eo ea nkhono oa hae e le letlotlo. Hona joale le eena ke e mong oa Lipaki tsa Jehova tse kolobelitsoeng. Ho feta moo, morali oa hae le motsoalle oa lelapa ea haufi-ufi le bona ba ithuta Bibele. Pokello ee ea libuka e ipakile ho ba lefa la bohlokoa hakaakang!