“Lentsoe la Molimo Lona Ha Lea Tlangoa”
HA A le litlamong ka lekhetlo la bobeli chankaneng Roma, moapostola Pauluse o ile a bolela ’nete ena e lekiloeng le e bonahetseng: “Lentsoe la Molimo lona ha lea tlangoa.” (2 Tim. 2:9) Mantsoe ana a ka bontšoa ka phihlelo e latelang e tsoang sehleke-hlekeng sa Pacific sa Tahiti.
“Sebokeng se seng sa rōna, moholo eo e leng molebeli oa thuto ea Bibele a kōpa sebaka se sa tloaelehang—chankane ea Tahiti, moo a neng a sebetsa joaloka molebeli teng. Boemo bo tepeletseng ba batšoaruoa bo ne bo mo tšoenya, ’me a kholoa hore le bona ba ameha ka ‘litaba tse molemo’ tse ngotsoeng ka Bibeleng. Ka makhetlo a mangata phutheho ea rōna e ne e ’nile ea kōpa tumello ea ho etela batšoaruoa, empa kamehla ho ne ho khutla karabelo e reng: ‘Mak’hatholike, Maprostanta, Masabatha, Mamormone le ba bang baa amoheleha ho tla le ho bua ka bolumeli ba bona, hobane litho tsa bolumeli boo li teng chankaneng ea rōna; empa ha ho na Lipaki tsa Jehova mona.’
“Kahoo moholo a fihlela qeto ea ho bolela ‘litaba tse molemo’ ka chankaneng ho basebetsi ba nakoana. Nakong ea lihora tseo e seng tsa mosebetsi, ho tloha motšehare o moholo ho fihlela ka 2 mantsiboea, o ne a bua ka tšepo ea ’Muso. Kapele, mosebetsi oa hae oa qala ho bea litholoana ’me lithuto tsa Bibele tsa tsamaisoa ka mehla.
“Ha ba hlokomela katleho ea Paki, balebeli ba bang, bao ba bang ho bona e neng e le badiakone ba Maprostanta, ba susumetsa balumeli ba ’maloa bahabo bona ho ea ipelaetsa ho mookameli hore ho bolela ha hae ho tšoenyana le phomolo ea bona ea motšehare. Kahoo, a biletsoa ofising ea mookameli, moo a ileng a kōpuoa hore a khaotse mosebetsi oa hae oa boevangeli, lebaka e le hore batšoaruoa ba “Block A” ha ba rate ho tsosoa ha ba phomotse. Ka bohlale, a hatisa tšusumetso e molemo ea thuto ea Bibele ’me a supa liphello tse sebetsang tseo a li fumaneng ho batšoaruoa ba “Block C” ha bao ba ho “Block A” ho se mohla ba kileng ba eteloa ke eena. Mookameli a phakisa a hlokomela ho se tšepahale ha babelaeli; leha ho le joalo, ka baka la ho boloka khotso, a kōpa Paki hore e khaotse ho bolela ka liseleng. Leha ho le joalo, a lumelloa hore a ’ne a etele ba lakatsang ha a ba etela.
“Kahoo, Lentsoe la Molimo le ne le sa tlangoa. Batšoaruoa ba ka bang bahlano ba tsoela pele ho amohela lijo tsa moea tse ileng tsa qetella li fetotse bophelo ba bona. Ha e le hantle, e mong ho bona ea e-ba kofuto ea bohlokoa ho abeng lijo tsena. Monna enoa o ne a le lilemo li robong chankaneng ka baka la ho utsoa mona le mane. E ne e le motšoaruoa ea thata ka ho fetisisa ’me a balehile ka makhetlo a mangata, empa o ne a tšoaroa nakoana kamor’a moo ’me kahlolo ea hae e lelefatsoe. Kaha molebeli o ne a thibetsoe ho bolela ka liseleng, motšoaruoa enoa a phakisa a utloisisa boikarabelo ba hae ba ho bolela ‘litaba tse molemo’ ho batšoaruoa ba bang.
“Ho khopeheng haholo ha balebeli ba bang, Jehova ea phakisa ea e-ba puo ka chankaneng. Baprista le baruti ba etelang chankane ba botsoa lipotso ka litaba tsa mefuta-futa, tse kang moea, pelekatori, lihele, nako ea bofelo. Balebeli ba bang ba bolela hore boboleli ke mohloli oa moferefere, kahoo mookameli a etsa qeto ea ho thibela thuto ea Bibele mabaleng a chankane.
“Empa moholo oa Paki ha a ka a tela tokisetsong ea hae ea ho tsebahatsa ‘litaba tse molemo’ ho batšoaruoa, ’me a kōpa tumello e khethehileng ea hore batšoaruoa ba thahasellang ba eo sebetsa lapeng ha hae ka Meqebelo, mohlang a seng mosebetsing. Kōpo ea amoheloa; ka baka leo, bohle ba ratang ba kena tlas’a tlhokomelo ea hae Moqebelo o mong le o mong. Ha ho nako e ileng ea senngoa ’me lithuto tse ngata tsa Bibele tsa tsamaisoa beke le beke.
“Moholo a putsoa haholo bakeng sa mamello ea hae. Ruri, e mong oa batšoaruoa ba kotsi ka ho fetisisa a fetola botho ba hae ’me a fumana tumelo ea ho ba teng kopanong ea potoloho, moo a ileng a kolobetsoa.
“Ho tloha ka nako eo ho ea pele, chankane ea e-ba le e mong oa Lipaki tsa Jehova har’a batšoaruoa. Mookameli a hlolloa haholo ke ho bona liphetoho tse khōlō tseo Lentsoe la Molimo le bileng le tsona ho batšoaruoa ba bang ba hae hoo a ileng a etsa tlhahiso ea hore kōpo e neng e kile ea etsoa ea hore e mong oa baboleli ba Lipaki a etele chankane e phetoe hape ka molao. Kōpo ea amoheloa, ka qaqiso e le ’ngoe—Lipaki tsa Jehova li ke ke tsa nka hora e le ’ngoe feela le batšoaruoa (joaloka litumelo tse ling), empa lihora tse peli!
“Me kahoo, ’Mantaha o mong le o mong kamor’a lijo tsa mantsiboea, batho bohle ba thahasellang ba ka fumana molemo ka puo ea phatlalatsa le thuto ea hora e le ’ngoe ea Bibele, re leboha thuso e tsoang ho Lipaki tse tharo tsa phutheho ea rōna. Joaloka moapostola Pauluse ha a le litlamong tsa chankane, le bona ba ka bua tjena: ‘Lentsoe la Molimo lona ha lea tlangoa.’”—2 Tim. 2:9.