“Molimo oa Khotso” o Hlokomela ba Mahlomoleng

BIBELE e etsa hore ho hlake hore Davida oa boholo-holo o ne a tloaelane le mahlomola. Ka lilemo tse ngata o ile a lula e le ’malehi, eo ka ho sa khaotseng a neng a lelekisoa ke morena ea khopo ea manganga, ea neng a ikemiselitse ho mo bolaea. Nakong ena ea mahlomola, Davida o ile a ipata libakeng tse thōko. Empa o ile a etsa ho eketsehileng. O ile a rapela Jehova ka tieo mabapi le tsietsi ea hae. Hamorao o ile a ngola mabapi le matšoenyeho a hae: “Ke bitsa ho Jehova ka lentsoe la ka; ke rapela Jehova ka lentsoe la ka la thapelisiso. Ke tšela molumaelo oa ka pel’a hae, ke mo beela tsieleho ea ka.”—Pesaleme ea 142:1, 2.

Kajeno, ba bang ba ne ba tla tšeha Davida ha a tšepa Molimo. Ba ne ba tla bolela hore thapelo ke feela mokhoa oa ho etsa hore eke motho o na le khotso kelellong le hore ha e le hantle ke tšenyo ea nako. Empa ho loketse hore ebe Davida o ne a behile tšepo ea hae ho Molimo, hobane lira tsa hae li ile tsa qetella li hlōtsoe. Ha a hetla morao phihlelong ea hae, Davida o ile a ngola: “Mohlomohi ha a rapela, Jehova oa utloa; o mo pholosa mahlomoleng a hae kaofela.” (Pesaleme ea 34:6) Ho na le moo Molimo oa ’nete eo Davida a ileng a retelehela ho eena a bitsoang “Molimo oa khotso.” (Bafilippi 4:9; Baheberu 13:20) Na o tla tlisa tokoloho mahlomoleng, e fellang ka khotso bakeng sa rōna?

Jehova oa U Tsotella

Jehova ha aa emella thōko le litsietsi tsa batho ba hae. (Pesaleme ea 34:15) Ha a ele hloko litlhoko tsa bahlanka ba hae e le sehlopha feela empa hape o ela hloko litlhoko tsa batho ka bomong ba mo tšabang. Ha Solomone a nehela tempele Jerusalema ea boholo-holo, o ile a kōpa Jehova ka tieo hore a mamele ‘leha e ka ba mang le mang, har’a sechaba sa hae sohle sa Iseraele, ea behang thapelo le kōpo, ka ho itseba e mong le e mong lefu la hae le bohloko ba hae.’ (2 Likronike 6:29, mongolo o tšekaletseng ke oa rōna.) Joalokaha Solomone a ile a hlokomela, motho ka mong o na le mahlomola a hae a khethehileng ao a lokelang ho a mamella. Ho motho e mong e ka ba ho kula ’meleng. Ho e mong ea e-ba ho tepella maikutlong. Ba bang ba ka ’na ba ba mahlomoleng ka lebaka la lefu la moratuoa. Ho se hiroe, mathata a moruo le mathata a lelapa le tsona ke mahlomola a tloaelehileng linakong tsena tse thata.

Ak’u nahane ka motsotsoana ka ‘lefu la hao le bohloko ba hao.’ Ka linako tse ling mohlomong u kile ua ikutloa joaloka mopesaleme Davida, ea ileng a ngola: “Ke lebeletse ba nkhauhelang, ’me ba hlokahetse; ka batla le batšelisi, ’me ha ke bone le a mong.” Empa, u ka kholiseha hore Molimo o tsotella boemo ba hao, hobane hamorao pesalemeng eona ena, Davida o ile a ngola: “Jehova o mamela ba lesitsi, ’me ha a nyelise ba hae ba holehiloeng.”—Pesaleme ea 69:20, 33.

Ha re sebelisa mantsoe a Davida ka kutloisiso e batsi, re ka kholiseha hore ’Mōpi oa moloko oa batho o mamela lithapelo tsa bao ka puo ea tšoantšetso ba kentsoeng teronkong ke mahlomola a bona. Ho feta moo, o nka bohato ka tsietsi ea bona. Nahana ka lipolelo tsena tse latelang tse senolang qenehelo ea Jehova bakeng sa ba mahlomoleng.

“Le se ke la tšoenya mosali oa mohlolohali, leha e le khutsana. Ekare ha u ba tšoenya, ’me ba tla, ba hooeletsa ho ’na, ke tla mamela mehooeletso ea bona; bohale ba ka bo tla tuka.”—Exoda 22:22-24.

“Na ka sebele Molimo ha a na ho etsa hore toka e etsetsoe bakhethoa ba hae ba hoeletsang ho eena motšehare le bosiu, esita le hoja a tiisetsa mabapi le bona?”—Luka 18:7.

“O tla lopolla mohloki ea llang ho eena, le mohlōphehi ea hlokang mothusi. Ea fokolang le ea hlokang o tla ba utloela bohlōkō, a pholose bophelo ba mafutsana. O tla ba lopolla, a ba lopolle ho ba mamènèmènè, a ba lopolle le ho ba sehlōhō, mali a bona e tla ba a bohlokoa, e be a bohlokoa mahlong a hae.”—Pesaleme ea 72:12-14, BPN.

‘Ea amang [batho ba Molimo lefatšeng] o ama thaka ea leihlo la hae.’—Zakaria 2:8.

Mehlala ena e seng mekae e bontša hore ’Mōpi oa rōna o ameha ka ho tebileng ka boiketlo ba batho ba hae. Kahoo, re na le lebaka le letle la ho latela keletso ea moapostola Petrose: ‘Lahlelang matšoenyeho ’ohle a lōna ho eena, hobane oa le tsotella.’ (1 Petrose 5:7) Empa Molimo o tla re thusa joang linakong tsa mahlomola?

Kamoo Molimo a Thusang ba Mahlomoleng

Joalokaha re se re bone, ha Davida a ne a le mahlomoleng, o ile a rapela Molimo ka tieo bakeng sa tataiso. Ka nako eona eo, o ile a nka bohato ba pele ho bebofatsa boemo bona, a sebelisa masene ho phonyoha ho ba mo lelekisang. Kahoo, ho tšepa Jehova ho kopaneng le boiteko ba botho ho ile ha nolofalletsa Davida ho mamella tsieleho ea hae. Re ka ithuta eng ho see?

Ha re talimane le mahlomola, ka sebele ha hoa fosahala hore re nke bohato bo loketseng ho rarolla bothata. Ka mohlala, haeba Mokreste a iphumana a sa hiroa, na a ke ke a etsa boiteko ba ho fumana mosebetsi? Kapa haeba a kula ’meleng, na a ke ke a ea ngakeng? Ka sebele, esita le Jesu, ea neng a e-na le matla a ho folisa mafu a mefuta eohle, o ile a lumela hore ‘ba kulang ba hloka ngaka.’ (Matheu 9:12; bapisa le 1 Timothea 5:23.) Ha e le hantle, litsietsi tse ling li ke ke tsa felisoa; ke feela hore li mamelloe. Leha ho le joalo, Mokreste oa ’nete ha a talime bohloko ka bobona e le ntho e molemo, joalokaha ba bang ba bo talima joalo. (Bapisa le 1 Marena 18:28.) Ho e-na le hoo, o nka mehato leha e le efe eo a ka e khonang ho sebetsana ka katleho le mahlomola a hae.

Leha ho le joalo, ka nako e tšoanang ke ho loketseng ho bolella Jehova taba ena thapelong. Hobane’ng? Taba ea pele, ka ho tšepa ’Mōpi oa rōna, re thusoa ho “nepisisa lintho tsa bohlokoa.” (Bafilippi 1:10) Ka mohlala, ha re batla mosebetsi, ho tšepa Molimo ho tla re thusa hore re se ke ra amohela mosebetsi o khahlanong le melao-motheo ea Bibele. Hape re tla qoba hore lerato la chelete le re ‘khelose tumelong.’ (1 Timothea 6:10) Ka sebele, ha re etsa liqeto tse boima—mabapi le khiro kapa tšobotsi leha e le efe ea bophelo—ho hlokahala hore re latele keletso ea Davida: “Jarisa Jehova phahlo tsa hao, ’me o tla u tšehetsa; a ke ke a lumela hore ea lokileng a ’ne a sisinngoe.”—Pesaleme ea 55:22.

Thapelo e boetse e re thusa ho boloka ho leka-lekana ha rōna kelellong, e le hore mahlomola a rōna a se ke a re sithabetsa. Moapostola Pauluse o ile a ngola: “Nthong e ’ngoe le e ’ngoe ka thapelo le thapeli hammoho le liteboho likōpo tsa lōna tse matla a li tsebisoe Molimo.” Ka phello efe? “Khotso ea Molimo e fetang monahano oohle e tla lebela lipelo tsa lōna le matla a lōna a kelello ka Kreste Jesu.” (Bafilippi 4:6, 7) E, khotso, khotso ea Molimo. Khotso eo ‘e feta monahano oohle,’ ka hona e ka etsa hore re tsitse ha re imetsoe ke maikutlo a tsielehisang. E tla ‘lebela lipelo tsa rōna le matla a rōna a kelello,’ kahoo e re thusa ho qoba ho nka bohato ka lepotlapotla le ka booatla, e leng se neng se ka eketsa mahlomola a rōna.—Moeklesia 7:7.

Thapelo e ka etsa se eketsehileng. E ka etsa hore ho be le phapang tabeng ea kamoo boemo bo tsoelang pele kateng. Nahana ka mohlala oa Bibele. Ha moapostola Pauluse a ne a kentsoe teronkong Roma, o ile a khothalletsa Bakreste-’moho le eena ho mo rapella. Hobane’ng? O ile a ba ngolla: “Ke le eletsa ka ho khethehileng haholoanyane hore le etse sena, e le hore nka khutlisetsoa ho lōna kapele.” (Baheberu 13:19) Pauluse o ne a tseba hore lithapelo tse phehellang tsa balumeli-’moho le eena li ka etsa phapang mabapi le nako ea ho lokolloa ha hae.—Filemone 22.

Na thapelo e tla fetola phello ea mahlomola a hao? E ka ’na ea ho etsa. Leha ho le joalo, re lokela ho hlokomela hore hase kamehla Jehova a arabelang lithapelo tsa rōna ka tsela eo re e lebeletseng. Ka mohlala, Pauluse o ile a rapela khafetsa mabapi le ‘moutloa o neng o le nameng ea hae’—mohlomong ho kula ho amanang le ho bona ha hae mahlong. Ho e-na le ho tlosa mahlomola, Molimo o ile a bolella Pauluse: “Mosa o sa tšoanelang oa ka o u lekane; kaha matla a ka a ntse a etsoa a phethahetseng bofokoling.”—2 Bakorinthe 12:7-9.

Ka hona ka linako tse ling litsietsi tsa rōna li ke ke tsa felisoa. Ho e-na le hoo, re tla ba le monyetla oa ho paka ho itšetleha ha rōna ka ’Mōpi oa rōna. (Liketso 14:22) Ho feta moo, re ka tiiseha hore esita le haeba Jehova a sa felise mahlomola ao, o tla ‘bula tsela ea ho tsoa e le hore re khone ho a mamella.’ (1 Bakorinthe 10:13) E, ke ka lebaka le letle Jehova a bitsoang “Molimo oa matšeliso ’ohle, ea re tšelisang matšoenyehong ’ohle a rōna.” (2 Bakorinthe 1:3, 4) O re fa seo re se hlokang hore re mamelle re e-na le khotso e khōlō haholo.

Lefatše le se Nang Mahlomola Haufinyane!

’Mōpi o tšepisa hore ka ’Muso oa hae, o tla felisa mahlomola a moloko oa batho haufinyane. O tla finyella see joang? Ka ho tlosa Satane Diabolose, mohlohlelletsi e moholo oa mahlomola le sera se ka sehloohong sa khotso, eo Bibele e mo bitsang “molimo oa tsamaiso ena ea lintho.” (2 Bakorinthe 4:4) Empa haufinyane taolo ea hae molokong oa batho e tla fela. Ho felisoa ha hae ho tla bula tsela ea hore mahlohonolo a se nang palo a tlele ba tšabang Molimo. Bibele e tšepisa hore Jehova o tla “hlakola meokho eohle mahlong a bona, ’me lefu ha le sa tla hlola le e-ba teng, leha e le ho siama kapa ho bokolla kapa bohloko ha li sa tla hlola li e-ba teng. Lintho tsa pele li fetile.”—Tšenolo 21:1-4.

Na lefatše le se nang tlhoriso le bonahala e le leo ho leng thata ho lumela hore le tla tla? Re tloaetse haholo ho mamella litsietsi hoo ho leng thata ho nahana ka bosieo ba tsona. Empa ho lokoloha tšabong, matšoenyehong le tlokotsing ke sona hantle feela seo Molimo a se reretseng moloko oa batho pōpong, ’me morero oa hae o tla atleha.—Esaia 55:10, 11.

Ena ke tšepo eo Sonia, Fabiana le Ana, bao ho builoeng ka bona sehloohong se qalang, ba ileng ba e fumana. Sonia, eo bara ba hae ba babeli ba ileng ba bolaoa ke AIDS, o ile a fumana khotso e khōlō tšepong eo Bibele e nang le eona—tsoho ea ba lokileng le ba sa lokang. (Liketso 24:15) O re: “Ho na le ntho e le ’ngoe e tiileng, tšepo ea rōna e feta bohloko leha e le bofe.”

Ha a ntse a lula lehaeng la likhutsana, Ana o ile a eteloa ke e mong oa Lipaki tsa Jehova. Ana o re: “O ile a mpontša lebitso la Jehova ka Bibeleng, ’me ke ile ka ntša meokho ea thabo. Ke ne ke hloka thuso ka matla, ’me ke ile ka ithuta hore ho na le Molimo ea re tsotellang.” Ka mor’a ho tloha lehaeng la likhutsana, Ana o ile a amohela thuto ea Bibele ’me a ithuta ho eketsehileng ka litšepiso tsa Jehova. Eaba o nehela bophelo ba hae ho Jehova ’me a tšoantšetsa boinehelo boo ka kolobetso. “Ho tloha ka nako eo ke ile ka tsoela pele ho tšepa Jehova ka thapelo, ’me ke tšelisoa ke tiiso ea hore o tla nthusa.”

Fabiana le eena o fumane matšeliso a mangata le khotso ea kelello mahlomoleng a hae ka ho ithuta ka litšepiso tsa Molimo tsa nakong e tlang. “Ho ithuta ’nete Bibeleng ho tšoana le ho tsoa sebakeng se lefifi le se lahlisang tšepo le ho kena kamoreng e hlakileng, e khanyang le e khahlisang.”—Bapisa le Pesaleme ea 118:5.

Empa khotso ea sebele lefatšeng ka kakaretso e tla tla joang hona neng? A re boneng lihloohong tse latelang.

[Lebokose le leqepheng la 6]

LITŠOBOTSI TSE NGATA TSA MAHLOMOLA

▪ Hoo e ka bang kotara ea baahi ba lefatše e phela bofutsaneng bo feteletseng, ba limilione tse eketsehileng ba phela maemong a sa lokelang batho, a sokelang bophelo ba bona.

▪ Bana ba ka holimo ho limilione tse 200 ba haelloa ke phepo e nepahetseng.

▪ Selemo le selemo letšollo le bolaea bana ba ka tlaase ho lilemo tse hlano ba ka bang limilione tse tharo.

▪ Mafu a tšoaetsanoang a bolaile batho ba ka bang limilione tse 16,5 ka 1993 feela. Kaha linaha tse ling li beha mafu lihlopheng tse sa tšoaneng, e ka ’na eaba palo ea sebele e phahame haholoanyane.

▪ Batho ba hakanyetsoang ho limilione tse 500 ba angoa ke mofuta o itseng oa bothata ba kelello.

▪ Palo ea batho ba ipolaeang e eketseha kapele haholoanyane har’a bacha ho feta har’a batho ba lilemo life kapa life.

▪ The Unesco Courier e re: “Tlala le ho se hiroe li fetohile likoli lefatšeng. Ba limilione tse 35 ha baa hiroa linaheng tse supileng tse ruileng ka ho fetisisa lefatšeng, ’me Brazil feela ho na le basebetsi ba limilione tse 20 bao ho bona ho sebetsa ho sa boleleng le hore ba tla khona ho ba le lijo tse lekaneng.”

[Litšoantšo tse leqepheng la 7]

Thapelo e ka re thusa ho lebisa tlhokomelo tšepisong ea Molimo ea lefatše le se nang mahlomola