Thusa ba Bang ho Tsamaea ka Mokhoa o Tšoanelang Jehova

‘Ha rea khaotsa ho le rapella le ho kōpa hore le ka tsamaea ka mokhoa o tšoanelang Jehova e le hore le mo khahlise ka botlalo ha le ntse le tsoela pele ho beha litholoana mosebetsing o mong le o mong o molemo.’—BAKOLOSE 1:9, 10.

1, 2. Ke eng eo ka ho khetheha e ka bang mohloli oa thabo le khotsofalo?

“RE LULA ka har’a k’haravene polasing e ’ngoe. Ka ho phela bophelo bo sa rarahanang, re na le nako e eketsehileng ea ho finyella batho ka litaba tse molemo. Re hlohonolofalitsoe haholo ka tokelo ea ho thusa ba bangata hore ba nehele bophelo ba bona ho Jehova.”—Banyalani ba bang bao e leng basebeletsi ba nako e tletseng ba Afrika Boroa.

² Na u ka latola hore ho thusa ba bang ke ntho e thabisang? Ba bang ba leka kamehla ho thusa ba kulang, ba hlokang, kapa ba lulang ba le bang, ’me sena sea ba khotsofatsa. Bakreste ba ’nete ba kholisehile hore ho abela ba bang tsebo ea Jehova Molimo le Jesu Kreste ke thuso e khōlōhali eo ba ka fanang ka eona. Ke sona sena feela se ka etsang hore ba bang ba amohele thekollo ea Jesu, ba hlaolele kamano e ntle le Molimo, ebe joale ba ba mocheng oa ho fumana bophelo bo sa feleng.—Liketso 3:19-21; 13:48.

 3. Ke thuso ea mofuta ofe eo re lokelang ho e ela hloko?

³ Leha ho le joalo, ho thoe’ng ka ho thusa ba seng ba ntse ba sebeletsa Molimo, ba latetseng “Tsela” ee? (Liketso 19:9) Ha ho pelaelo hore u ba thahasella haholo ho feta neng kapa neng, empa mohlomong ha u bone hore na u ka ba thusa joang ka ho eketsehileng kapa ka mokhoa o tsoelang pele. Kapa ho ka ’na ha bonahala boemo ba hao bo u sitisa ho ba thusa ka ho feletseng, kahoo bo etsa hore u se ke ua khotsofala ka ho feletseng. (Liketso 20:35) Maemong ana a mabeli, re ka ithuta bukeng ea Bakolose.

 4. (a) Pauluse o ile a ngolla Bakolose tlas’a maemo afe? (b) Epafrase o ile a kenella joang tabeng?

⁴ Ha moapostola Pauluse a ne a ngolla Bakreste ba Kolose, o ne a le litlamong Roma, le hoja a ne a lumelloa ho ba le baeti. Joalokaha u ka lebella, Pauluse o ile a a sebelisa nako ea hae e fokolang ea bolokolohi ho bolela ka ’Muso oa Molimo. (Liketso 28:16-31) Bakreste-’moho le Pauluse ba ne ba ka mo etela, ’me ka linako tse ling ba bang ba ne ba e-ba litlamong le eena. (Bakolose 1:7, 8; 4:10) E mong e ne e le moevangeli ea chesehang Epafrase oa motseng oa Kolose, Frigia, naheng e sehlabeng e ka bochabela ho Efese, Asia Minor (Turkey ea kajeno). Epafrase o ne a thusitse hore ho thehoe phutheho Kolose, ’me o ne a sebeletsa liphutheho tse haufi tsa Laodicea le Hierapolise. (Bakolose 4:12, 13) Ke hobane’ng ha Epafrase a ile a nka leeto la ho ea bona Pauluse Roma, ’me re ka ithuta eng karabelong ea Pauluse?

Thuso e Atlehang Bakeng sa Bakolose

 5. Ke hobane’ng ha Pauluse a ile a ngola seo a ileng a se ngolla Bakolose?

⁵ E le hore Epafrase a bonane le Pauluse ka maemo a neng a le phuthehong ea Kolose, o ile a nka leeto le boima la ho ea Roma. O ile a tlaleha ka tumelo, ka lerato, le ka boiteko ba Bakreste bao ba ho bolela evangeli. (Bakolose 1:4-8) Ntle ho moo, e lokela ebe o ile a boela a bua ka kameho ea hae ka tšusumetso e mpe e neng e sokela bomoea ba Bakolose. Pauluse o ile a araba ka lengolo le bululetsoeng le neng le hanyetsa maikutlo a mang a neng a jaloa ke mesuoe ea bohata. O ile a tsepamisa maikutlo ka ho khetheha karolong e ka sehloohong eo Jesu Kreste a lokelang ho e phetha.a Na thuso ea hae e ne e fella feela tabeng ea ho hatisa ka matla linnete tsa sehlooho tsa Bibele? O ne a ka thusa Bakolose joang hape, ’me ke lithuto life tseo re ka ithutang tsona ka ho thusa ba bang?

 6. Pauluse o ile a hatella taba efe haholo lengolong la hae le eang ho Bakolose?

⁶ Qalong ea lengolo la hae, Pauluse o etsa hore re lemohe thuso ea mofuta o mong eo re ka ’nang ra e hlokomoloha. Ke mokhoa oa ho fana ka thuso e atlehang u le hōle, Pauluse le Epafrase ba ne ba le hōle le Kolose. Pauluse o ile a tiisa a re: “Re leboha Molimo Ntate oa Morena oa rōna Jesu Kreste ka mehla ha re le rapella [NW, mongolo o botlaaseng ba leqephe, “rapella kamehla”].” E, lithapelo tsena e ne e le tse tobileng lebitsong la Bakreste ba Kolose. Pauluse o ile a phaella ka ho re: “Ke ka lebaka leo hape rōna, ho tloha letsatsing leo ka lona re ileng ra utloa ka hona, re sa khaotsang ho le rapella le ho kōpa hore le ka tlala tsebo e nepahetseng ea thato ea hae ka bohlale bohle le kutloisiso ea moea.”—Bakolose 1:3, 9.

7, 8. Lithapelo tsa rōna le tsa phutheho li atisa ho akarelletsa litaba life?

⁷ Rea tseba hore Jehova ke “Ea utloang thapelo,” ka hona re ka tšepa hore o loketse ho utloa lithapelo tsa rōna tse etsoang tumellanong le thato ea hae. (Pesaleme ea 65:2, NW; 86:6; Liproverbia 15:8, 29; 1 Johanne 5:14) Leha ho le joalo, ha re rapella ba bang, lithapelo tsa rōna li joang?

⁸ Mohlomong hangata re nahana ka ‘mokhatlo oohle oa barab’abo rōna lefatšeng’ ebile rea o rapella. (1 Petrose 5:9) Kapa re ka ’na ra atamela Jehova mabapi le Bakreste le ba bang ba sebakeng se oetsoeng ke koluoa kapa tlokotsi. Ha barutuoa ba lekholong la pele la lilemo ba libakeng tse ling ba utloa hore tlala e oele Judea, e tlameha ebe ba ile ba etsetsa barab’abo bona lithapelo tse ngata le pele ba ka romella liphallelo. (Liketso 11:27-30) Mehleng ea rōna, lithapelo tse etsetsoang mokhatlo oohle oa bara ba motho kapa sehlopha se seholo sa barab’abo rōna li utloahala hangata libokeng tsa Bokreste, moo ho hlokahalang hore ba bangata ba utloisise ’me ba khone ho re “Amen.”—1 Bakorinthe 14:16.

Toba ha U Rapela

9, 10. (a) Ke mehlala efe e bontšang hore ho rapella batho ba itseng ho loketse? (b) Pauluse o ile a rapelloa joang ka tsela e tobileng?

⁹ Empa, Bibele e re fa mehlala ea lithapelo tse etsetsoang ba bang tse neng li tobile haholoanyane ebile li qoolla. Nahana ka polelo ea Jesu e tlalehiloeng ho Luka 22:31, 32. O ne a potiloe ke baapostola ba 11 ba tšepahalang. Kaofela ha bona ba ne ba tla hloka tšehetso ea Molimo linakong tse tlang tse boima, ’me Jesu o ile a ba rapella. (Johanne 17:9-14) Ho ntse ho le joalo, Jesu o ile a qoolla Petrose, a etsetsa morutuoa eo a le mong thapeli e tobileng. Mehlala e meng: Elisha o ile a rapella hore Molimo a thuse motho ea itseng, ’me eo e ne e le mohlanka oa hae. (2 Marena 6:15-17) Moapostola Johanne o ile a rapella hore Gaiuse a tsoele pele a phela hantle ’meleng le moeeng. (3 Johanne 1, 2) Lithapelo tse ling tsona li ne li toba lihlopha tse itseng.—Jobo 42:7, 8; Luka 6:28; Liketso 7:60; 1 Timothea 2:1, 2.

¹⁰ Mangolo a Pauluse a totobatsa taba ea lithapelo tse tobileng haholo. O ile a kōpa hore a rapelloe kapa ho rapelloe eena le bao a nang le bona. Bakolose 4:2, 3, e re: “E-bang ba phehellang thapelong, le lula le falimehile ho eona ka liteboho, ka nako e tšoanang le rōna le re rapella, hore Molimo a ke a re bulele monyako oa ho bua, hore re bolele sephiri se halalelang se mabapi le Kreste, seo, ha e le hantle, ke leng litlamong tsa chankana ka lebaka la sona.” Hape, nahana ka mehlala ena e meng: Baroma 15:30; 1 Bathesalonika 5:25; 2 Bathesalonika 3:1; Baheberu 13:18.

11. Epafrase o ne a rapella bo-mang ha a le Roma?

¹¹ Ho bile joalo le ka motsoalle e mong oa Pauluse Roma. “Epafrase, ea tsoang har’a lōna, . . . o le romela litumeliso, ka mehla [o] ikitlaetsa molemong oa lōna lithapelong tsa hae.” (Bakolose 4:12) Lentsoe le fetoletsoeng e le “ikitlaetsa” le ka ’na la fana ka maikutlo a “ho hoatalla,” ho kang ha sebapali sa boikoetliso ba ’mele lipapaling tsa boholo-holo. Na Epafrase o ne a rapela ka tieo feela mabapi le sehlopha sa balumeli sa lefatše ka bophara kapa o ne a rapela esita le mabapi le barapeli ba ’nete ba libakeng tsohle tsa Asia Minor? Pauluse o bontšitse hore Epafrase o ne a rapella ba leng Kolose ka ho toba. Epafrase o ne a tseba boemo ba bona. Ha re ba tsebe kaofela ka mabitso, ebile ha re tsebe hore na ba ne ba talimane le mathata afe, empa nahana ka a mang a neng a ka ’na a e-ba teng. Mohlomong Linase e monyenyane o ne a loantša tšusumetso ea lifilosofi tse neng li atile, ’me mohlomong Rufase o ne a hloka matla a ho hanela ho hoheloa ke mekhoa ea hae ea pele ea Bojudeng. Kaha Persise o ne a e-na le monna ea sa lumelang, na o ne a hloka mamello le bohlale hore a hōlisetse bana ba hae Moreneng, ’me na Asinkritase, ea neng a kulela lefu, o ne a hloka matšeliso a eketsehileng? E, Epafrase o ne a tseba ba phuthehong ea habo, ’me o ne a ba rapella ka tieo hobane eena le Pauluse ba ne ba batla hore ba inehetseng joalo ba tsamaee ka mokhoa o tšoanelang Jehova.

12. Re ka toba haholoanyane joang lithapelong tsa rōna?

¹² Na u bona mohlala oo re o behetsoeng—oa tsela eo re ka thusang ba bang ka eona? Joalokaha ho hlokomelehile, lithapelo tsa phatlalatsa libokeng tsa Bokreste li atisa hore e be tse akaretsang haholoanyane, ka lebaka la bamameli ba sa tšoaneng. Empa lithapelo tsa boinotšing le tsa lelapa li ka toba haholoanyane. Le hoja ka linako tse ling re ka kōpa Molimo hore a tataise le ho hlohonolofatsa balebeli bohle ba tsamaeang kapa balisa ba moea, na ka linako tse ling re ke ke ra toba haholoanyane? Ka mohlala, ke hobane’ng ha u sa bitse ka lebitso molebeli oa potoloho ea etelang phutheho ea heno kapa motsamaisi oa sehlopha sa Thuto ea Buka ea Phutheho seo u kopanelang ho sona? Bafilippi 2:25-28 le 1 Timothea 5:23 li bontša kameho e tobileng eo Pauluse a neng a e-na le eona ka bophelo ba Timothea le ba Epafroditase. Na re ka bontša thahasello e joalo ho ba kulang bao re ba tsebang ka mabitso?

13. Ke maemo a mofuta ofe a loketseng hore re a akarelletse lithapelong tsa rōna?

¹³ Ke ’nete hore re lokela ho qoba ho kena-kenana le litaba tsa batho ba bang, empa ho loketse hore lithapelo tsa rōna li bontše hore re hlile re thahasella bao re ba tsebang le bao re ba tsotellang. (1 Timothea 5:13; 1 Petrose 4:15) E ka ’na eaba mor’abo rōna e mong o senyehetsoe ke mosebetsi, ’me re sitoa ho mo fumanela o mong. Ho sa tsotellehe seo, re ka mo bolela ka lebitso le ho toba bothata ba hae lithapelong tsa rōna. (Pesaleme ea 37:25; Liproverbia 10:3) Na re lemoha morali’abo rōna ea seng a hōlile, ea se nang monna le bana hobane a ikemiselitse ho nyaloa “feela Moreneng”? (1 Bakorinthe 7:39) Lithapelong tsa hao, ke hobane’ng ha u sa kōpe Jehova hore a mo hlohonolofatse le ho mo thusa hore a tsoele pele a tšepahala tšebeletsong ea hae? Mohlala o mong ke ona, e ka ’na eaba baholo ba babeli ba fane ka keletso ho mor’abo rōna ea entseng phoso. Na ho ka ba le bothata ha bobeli ba bona ba mo bolela ka lebitso lithapelong tsa bona nako le nako?

14. Lithapelo tse tobileng li amana joang le ho thusa ba bang?

¹⁴ Ho na le menyetla e mengata ea hore lithapelong tsa hao u akarelletse batho bao u tsebang hore ba hloka hore Jehova a ba tšehetse, a ba tšelise, a ba fe bohlale le moea o halalelang, kapa litholoana leha e le life tseo o li hlahisang. Ka lebaka la bohōle kapa maemo a mang, u ka ’na ua ikutloa hore thuso ea lintho tse bonahalang kapa e tobileng eo u ka fanang ka eona ea fokola. Empa u se ke ua lebala ho rapella bara le barali beno. Ua tseba hore ba batla ho tsamaea ka mokhoa o tšoanelang Jehova, empa e ka ’na eaba ba hloka thuso hore ba etse joalo ka ho sa feleng. Senotlolo sa thuso ke lithapelo tsa hao.—Pesaleme ea 18:2; 20:1, 2; 34:15; 46:1; 121:1-3.

Sebeletsa ho Matlafatsa ba Bang

15. Ke hobane’ng ha re lokela ho thahasella karolo e qetellang ea Bakolose?

¹⁵ Ha e le hantle, thapelo e tiileng le e tobileng, hase eona feela tsela ea ho thusa ba bang, haholo-holo ba haufi le uena le bao u ba ratang. Buka ea Bakolose e hlakisa seo. Litsebi tse ngata li na le maikutlo a hore ka mor’a hore Pauluse a fane ka thuto e tataisang le keletso e sebetsang, o ile a tlatsetsa ka litumeliso tsa hae. (Bakolose 4:7-18) Ho fapana le moo, re se re fumane hore karolo ena ea ho qetela ea buka ena e na le keletso ea bohlokoa, ’me ho na le ho hongata ho ka ithutoang karolong ena.

16, 17. Re ka re’ng ka barab’abo rōna ba boletsoeng ho Bakolose 4:10, 11?

¹⁶ Pauluse o ngotse: “Aristakase moholehuoa-’moho le ’na o le romela litumeliso, le Mareka ea tsoalanang le Barnabase o le romela litumeliso, (eo malebana le eena le ileng la amohela litaelo tsa hore le mo amohele ka mofuthu haeba ka nako leha e le efe a tla ho lōna,) le Jesu ea bitsoang Justase, bana e le ba ba bolotseng. Bana ke bona feela basebetsi-’moho le ’na bakeng sa ’muso oa Molimo, ’me bona bana ba fetohile thuso e matlafatsang ho ’na.”—Bakolose 4:10, 11.

¹⁷ Mono Pauluse o qoolotse barab’abo rōna ba itseng bao ho neng ho hlokahala hore ba eloe hloko ka ho khetheha. O itse e ne e le ba lebollo, ba semelo sa Sejuda. Ho ne ho e-na le Bajuda ba bangata ba bolotseng Roma, ’me ba bang e ne e se Bakreste. Ho ntse ho le joalo, bao Pauluse a buang ka bona ba ne ba ile ba mo phallela. Ho bonahala eka ba ne ba se leqe ho kopana le Bakreste ba Balichaba, ’me e tlameha ebe ba ne ba kopanetse ka thabo le Pauluse ho bolella Balichaba.—Baroma 11:13; Bagalata 1:16; 2:11-14.

18. Pauluse o ile a babatsa ba bang ba neng ba e-na le eena joang?

¹⁸ Hlokomela se hlalosoang ke Pauluse: “Bona bana ba fetohile thuso e matlafatsang ho ’na.” O sebelisitse lentsoe la Segerike le hlahang ka lekhetlo lona lena feela ka Bibeleng. Bafetoleli ba bangata ba le fetolela e le “matšeliso.” Leha ho le joalo, ho na le lentsoe le leng la Segerike (pa·ra·ka·le’o) leo ho tloaelehileng haholoanyane hore le fetoleloe e le “matšeliso.” Pauluse o le sebelisitse sebakeng se seng lengolong lona lena empa ha aa le sebelisa ho Bakolose 4:11.—Matheu 5:4; Liketso 4:36; 9:31; 2 Bakorinthe 1:4; Bakolose 2:2; 4:8.

19, 20. (a) Polelo eo Pauluse a ileng a e sebelisa ho barab’abo ba neng ba mo thusa Roma e na le moelelo ofe? (b) E ka ’na eaba bara bao babo Pauluse ba ne ba mo thusa ka litsela life?

¹⁹ Bao Pauluse a ba boletseng ka mabitso e tlameha ebe ha baa ka ba fella ka matšeliso a molomo feela. Lentsoe la Segerike le fetoletsoeng e le “thuso e matlafatsang” ho Bakolose 4:11 ka linako tse ling le ne le sebelisoa libukeng tsa lefatše bakeng sa moriana o imollang kelello. New Life Version e re: “Ba nthusitse hakaakang!” Today’s English Version e sebelisa polelo ena: “Ba nthusitse haholo.” Ebe bara bao babo rōna ba Bakreste ba neng ba le haufi le Pauluse ba ile ba etsa’ng ho mo thusa?

²⁰ Pauluse o ne a ka ba le baeti, empa ho ne ho e-na le lintho tse ngata tseo a neng a ke ke a li etsa, tse kang ho reka lintho tseo a li hlokang haholo—lijo le liaparo tsa mariha. O ne a ka fumana meqolo ea ho ithuta kapa lintho tsa ho ngola joang? (2 Timothea 4:13) Na u bona ha bara bao babo rōna ba se ba thusa Pauluse ka litlhoko tsa hae, ba mo etsetsa lintho tse hlokahalang tse kang ho reka kapa ho phetha mabaka a hae? O ne a ka ’na a batla ho hlahloba phutheho e itseng le ho e haha. Kaha o ne a koaletsoe, o ne a ke ke a ho etsa, kahoo bara bao babo mohlomong ba ne ba nka maeto ao Pauluse a neng a lokela ho a nka, ba isa melaetsa, ba e-tla le litlaleho. Ho matlafatsa hakaakang!

21, 22. (a) Ke hobane’ng ha re lokela ho thahasella mantsoe a Bakolose 4:11? (b) Ke litsela life tse ling tseo ka tsona re ka etsisang mohlala oa ba neng ba e-na le Pauluse?

²¹ Seo Pauluse a ileng a se ngola ka ho ba “thuso e matlafatsang,” se etsa hore re lemohe kamoo re ka thusang ba bang. E ka ’na eaba ba tsamaea ka mokhoa o tšoanelang Jehova tabeng ea litekanyetso tsa hae tsa boitšoaro, ba ba teng libokeng tsa Bokreste ba bile ba kopanela mosebetsing oa boboleli. Ntlheng eo ke ho loketseng hore re ba babatse. Leha ho le joalo, na re ka etsa ho eketsehileng, ra ba “thuso e matlafatsang” joaloka ba neng ba e-na le Pauluse?

²² Haeba u tseba morali’abo rōna ea ileng a khomarela ka bohlale 1 Bakorinthe 7:37 empa hona joale a se na beng ka eena ba haufi le eena, na u ka mo akarelletsa mesebetsing e itseng ea lelapa, mohlomong u mo memela lijong kapa hore a be teng ’mokeng oa metsoalle kapa oa beng ka uena? Ho ka ba joang ha u ka mo mema hore a tsamaee le lelapa la hao ha le e-ea kopanong kapa phomolong? Kapa u mo kōpe hore a ee le uena ka nako e loketseng ha u e-ea mabenkeleng. Re ka etsa se tšoanang ka bahlolohali, kapa mohlomong ba seng ba sa khone ho khanna. U ka fumana ho putsa ho utloa liphihlelo tsa bona kapa ho rua molemo tsebong ea bona ea lintho tse tloaelehileng tse kang ho khetha litholoana tse ntle kapa liaparo tsa bana. (Levitike 19:32; Liproverbia 16:31) Ho tla itlela feela hore le atamelane haholoanyane. Kahoo ba ka ikutloa ba lokolohile haholoanyane ho u kōpa thuso ha ba hloka moriana k’hemisteng, kapa ho hong feela. E tlameha ebe barab’abo Pauluse ba neng ba e-na le eena Roma ba ne ba fana ka thuso e molemo e matlafatsang, joalokaha le uena u ka fana ka e matlafatsang joalo. Nakong eo le hona joale tlhohonolofatso e eketsehileng ke hore maqhama a lerato a tiile, ’me re ikemiselise ho sebeletsa Jehova hammoho ka botšepehi.

23. Ho ka ba molemo ha e mong le e mong oa rōna a ka qeta nako a etsa’ng?

²³ E mong le e mong oa rōna a ka nahana ka maemo a boletsoeng sehloohong sena. Ke mehlala feela, empa e ka re hopotsa ka maemo a sebele ao ho ’ona re ka bang “thuso e matlafatsang” haholoanyane ho bara le barali babo rōna. Taba ea bohlokoa hase hore re ntšetsa pele moea oa ntlafatso ea boiketlo ba sechaba. Seo e ne e se pakane ea barab’abo rōna ba boletsoeng ho Bakolose 4:10, 11. E ne e le ‘basebetsi-’moho le eena bakeng sa ’muso oa Molimo.’ Phello e matlafatsang e ne e amana ka ho toba le seo. E se eka ho ka ba joalo le ka rōna.

24. Lebaka le ka sehloohong la ho rapella ba bang le ho batla ho ba matlafatsa ke lefe?

²⁴ Ba bang re ba bolela ka mabitso lithapelong tsa rōna ’me re leka ho ba matlafatsa ka lebaka la sena: Re lumela hore bara le barali babo rōna ba batla ho ‘tsamaea ka mokhoa o tšoanelang Jehova e le hore ba mo khahlise ka botlalo.’ (Bakolose 1:10) Ntlha eo e amana le ntho e ’ngoe hape eo Pauluse a ileng a e hlahisa ha a ngola ka lithapelo tsa Epafrase mabapi le Bakolose, e le hore ba ka ‘ema ba feletse le ka kholiseho e tiileng thatong eohle ea Molimo.’ (Bakolose 4:12) Seo re ka se finyella joang ka borōna? A re boneng.

[Mongolo o botlaaseng ba leqephe]

Na U Ile Ua Hlokomela?

• Re ka thusa haholoanyane joang lithapelong tsa rōna tsa boinotšing?

• Bakreste ba bang e ne e le “thuso e matlafatsang” joang ho Pauluse?

• Ke maemong a mofuta ofe moo re ka bang “thuso e matlafatsang”?

• Pakane ea rōna ke efe ha re rapella bara le barali babo rōna le ha re batla ho ba matlafatsa?

[Setšoantšo se leqepheng la 18]

Na u ka akarelletsa Mokreste e mong ha lelapa la hao le intša?

[Tlhaloso ea Moo Setšoantšo se Nkiloeng Teng]

Courtesy of Green Chimney’s Farm