Ho Haha Lelapa le Matla Moeeng

“Le tsoele pele ho ba hōlisa ka taeo le kelello e laoloang ke Jehova.”—BAEFESE 6:4.

 1. Morero oa Molimo ka lelapa e ne e le ofe, empa ho e-na le hoo ho ile ha etsahala’ng?

“ATANG le ngatafale le tlale lefatše.” (Genese 1:28) Jehova Molimo o ile a theha tokisetso ea lelapa ka mantsoe ao ho Adama le Eva. (Baefese 3:14, 15) Banyalani bao ba pele ba ne ba ka lebella ho bona lefatše le tletseng bana ba bona—e le meloko e mengata ea batho ba phethahetseng ba phelang ka thabo lefatšeng la paradeise ’me ba momahane borapeling ba ’Mōpi oa bona e Moholo. Empa Adama le Eva ba ile ba oela sebeng, ’me lefatše ha lea ka la tlala batho ba lokileng, ba tšabang Molimo. (Baroma 5:12) Ho e-na le hoo, bophelo ba lelapa bo ile ba senyeha ka potlako, ’me lehloeo, pefo le ho hloka “lerato la tlhaho” li busitse, haholo-holo ‘matsatsing ana a ho qetela.’—2 Timothea 3:1-5; Genese 4:8, 23; 6:5, 11, 12.

 2. Bana ba Adama ba ne ba e-na le matla a ho etsa eng, empa ho ne ho tla hlokahala eng ho haha malapa a matla moeeng?

² Adama le Eva ba ne ba bōpiloe ka setšoantšo sa Molimo. Le hoja Adama e ne e se e le moetsalibe, Jehova o ile a mo lumella ho ba le bana. (Genese 1:27; 5:1-4) Joaloka ntat’a bona, bana ba Adama ba ne ba e-na le matla a ho tseba se setle le se sebe ’me ba ne ba ka ithuta ho khetha pakeng tsa se nepahetseng le se fosahetseng. Ba ne ba ka rutoa hore na ba rapele ’Mōpi oa bona joang hammoho le ho rutoa bohlokoa ba ho mo rata ka lipelo tsa bona, meea ea bona, likelello tsa bona le matla a bona ’ohle. (Mareka 12:30; Johanne 4:24; Jakobo 1:27) Ho feta moo, ba ne ba ka koetlisetsoa hore ‘ba sebelise toka ba rate mosa ’me ba inyenyefatse ha ba tsamaea le Molimo.’ (Mikea 6:8) Leha ho le joalo, joaloka baetsalibe, ho ne ho tla hlokahala hore ba be hlokolosi haholo e le hore ba hahe malapa a matla moeeng.

Reka Nako

 3. Batsoali ba ka ‘reka nako’ joang hore ba hōlise bana ba Bakreste?

³ Mehleng ena e rarahaneng, e mahlonoko, ho hlokahala boikitlaetso bo boholo e le hore bana e ka ba “ba ratang Jehova” bao kannete ba “hloeang se sebe.” (Pesaleme ea 97:10) Batsoali ba bohlale ba tla ‘reka nako’ e le hore ba finyelle mosebetsi ona o boima. (Baefese 5:15-17) Haeba u motsoali, u ka etsa see joang? Ntho ea pele, beha lintho tsa pele boemong ba pele, u ele hloko “lintho tsa bohlokoa haholo,” ho akarelletsa ho ruta le ho koetlisa bana ba hao. (Bafilipi 1:10, 11) Ntho ea bobeli, nolofatsa mokhoa oa hao oa bophelo. Mohlomong u ka ’na ua tlohela mesebetsi e hlileng e sa hlokahaleng. Kapa mohlomong ho ka hlokahala hore u arohane le matlotlo a hlileng a sa hlokahaleng a hlokang tlhokomelo e jang nako. Joaloka motsoali oa Mokreste, le ka mohla u ke ke ua ikoahlaea hore ebe u ile ua etsa boiteko bo hlokahalang ba ho hōlisa bana ba tšabang Molimo.—Liproverbia 29:15, 17.

 4. Lelapa le ka bolokoa le momahane joang?

⁴ Ho qeta nako le e-na le bana ba lōna, haholo-holo litabeng tsa moea, ho etsa hore boiteko ba lōna e be bo tšoanelehang ’me ke e ’ngoe ea litsela tse molemo ka ho fetisisa tsa ho boloka lelapa le momahane. Empa sena se lokela ho etsoa kamehla. Etsang kemiso ea linako tseo le tla ba hammoho ka tsona. Sena ha se bolele feela ho ba ka ntlong e le ’ngoe, e mong le e mong a iketsetsa tsa hae. Bana ba atleha hamolemo ha ba fuoa tlhokomelo letsatsi le leng le le leng. Ho hlokahala hore lerato le kameho li bontšoe ka bolokolohi. Le pele ba etsa qeto ea ho ba le bana, banyalani ba lokela ho nahana ka botebo ka boikarabelo bona ba bohlokoa. (Luka 14:28) Kahoo, ba ke ke ba nka ho hōlisa bana e le mokhoka-khoale. Ho e-na le hoo, ba tla ho nka e le tokelo e thabisang.—Genese 33:5; Pesaleme ea 127:3.

Ruta ka Lipolelo le ka Mohlala

 5. (a) Ho ruta bana ho rata Jehova ho qala ka eng? (b) Batsoali ba fuoa keletso efe ho Deuteronoma 6:5-7?

⁵ Ho ruta bana ba hao ho rata Jehova ho qala ka hore u mo rate ka bouena. Ha lerato la hao ho Molimo le le matla, le tla u susumelletsa hore u latele litaelo tsohle tsa hae ka botšepehi. Sena se akarelletsa ho hōlisa bana ka “taeo le kelello e laoloang ke Jehova.” (Baefese 6:4) Molimo o eletsa batsoali hore ba behele bana ba bona mohlala, ba buisane le bona le ho ba ruta. Deuteronoma 6:5-7 e re: “U rate Jehova Molimo oa hao ka pelo ea hao eohle le ka moea oa hao oohle le ka mafolofolo a hao ’ohle. Mantsoe ana ao ke u laelang ’ona kajeno a be pelong ea hao; u a rute mora oa hao ka ho pheta-pheta ’me u bue ka ’ona ha u lutse ka tlung ea hao le ha u tsamaea tseleng le ha u robetse le ha u tsoha.” Ka keletso e fanoang nako le nako le ka ho pheta-pheta, u ka kenya ka botebo litaelo tsa Molimo baneng ba hao. Kahoo, bana ba hao ba tla bona lerato leo u nang le lona ho Jehova ’me le bona, ba tla susumelletseha ho hlaolela hore ba atamelane le eena.—Liproverbia 20:7.

 6. Batsoali ba ka sebelisa hamolemo joang ’nete ea hore bana ba ithuta ka mohlala?

⁶ Bana ba chesehela ho ithuta. Ke bamameli le bashebelli ba hloahloa ’me ba potlakela ho etsisa mohlala oa hao. Ha ba bona hore ha u rate lintho tse bonahalang, sena se ba thusa ho ithuta mokhoa oa ho latela keletso ea Jesu. U ba ruta hore ba se ke ba labalabela lintho tse bonahalang empa ba ‘batle ’Muso oa Molimo pele.’ (Matheu 6:25-33) Ka ho qoqa hammoho ka mokhoa o molemo le o hahang ka ’nete ea Bibele, phutheho ea Molimo le baholo ba khethiloeng, u ruta bana ba hao ho hlompha Jehova le ho nka litokisetso tsa hae tsa moea e le tsa bohlokoa. Kaha bana ba hlokomela ka potlako ha lintho li sa lumellane, thuto ea molomo e lokela ho tšehetsoa ka boitšoaro le boikutlo tse bontšang kananelo ea hao e tebileng ea lintho tsa moea. Ke tlhohonolofatso e kaakang ha batsoali ba bona hore mohlala o motle oa bona o entse hore bana ba bona ba rate Jehova ka lipelo tsohle tsa bona!—Liproverbia 23:24, 25.

7, 8. Ke mohlala ofe o bontšang molemo oa ho koetlisa bana ho tloha bonyenyaneng, ’me ho tlotlisoa mang ka katleho e hlahang?

⁷ Molemo oa ho koetlisa bana ho tloha bonyenyaneng o ka bonoa mohlaleng o mong oa Venezuela. (2 Timothea 3:15) Ke oa banyalani ba banyenyane, Félix le Mayerlín. Ba sebeletsa e le bo-pula-maliboho. Ha mora oa bona Felito a hlaha, ba ne ba chesehela ho etsa sohle se matleng a bona hore ba mo hōlise e le morapeli oa ’nete oa Jehova. Ka lentsoe le phahameng, Mayerlín o ile a qala ho balla Felito Buka ea ka ea Lipale tsa Bibele, e hatisitsoeng ke Lipaki tsa Jehova. Ho tloha bonyenyaneng ho ile ha bonahala Felito a lemoha Moshe le batho ba bang ba tšoantšitsoeng bukeng ena.

⁸ Felito o ile a qala ho pakela batho ka boeena a sa le monyenyane. O ile a phethahatsa takatso ea hae ea ho ba mohoeletsi oa ’Muso, ’me hamorao o ile a kolobetsoa. Ka mor’a nako, Felito e ile ea e-ba pula-maliboho oa kamehla. Batsoali ba hae ba re: “Ha re shebeletse tsoelo-pele ea mora oa rōna, re hlokomela hore o seo a leng sona ka lebaka la Jehova le taeo e tsoang ho eena.”

Thusa Bana ho Hōla Moeeng

 9. Ke hobane’ng ha re lokela ho leboha taeo ea moea eo re e fumanang ka sehlopha sa lekhoba le tšepahalang le le masene?

⁹ Ho na le limakasine tse ngata, libuka tse makholo le mecha e likete ea Internet e fanang ka keletso ea hore na bana ba hōlisoe joang. Tokollo e khethehileng ea bana ea Newsweek e re hangata “boitsebiso bo fanoang boa ikhanyetsa. Ho ferekanyang haholo ke haeba boitsebiso boo u nahanang hore u ka bo tšepa e e-ba bo fosahetseng ka ho feletseng.” Re leboha hakaakang hore ebe Jehova o lokiselitse ho hongata bakeng sa taeo le tsoelo-pele ea moea ea malapa! Na u sebelisa ka botlalo litokisetso tsohle tse etsoang ka sehlopha sa lekhoba le tšepahalang le le masene?—Matheu 24:45-47.

10. Thuto ea Bibele ea lelapa e atlehang e molemo joang ho batsoali le bana?

¹⁰ Ntho e ’ngoe ea bohlokoa e hlokahalang ke thuto ea Bibele ea lelapa ea kamehla le e tsitsitseng e tšoaroang e mong le e mong a phutholohile. Hore e be e laeang, e thabisang le e khothatsang, ho hlokahala tokisetso e ntle. Ha batsoali ba fa bana bolokolohi ba ho bua, ba ka ithuta se ka lipelong le likelellong tsa bona. Mokhoa o mong oa ho bona hore na thuto ea lelapa e atleha hakae ke ho hlokomela hore na litho tsohle tsa lelapa li e lebella ka thabo.

11. (a) Batsoali ba ka thusa bana ba bona hore ba iketsetse lipakane life? (b) Ho ile ha e-ba le phello efe ha ngoanana e mong oa Mojapane a phehella pakane ea hae?

¹¹ Lipakane tsa Mangolo li thusa ka tsela e tšoanang hore lelapa le be matla moeeng, ’me batsoali ba lokela ho thusa bana ba bona ho iketsetsa tsona. Lipakane tse loketseng li akarelletsa ho bala Bibele letsatsi le leng le le leng, ho ba mohoeletsi oa litaba tse molemo oa kamehla le ho tsoela pele ho fihlela motho a inehela le ho kolobetsoa. Lipakane tse ling li ka ’na tsa akarelletsa tšebeletso ea nako e tletseng motho e le pula-maliboho, a le Bethele, kapa e le moromuoa. Ngoanana e mong oa Mojapane ea bitsoang Ayumi o ile a iketsetsa pakane ea ho pakela e mong le e mong sehlopheng sa hae ha a ntse a le sekolong sa mathomo. E le hore a tsose thahasello ea mosuoe oa hae le baithuti-’moho le eena, o ile a kōpa tumello ea ho beha lingoliloeng tse ngata tsa Bibele ka laebraring. Ka lebaka leo, o ile a khanna lithuto tsa Bibele tse 13 lilemong tse tšeletseng tseo a neng a le sekolong sa mathomo ka tsona. Se seng sa liithuti tseo tsa Bibele le ba bang ka lapeng labo sona ba ile ba fetoha Bakreste ba kolobelitsoeng.

12. Bana ba ka fumana molemo o moholo ka ho fetisisa joang libokeng tsa Bokreste?

¹² Ntho e ’ngoe e hlokahalang bakeng sa bophelo bo matla ba moea ke ho ba teng libokeng kamehla. Moapostola Pauluse o ile a khothatsa balumeli-’moho le eena ‘hore ba se ke ba tlohela ho bokana hammoho joalokaha ba bang ba ne ba e-na le tloaelo eo.’ A re se keng ra itloaetsa joalo hobane ba bacha le ba baholo ba rua molemo haholo ka ho tšoanang ka ho ba teng kamehla libokeng tsa Bokreste. (Baheberu 10:24, 25; Deuteronoma 31:12) Bana ba lokela ho rutoa ho mamela ka hloko. Ho lokisetsa liboka le hona ke habohlokoa hobane molemo o moholo ka ho fetisisa o tlisoa ke ho fana ka litlhaloso ka mafolofolo. Le hoja ngoana e monyenyane a ka ’na a qala ka ho bua mantsoe a se makae kapa ka ho bala karolo e nyenyane ea serapa, ho tla ba molemo ka ho fetisisa haeba bana ba rutoa ho batla likarabo le ho li bua ka mantsoe a bona. Na lōna batsoali le beha mohlala ka hore le fane ka litlhaloso kamehla le ka tsela e utloahalang? Ho boetse ho molemo hore setho se seng le se seng sa lelapa se be le Bibele, buka ea lipina le sengoliloeng se sebelisetsoang puisano ea Mangolo.

13, 14. (a) Ke hobane’ng ha batsoali ba lokela ho sebetsa le bana ba bona tšebeletsong? (b) Ke eng e tla thusa hore tšebeletso ea tšimo e be e molemo le e thabisang ho bana?

¹³ Batsoali ba hlalefileng ba tla tobisa matla a bocha a bana ba bona ho sebeletseng Jehova, ba ba thusa ho etsa boboleli karolo ea bohlokoa ea bophelo ba bona. (Baheberu 13:15) Ke feela ka ho sebetsa le bana ba bona tšebeletsong moo batsoali ba ka tiisang hore bana ba bona ba tla fumana koetliso e hlokahalang hore e be basebeletsi bao ‘ho seng letho leo ba ka hlajoang ke lihlong ka lona, ba tšoarang lentsoe la ’nete ka nepo.’ (2 Timothea 2:15) Kahoo, ho thoe’ng ka uena? Haeba u motsoali, na u thusa bana ba hao ho lokisetsa tšebeletso ea tšimo? Ho etsa sena ho tla thusa hore tšebeletso e ba thabise, e be le morero le litholoana.

¹⁴ Ke hobane’ng ha ho le molemo hore batsoali le bana ba bona ba sebetse hammoho tšebeletsong? Ka tsela ena, bana ba ka hlokomela le ho kopitsa mohlala o motle oa batsoali ba bona. Ka nako e tšoanang, batsoali ba ka lemoha boikutlo, boitšoaro le bokhoni ba bana ba bona. Tiisa hore u ea le bana ba hao litšobotsing tse fapa-fapaneng tsa tšebeletso. Ha ho khoneha, ngoana e mong le e mong a be le mokotlana oa hae oa tšimo, ’me u mo rute ho o boloka o le makhethe, o shebahala hantle. Ha bana ba koetlisoa le ho khothatsoa ka mokhoa o tsitsitseng, sena se tla haha kananelo ea ’nete bakeng sa tšebeletso, ’me ba tla bona mosebetsi oa boboleli e le mokhoa oa ho bontša lerato ho Molimo le moahelani.—Matheu 22:37-39; 28:19, 20.

Lula U Phela Hantle Moeeng

15. Kaha ho etsa hore lelapa le lule le phela hantle moeeng ke habohlokoa haholo, litsela tse ling tsa ho etsa see ke life?

¹⁵ Ho etsa hore lelapa le lule le phela hantle moeeng ke ntho ea bohlokoa. (Pesaleme ea 119:93) Tsela e ’ngoe ea ho etsa sena ke hore neng le neng ha ho hlaha monyetla u qoqe ka lintho tsa moea le lelapa la hao. Na u bua ka temana ea Bibele ea letsatsi le bona? Na u tloaetse hore ha le “tsamaea tseleng” u ba bolelle ka liphihlelo tsa tšebeletso ea tšimo kapa ka lintlha tse tsoang limakasineng tsa morao-rao tsa Molula-Qhooa le Tsoha!? Na u hopola ho leboha Jehova ka thapelo ka bophelo ba letsatsi ka leng le ka litokisetso tse ngata “ha u robetse le ha u tsoha”? (Deuteronoma 6:6-9) Ha bana ba hao ba bona lerato la hao bakeng sa Molimo le bonahala nthong e ’ngoe le e ’ngoe eo u e etsang, hona ho tla ba thusa ho etsa ’nete tsela ea bona ea bophelo.

16. Ho khothalletsa bana ho iketsetsa lipatlisiso ho na le molemo ofe?

¹⁶ Ka linako tse ling, bana ba tla hloka tataiso bakeng sa ho sebetsana ka katleho le mathata kapa maemo a hlahang. Ho e-na le hore kamehla u ba bolelle hore na ba etse’ng, ke hobane’ng ha u sa ba bontše hore na ba ka fumana maikutlo a Molimo joang ka ho ba khothalletsa ho iketsetsa lipatlisiso? Ho ruta bana ho sebelisa hamolemo lisebelisoa tsohle le likhatiso tse lokisetsoang ka “lekhoba le tšepahalang” ho tla ba thusa ho hlaolela kamano e haufi le Jehova. (1 Samuele 2:21b) ’Me ha ba phetela litho tse ling tsa lelapa melemo ea patlisiso ea Bibele eo ba e entseng, bomoea ba lelapa bo ntlafala ka ho eketsehileng.

Itšetlehe ka ho Feletseng ka Jehova

17. Ke hobane’ng ha batsoali ba se nang balekane ba sa lokela ho felloa ke tšepo tabeng ea hore ba hōlise bana ba bona e le Bakreste?

¹⁷ Batsoali ba se nang balekane ba ka haha malapa a matla moeeng joang? Malapa ana a thulana le mathata a eketsehileng tabeng ea ho hōlisa bana. Empa batsoali ba se nang balekane, le se ke la nyahama! Katleho ea khoneha, joalokaha ho bontšoa ke batsoali ba bangata ba se nang balekane ba tšepileng Molimo, ba sebelisitseng keletso ea hae ka boikokobetso, le ba hōlisitseng bana ba molemo le ba matla moeeng. (Liproverbia 22:6) Ha e le hantle, ho hlokahala hore Bakreste bao e leng batsoali ba se nang balekane ba tšepe Jehova ka ho feletseng. Ba lokela ho ba le tumelo ea hore o tla fana ka thuso.—Pesaleme ea 121:1-3.

18. Batsoali ba lokela ho ela hloko litlhoko life tsa kelello le tsa ’mele tsa bana ba bona, empa taba ea sehlooho e lokela ho ba eng?

¹⁸ Batsoali ba hlalefileng ba hlokomela hore ‘ho na le nako ea ho bokolla le nako ea ho tlōla-tlōla.’ (Moeklesia 3:1, 4) Ntho e hlokahalang hore ngoana a hōle ’meleng le kelellong ke nako ea boikhathollo le boithabiso bo nang le meeli le bo hahang. ’Mino o matlafatsang, haholo-holo ho bina lipina tse rorisang Molimo, o tla thusa ngoana ho hlaolela boikutlo bo molemo bo ka phethang karolo ea bohlokoa ho matlafatseng kamano ea hae le Jehova. (Bakolose 3:16) Bocha le bona ke nako ea ho lokisetsa ho ba motho e moholo ea tšabang Molimo, e le hore motho a ka tsoela pele ho thabela bophelo ka ho sa feleng lefatšeng la paradeise.—Bagalata 6:8.

19. Ke hobane’ng ha batsoali ba ka kholiseha ka tlhohonolofatso ea Jehova boitekong ba bona ba ho hōlisa bana?

¹⁹ Jehova o batla hore malapa ’ohle a Bakreste a lule e le a matla le a momahaneng moeeng. Haeba kannete re rata Molimo ’me re ikitlaelletsa ho mamela Lentsoe la hae, o tla hlohonolofatsa boiteko ba rōna ’me o tla re fa matla a hlokahalang hore re latele tataiso ea hae e bululetsoeng. (Esaia 48:17; Bafilipi 4:13) Hopola hore monyetla oo u nang le oona hona joale oa ho ruta le ho koetlisa bana ba hao o tla fela ’me o ke ke oa phetoa hape. Etsa sohle seo u ka se khonang ho sebelisa keletso ea Lentsoe la Molimo, ’me Jehova o tla hlohonolofatsa boiteko ba hao ba hore u hahe lelapa le matla moeeng.

Re Ithutile Eng?

•Ke hobane’ng ha ho reka nako e le habohlokoa hakaale ha ho koetlisoa bana?

•Ke hobane’ng ha ho hlokahala mohlala o motle oa batsoali?

•Litsela tse ling tsa bohlokoa tsa ho thusa bana ho hōla moeeng ke life?

•Lelapa le ka lula le phela hantle moeeng joang?

[Litšoantšo tse leqepheng la 24, 25]

Malapa a matla moeeng a ithuta Lentsoe la Molimo kamehla, a ba teng libokeng tsa Bokreste kamehla le ho kopanela hammoho tšebeletsong kamehla