Lipotso Tse Tsoang ho Babali

Ke hobane’ng ha Molula-Qhooa oa April 1, 2002, leqepheng la 11, serapeng sa 7, o itse ho kolobetsoa metsing ha balumeli ba bacha ba Bajuda ka Pentekonta ea 33 C.E. ho ne ho tšoantšetsa “boinehelo ba bona ho Molimo ka Kreste,” empa pele ho ne ho thoe ho tloha ka 33 C.E. ho fihlela ka 36 C.E. ho ne ho sa hlokahale hore Bajuda ba inehele ha ba ne ba kolobetsoa?

Ka 1513 B.C.E., Jehova Molimo o ile a fa Baiseraele monyetla oa ho ba sechaba se halalelang ho eena hafeela ba ne ba ka ‘mamela lentsoe la hae ka tieo ’me ba boloka selekane sa hae.’ Ba ile ba araba ba re: “Sohle seo Jehova a se buileng re ikemiselitse ho se etsa.”—Exoda 19:3-8; 24:1-8.

Ka ho lumela ho boloka selekane sa Molao oa Moshe, Baiseraele ba ne ba inehela ho Molimo. Meloko e latelang ea Bajuda e ile ea tsoalloa sechabeng sena se inehetseng. Leha ho le joalo, ho kolobetsoa ha Bajuda ba ileng ba fetoha balateli ba Jesu Kreste ho tloha ka Pentekonta ea 33 C.E. ho ea pele, ho ne ho bolela ho hong ntle le ho itlhahisa ho Molimo e le litho tsa sechaba se inehetseng. Ho ne ho tšoantšetsa boinehelo ba bona ho Jehova Molimo kamanong e ncha le eena ka Jesu Kreste. Joang?

Ka mor’a ho tšolleloa ha moea o halalelang holim’a barutuoa ba ka bang 120 ba neng ba bokane kamoreng e ka holimo Jerusalema ka Pentekonta ea 33 C.E., moapostola Petrose o ile a ema ’me a qala ho bolela ho matšoele a Bajuda le basokolohi ba neng ba khobokane ho tla bona se etsahetseng. Ka mor’a ho fana ka bopaki ka ho feletseng, o ile a bua le Bajuda ba neng ba se ba khakhathoa ke matsoalo, a re: “Bakang, ’me e mong le e mong oa lōna a ke a kolobetsoe ka lebitso la Jesu Kreste hore le tšoareloe libe.” Ka lebaka la ho nka khato ka keletso eo Petrose a ileng a fana ka eona ka mor’a moo, “ba ileng ba amohela lentsoe la hae ka pelo eohle ba kolobetsoa, ’me letsatsing leo ha eketsoa meea e ka bang likete tse tharo.”—Liketso 2:1-41.

Na Bajuda bao ba ileng ba kolobetsoa ka mor’a ho utloa keletso ea Petrose, ka nako eo e ne e se litho tsa sechaba se inehetseng? Na ba ne ba sa inehela ho Molimo? Che. Moapostola Pauluse o ile a ngola hore ‘Molimo o tlositse Molao tseleng ka ho o otlella thupeng ea tlhokofatso.’ (Bakolose 2:14) Ka lefu la Kreste ka 33 C.E., Jehova Molimo o ile a tlosa selekane sa Molao—e leng sona se neng se etsa hore ebe Baiseraele ba se ba inehetse ho Eena. Sechaba se neng se lahlile Mor’a Molimo, joale se ile sa lahloa ke Molimo. ‘Seo e neng e le Iseraele ka tsela ea nama’ se ne se ke ke sa hlola se bolela hore ke sechaba se inehetseng ho Molimo.—1 Bakorinthe 10:18; Matheu 21:43.

Selekane sa Molao se ile sa felisoa ka 33 C.E., empa nako ea Molimo ea mohau o khethehileng le ea tlhokomelo eo a neng a e fa Bajuda ha ea ka ea fela ka nako eo.a Nako eo e ne e lokela ho tsoela pele ho fihlela ka 36 C.E., ha Petrose a ne a pakela Motaliana ea tšabang Molimo ea bitsoang Korneliase, ba ntlo ea hae le Balichaba ba bang. (Liketso 10:1-48) Nako ee ea mohau e ile ea eketsoa ka lebaka lefe?

Daniele 9:27 e re: “[Mesia] o tla boloka selekane se ntse se sebetsa bakeng sa ba bangata ka beke e le ’ngoe.” Selekane se ileng sa tsoela pele se sebetsa ka lilemo tse supileng, kapa “beke e le ’ngoe,” ho tloha kolobetsong ea Jesu le qalong ea tšebeletso ea phatlalatsa ea Mesia ka 29 C.E., e ne e le selekane sa Abrahama. E le hore motho a kene selekaneng seo, ho ne ho hlokahala feela hore e be ngoana oa Moheberu oa Abrahama. Selekane sena seo Molimo a neng a se etselitse Baiseraele se ne se sa fe motho monyetla oa ho inehela ho Jehova. Kahoo, le hoja balumeli ba Bajuda ba ileng ba kolobetsoa ka mor’a puo ea Petrose ka Pentekonta ea 33 C.E. ba ne ba fuoa tlhokomelo e khethehileng e le Bajuda ba tlhaho, ba ne ba ke ke ba bolela hore ba inehetse ho Molimo ha selekane sa Molao se felisitsoe. Ho ne ho hlokahala hore bona ka bobona ba inehele ho Molimo.

Ho inehela ha Bajuda le basokolohi ba ileng ba kolobetsoa ka letsatsi la Pentekonta ea 33 C.E. ho ne ho hlokahala ka lebaka le leng hape. Moapostola Petrose o ile a khothalletsa bamameli ba hae hore ba bake le ho kolobetsoa ka lebitso la Jesu. E le hore ba etse joalo, ho ne ho hlokahala hore ba tlohele litsela tsa lefatše ’me ba amohele Jesu e le Morena le Mesia, Moprista ea Phahameng hape e le ea lutseng ka letsohong le letona la Molimo leholimong. Ho ne ho hlokahala hore ba ipiletse lebitsong la Jehova Molimo bakeng sa poloko ka Kreste Jesu, e leng ho neng ho ama ho bontša tumelo ho Kreste le ho mo amohela e le Moeta-pele oa bona. Motheo oa ho ba le kamano le Molimo le oa ho tšoareloa libe o ne o se o fetohile. Bajuda ka bomong ba lumelang ba ne ba lokela ho amohela tokisetso ena e ncha. Joang? Ka ho inehela ho Molimo le ka ho bontša hore ba inehetse ka ho qoelisoa metsing ka lebitso la Jesu Kreste. Ho kolobetsoa metsing e ne e le pontšo ea hore ba inehetse ho Molimo, e leng ho neng ho ba kenya kamanong e ncha le eena ka Jesu Kreste.—Liketso 2:21, 33-36; 3:19-23.

[Mongolo o botlaaseng ba leqephe]