Na Letsoalo la Hao le Koetlisitsoe Hantle?

NA U kile ua re, “Kea utloa le pelong ea ka hore ntho ena e fosahetse,” kapa “Ke sitoa ho etsa seo u nkōpang sona. Ho na le ntho e mpolellang hore seo se fosahetse”? Ho ne ho “bua” letsoalo la hao, e leng boikutlo bo ka hare bo lemosang motho se nepahetseng le se fosahetseng, bo mo emelang kapa bo mo qosang. Ha e le hantle, re tsoaloa re e-na le letsoalo.

Esita le hoja batho ba ikarotse ho Molimo, motho o ntse a ka khetholla se nepahetseng ho se fosahetseng. Lebaka la sena ke hobane o entsoe ka setšoantšo sa Molimo, kahoo ho isa bohōleng bo itseng, o bonahatsa litšobotsi tsa Molimo, e leng bohlale le toka. (Genese 1:26, 27) Moapostola Pauluse o ile a re ha ngola seo Molimo a mo susumelitseng ho se ngola: “Kaha neng kapa neng ha batho ba lichaba ba se nang molao ba etsa ka tlhaho lintho tsa molao, batho bana, le hoja ba se na molao, ke molao ka bobona. Ke bona ba bontšang hore boitsebiso ba molao bo ngotsoe ka lipelong tsa bona, ha matsoalo a bona a ntse a ba pakela ’me, menahanong ea bona, ba ntse ba qosoa kapa ba bile ba emeloa.”a—Baroma 2:14, 15.

Tšobotsi ena ea boitšoaro, e futsitsoeng ho motho oa pele, e leng Adama, e sebetsa joaloka “molao,” kapa tekanyetso ea boitšoaro, ho batho ba merabe eohle le ba lichaba tsohle. Ke bokhoni ba ho itlhahloba le ho ikahlola. (Baroma 9:1) Adama le Eva ba ile ba bonahatsa matla a ho etsa seo ha ba qeta ho tlōla molao oa Molimo—ba ile ba ipata. (Genese 3:7, 8) Mohlala o mong o bontšang kamoo letsoalo le sebetsang kateng ke tsela eo Morena Davida a ileng a itšoara ka eona ha a hlokomela hore o entse sebe ka ho nka palo ea sechaba. Bibele e re “pelo ea Davida ea qala ho mo tšetšetha.”—2 Samuele 24:1-10.

Ho khona ho itlhahloba le ho ahlola boitšoaro ba rōna ho ka re susumelletsa hore re nke khato ea bohlokoa haholo ea ho baka ka tsela eo Molimo a e amohelang. Davida o ile a ngola a re: “Ha ke ne ke khutsitse masapo a ka a ile a khathala ka lebaka la ho bobola ha ka letsatsi lohle. Qetellong ka bolela sebe sa ka ho uena, ’me phoso ea ka ha kea ka ka e koahela. Ke ile ka re: ‘Ke tla ipolela ho Jehova ka lebaka la litlōlo tsa ka.’ Ua tšoarela phoso ea libe tsa ka.” (Pesaleme ea 32:3, 5) Kahoo, letsoalo le sebetsang le ka boelanya moetsalibe le Molimo, la mo thusa ho elelloa hore ho hlokahala hore Molimo a mo tšoarele le hore o lokela ho latela litsela tsa Molimo.—Pesaleme ea 51:1-4, 9, 13-15.

Letsoalo le boetse lea re lemosa kapa hona ho re tataisa ha re lokela ho etsa khetho kapa qeto litabeng tsa boitšoaro. E ka ’na eaba ke eona tšobotsi ena ea letsoalo e ileng ea thusa Josefa ho hlokomela esale pele hore bofebe bo fosahetse le hore ke sebe mahlong a Molimo. Hamorao molao o tobileng o thibelang bofebe o ile oa kenyelletsoa Melaong e Leshome e ileng ea fuoa Baiseraele. (Genese 39:1-9; Exoda 20:14) Ho hlakile hore re ka rua molemo haholo ha matsoalo a rōna a koetliselitsoe ho re tataisa eseng feela ho re ahlola. Na letsoalo la hao le sebetsa ka tsela eo?

Kamoo U ka Koetlisang Letsoalo la Hao Kateng Hore le Etse Liqeto Tse Nepahetseng

Le hoja re tsoaloa re e-na le letsoalo, ka bomalimabe mpho eo e na le sepha. Le hoja qalong batho ba ne ba bōpiloe ba phethahetse, “bohle ba entse sebe ’me ba haelloa ke khanya ea Molimo.” (Baroma 3:23) Kaha matsoalo a rōna a silafalitsoe ke sebe le ho se phethahale, a ka ’na a khopama ’me a se ke a hlola a sebetsa ka botlalo ka tsela eo Jehova a neng a a reretse eona. (Baroma 7:18-23) Ho feta moo, lintho tse ling tse re potolohileng li ka ama matsoalo a rōna. A ka ’na a susumetsoa ke tsela eo re hōlisitsoeng ka eona, litloaelo tsa sebaka seo re phelang ho sona, lintho tseo re li lumelang le tikoloho. Ka sebele motho a ke ke a sebelisa mekhoa ea lefatše lena e hlephileng le litekanyetso tsa lona tse nyehlileng e le tsona tseo a lekanyang letsoalo le letle ka tsona.

Ka hona, Mokreste o lokela ho latela litekanyetso tse tiileng le tse lokileng tse ka Lentsoeng la Molimo, Bibele. Li ka tataisa matsoalo a rōna e le hore re sekaseke maemo ka nepo le ho otlolla lintho. (2 Timothea 3:16) Ha matsoalo a rōna a koetlisitsoe ka melao-motheo ea Molimo, a ka re thusa ho qoba lintho tse ka re ntšang kotsi boitšoarong, a re nolofalletsa “ho khetholla se nepahetseng le se fosahetseng.” (Baheberu 5:14) Ha matsoalo a rōna a sa koetlisoa ka melao-motheo ea Molimo, a ka ’na a se ke a re lemosa ha re khelohela tseleng e kotsi. Bibele e re: “Ho na le tsela e lokileng ka pel’a motho, empa qetello ea eona hamorao ke litsela tsa lefu.”—Liproverbia 16:25; 17:20.

Likarolong tse ling tsa bophelo, Lentsoe la Molimo le fana ka litaelo tse tobileng, ’me re rua molemo ha re li latela. Ka lehlakoreng le leng, ho na le maemo a mang a mangata ao Bibele e sa faneng litaelo tse tobileng ho ’ona. Ke maemo a ka ’nang a akarelletsa taba ea ho khetha mosebetsi, tlhokomelo ea bophelo, boikhathollo, moaparo le boitlhopho hammoho le likarolo tse ling. Ha ho bonolo ho tseba seo motho a lokelang ho se etsa boemong ka bomong le ho etsa qeto e nepahetseng. Ka lebaka leo, re lokela ho ikutloa joaloka Davida, ea ileng a rapela a re: “Ntsebise litsela tsa hao, Jehova; nthute litsela tsa hao. Ntsamaise ’neteng ea hao ’me u nthute, etsoe u Molimo oa ka oa poloko.” (Pesaleme ea 25:4, 5) Haeba re utloisisa tsela eo Molimo a talimang lintho ka eona, re tla nolofalloa ho sekaseka maemo a rōna ka tsela e nepahetseng le ho etsa liqeto ka letsoalo le khutsitseng.

Ka hona, ha re tobane le bothata kapa re lokela ho etsa qeto, re lokela ho nahana pele ka melao-motheo ea Bibele e ka ’nang ea sebetsa boemong boo. E meng ea eona e ka ’na ea e-ba: ho hlompha bohlooho (Bakolose 3:18, 20); ho tšepahala linthong tsohle (Baheberu 13:18); ho hloea se sebe (Pesaleme ea 97:10); ho phehella khotso (Baroma 14:19); ho mamela ba behiloeng boholong (Matheu 22:21; Baroma 13:1-7); ho inehela ho Molimo a ’notši (Matheu 4:10); ho se be karolo ea lefatše (Johanne 17:14); ho qoba metsoalle e mebe (1 Bakorinthe 15:33); ho apara le ho itlhopha ka tsela e loketseng (1 Timothea 2:9, 10); le ho se khopise ba bang (Bafilipi 1:10). Ka hona ho tseba molao-motheo oa Bibele o amehang ho ka matlafatsa matsoalo a rōna ’me ha re thusa ho etsa liqeto tse nepahetseng.

Mamela Letsoalo la Hao

E le hore matsoalo a rōna a re thuse, re lokela ho a mamela. Re rua molemo hafeela re nka khato ka potlako ha matsoalo a rōna a koetlisitsoeng ka Bibele a re lemosa. Re ka bapisa letsoalo le koetlisitsoeng le mabone a khantšang deshboteng ea koloi. A re nke hore lebone lea khantša ho re lemosa hore oli e tlaase. Ho etsahala’ng haeba re sa lokise boemo boo hang-hang, empa ho e-na le hoo re tsoela pele ho khanna koloi? Re ka senya enjene. Ka tsela e tšoanang, matsoalo a rōna, kapa lentsoe le ka hare ho rōna, a ka re lemosa hore ketso e itseng e fosahetse. Ha a bapisa seo re se etsang kapa seo re nahanang ho se etsa le litekanyetso le melao-motheo ea Mangolo, matsoalo a rōna aa re lemosa, joaloka lebone le khantšang deshboteng ea koloi. Ho mamela temoso eo ho tla re thusa ho qoba liphello tse bohloko tsa ketso e fosahetseng ho be ho re thuse ho boloka matsoalo a rōna a sebetsa hantle.

Ho etsahala’ng haeba re khetha ho hlokomoloha temoso? Butle-butle, letsoalo le khaotsa ho sebetsa. Se etsahalang ha motho a tsoela pele ho hlokomoloha letsoalo kapa ho le hatella se ka ’na sa tšoana le se etsahalang ha motho a chesa letlalo ka tšepe. Khoho e bang holim’a leqeba ha e utloe bohloko kaha ha e sa na methapo ea kutlo. (1 Timothea 4:2) Letsoalo le joalo ha le sa ahlola motho ha a etsa sebe, leha e le hona ho mo lemosa hore a se ke a pheta sebe seo. Letsoalo le cheleng le hlokomoloha melao-motheo ea Bibele ea se nepahetseng le se fosahetseng, kahoo ke letsoalo le shoeleng. Ke letsoalo le senyehileng, leo mong’a lona a “feletsoeng ke kutlo eohle ea boitšoaro,” ’me o hōle le Molimo. (Baefese 4:17-19; Tite 1:15) Ka sebele ho hlokomoloha letsoalo ho fella ka tlokotsi!

“E-bang le Letsoalo le Molemo”

E le hore motho a be le letsoalo le letle ho hlokahala hore a lule a etsa boiteko. Moapostola Pauluse o ile a re: “Ke ikoetlisa ke sa khaotse hore ke be le kelo-hloko ea hore ke se ke ka siteloa Molimo le batho.” (Liketso 24:16) Kaha Pauluse e ne e le Mokreste, o ne a lula a hlahloba tsela eo a etsang lintho ka eona le ho e lokisa e le hore a tiise hore ha a siteloe Molimo. Pauluse o ne a tseba hore qetellong, ke Molimo ea tla etsa qeto ea hore na seo re se etsang se nepahetse kapa se fosahetse. (Baroma 14:10-12; 1 Bakorinthe 4:4) Pauluse o ile a re: “Lintho tsohle li hlobotse ’me li pepesitsoe phatlalatsa mahlong a eo re nang le boikarabello ho eena.”—Baheberu 4:13.

Pauluse o ile a boela a bua ka ho se khopise batho ba bang. Mohlala o mong o loketseng ke keletso eo a ileng a e fa Bakreste ba Korinthe mabapi le “ho ja lijo tse nyeheloang ho litšoantšo tse rapeloang.” O ne a buella hore esita le haeba Lentsoe la Molimo le sa hanele ntho e itseng, ke habohlokoa ho nahanela matsoalo a ba bang. Ho se a nahanele ho ka ‘senya bomoea ba barab’abo rōna bao Kreste a ileng a ba shoela.’ Re ka boetse ra senya kamano ea rōna le Molimo.—1 Bakorinthe 8:4, 11-13; 10:23, 24.

Kahoo, tsoela pele u koetlisa letsoalo la hao ’me u lule u e-na le letsoalo le letle. Ha u etsa liqeto, kōpa Molimo hore a u tataise. (Jakobo 1:5) Ithute Lentsoe la Molimo, ’me u lumelle melao-motheo ea lona hore e fetole kelello le pelo ea hao. (Liproverbia 2:3-5) Ha ho hlaha maemo a tebileng, buisana le Bakreste ba hōlileng tsebong ho netefatsa hore u utloisisa hantle melao-motheo ea Bibele e amehang. (Liproverbia 12:15; Baroma 14:1; Bagalata 6:5) Nahana kamoo qeto eo u e etsang e tla ama letsoalo la hao kateng, kamoo e tla ama ba bang kateng, ’me ka holim’a tsohle, kamoo e tla ama kamano ea hao le Jehova kateng.—1 Timothea 1:5, 18, 19.

Matsoalo a rōna ke mpho e babatsehang eo re e filoeng ke Ntate oa rōna ea lerato oa leholimo, Jehova Molimo. Re tla atamelana haholoanyane le ’Mōpi oa rōna haeba re sebelisa mpho ena tumellanong le thato ea Mofani oa eona. Ha re ntse re leka ho ‘ba le letsoalo le molemo’ linthong tsohle tseo re li etsang, re bontša ka ho hlakileng haholoanyane hore re entsoe ka setšoantšo sa Molimo.—1 Petrose 3:16; Bakolose 3:10.

[Mongolo o botlaaseng ba leqephe]

[Litšoantšo tse leqepheng la 13]

Na letsoalo la hao le koetliselitsoe ho u tataisa eseng feela ho u ahlola?

[Setšoantšo se leqepheng la 14]

Re koetlisa matsoalo a rōna hantle ha re ithuta melao-motheo ea Bibele le ho e sebelisa

[Litšoantšo tse leqepheng la 15]

U se ke ua hlokomoloha letsoalo la hao ha le u lemosa