Rutang Bana ba Lōna ho Rata Jehova

“Joaloka metsu letsohong la monna ea matla, bara ba bocha ba joalo.”—PESALEME EA 127:4.

1, 2. Ke joang bana ba tšoanang le “metsu letsohong la monna ea matla”?

SETSOMI se lokisetsa ho phosa motsu hore se hlabe phofu. Se o beha ka hloko seqheng, ’me se tiisa mesifa ea letsoho hore se tsebe ho qhakholla khoele ea seqha. Ho sa tsotellehe hore na se tiisitse mesifa hakae, se korola motsu ka hloko le ka mamello. Ka mor’a moo, se o tlohela hore o betsehe! Na motsu oo o tla hlaba phofu? Karabo e itšetlehile ka mabaka a mangata, a akarelletsang bokhoni ba setsomi, moo moea o fokelang teng le motsu ka booona.

² Morena Solomone o ile a tšoantša bana le “metsu letsohong la monna ea matla.” (Pesaleme ea 127:4) Nahana kamoo papiso ena e ka sebelisoang kateng. Setsomi se beha motsu ka nakoana feela seqheng. E le hore se hlabe phofu, se lokela ho phosa motsu ka potlako. Ka tsela e tšoanang, batsoali ba na le nako e khutšoanyane haholo ea ho etsa hore bana ba bona ba rate Jehova ho tloha botebong ba pelo. Ka mor’a lilemo tse seng kae feela, bana baa phurusetsa. (Matheu 19:5) Na bana ba tla fihla pakaneng—ke hore, ha ba tloha lapeng, na ba tla rata Molimo le ho mo sebeletsa? Karabo e ama mabaka a mangata. A mararo ke ana, tikoloho eo bana ba hōlisetsoang ho eona le tsela eo ‘motsu,’ kapa ngoana, a nkang khato ka eona ha a koetlisoa. A re sekasekeng lebaka ka leng. Re tla qala ka ho hlahloba hore na motsoali ea nang le bokhoni ke ea joang.

Batsoali ba Nang le Bokhoni ba Beha Mohlala o Motle

3. Ke hobane’ng ha lipuo tsa motsoali li lokela ho lumellana le liketso?

³ Jesu o ile a behela batsoali mohlala ka hore o ne a etsa seo a se rutang. (Johanne 13:15) Ka lehlakoreng le leng, o ile a nyatsa Bafarisi ba neng ba “bua” empa ‘ba sa etse.’ (Matheu 23:3) E le hore batsoali ba susumetse bana ba bona hore ba rate Jehova, lipuo tsa bona li lokela ho lumellana le liketso tsa bona. Lipuo tse sa lumellaneng le liketso ha li na thuso joaloka seqha se se nang khoele.—1 Johanne 3:18.

4. Batsoali ba lokela ho ipotsa lipotso life, hona hobane’ng?

⁴ Ke hobane’ng ha mohlala oa batsoali e le oa bohlokoa hakaale? Feela joalokaha batho ba baholo ba ka ithuta ho rata Molimo ka ho sheba mohlala oa Jesu, bana ba ka ithuta ho rata Jehova ka ho latela mohlala o motle oa batsoali ba bona. Metsoalle ea ngoana e ka matlafatsa ngoana kapa ea “senya mekhoa e metle” ea hae. (1 Bakorinthe 15:33) Lilemong tsa pele tsa bohlokoa tseo botho ba ngoana bo bōpehang ka tsona, metsoalle ea hae e haufi ka ho fetisisa le e nang le tšusumetso e khōlō ke batsoali ba hae. Ka lebaka leo, batsoali ba lokela ho ipotsa: ‘Ke motsoalle oa mofuta ofe? Na mohlala oa ka o khothalletsa ngoana oa ka ho ithuta mekhoa e metle? Ke beha mohlala oa mofuta ofe litabeng tsa bohlokoa tsa ho rapela le ho ithuta Bibele?’

Batsoali ba Nang le Bokhoni ba Rapela le Bana ba Bona

5. Bana ba ka ithuta’ng lithapelong tsa motsoali?

⁵ Bana ba lōna ba ka ithuta ho hongata ka Jehova ha ba mametse lithapelo tsa lōna. Ha ba le utloa le leboha Molimo pele ho jeoa le ha le rapela nakong ea thuto ea Bibele, ba ka etsa liqeto tsa mofuta ofe? Ho ka etsahala hore ebe ba tla ithuta hore Jehova o lokisetsa litlhoko tsa rōna tsa nama—e leng seo re lokelang ho mo leboha ka sona—le hore o re ruta linnete tsa Bibele. Lithuto tsena ke tsa bohlokoa.—Jakobo 1:17.

6. Batsoali ba ka thusa bana joang hore ba utloisise hore Jehova o ba thahasella e le batho ka bomong?

⁶ Leha ho le joalo, u tla finyella ho hongata le ho feta haeba u rapela le lelapa la hao eseng feela nakong ea ho ja le ea ho ithuta Bibele, empa le ka linako tse ling, ’me lithapelong tseo u bua ka litaba tse itseng tse u amang le bana ba hao. U tla thusa bana ba hao hore ba utloisise hore Jehova ke karolo ea lelapa la lōna, le hore o le tsotella haholo ka bomong. (Baefese 6:18; 1 Petrose 5:6, 7) Ntate e mong o re: “Ho tloha ha morali oa rōna a hlaha, re ile ra rapela le eena. Ha a ntse a hōla, re ile ra rapella litaba tse amanang le setsoalle le tse ling tse mo amang. Ho fihlela a tloha lapeng ha a nyaloa, ha ho letsatsi le ileng la feta re sa rapele le eena.” Na le uena u ka rapela le bana ba hao letsatsi le letsatsi? Na u ka ba thusa hore ba nke Jehova e le Motsoalle ea ba fang lintho tseo ba li hlokang nameng le moeeng le ea bileng a ba hlokomelang maikutlong?—Bafilipi 4:6, 7.

7. E le hore lithapelo tsa batsoali e be tse tobang taba, ba lokela ho tseba eng?

⁷ Ha e le hantle, e le hore lithapelo tsa lōna e be tse tobang taba, le lokela ho tseba se etsahalang bophelong ba ngoana oa lōna. Hlokomelang se hlalosoang ke ntate e mong ea ileng a hōlisa bana ba babeli: “Mafelong a beke ka ’ngoe, ke ne ke ipotsa lipotso tse peli: ‘Ebe bana ba ka ba ne ba nahana ka eng bekeng ee? Hona ho etsahetse lintho life tse molemo bophelong ba bona ba letsatsi le letsatsi?’” Batsoali, na le ka ipotsa lipotso tsa mofuta oo ebe le akarelletsa tse ling tsa likarabo tsa tsona lithapelong tseo le li etsang le bana ba lōna? Ha le etsa joalo, le tla be le sa ba rute feela ho rapela Jehova—Ea Utloang thapelo—empa le tla be le ba ruta le ho mo rata.—Pesaleme ea 65:2.

Batsoali ba Nang le Bokhoni ba Khothalletsa Mekhoa e Metle ea ho Ithuta

8. Ke hobane’ng ha batsoali ba lokela ho thusa bana ba bona hore ba tloaele ho ithuta Lentsoe la Molimo?

⁸ Maikutlo ao motsoali a nang le ’ona mabapi le ho ithuta Bibele a ka susumetsa setsoalle sa ngoana le Molimo joang? Haeba batho ba batla hore setsoalle sa bona se hōle le ho tsoella, ba lokela ho buisana le ho mamelana. Tsela e ’ngoe eo re mamelang Jehova ka eona ke ka ho ithuta Bibele ka likhatiso tse lokisetsoang ke “lekhoba le tšepahalang.” (Matheu 24:45-47; Liproverbia 4:1, 2) Kahoo, e le hore batsoali ba thuse bana ba bona hore ba be le setsoalle se tšoarellang le se lerato le Jehova, ba lokela ho ba khothalletsa hore ba tloaele ho ithuta Lentsoe la Molimo.

9. Bana ba ka thusoa joang hore ba be le mekhoa e metle ea ho ithuta?

⁹ Bana ba ka thusoa joang hore ba be le mekhoa e metle ea ho ithuta? Le ntlheng ena, mohlala oa motsoali o ka ruta hantle ka ho fetisisa. Na bana ba hao ba u bona u thabela ho bala Bibele kapa ho ithuta eona kamehla? Ke ’nete hore mohlomong u phathahane ka ho hlokomela bana ba hao, ’me ua ipotsa hore na nako ea ho bala le ho ithuta Bibele u ka e nka hokae. Empa ipotse, ‘Na bana ba ka ba mpona hangata ke shebelletse thelevishene?’ Haeba ho joalo, na u ka sebelisa karolo e ’ngoe ea nako eo ho ba behela mohlala o motle mabapi le thuto ea botho?

10, 11. Ke hobane’ng ha batsoali ba lokela ho ba le lipuisano tsa kamehla tsa Bibele tsa lelapa le bana ba bona?

¹⁰ Tsela e ’ngoe e molemo eo ka eona batsoali ba ka rutang bana ba bona hore ba mamele Jehova ke ka hore kamehla lelapa le buisane ka Bibele. (Esaia 30:21) Leha ho le joalo, batho ba bang ba ka ’na ba ipotsa: ‘Ke hobane’ng ha bana ba hloka thuto ea lelapa haeba batsoali ba bona ba e-ea le bona libokeng tsa phutheho kamehla?’ Ho na le mabaka a mangata a matle. Jehova o file batsoali boikarabelo bo ka sehloohong ba hore ba rute bana ba bona. (Liproverbia 1:8; Baefese 6:4) Thuto ea Bibele ea lelapa e ruta bana hore borapeli hase ntho e etsoang phuthehong feela, empa ke karolo ea bophelo ba lelapa.—Deuteronoma 6:6-9.

¹¹ Ho phaella moo, thuto ea lelapa e khannoang hantle e ka fa batsoali monyetla oa ho tseba hore na bana ba bona ba nahana eng ka litaba tsa moea le tsa boitšoaro. Ka mohlala, ha bana ba le banyenyane, batsoali ba ka sebelisa lingoliloeng tse kang Ithute ho Mosuoe e Moholo.a Hoo e ka bang serapeng se seng le se seng sa buka ena ea ho ithuta Bibele, bana ba kōptjoa hore ba bolele maikutlo a bona tabeng eo ho buuoang ka eona. Ka ho nahana ka litemana tse boletsoeng bukeng ena, batsoali ba ka thusa bana ho ntlafatsa matla a bona a ho lemoha “ho khetholla se nepahetseng le se fosahetseng.”—Baheberu 5:14.

12. Batsoali ba ka etsa hore thuto ea lelapa e lumellane le litlhoko tsa ngoana joang, ’me ke eng eo le fumaneng hore ea atleha ntlheng ee?

¹² Ha bana ba hao ba ntse ba hōla, etsa hore thuto e lumellane le litlhoko tsa bona. Hlokomela kamoo banyalani ba bang ba ileng ba thusa bana ba bona hore ba nahane ka kōpo ea ho ea tantšing ea sekolo. Ntate o re: “Re ile ra bolella bana ba rōna hore karolong e ’ngoe ea thuto e latelang ea lelapa, ’na le mosali oa ka re tla iketsa bana, ’me banana ba rōna ba iketse batsoali. E mong e ne e ka ba Ntate ’me e mong ea e-ba ’Mè, empa ba ne ba lokela ho thusana ho etsa lipatlisiso ka taba ena le ho fana ka tataiso mabapi le litantši tsa sekolo.” Ho ile ha etsahala joang? Ntate enoa o tsoela pele: “Re ile ra hlolloa ke kamoo barali ba rōna ba ileng ba khona ho khetholla se nepahetseng ho se fosahetseng kateng ha (ba ikentse batsoali) ba re hlalosetsa (re ikentse bana) mabaka a bona a thehiloeng Bibeleng a hore na ke hobane’ng ha e se bohlale ho ea litantšing tseo. Se ileng sa re khahla hape ke litlhahiso tseo ba ileng ba fana ka tsona tsa hore na ho ka etsoa’ng ho e-na le ho ea litantšing tsena. Litlhahiso tsena li ile tsa re thusa ho utloisisa hamolemo hore na ba nahana joang le hore na ba rata eng.” Ke ’nete hore ho hlokahala mamello le ho nahana e le hore thuto ea lelapa e khannoe kamehla le hore e lumellane le litlhoko tsa lelapa, empa litholoana e ba tse molemo.—Liproverbia 23:15.

Etsang Hore ho Rene Khotso ka Lapeng

13, 14. (a) Batsoali ba ka etsa joang hore ho rene khotso ka lapeng? (b) Ho ka ba le liphello life tse molemo ha motsoali a lumela hore o entse phoso?

¹³ Ho ka etsahala hore motsu o otle phofu haeba setsomi se o korola ebile se o phosa ntle ho tšitiso. Ka ho tšoanang, ho ka etsahala hore bana ba rate Jehova ha batsoali ba etsa hore ho rene khotso ka lapeng. Jakobo o ile a ngola a re: “Litholoana tsa ho loka peō ea tsona e jaloa tlas’a maemo a khotso bakeng sa ba etsang khotso.” (Jakobo 3:18) Batsoali ba ka etsa joang hore ho rene khotso ka lapeng? Banyalani ba lokela ho lula ba e-na le kamano e ntle ea lenyalo. Monna le mosali ba ratanang le ba hlomphanang ba na le monyetla o motle oa ho ruta bana ba bona ho rata le ho hlompha batho ba bang, hammoho le Jehova. (Bagalata 6:7; Baefese 5:33) Lerato le tlhompho li etsa hore ho rene khotso. Banyalani ba phelisanang ka khotso ba na le monyetla o moholo oa ho lokisa likhohlano tse ka ’nang tsa hlaha ka lapeng.

¹⁴ Ha e le hantle, feela joalokaha ho se na manyalo a phethahetseng, ha ho na malapa a phethahetseng hona joale lefatšeng. Ka linako tse ling batsoali ba ka ’na ba hlōloa ho bontša tholoana ea moea baneng ba bona. (Bagalata 5:22, 23) Ha ho etsahala seo, batsoali ba lokela ho etsa joang? Haeba ba lumela hore ba entse phoso, na seo se tla fokotsa tlhompho eo ngoana a ba hlomphang ka eona? Nahana ka mohlala oa moapostola Pauluse. O ne a tšoana le ntate oa moea ho ba bangata. (1 Bakorinthe 4:15) Empa o ile a lumela pepenene hore o etsa liphoso. (Baroma 7:21-25) Leha ho le joalo, boikokobetso ba hae le botšepehi ba hae ha li fokotse tlhompho ea rōna ho eena, empa lia e eketsa. Ho sa natsoe bofokoli ba hae, Pauluse o ne a ka ngolla phutheho ea Korinthe ka kholiseho a re: “E-bang baetsisi ba ka, esita le joalokaha ke le oa Kreste.” (1 Bakorinthe 11:1) Haeba le uena u lumela liphoso tsa hao, ho ka etsahala hore bana ba hao ba hlokomolohe liphoso tsa hao.

15, 16. Ke hobane’ng ha batsoali ba lokela ho ruta bana ba bona hore ba rate bara le baralib’abo bona ba Bakreste, ’me ba ka etsa see joang?

¹⁵ Ke eng hape eo batsoali ba ka e etsang hore bana ba bona ba hōlele tikolohong eo ho eona ba ka ratang Jehova? Moapostola Johanne o ile a ngola a re: “Haeba leha e le mang a re: ‘Ke rata Molimo,’ leha ho le joalo a hloile mor’abo, o leshano. Etsoe ea sa rateng mor’abo, eo a mo boneng, a ke ke a rata Molimo, eo a e-s’o mo bone.” (1 Johanne 4:20, 21) Kahoo, ha u koetlisa bana ba hao hore ba rate bara le baralib’abo bona ba Bakreste, u ba ruta ho rata Molimo. Batsoali ba lokela ho ipotsa, ‘Ha ke bua ka phutheho, na ke utloahala ke bua lintho tse khothatsang kapa tse nyatsang?’ U ka tseba see joang? Mamela ka hloko tsela eo bana ba hao ba buang ka eona ka liboka le ka litho tsa phutheho. Ho ka etsahala hore lipolelong tsa bona u utloe ba pheta lipuo tsa hao.

¹⁶ Batsoali ba ka etsa’ng ho thusa bana ba bona hore ba rate bara le baralib’abo bona ba Bakreste? Peter, e leng ntate oa bashanyana ba babeli ba bacha lilemong, o re: “Ho tloha ha bashanyana ba rōna ba sa le banyenyane, kamehla re ’nile ra mema bara le baralib’abo rōna ba hōlileng moeeng ho tla ja le rōna le ho re etela, ’me re entse sena ka thabo e khōlō. Bashanyana ba rōna ba hōtse ba tloaelane le batho ba ratang Jehova, ’me joale baa bona hore ho sebeletsa Molimo ho monate.” Dennis o na le bana ba banana ba bahlano, ’me o re, “Re ile ra khothalletsa banana ba rōna hore ba tloaelane le batho ba baholo ba bo-pula-maliboho ka phuthehong, ’me neng le neng ha ho ne ho khoneha, re ne re amohela balebeli ba tsamaeang le basali ba bona.” Na le uena u ka ikemisetsa ho thusa bana ba hao hore ba nke phutheho e le karolo ea lelapa la hao?—Mareka 10:29, 30.

Boikarabelo ba Ngoana

17. Qetellong bana ba lokela ho etsa qeto efe?

¹⁷ Nahana hape ka mohlala oa setsomi. Le hoja e ka ’na eaba sea nepa, ho ka etsahala hore se se ke sa hlaba phofu haeba motsu oo se o phosang o kobehile. Ha re tšoantšetsa, ’nete ke hore batsoali ba tla leka ka thata ho otlolla motsu o kobehileng ka ho ikitlaelletsa ho lokisa monahano o fosahetseng oa ngoana. Empa qetellong bana ba lokela ho iketsetsa qeto ka bobona hore na ba lumella lefatše lena hore le ba susumelletse ho etsa thato ea lona kapa ba lumella Jehova hore a ‘otlolle litsela’ tsa bona.—Liproverbia 3:5, 6; Baroma 12:2.

18. Khetho ea ngoana e ka ba le phello efe ho batho ba bang?

¹⁸ Le hoja batsoali ba e-na le boikarabelo bo boima ba ho hōlisa bana ba bona ka “taeo le kelello e laoloang ke Jehova,” qeto ea hore na ngoana o tla hōla hore e be motho oa mofuta ofe, ke ea hae ka boeena. (Baefese 6:4) Ka lebaka leo, bana, ipotseng, “Na re tla lumela ha batsoali ba rōna ba re koetlisa ka lerato?” Ha le lumela, le tla be le khetha tsela e molemohali bophelong. Le tla thabisa batsoali ba lōna haholo. Sa bohlokoa ka ho fetisisa, le tla thabisa pelo ea Jehova.—Liproverbia 27:11.

[Mongolo o botlaaseng ba leqephe]

Na U sa Hopola?

• Batsoali ba ka beha mohlala o motle joang tabeng ea ho rapela le ho ithuta Bibele?

• Batsoali ba ka etsa joang hore ho rene khotso ka lapeng?

• Bana ba tobane le khetho efe, ’me khetho eo ba e etsang e tla ama batho ba bang joang?

[Setšoantšo se leqepheng la 28]

Na le behela ngoana oa lōna mohlala o motle tabeng ea thuto ea botho?

[Setšoantšo se leqepheng la 29]

Ha ho rena khotso ka lapeng ho ba le thabo