Na Lefatše la Rōna le Tla Felisoa?

NA U kile ua ipotsa potso ee, ‘Ho tla qetella ho etsahetse’ng ka lefatše la rōna?’ Lintho tse etsahalang lefatšeng la rōna le letle li etsa hore batho ba bangata ba nke hore le ka ’na la felisoa.

Ke ’nete hore kajeno lefatšeng ho senngoa lintho tsa tlhaho tse kang metsi, meru le tikoloho. Ho feta moo, bo-rasaense ba bang ba lemosa hore lefatše le libōpuoa tsohle tse ho lona li ka ’na tsa felisoa ke lintho tse kang majoe a maholo a tsoang sepakapakeng, linaleli tse phatlohang, kapa ho fela ha haedrojene ea letsatsi.

Bo-rasaense ba lumela hore butle-butle—mohlomong ka mor’a lilemo tse libilione—lefatše le tla felloa ke lintho tse nolofalletsang batho ho phela ho lona. Encyclopædia Britannica e hlalosa hore “boemo bona ha bo ntse bo tsoela pele bo tla qetella bo lebisitse tšenyong e ke keng ea hlola e lokisoa.”

Ho thabisang ke hore Bibele e re tiisetsa hore Jehova Molimo a ke ke a lumella lefatše la rōna hore le felisoe kapa le hloke baahi. Kaha ke ’Mōpi, o na le ‘bonatla bo boholo,’ kahoo a ka etsa hore leholimo le lefatše le be teng ka ho sa feleng. (Esaia 40:26) Ka lebaka leo, u ka tšepa mantsoe ana a reng: “[Molimo] o thehile lefatše holim’a libaka tsa lona tse tiisitsoeng; le ke ke la sisinngoa ho isa nakong e sa lekanyetsoang, kapa ka ho sa feleng.” “Mo roriseng, lōna letsatsi le khoeli. Mo roriseng, lōna linaleli tsohle tsa leseli. . . . Etsoe o ile a laela, ’me tsa bōptjoa. O li boloka li eme ka ho sa feleng.”—Pesaleme ea 104:5; 148:3-6.

Morero oa Molimo ka Lefatše

Ho hang e ne e se morero oa Molimo hore lefatše le senngoe ’me le silafatsoe kamoo le leng kateng kajeno. Ho e-na le hoo, ha Molimo a bōpa monna le mosali oa pele, Adama le Eva, o ile a ba beha serapeng se setle. Ho hlakile hore lehae la bona la Paradeise le ne le ke ke la lula le le letle ntle le hore le hlokomeloe. Molimo o ile a ba fa kabelo ea “ho [lema serapa seo] le ho se hlokomela.” (Genese 2:8, 9, 15) Ka sebele Molimo o ile a fa batsoali ba rōna ba neng ba se na sekoli mosebetsi o thabisang le o khotsofatsang.

Leha ho le joalo morero oa Molimo ka lefatše e ne e se feela hore ho hlokomeloe serapa seo sa pele. O ne a batla hore lefatše lohle le etsoe paradeise. Ke ka lebaka leo Molimo a ileng a fa Adama le Eva taelo e reng: “Atang le ngatafale le tlale lefatše ’me le le buse, ’me le laole litlhapi tsa leoatle le libōpuoa tse fofang tsa maholimo le sebōpuoa se seng le se seng se phelang se hahabang lefatšeng.”—Genese 1:28.

Ka masoabi, morero oa Molimo o ile oa hanyetsoa ke lengeloi le ikhohomosang le ileng la bitsoa Satane. O ne a labalabela hore Adama le Eva ba mo rapele. Satane o ile a etsa hore ho bonahale eka ke noha e buang ’me a ba susumelletsa hore ba fetohele puso ea Molimo. (Genese 3:1-6; Tšenolo 12:9) Ruri e tlameha ebe ho hloka teboho ha bona ho ile ha utloisa ’Mōpi bohloko. Empa bofetoheli ba bona ha boa ka ba fetola morero oa Jehova Molimo ka lefatše. O re: “Lentsoe la ka le tsoang molomong oa ka le . . . ke ke la khutlela ho ’na le se na litholoana, empa ka sebele le tla etsa seo ke se thabelang, ’me ka sebele le tla atleha ho seo ke le rometseng sona.”—Esaia 55:11.

Ho na le lebaka le utloahalang la hore ebe Jehova o lumeletse bofetoheli ba Satane hore bo tsoele pele ho tla fihlela kajeno. Nakong ena, batho ba khonne ho leka mefuta e sa tšoaneng ea puso, ’me liphello li bontšitse hore ho itokolla ho Molimo hoo Satane a ho khothalletsang, ke ho hamela letanteng.a—Jeremia 10:23.

Ho sa tsotellehe seo, ho theosa le lilemo tse likete tse fetileng, Molimo o ’nile a hlohonolofatsa batho ba itseng ba lokileng. Hape ka Bibeleng o tlalehile liphello tsa ho mamela Molimo kapa ho furalla puso ea hae. Ho phaella moo, Jehova o entse lintho tse hlollang tseo re ka ruang molemo ho tsona nakong e tlang. Ka lerato o file batho Mopholosi ha a romela Mora oa hae ea ratoang, Jesu Kreste, hore a tl’o re ruta tsela e molemohali ea ho phela le hore a tele bophelo ba hae bakeng sa rōna. (Johanne 3:16) Kaha Jesu o ne a sa tšoanela ho shoa, Molimo o sebelisitse lefu la hae e le tsela e loketseng ea ho rekolla se lahlehetseng Adama le Eva, e leng tšepo ea ho phela ka ho sa feleng paradeiseng ea lefatše lohle.b E le ho finyella seo, Jehova Molimo o thehile ’muso leholimong o tla busa batho bohle, ’me o khethile Mora oa hae, Jesu Kreste ea tsositsoeng, hore e be Morena oa ’Muso oo. Khato ena e tsotehang e tla tiisa hore morero oa Molimo ka lefatše oa phethahala.—Matheu 6:9, 10.

Ka lebaka leo, u ka ba le tšepo e feletseng litšepisong tsena tsa Bibele tse tsotehang: “Baetsi ba bobe ba tla felisoa, empa ba tšepang Jehova ke bona ba tla rua lefatše. Ba lokileng ba tla rua lefatše, ba tla lula ho lona ka ho sa feleng.” “‘Bonang! Tente ea Molimo e ho moloko oa batho, o tla lula le bona, ’me e tla ba batho ba hae. Molimo o tla ba le bona. O tla hlakola meokho eohle mahlong a bona, lefu ha le sa tla hlola le e-ba teng, ’me ho siama kapa ho bokolla kapa bohloko ha li sa tla hlola li e-ba teng. Lintho tsa pele li fetile.’ Ea lutseng teroneng a re: ‘Bona! Ke etsa hore lintho tsohle li be ncha.’”—Pesaleme ea 37:9, 29; Tšenolo 21:3-5.

Bibele ha e Ikhanyetse

Leha ho le joalo, ba bang ba ka ’na ba ipotsa ba re, ‘Litemana tsa Bibele tse sa tsoa qotsoa li lumellana joang le tse reng lefatše le tla fela?’ A re hlahlobeng mehlala e seng mekae. Ho etsa joalo ho tla hlakisa hore Bibele ha e ikhanyetse.

Nako e telele pele bo-rasaense ba hlokomela hore lintho tsohle tse bōpiloeng li ‘ka qetella li senyehile,’ mopesaleme e mong ka Bibeleng o ile a re: “[Molimo] u ile ua rala metheo ea lefatše khale, maholimo ke mosebetsi oa matsoho a hao. Li tla timela, empa u tla ’ne u eme; li tla tsofala kaofela ha tsona feela joaloka seaparo. Feela joaloka liaparo u tla beha ho hong sebakeng sa tsona, ’me li tla qeta nako ea tsona. Empa uena ha u fetohe, ’me lilemo tsa hao li ke ke tsa phethoa.”—Pesaleme ea 102:25-27.

Ha mopesaleme a ne a bua mantsoe ana o ne a sa hanyetse morero oa ka ho sa feleng oa Molimo ka lefatše. Ho e-na le hoo, o ne a bontša phapang pakeng tsa hore Molimo o phela ka ho sa feleng ’me lintho tsohle tseo Molimo a li bōpileng li ka fela. Ha e ne e se ka matla a Molimo a ka ho sa feleng a ho nchafatsa lintho, pōpo eohle—ho akarelletsa le letsatsi le lipolanete tse ling tseo re li hlokang bakeng sa leseli, matla a tsona le ho etsa hore lefatše le tsitse—e ne e tla senyeha ’me e qetelle e timetse. Ka lebaka leo, hoja lefatše la rōna le ne le ka tloheloa feela, le ne le tla “tsofala,” kapa le felle ruri.

Ho na le litemana tse ling ka Mangolong tseo ha u li habanya feela li ka ’nang tsa bonahala li hanyetsana le morero oa Molimo ka lefatše. Ka mohlala, Bibele e re leholimo le lefatše ‘lia feta.’ (Tšenolo 21:1) Ka sebele mantsoe ana ha a hanyetsane le tšepiso ea Jesu e reng: “Ho thaba ba maikutlo a bonolo, kaha ba tla rua lefatše.” (Matheu 5:5) Joale, Bibele e bolela’ng ha e re leholimo le lefatše ‘lia feta’?

Hangata ka Bibeleng lentsoe “lefatše” le sebelisoa ka tsela ea tšoantšetso e bolelang batho. Ka mohlala, hlokomela temana e latelang e reng: “Lefatše lohle la tsoela pele le e-na le puo e le ’ngoe le pokello e le ’ngoe ea mantsoe.” (Genese 11:1) Ho totobetse hore mona “lefatše” le bolela batho ba neng ba phela lefatšeng. Mohlala o mong ke oa Pesaleme ea 96:1, eo ho latela King James Version e reng: “Binelang MORENA, lōna lefatše kaofela.” Ho hlakile hore temaneng ena le tse ling, lentsoe “lefatše” le sebelisitsoe ka tsela ea tšoantšetso e bolelang batho.—Pesaleme ea 96:13.

Ka linako tse ling Bibele e tšoantša babusi ba lefatšeng le maholimo kapa lihloliloeng tse leholimong. Ka mohlala, ho ne ho thoe babusi ba bahatelli ba Babylona ba tšoana le linaleli hobane ba ne ba iphahamisetsa batho ba bang. (Esaia 14:12-14) Joalokaha ho profetiloe, “maholimo” a tšoantšetso a Babylona kapa babusi ba eona, le “lefatše,” e leng batšehetsi ba ’muso oo, li ile tsa fela ka 539 B.C.E. (Esaia 51:6) Sena se ile sa fa Bajuda ba bakileng monyetla oa hore ba khutlele Jerusalema, moo “maholimo a macha,” e leng babusi ba bacha, a neng a busa holim’a “lefatše le lecha,” e leng batho ba lokileng.—Esaia 65:17.

Kamoo ho bonahalang kateng, ha Bibele e re leholimo le lefatše lia ‘feta’ e bolela hore ho tla fela mebuso ea kajeno ea batho e tletseng bobolu hammoho le batšehetsi ba eona ba khopo. (2 Petrose 3:7) Hoo ho tla hleka tsela bakeng sa ’muso o mocha oa Molimo o leholimong o tla tlisetsa batho ba lokileng mahlohonolo, etsoe “ho na le maholimo a macha le lefatše le lecha tseo re li letetseng ho ea ka tšepiso ea [Molimo], ’me ho loka ho tla aha ho tsona.”—2 Petrose 3:13.

Kahoo, u ka ba le tumelo tšepisong ea Molimo ea hore lefatše leo re lulang ho lona le tla hlola ka ho sa feleng. Ho feta moo, Bibele e bolela seo u tlamehang ho se etsa hore u phele nakong eo e thabisang ha lefatše lohle le tla be le fetotsoe paradeise. Jesu o itse: “Sena se bolela bophelo bo sa feleng, ho tsoela pele ba rua tsebo ka uena, Molimo a le mong feela oa ’nete, le ka eo u mo romileng, Jesu Kreste.” (Johanne 17:3) Ke hobane’ng ha u sa ikemisetse ho hlahloba seo Bibele e se rutang mabapi le bokamoso ba lefatše le ba batho? Lipaki Tsa Jehova tsa haeno li tla thabela ho u thusa ho etsa joalo.

[Mongolo o botlaaseng ba leqephe]

[Ntlha e Qolotsoeng e leqepheng la 12]

Bibele e tšepisa hore lefatše leo re lulang ho lona le tla hlola ka ho sa feleng

[Moo Litšoantšo li Nkiloeng Teng leqepheng la]

Background globe: NASA/The Visible Earth (http://visibleearth.nasa.gov/); polar bear: © Bryan and Cherry Alexander Photography