‘Mahlo a Jehova a Khanyang’ a Hlahloba Bohle
“Mahlo a [Jehova] a khanyang a hlahloba bara ba batho.”—PES. 11:4.
1. Ke batho ba mofuta ofe bao re batlang ho ba haufi le bona?
U IKUTLOA joang ka batho ba u ratang e le kannete? Ha ba pate letho ha u ba botsa hore na maikutlo a bona ke afe ka taba e itseng. Ha u hloka thuso, ba u thusa ba sa khanane. Ha u hloka keletso, ba u fa eona ka lerato. (Pes. 141:5; Bagal. 6:1) Na ha u ikutloe u batla ho ba haufi le batho ba joalo? Ka sebele Jehova le Mora oa hae ke batho ba joalo. Ha e le hantle, ba u rata ho feta motho ofe kapa ofe, ebile ho hang ha ba etse sena hobane ho e-na le ntho eo ba e shebileng, ba batla ho u thusa hore u ‘tšoare ka tieo bophelo ba sebele.’—1 Tim. 6:19; Tšen. 3:19.
2. Jehova o rata bahlanka ba hae hakae?
2 Mopesaleme Davida o ile a bolela botebo ba lerato leo Jehova a re ratang ka lona ha a ne a re: “Mahlo a [Jehova] aa bona, mahlo a hae a khanyang a hlahloba bara ba batho.” (Pes. 11:4) Ka sebele, hase feela hore Molimo oa re sheba, empa oa re hlahloba. Davida o ile a boela a ngola: “U lekotse pelo ea ka, u entse tlhahlobo bosiu . . . u tla fumana hore ha kea rera letho.” (Pes. 17:3) Ho hlakile hore Davida o ne a utloisisa botebo ba lerato leo Jehova a neng a mo rata ka lona. O ne a tseba hore o ne a tla utloisa Jehova bohloko le hore o ne a ke ke a Mo khahlisa haeba a ne a sa loantše menahano e fosahetseng kapa haeba a ne a ka ba le pelo e rerang bolotsana. Na u nka Jehova e le motho oa sebele joalokaha Davida a ne a mo nka e le motho oa sebele?
Jehova o Bona Pelo
3. Jehova o bontša joang hore o talima mefokolo ea rōna ka tsela e loketseng?
3 Jehova o thahasella haholo motho ea ka hare—e leng seo re hlileng re leng sona pelong. (Pes. 19:14; 26:2) O bontša lerato ka hore ha a shebe mefokolo e sa reng letho. Ka mohlala, ha Sara, mosali oa Abrahama a ne a sa bolelle lengeloi le neng le iphetotse motho ’nete, ho hlakile hore lengeloi leo le ile la bona hore o ne a tšohile a bile a le lihlong, kahoo le ile la mo khalemela hanyenyane feela. (Gen. 18:12-15) Ha mopatriareka Jobo a ne a “bolela hore moea oa hae o lokile ho e-na le Molimo,” Jehova o ile a ’na a mo hlohonolofatsa, hobane a ne a tseba hore Satane o hlokofalitse Jobo haholo. (Jobo 32:2; 42:12) Ka ho tšoanang, Jehova ha aa ka a khopisoa ke mantsoe a bohloko ao mohlolohali oa Sarepta a ileng a a buela moprofeta Elia. Molimo o ile a utloisisa hore o ne a saretsoe ka lebaka la ho shoeloa ke ngoana oa hae ea mong feela.—1 Mar. 17:8-24.
4, 5. Jehova o ile a bontša mosa joang ha a sebetsana le Abimeleke?
4 Kaha Jehova o hlahloba lipelo, o bontšitse hore le batho ba sa lumelang oa ba nahanela. Nahana kamoo a ileng a sebetsana kateng le Abimeleke, morena oa motse oa Bafilista oa Gerare. Abimeleke, ea neng a sa hlokomele hore Abrahama le Sara e ne e le banyalani, o ile a nka Sara hore e be mosali oa hae. Leha ho le joalo, pele Abimeleke a ka mo ama, Jehova o ile a re ho eena torong: “Le ’na ke tsebile hore u entse sena ka pelo e tšepahalang, ’me ke ne ke u thibela hore u se ke ua ntšiteloa. Ke ka lebaka leo ke sa kang ka u lumella hore u mo ame. Empa joale khutlisa mosali oa monna eo, etsoe ke moprofeta, ’me o tla u etsetsa thapeli. Kahoo u ’ne u phele.”—Gen. 20:1-7.
5 Ka sebele, Jehova a ka be a ile a khahlapetsa Abimeleke, eo e neng e le morapeli oa melimo ea bohata. Empa Molimo o ile a bona hore lekhetlong lena monna enoa o ne a sebetsa litaba ka botšepehi. Ka mosa Jehova o ile a hlokomela sena eaba o bolella morena eo hore na a ka fumana tšoarelo joang e le hore ‘a ’ne a phele.’ Na ha u batle ho rapela Molimo ea joalo?
6. Jesu o ile a etsisa Ntate oa hae ka litsela life?
6 Jesu o ile a etsisa Ntate oa hae ka ho phethahetseng, ka ho sheba lintho tse ntle tseo barutuoa ba hae ba neng ba li etsa le ka ho ikemisetsa ho ba tšoarela liphoso. (Mar. 10:35-45; 14:66-72; Luka 22:31, 32; Joh. 15:15) Maikutlo a Jesu a ne a lumellana le mantsoe a hae a fumanoang ho Johanne 3:17 a reng: “Molimo o rometse Mora oa hae lefatšeng, eseng hore a ahlole lefatše, empa hore lefatše le pholosoe ka eena.” Ka sebele, lerato leo Jehova le Jesu ba re ratang ka lona le tebile ebile ha le fele. Le bontšoa ke takatso ea bona ea hore re fumane bophelo. (Jobo 14:15) Lerato la mofuta ona le bontša hore na ke hobane’ng ha Jehova a re hlahloba, hore na o na le maikutlo afe ka rōna le hore na o etsa’ng ka seo a se bonang.—Bala 1 Johanne 4:8, 19.
Re Hlahlojoa ka Lerato
7. Jehova o re hlahloba ka sepheo sefe?
7 Kahoo, ho fosahetse hakaakang ho nahana hore Jehova ke lepolesa le leholimong le re shebileng ka morero oa hore le re tšoare re sa ntse re etsa sebe! Satane ke eena ea re qosang ebe o re re baikhabi. (Tšen. 12:10) Ebile o bolela hore batho ba na le sepheo se sebe leha ba se na sona! (Jobo 1:9-11; 2:4, 5) Mopesaleme o ile a ngola sena ka Molimo: “Haeba u ne u talima liphoso, Jah, Jehova, ke mang ea neng a ka ema?” (Pes. 130:3) Karabo ke hore, Ha ho le ea mong! (Moek. 7:20) Ho e-na le hoo, Jehova o re talima ka mahlo a mohau le a mosa a motsoali ea tsotellang ea batlang ho sireletsa bana ba hae bao a ba ratang kotsing. Hangata o re hlokomelisa ho se phethahale ha rōna le mefokolo ea rōna e le hore re ka qoba ho intša kotsi.—Pes. 103:10-14; Mat. 26:41.
8. Jehova o ruta le ho laea bahlanka ba hae joang?
8 Lerato la Molimo le bontšoa ka thuto le taeo eo re e fuoang ka Mangolo le ka lijo tsa moea tse fanoang ke “lekhoba le tšepahalang le le masene.” (Mat. 24:45; Baheb. 12:5, 6) Jehova o boetse o re thusa ka phutheho ea Bokreste le ka ‘limpho tsa eona tseo e leng banna.’ (Baef. 4:8) Ho phaella moo, Jehova o re talima e le hore a bone seo re se etsang ka thuto e lerato eo a re fang eona joaloka ntate, ’me o ikemiselitse ho re thusa ho ea pele. Pesaleme ea 32:8 e re: “Ke tla etsa hore u be le temohisiso ’me ke u rupele ka tsela eo u lokelang ho tsamaea ka eona. Ke tla u fa keletso leihlo la ka le le holim’a hao.” Kahoo, ke habohlokoa hakaakang hore kamehla re mamele Jehova! Re lokela ho ikokobelletsa eena, re hlokomela hore ke Mosuoe le Ntate oa rōna ea lerato.—Bala Matheu 18:4.
9. Ke mekhoa efe eo re lokelang ho e qoba, hona hobane’ng?
9 Ka lehlakoreng le leng, e se eka le ka mohla re ke ke ra thatafatsoa ke boikhohomoso, ho hloka tumelo, kapa “matla a thetsang a sebe.” (Baheb. 3:13; Jak. 4:6) Hangata, mekhoa ena e qala ha motho a hlaolela menahano kapa litakatso tse mpe. Qetellong a ka ba a hana le keletso e loketseng ea Mangolo. Ho hobe le ho feta, a ka ba a thatafala maikutlong kapa litseleng tsa hae tse mpe hoo a iketsang sera sa Molimo—e leng boemo bo tšosang e le kannete! (Liprov. 1:22-31) Nahana ka mohlala oa Kaine, letsibolo la Adama le Eva.
Jehova o Bona Tsohle Ebile o Nka Khato e Loketseng
10. Ke hobane’ng ha Jehova a sa ka a amohela nyehelo ea Kaine, hona Kaine o ile a etsa’ng ka mor’a moo?
10 Ha Kaine le Abele ba ne ba tlisitse linyehelo tsa bona ho Jehova, Jehova ha aa ka a sheba feela limpho tsa bona empa o ile a boela a sheba le sepheo sa e mong le e mong oa bona. Ka lebaka leo, Molimo o ile a bontša hore o amohela nyehelo ea Abele, e neng e etsoa ka tumelo, empa a bontša hore ha a amohele nyehelo ea Kaine, eo ka tsela e itseng e neng e bontša ho hloka tumelo. (Gen. 4:4, 5; Baheb. 11:4) Ho e-na le hore a ithute ho hong ketsahalong eo ’me a fetole maikutlo a hae, Kaine o ile a halefela mor’abo haholo.—Gen. 4:6.
11. Kaine o ile a bontša joang hore pelo ea hae e bolotsana, ’me re ithuta eng tabeng ee?
11 Jehova o ile a hlokomela hore maikutlo a Kaine a ne a le kotsi eaba o bua le Kaine ka mosa, a mo bontša hore haeba a ka etsa se molemo, o ne a tla ba le lebaka la ho phahamisoa. Ka masoabi, Kaine o ile a hlokomoloha keletso ea ’Mōpi oa hae, eaba o bolaea mor’abo. Se ileng sa boela sa bontša hore Kaine o ne a le pelo e mpe ke tsela eo ka eona ka ho tella a ileng a araba potso ea Molimo e reng: “Moen’ao Abele o hokae?” Kaine o ile a araba ka bohale a re: “Ha ke tsebe. Na ke ’na mohlokomeli oa moen’a ka?” (Gen. 4:7-9) Pelo e ka ba bolotsana hakaakang—e ka ba ea etsa hore re hlokomolohe keletso e tobileng ea Molimo! (Jer. 17:9) Ka lebaka leo a re ithuteng litlalehong tsa mofuta oo ’me re potlakele ho hana menahano le litakatso tse fosahetseng. (Bala Jakobo 1:14, 15.) Haeba re fuoa keletso ea Mangolo, e se eka re ka e ananela ’me re e nke e le bopaki ba hore Jehova oa re rata.
Ha ho Sebe se ka Pateloang Jehova
12. Jehova o sebetsa liphoso joang?
12 Ba bang ba ka ’na ba nahana hore haeba ho se motho ea ba bonang ha ba etsa phoso, ba ke ke ba tšoaroa. (Pes. 19:12) Ha e le hantle, ha ho sebe se ka pateloang Jehova. “Lintho tsohle li hlobotse ’me li pepesitsoe phatlalatsa mahlong a eo re nang le boikarabello ho eena.” (Baheb. 4:13) Jehova ke Moahloli ea hlahlobang seo hantle-ntle e leng sona sepheo seo re etsang lintho ka sona, ’me tsela eo a sebetsang liphoso ka eona e bontša toka e phethahetseng. Ke “Molimo ea mohau le ea mosa, ea liehang ho halefa le ea tletseng mosa o lerato le ’nete.” Leha ho le joalo, ba sa bakeng, “ho hang a ke ke a [ba] lokolla kotlong” ha ba “tloaela ho etsa sebe ka boomo” kapa ba le bolotsana ebile ba loha mano. (Ex. 34:6, 7; Baheb. 10:26) ’Nete ena e ile ea bonahala tseleng eo ka eona Jehova a ileng a sebetsana le Akane hammoho le Ananiase le Safira.
13. Ho bonahala monahano o fosahetseng o ile oa susumetsa Akane joang hore a etse bobe?
13 Akane o ile a tlōla taelo ea Molimo ka mokhoa o totobetseng ka ho nka lintho tse neng li hapiloe motseng oa Jeriko eaba o li pata ka tenteng ea hae, mohlomong a tlatsitsoe ke lelapa la hae. Ha sebe sa hae se pepesoa, Akane o ile a hlokomela hore na seo a neng a se entse se ne se le sebe hakae, hobane o ile a re: “Ke sitetsoe Jehova.” (Josh. 7:20) Joaloka Kaine, Akane o ne a le pelo e mpe. Ntho e ka sehloohong e ileng ea etsa hore Akane a be bolotsana, ke meharo. Kaha lintho tse hapiloeng Jeriko e ne e le tsa Jehova, ha e le hantle Akane o ile a utsoetsa Molimo, ’me sena se ile sa etsa hore eena le lelapa la hae ba bolaoe.—Josh. 7:25.
14, 15. Ke hobane’ng ha Ananiase le Safira ba ne ba lokeloa ke kahlolo ea Molimo, ’me re ithuta eng ho see?
14 Ananiase le mosali oa hae Safira e ne e le litho tsa phutheho ea pele ea Bokreste e neng e le Jerusalema. Ka mor’a Pentekonta ea 33 C.E., ho ile ha thehoa letlōle bakeng sa ho hlokomela balumeli ba bacha ba tsoang libakeng tse hōle ba neng ba setse Jerusalema. Letlōle leo le ne le tšehetsoa ka menehelo ea boithatelo. Ananiase o ile a rekisa tšimo eaba o nehela karolo ea chelete eo letlōleng lena. Leha ho le joalo, Ananiase o ile a etsa eka o ne a nehelane ka chelete eohle, ’me mosali oa hae o ne a tseba hantle ka sena. Ha ho pelaelo hore banyalani bana ba ne ba batla ho hlomphuoa ka tsela e khethehileng ka phuthehong. Empa ketso ea bona e ne e le bolotsana. Ka mohlolo, Jehova o ile a senolela moapostola Petrose bolotsana boo, ’me eena o ile a toba Ananiase ka phoso ea hae. Kapele ka mor’a moo, Ananiase o ile a oela fatše eaba oa shoa. Nakoana ka mor’a moo, Safira le eena o ile a shoa.—Lik. 5:1-11.
15 Ananiase le Safira ba ne ba sa oeloa ke bofokoli ba nakoana feela. Ba ile ba rera bolotsana ba ba ba bua leshano ka sepheo sa ho thetsa baapostola. Ho hobe le ho feta, ba ile ba ‘etsetsa Molimo le moea o halalelang bolotsana.’ Tsela eo Jehova a ileng a sebetsa litaba ka eona e bontša ka ho hlakileng hore o ikemiselitse ho sireletsa phutheho ho baikaketsi. Ka sebele, “ke ntho e tšabehang ho oela matsohong a Molimo ea phelang”!—Baheb. 10:31.
Lula U Tšepahala ka Linako Tsohle
16. (a) Satane o leka ho silafatsa batho ba Molimo joang? (b) Diabolose o sebelisa mekhoa efe ho silafatsa batho sebakeng sa heno?
16 Satane o etsa sohle seo a ka se khonang ho re silafatsa le ho etsa hore re se ke ra amoheloa ke Jehova. (Tšen. 12:12, 17) Merero e mebe ea Diabolose e bonahala ka ho hlaka lefatšeng lena le hlanyetsang pefo le boitšoaro bo bobe ba ho kopanela liphate. Hona joale litšoantšo tse litšila tse tsosang takatso li ka bonoa habonolo ka lik’homphieutha kapa ka lisebelisoa tse ling tsa elektronike. E se eka le ka mohla re ke ke ra inehela litlhaselong tsa Satane. Ho e-na le hoo, e se eka maikutlo a rōna a ka tšoana le a mopesaleme Davida, ea ileng a ngola a re: “Ke tla etsa ka masene ka tsela e se nang molato. . . . Ke tla tsamaea botšepehing ba pelo ea ka ka har’a ntlo ea ka.”—Pes. 101:2.
17. (a) Ke hobane’ng ha qetellong Jehova a senola libe tse patiloeng? (b) Re lokela ho ikemisetsa ho etsa’ng?
17 Kajeno, Jehova ha a senole sebe se tebileng le bolotsana ka mohlolo joalokaha a ’nile a etsa ka linako tse ling nakong e fetileng. Leha ho le joalo, o bona lintho tsohle ’me ka nako ea hae le ka tsela ea hae o senola lintho tse patiloeng. Pauluse o ile a re: “Libe tsa batho ba bang li bonahala phatlalatsa, li lebisa ka ho toba kahlolong, empa ha e le batho ba bang libe tsa bona le tsona li bonahala hamorao.” (1 Tim. 5:24) Lerato ke lona le ka sehloohong le ka etsang hore Jehova a senole liketso tse mpe. O rata phutheho ’me o batla ho sireletsa bohloeki ba eona. Ho feta moo, o hauhela ba ileng ba etsa sebe empa hona joale ba bakile e le kannete. (Liprov. 28:13) Kahoo a re loaneleng ho lula re sebeletsa Molimo ka pelo e feletseng ’me re qobe lintho tsohle tse silafatsang.
Lula U E-na le Pelo e Feletseng
18. Morena Davida o ne a batla hore mora oa hae a ikutloe joang ka Molimo?
18 Morena Davida o ile a re ho mora oa hae Solomone: “Tseba Molimo oa ntat’ao ’me u mo sebeletse ka pelo e feletseng le ka moea o thabileng; etsoe Jehova o phenya lipelo tsohle, ’me o lemoha tšekamelo e ’ngoe le e ’ngoe ea menahano.” (1 Likron. 28:9) Davida o ne a batla hore mora oa hae a se a ke a lumela feela ho Molimo. O ne a batla hore Solomone a ananele botebo ba lerato leo Jehova a ratang bahlanka ba Hae ka lona. Na u ananela Jehova ka tsela eo?
19, 20. Ho ea ka Pesaleme ea 19:7-11, Davida o ile a thusoa ke eng hore a atamele ho Molimo, ’me re ka etsisa Davida joang?
19 Jehova oa tseba hore batho ba nang le maikutlo a nepahetseng ba tla huleloa ho eena le hore ha ba tseba makhabane a hae seo se tla etsa hore ba atamele ho eena. Kahoo, Jehova o batla hore re mo tsebe re be re tsebe le botho ba hae bo babatsehang. Re ka etsa seo joang? Ka ho ithuta Lentsoe la hae le ka ho bona kamoo a re hlohonolofatsang kateng bophelong ba rōna.—Liprov. 10:22; Joh. 14:9.
20 Na u bala Bibele letsatsi le leng le le leng u hlokomela hore e tsoa ho Molimo, ebile u rapella thuso ea hore u sebelise seo u se balang? Na u bona bohlokoa ba ho phela ka melao-motheo ea Bibele? (Bala Pesaleme ea 19:7-11.) Haeba ho joalo, tumelo ea hao le lerato leo u ratang Jehova ka lona li tla tsoela pele ho hōla. Le eena o tla ’ne a atamele ho uena kamehla, a tsamaee le uena joalokaha eka le tšoarane ka matsoho. (Esa. 42:6; Jak. 4:8) Ka sebele, Jehova o tla bontša hore oa u rata ka ho u hlohonolofatsa le ka ho u sireletsa moeeng ha u ntse u tsamaea tseleng e patisaneng e isang bophelong.—Pes. 91:1, 2; Mat. 7:13, 14.
U ka Araba Joang?
• Ke hobane’ng ha Jehova a re hlahloba?
• Ke eng e ileng ea etsa hore batho ba itseng e be lira tsa Molimo?
• Re ka bontša joang hore Jehova ke motho oa sebele ho rōna?
• Re ka lula re sebeletsa Molimo ka pelo e feletseng joang?
[Setšoantšo se leqepheng la 4]
Jehova o re talima joang joaloka motsoali ea tsotellang?
[Setšoantšo se leqepheng la 5]
Re ithuta eng mohlaleng oa Ananiase?
[Setšoantšo se leqepheng la 6]
Ke eng e tla re thusa hore re lule re sebeletsa Jehova ka pelo e feletseng?