Baholo​—Na le Tla Khatholla “Moea o Khathetseng”?

Angela,a e leng morali’abo rōna oa lesoha ea lilemo li ka holimonyana ho 30, ha aa phutholoha. O lebeletse baholo. Ebe ba tl’o re’ng ho eena? Ke ’nete hore o lofile liboka ka makhetlo a mangatanyana, empa o lula a khathetse haholo ka lebaka la ho sebeletsa batho ba hōlileng letsatsi lohle. Ho phaella linthong tse mo tšoenyang letsatsi le letsatsi, o boetse o khathatsehile haholo ka bophelo ba ’mè oa hae.

Haeba e ne e le uena ea etetseng Angela, u ne u tla khothatsa “moea [oo] o khathetseng” joang? (Jer. 31:25) Empa pele u mo etela u ne u tla itokisetsa hore u etse leeto la bolisa le khothatsang joang?

Ka linako tse ling, kaofela ha rōna rea khathala ka lebaka la mosebetsi oa rōna oa boipheliso kapa ka lebaka la mesebetsi ea rōna ea Bokreste. Ka mohlala, moprofeta Daniele o ile a “ikutloa [a] khathetse” ha a ne a fuoa pono eo a neng a sa e utloisise. (Dan. 8:27) O ile a thusoa ke hore lengeloi Gabriele le hlahe ho eena. Lenģosa la Molimo le ile la thusa Daniele hore a utloisise pono eo, la mo tiisetsa hore Jehova o utloile thapelo ea hae la ba la mo bolella hore e ntse e le “ea khahlehang haholo.” (Dan. 9:21-23) Ketsahalong e ’ngoe, mantsoe a khethiloeng ka hloko a ileng a buuoa ke lengeloi le leng a ile a matlafatsa moprofeta eo ea neng a khathetse.—Dan. 10:19.

Ka tsela e tšoanang, pele u etela molumeli-’moho le uena eo e ka ’nang eaba o khathetse kapa o nyahame, iphe nako ea ho nahana ka boemo boo a leng ho bona. Ke mathata afe ao a thulanang le ’ona? E ka ’na eaba mathata aa a mo khathatsa ka tsela efe? O na le makhabane afe? Richard eo e seng e bile moholo ka lilemo tse fetang 20 o re: “Ke bua haholo ka makhabane a bara le barali beso.” O phaella ka ho re: “Pele ke ba etela, ke nahanisisa ka maemo a bona, ’me seo se etsa hore ho be bonolo hore ke ba khothatse ho latela litlhoko tsa bona.” Haeba u tla etsa leeto la bolisa le moholo e mong, e ka ba hantle hore le buisane ka boemo boo mora kapa morali’abo rōna a leng ho bona.

E ka ’na eaba u oa lumela hore ho hlabisa lihlong hore motho a bue ka hore na o ikutloa joang. Ho tea mohlala: Mor’eno a ka ’na a se ke a phutholoha ha a bua le baholo ba mo etetseng. Joale u ka etsa’ng hore a phutholohe? Ho bososela ka mofuthu le ho bua mantsoe a khothatsang ho ka ’na ha mo thusa. Hangata, Michael, eo e seng e bile moholo ka lilemo tse ka holimo ho 40, o qala leeto la hae la bolisa ka mantsoe ana: “Ua tseba ke’ng, e ’ngoe ea litlotla tseo baholo ba nang le tsona ke ea ho etela bara le barali babo rōna malapeng a bona e le hore re ka ba tseba haholoanyane. Kahoo, ke ne ke tatetse hore letsatsi lena le fihle.”

E ka ba hantle hore le qalise leeto la lōna la bolisa ka thapelo e tsoang botebong ba pelo. Lithapelong tsa hae, moapostola Pauluse o ile a bua haholo ka tumelo, lerato le mamello ea barab’abo. (1 Bathes. 1:2, 3) Ha u bua ka hore na u ikutloa joang ka makhabane a bara le barali beno, ha e le hantle u lokisa pelo ea hao le ea bona hore le tsebe ho ba le puisano e khothatsang. Mantsoe a hao le ’ona a ka ba thoba pelo. Ray, e leng moholo e mong ea nang le boiphihlelo o re: “Ka linako tse ling re lebala lintho tse ntle tseo re li finyellang. Kahoo, ha motho e mong a re hopotsa tsona, seo se ka re khatholla moeeng.”

Joaloka Pauluse, u ka ‘fana ka mpho ea moea’ ka hore u bue le motho ka mantsoe a tsoang Bibeleng, le haeba e le ka temana e le ’ngoe feela. (Bar. 1:11) Ka mohlala, mor’abo rōna ea tepelletseng maikutlo a ka ’na a nka hore ha a na thuso, eaba joaloka mopesaleme o itšoantša le ‘lekuka le mosing’ le omeletseng. (Pes. 119:83, 176) Ka mor’a hore ka bokhutšoanyane u hlalosetse motho temana eo, u ka ’na ua mo bolella hore u kholisehile hore ‘ha aa lebala’ litaelo tsa Molimo.

Ka tsela e tšoanang, mohlomong papiso ea chelete ea tšepe ea drakema e lahlehileng e ka ’na ea ama morali’abo rōna ea hlahlatheletseng hōle le phutheho kapa eo e bang o ne a se a khoehlisitse moeeng. (Luka 15:8-10) E ka ’na eaba drakema e lahlehileng e ne e le karolo ea sefaha sa bohlokoa se entsoeng ka lichelete tsa silevera tse ngata. Haeba u tšohla papiso eo le eena, u ka ’na ua mo thusa hore a hlokomele hore ke setho sa bohlokoa sa phutheho ea Bokreste. Ka mor’a hore u tšohle taba eo le eena, u ka ’na ua totobatsa taba ea hore Jehova o oa mo tsotella kaha ke e mong oa linku tsa hae tse nyenyane.

Hangata balumeli-’moho le rōna ba rata ho ntša maikutlo a bona ka litaba tse hlahang ka Bibeleng. Kahoo, e se ke ea e-ba uena feela ea buang! Ka mor’a ho bala temana e buang ka boemo ba bona, u ka totobatsa lentsoe kapa poleloana ea sehlooho ebe u ba kōpa hore ba ke ba e hlalose. Ka mohlala, ka mor’a ho bala 2 Bakorinthe 4:16, moholo a ka ’na a botsa mohoeletsi, “Na uena ho na le litsela tseo ka tsona Jehova a ’nileng a u nchafatsa?” Ha u etsa lintho ka tsela ena, seo se ka ’na sa etsa hore ‘le khothatsane’ e le kannete.—Bar. 1:12.

U ka ’na ua boela ua khatholla molumeli-’moho le uena ka hore u buisane le eena ka motho e mong eo ho buuoang ka eena ka Bibeleng, ea fetileng maemong a tšoanang le a hae. Motho ea ikutloang a nyahame a ka ’na a utloisisa maemo a Anna kapa Epafroditase, bao ka linako tse ling ba neng ba nyahama empa Molimo a lula a ba nka e le batho ba bohlokoa. (1 Sam. 1:9-11, 20; Bafil. 2:25-30) E ka ba hantle hore le buisane ka mehlala e meng ea batho bao ho buoang ka bona ka Bibeleng haeba maemo a le lumella.

U ka bontša hore u tsotella bara le barali beno e le kannete ka hore u tsoele pele u ba etela le nakong e tlang. (Lik. 15:36) Ha u khaohana le motho, e ka ba hantle hore le etse litokisetso tsa hore le sebetse tšimo hammoho. Ha Bernard, eo e leng moholo ea nang le boiphihlelo, a kopana le mora kapa morali’abo rōna eo a neng a sa tsoa mo etela, ka masene o bua ka keletso eo a neng a mo file eona ka hore a re, “Ak’u mpolelle, na e u thusitse?” Ha u bontša hore u tsotella motho ka tsela eo, u tla khona ho hlokomela hore na o hloka thuso e ’ngoe kapa che.

Ho feta neng kapa neng, bara le barali babo rōna ba lokela ho ikutloa hore baa tsotelloa, baa utloisisoa ebile baa ratoa. (1 Bathes. 5:11) Ka lebaka leo, pele u etsa leeto la bolisa, iphe nako ea hore u nahane ka boemo boo mora kapa morali’eno a leng ho bona. Rapela ka taba eo. Khetha mangolo a loketseng. Kahoo, u tla fumana mantsoe a nepahetseng a ho khatholla “moea o khathetseng”!