“Ke Fetohile Lintho Tsohle ho Batho ba Mefuta Eohle”

KA NAKO eo ke ne ke se ntse ke rata ho ithuta Bibele. ’Mè o ne a atisa ho tla le lingoliloeng tse thehiloeng Bibeleng, ’me ke ne ke thabela ho li bala, haholo-holo tse nang le litšoantšo. Ntate o ne a sa batle ha ’Mè a bua le ’na ka lintho tseo a ithutileng tsona. Leha ho le joalo, ke ne ke batla ho tseba, ’me ke botsa lipotso, kahoo re ne re ithuta le ’Mè ha Ntate a le sieo lapeng. Le ’na ke ile ka etsa qeto ea ho inehela ho Jehova. Eaba ke kolobetsoa ka 1943 motseng oa Blackpool Engelane, ke le lilemo li leshome.

Ho tloha ka nako eo, ’na le ’Mè re ile ra qalella ho ea tšimong kamehla. Re ne re sebelisa keramafono ho bolella batho molaetsa oa Bibele. Kaha e ne e ka ba boima ba 4.5 kg, e ne e nkimela.

Ha ke le lilemo li 14 ke ne ke batla ho qeta lihora tse 100 ka khoeli ke ruta batho Bibele. ’Mè o ile a re ke bue le mohlanka ho baena (eo hona joale a seng a bitsoa molebeli oa potoloho). Molebeli oa potoloho o ile a nkhothaletsa hore ke ithute mosebetsi o itseng bakeng sa hore ke itlhokomele ha ke ntse ke etsa mosebetsi oa ho ruta batho Bibele. Kahoo ke ile ka etsa joalo. Ka mor’a lilemo tse peli, ke ile ka buisana le molebeli e mong oa potoloho ka hore ke etse mosebetsi oa ho ruta batho Bibele. O ile a re ke tsoele pele.

Kahoo, ka April 1949 re ile ra tloha lapeng moo re neng re hirile teng, ’me ra rekisa thepa eaba re fallela Middleton, haufi le Manchester, moo re ileng ra qala mosebetsi oa ho ruta batho Bibele. Ka mor’a likhoeli tse ’nè, ke ile ka qalella ho sebetsa le mor’abo rōna e mong. Ofisi ea lekala e ile ea re romela phuthehong e sa tsoa thehoa motseng oa Irlam. Eaba ’Mè o sebetsa le morali’abo rōna e mong phuthehong e’ngoe.

Le hoja ke ne ke le lilemo li 17, ’na le mor’abo rōna re ile ra fuoa boikarabelo ba ho ruta ka phuthehong. Hamorao, ke ile ka kōptjoa ho ea sebeletsa phuthehong ea Buxton e neng e na le litho tse fokolang ka palo kahoo ba hloka thuso. Ke ne ke nka hore ho etsa mosebetsi ona ke sa le monyenyane ho tla nthusa ho etsa likabelo tse ling ha ke ntse ke hōla.

Ka 1951, ke ile ka etsa kōpo ea ho ea Sekolong sa Bibele sa Gileade sa Watchtower. Empa ka December 1952, ke ile ka bitsetsoa ho kena sesoleng. Ke ile ka hana ho ba lesole, eaba lekhotla le nkahlolela ho hlola likhoeli tse tšeletseng teronkong. Ha ke ntse ke le teronkong ke ile ka fumana memo ea ho ba sehlopheng sa bo22 sa Sekolo sa Gileade. Ka July 1953, ke ile ka ea New York ka sekepe.

Ha ke le moo, ke ile ka ea Kopanong ea Mokhatlo oa Lefatše le Lecha ea 1953. Ka mor’a moo, ke ile ka fetela sekolong South Lansing, New York. Kaha ke ne ke sa tsoa lokolloa teronkong, ke ne ke se na chelete. Ha ke qeta ho theoha terene ke ne ke tlameha ho palama bese ho ea South Lansing, kahoo ka kōpa lisente tse 25 ho baeti ba bang.

Sekolo sa Gileade se re thusitse ho ba “lintho tsohle ho batho ba mefuta eohle,” mosebetsing oa boromuoa. (1 Bakor. 9:22) ’Na, Paul Bruun le Raymond Leach, re ile ra abeloa ho ea sebeletsa Philippines. Re ile ra tlameha ho emela li-visa likhoeli tse seng kae. Ka mor’a moo ra nka leeto la khoeli le libeke tse peli re le leoatleng, ra tšela leoatle la Mediterranean, la Suez Canal, India, Malaysia ra ba ra fihla Hong Kong. Re fihlile Manila ka November 19, 1954.

Re ile ra tlameha ho tloaela batho ba moo le ho ithuta setso le puo ea bona. Re ile ra abeloa ho ea sebeletsa phuthehong e toropong ea Quezon moo batho ba bangata ba buang puo ea Senyesemane. Kahoo ka mor’a likhoeli tse tšeletseng, re ne re tseba mantsoe a seng makae feela a Setagalog. Kabelo ea rōna e latelang e ne e tla re thusa boemong boo.

Ka May 1955 ha re tsoa tšimong le Leach, re ile ra fumana mangolo ka kamoreng ea rōna. A ne a bontša hore re abetsoe ho sebeletsa re le balebeli ba potoloho. Ke ne ke le lilemo li 22 feela, empa kabelo ena e ile ea nthusa hore ke be “lintho tsohle ho batho ba mefuta eohle” ka litsela tse sa tšoaneng.

Mohlala, ke ile ka fana ka puo ea ka ea pele ea phatlalatsa ke le molebeli potoloho ka pel’a lebenkele. Ha ke ntse ke etela liphutheho ke ile ka fana ka lipuo litenteng, limmarakeng le liholong tsa sechaba. Ka le leng motseng oa San Pablo City pula e ile ea ntšitisa ho fana ka puo ea phatlalatsa ’me ra etsa qeto ea ho e fana Holong ea ’Muso ea Lipaki Tsa Jehova.

Re ne re amoheloa malapeng a balumeli-’moho le rōna. Le hoja matlo a bona a ne a le manyenyane, a ne a le makhethe. Ke ne ke robala fatše ’meteng. Ke ile ka tlameha ho fumana bohlale ba ho hlapela ka ntle kaha ho ne ho se moo nka hlapelang. Re ne re palama libese kapa liketsoana ha re ea lihlekehlekeng. Ke ne ke etsa mosebetsi oa boboleli ke se na koloi.

Ho sebetsa tšimo le ho etela liphutheho, ho nthusitse ho ithuta puo ea Setagalog. Ke ithutile Setagalog ka ho mamela barab’abo rōna tšimong le libokeng. Barab’abo rōna ba ne ba batla ho nthusa ’me ke thabela tsela eo ba ’mamellang ka eona le likeletso tsa bona.

Ha nako e ntse e feta, likabelo tse ncha li ile tsa ntlama hore ke etse liphetoho tse itseng. Ka 1956, ha Mor’abo rōna Knorr a le teng, ke ile ka fuoa kabelo ea ho sebetsa lefapheng la litaba kopanong. Kaha ke ne ke sa tsebe letho ka kabelo ena, barab’abo rōna ba ile ba nthusa. Ka mor’a likhoeli tse ’maloa, mor’abo rōna Frederick Franz o ile a tla kopanong a tsoa ntlo-khōlō ea Lipaki Tsa Jehova. Ke ile ka ithuta ho sebelisana le batho ho mor’abo rōna Franz ha ke ntse ke le molebeli oa kopano. Barab’abo rōna ba ne ba thabile ha ba bona mor’abo rōna Franz a fana ka puo a apere liaparo tsa setso tsa Philippines.

Ke ile ka tlameha ho etsa liphetoho hape ha ke ne ke abeloa ho sebeletsa ke le molebeli oa setereke. Ka nako eo re ne re bapalla batho filimi ea The Happiness of the New World Society libakeng tsa sechaba. Bothata e ne e le hore likokoanyana li ne li bitsoa ke khanya ea mochine o bapalang lifilimi ebe li kena ka har’a oona. Li ne li re bakela mosebetsi oa hore re hloekise mochine ka mor’a hore re bapale filimi. Le hoja ho ne ho le thata ho hlophisa lifilimi tsena, ho ne ho thabisa ho bona kamoo barab’abo rōna ba li thabelang kateng.

Baruti ba Mak’hatholike ba ne ba susumelletsa ba boholong pusong hore ba hane ho re fa litokomane tsa molao tse re lumellang ho tšoara likopano. Ba ne ba bile ba etsa lerata ka ho letsa tšepe ea kereke ha puo ea phatlalatsa e tšoaretsoe haufi le kereke ea bona. Ho ntse ho le joalo, batho ba bangata ba lulang libakeng tseo, e ile ea e-ba Lipaki Tsa Jehova.

Ka 1959 ke ile ka fumana kabelo ea ho sebeletsa ofising ea lekala ea Lipaki Tsa Jehova. Ke ile ka ithuta lintho tse ngata moo. Ha nako e ntse e e-ea ke ile ka kōptjoa ho etela linaheng tse ling. Ha ke le naheng e ’ngoe ke ile ka kopana le morali’abo rōna ea neng a sebeletsa Thailand e le moromuoa. O ile a nkhahla ’me hamorao ra nyalana. Re qetile lilemo tse 51 re sebeletsa Jehova hammoho re thabile.

Ka kakaretso ke etetse batho ba Jehova linaheng tse 33. Ke leboha haholo hore ebe likabelo tseo ke bileng le tsona li nthusitse ho sebetsana le batho ba fapaneng. Maeto ana a nthusitse ho bona hore Jehova o rata batho ba mefuta eohle.—Lik. 10:34, 35.

Ho bile monate ho sebetsa le barab’abo rōna ba Philippines. Palo ea bahoeletsi e eketsehile ka makhetlo a leshome ho tloha ka nako eo. ’Na le Janet re ntse re sebeletsa ofising ea lekala ea Philippines e motseng oa Quezon. Esita le ka mor’a lilemo tse 60 ke sebeletsa Jehova linaheng tse ling, ke ntse ke tlameha ho ithuta ho tsamaisana le maemo. Ka lebaka la liphetoho tse ntseng li etsoa ka mokhatlong oa Jehova hona joale, re lula re ikemiselitse ho fetoha ha ho hlokahala.

Kaha re ikemiselitse ho amohela eng kapa eng eo e leng thato ea Jehova, re phela bophelo bo monate. Re boetse re leka ho etsa liphetoho tse hlokahalang hore re sebeletse barab’abo rōna hantle. Re ikemiselitse ho ba “lintho tsohle ho batho ba mefuta eohle” ho ea ka thato ea Jehova.