Bontša Hore U Thahasella Batho ba Bang—Ka ho ba Mosa
1 “Jehova o mosa.” (Pes. 145:8) Le hoja e le ’Musi oa Bokahohle, ha a sebelisana le batho ba sa phethahalang o mosa, oa ba nahanela ebile o ba fa seriti. (Gen. 13:14; 19:18-21, 29) Re ka etsa hore litaba tse molemo li ipiletse ka ho etsisa Molimo oa rōna ea mosa. (Bakol. 4:6) Sena ha se akarelletse feela mekhoa e metle le ho bua ka tsela e bontšang tlhompho.
2 Ha re le Tšebeletsong ea Ntlo le Ntlo: Ho thoe’ng haeba re etela mong’a ntlo a se na nako kapa a phathahane hoo a sitoang ho buisana le rōna? Ho molemo hore re hlokomele maemo a joalo ’me re khutsufatse nehelano ea rōna kapa re ithaopele ho khutla ka nako e ’ngoe. Ka mosa re qoba ho qobella batho ho amohela lingoliloeng haeba ba li hana. Ho nahanela ba bang ho tla boela ho re susumelletse ho hlompha thepa ea bona, joaloka ho koala liheke le menyako le ka ho koetlisa bana ba rōna hore ba etse se tšoanang. Re lokela ho etsa bonnete ba hore lingoliloeng life kapa life tseo re li sieang moo ho se nang batho teng ha li pepeneneng. Ka sebele, mosa o tla re susumelletsa ho tšoara ba bang ka tsela eo re neng re ka rata hore ba re tšoare ka eona.—Luka 6:31.
3 Ha re le Tšebeletsong ea Seterateng: Ha re le tšebeletsong ea seterateng, re ka bontša hore re nahanela ba bang ka hore re se ke ra tlala tsela kapa ra etsa seqhoqho ka pel’a mabenkele. Re tla nahanela maemo a ba bang, re batle ho bua le ba nang le nako e seng kae ho e-na le ho leka ho bua le bao ho hlakileng hore ba potlakile. Ka linako tse ling, ho ka ’na ha hlokahala hore re phahamise lentsoe e le hore re utloahale ha re le sebakeng se lerata. Empa re lokela ho etsa seo ka tsela e nang le seriti, re sa meme mahlo a batho.—Mat. 12:19.
4 Ha re Paka ka Thelefono: Ho nahanela ba bang ho tla re susumelletsa ho paka ka thelefono sebakeng se khutsitseng. Re bontša hore re mekhoa e metle ha re bolella batho mabitso a rōna hang-hang ’me re ba hlalosetsa lebaka la rōna la ho letsa. Ho buela ka har’a thelefono le ho bua ka lentsoe le monate ho tla hulela ba bang moqoqong oa Mangolo o hahang. (1 Bakor. 14:8, 9) Ka ho ba mosa, ho nahanela batho le ho ba fa seriti ka litsela tsena tse sa tšoaneng, re etsisa Jehova, Molimo oa rōna ea mosa.