Ho Rata Jehova ho ka U Susumeletsa Hore U kolobetsoe

1-2. Ho ea ka Liketso 8:​27-31, 35-38, ke’ng e ileng ea susumetsa leqhalaha la Moethiopia hore le kolobetsoe?

NA U batla ho kolobetsoa ’me u be morutuoa oa Kreste? Ho ba le kananelo le ho rata Jehova ho ile ha susumeletsa batho ba bangata hore ba etse qeto eo. Nahana ka leqhalaha le neng le sebeletsa mofumahali oa Ethiopia.

² Le ile la hlokomela hore le tlameha ho kolobetsoa ka mor’a hore le ithute Mangolo. (Bala Liketso 8:​27-31, 35-38.) Le ile la susumetsoa ke’ng? Le ne le nka Lentsoe la Molimo e le la bohlokoa kaha le ne le ntse le bala litemana tse ling tsa buka ea Esaia ha le palame kariki le tloha Jerusalema le ea Ethiopia. Ha Filipi a ntse a bua le lona, le ile la ananela haholo lintho tseo Jesu a le etselitseng tsona. Empa ke hobane’ng ha leqhalaha leo le ile la ea Jerusalema? Ke hobane le ne le se le rata Jehova. Re tseba joang? Le ne le tsoa rapela Jehova Jerusalema. Ho bonahala monna eo a ile tlohela bolumeli ba hae ba pele ’me ea e-ba karolo ea sechaba se neng se rapela Molimo oa ’Nete. Kaha o ne a rata Jehova, o ile a etsa qeto e ’ngoe ea bohlokoa e leng ho kolobetsoa le ho ba morutuoa oa Kreste.​—Mat. 28:19.

 3. Motho a ka sitisoa ke’ng hore a kolobetsoe? (Sheba lebokose le reng Ke’ng se ka Pelong ea Hao?”)

³ Ho rata Jehova ho ka u susumeletsa hore u kolobetsoe. Empa lerato le ka boela la u thibela hore u kolobetsoe. Joang? Nahana ka mehlala ena. E ka ’na eaba u rata metsoalle ea hao le beng ka uena bao e seng Lipaki ’me mohlomong u tšoha hore ha u ka kolobetsoa ba ka ’na ba u hloea. (Mat. 10:​37) Kapa mohlomong ho na le lintho tseo u li ratang tseo u tsebang hore Jehova o li hloile, kahoo e ka ’na eaba ho thata hore u li tlohele. (Pes. 97:​10) Hape, e ka ’na eaba u hotse u keteka mekete ea bolumeli ba bohata. Mohlomong ho na le lintho tse monate tseo u li hopolang tse neng li etsoa meketeng eo. Ka lebaka leo, u ka ’na oa thatafalloa ho tlohela ho etsa lintho tse sa khahliseng Jehova. (1 Bakor. 10:​20, 21) Joale, u lokela ho etsa qeto ea hore na ntho ea bohlokoa ka ho fetisisa ho uena ke efe.

 4. Ke lebaka lefe le ka sehloohong le ka etsang hore u kolobetsoe?

⁴ Ho na le lintho tse ngata tseo u ka li ananelang le ho li rata. Ka mohlala, e ka ’na eaba le pele u ithuta le Lipaki u ne u se u ntse u rata Bibele haholo. Hape, e ka ’na eaba u ne u se u ntse u rata Jesu. Joale, kaha u se u tsebana le Lipaki Tsa Jehova, e ka ’na eaba u batla ho qeta nako e ngata le tsona. Empa ho rata lintho tsena feela ha se hona ho tla etsa hore u batle ho inehela ho Jehova le ho kolobetsoa. Lebaka le ka sehloohong le ka u susumeletsang hore u kolobetsoe, ke hobane u rata Jehova. Ha u rata Jehova ho feta ntho le ha e le efe, u ke ke oa lumella eng kapa eng kapa motho le ha e le ofe ho u sitisa ho mo sebeletsa. Ho mo rata ho tla u susumeletsa hore u kolobetsoe hape u tla lula u mo tšepahalla le ka mor’a hore u kolobetsoe.

 5. Re tl’o hlahloba lipotso life?

⁵ Jesu o ile a re re lokela ho rata Jehova ka lipelo tsohle tsa rona, moea, kelello le matla ’ohle a rona. (Mar. 12:​30) U ka ithuta ho rata Jehova le ho mo hlompha ka tsela e tebileng joalo joang? Ha re nahana ka hore na Jehova o re rata hakae, taba eo e tla etsa hore le rona re mo rate. (1 Joh. 4:​19) Ha u se u rata Jehova ka tsela eo, ke lintho life tseo u tla susumeletseha ho li etsa?b

 6. Baroma 1:​20 e bua ka tsela efe eo re ka ithutang Jehova ka eona?

⁶ Ithute ka Jehova popong. (Bala Baroma 1:​20; Tšen. 4:​11) Nahana ka limela le liphoofolo tseo Jehova a li entseng ’me u bone hore na li bontša joang hore o bohlale. Ithute ka tsela e hlollang eo ’mele oa hao o entsoeng ka eona. (Pes. 139:​14) Hape, ha u nahana ka hore na Jehova o bopile letsatsi le e-na le matla a maholo hakae, u nahana hore linaleli tse ling tse libilione tsona li na le matla a makae?c (Esa. 40:​26) Ha u nahana ka lintho tseo Jehova a li bopileng, u tla mo hlompha le ho feta. Ho tseba hore Jehova o na le matla hape o bohlale ke tse ling tsa lintho tse ka u thusang hore u be motsoalle oa hae. Empa ntho e ka u thusang hore u mo rate le ho feta ke hore u tsebe haholoanyane ka eena.

 7. E le hore u rate Jehova ka ho teba, u lokela ho kholiseha ka’ng?

⁷ U lokela ho kholiseha hore Jehova o u rata haholo. Na ho thata ho uena ho lumela hore ’Mopi oa leholimo le lefatše oa u tseba le hore oa u tsotella? Haeba ho joalo, u hopole hore Jehova ha a “hole le e mong le e mong oa rona.” (Lik. 17:​26-28) “O phenya lipelo tsohle” ’me o u tšepisa hore “haeba u mo batla, o tla etsa hore u mo fumane.” (1 Likron. 28:9) Ha e le hantle, lebaka leo ka lona u ithutang Bibele ka lona ke hobane Jehova ‘o u hutse.’ (Jer. 31:3) Ha u lula u ananela lintho tsohle tseo Jehova a u etselitseng tsona, u tla mo rata le ho feta.

 8. U ka bontša joang hore u ananela taba ea hore Jehova oa u rata?

⁸ Tsela e ’ngoe eo u ka bontšang ka eona hore u ananela hore ebe Jehova oa u rata, ke ka ho bua le eena ka thapelo. U tla mo rata haholo haeba u mo bolella mathata a hao leha u mo leboha ka lintho tsohle tseo a u etselitseng tsona. Athe setsoalle sa lona sona se tla tiea le ho feta ha u bona kamoo a arabelang lithapelo tsa hao kateng. (Pes. 116:1) Hape u tla kholiseha hore oa u utloisisa. Leha ho le joalo, e le hore u atamele haufi le Jehova, u lokela ho tseba hore na o nahana joang, o rata’ng le hore na ha a rate’ng le hore na ke hobane’ng ha a etsa lintho tse itseng. Hape u lokela ho tseba hore na o lebeletse’ng ho uena. Ka hona, ntho feela e ka u thusang hore u tsebe lintho tseo, ke hore u ithute Lentsoe la hae Bibele.

 9. U ka bontša joang hore u nka Bibele e le bohlokoa?

⁹ Ithute ho nka Lentsoe la Molimo e le la bohlokoa. Ke Bibele feela e buang ’nete ka Jehova le ka merero ea hae ka batho. U bontša hore u nka Bibele e le ea bohlokoa ka hore u e bale letsatsi le letsatsi, u lokisetse thuto le hore u etse lintho tsohle tseo u ithutileng tsona. (Pes. 119:​97, 99; Joh. 17:​17) Na u na le nako eo u ipehetseng eona ea ho ithuta Bibele? Na u bala Bibele letsatsi le leng le le leng?

10. Ke ntho efe e ’ngoe eo Bibele e ikhethang ka eona?

¹⁰ Ntho e ’ngoe eo Bibele e ikhethang ka eona ke hore e na le litlaleho tse ngotsoeng ke batho ba ileng ba bona Jesu. Ke eona feela buka e hlalosang hore na Jesu o u etselitse’ng. Ha u ntse u ithuta ka lintho tseo Jesu a ileng a li bua le ho li etsa, u tla batla ho ba motsoalle oa hae.

11. U tla thusoa ke’ng hore u rate Jehova?

¹¹ Ithute ho rata Jesu ’me u tla rata Jehova le ho feta. Hobane’ng? Hobane Jesu o khona ho etsisa makhabane a Ntate oa hae hantle. (Joh. 14:9) Kahoo, ha u ntse u ithuta ka Jesu haholoanyane, u tla utloisisa Jehova u be u mo rate haholo. Nahana kamoo Jesu a neng a le mosa kateng ho batho bao batho ba bang ba neng ba ba khella fatše hobane ba futsanehile, ba kula hape ba sena mang oe! Hape, ak’u nahane ka keletso eo a u fileng eona le hore na bophelo ba hao bo tla ntlafala joang haeba u e mamela.​—Mat. 5:​1-11; 7:​24-27.

12. Ha u ntse u ithuta ka Jesu, u ka ’na oa susumeletseha ho etsa’ng?

¹² U tla rata Jesu le ho feta ha u nahana ka sehlabelo seo a ileng a fana ka sona e le hore libe tsa rona li ka tšoareloa. (Mat. 20:​28) Ha u utloisisa hore Jesu o ne a ikemiselitse ho u shoela, u tla susumeletseha hore u bake ebe u kopa Jehova hore a u tšoarele. (Lik. 3:​19, 20; 1 Joh. 1:9) Hape ha u ntse u tsoela pele ho ithuta ka Jehova le Jesu, u tla batla ho ba le batho ba ba ratang.

13. Jehova o u file eng?

¹³ Ithute ho rata batho ba ratang Jehova. Beng ka uena le metsoalle ea hao ea pele ba ka ’na ba se ke ba utloisisa hore na ke hobane’ng ha u batla ho inehela ho Jehova. Ba ka ’na ba u hlorisa. Jehova o tla u thusa ka hore a u fe lelapa le lecha ka phuthehong. Haeba u etsa sohle seo u ka se khonang hore u be haufi le lelapa lena, le tla u rata le ho u tšehetsa. (Mar. 10:​29, 30; Baheb. 10:​24, 25) Mohlomong ha nako e ntse e-ea, beng ka uena le bona ba ka sebeletsa Jehova le ho mamela melao ea hae.​—1 Pet. 2:12.

14. 1 Johanne 5:​3, e re’ng ka litaelo tsa Jehova?

¹⁴ Ithute ho hlompha melao ea Jehova le ho phela ka eona. E ka ’na eaba pele u tseba Jehova u ne u iphelela ka melao ea hao empa hona joale oa hlokomela hore melao ea Jehova e molemo. (Pes. 1:​1-3; bala 1 Johanne 5:3.) Ak’u nahane ka melao eo Jehova a e fileng banna, basali le bana. (Baef. 5:​22–6:4) Na lelapa la hao le thabile hobane u mamela melao eo? Na ho mamela melao ea Jehova ha u khetha metsoalle, ho u thusitse hore bophelo ba hao bo fetohe? Na u thabile? (Liprov. 13:​20; 1 Bakor. 15:​33) Ho ka etsahala hore ebe u arabile lipotso tsena ka E!

15. U lokela ho etsa’ng haeba u hloleha ho mamela melao ea Molimo?

¹⁵ Ka linako tse ling, u ka ’na oa thatafalloa ke ho etsa lintho tseo u ithutileng tsona ka Bibeleng. Ke kahoo Jehova a sebelisang mokhatlo oa hae ho u fa lingoliloeng tse hlalosang Bibele tse tla u thusa ho tseba se nepahetseng le se fosahetseng. (Baheb. 5:​13, 14) Ha u bala le ho ithuta lingoliloeng tsena, u tla bona hore na li u tsoela molemo hakae ’me u ka ’na oa batla ho ba karolo ea mokhatlo oa Jehova.

16. Jehova o hlophisitse batho ba hae joang?

¹⁶ Ithute ho rata mokhatlo oa Jehova le ho o tšehetsa. Jehova o entse hore ho be le liphutheho ’me Jesu ke hlooho ea tsona. (Baef. 1:​22; 5:​23) Jesu o khethile sehlopha se senyenyane sa batho ba tlotsitsoeng hore se etelle pele mosebetsing oo a batlang hore o etsoe mehleng ena. Jesu o itse sehlopha sena ke “lekhoba le tšepahalang le le masene” ’me boikarabelo ba sona ke ho u thusa hore u be le kamano e ntle le Molimo le ho e sireletsa. (Mat. 24:​45-47) Tsela e ’ngoe eo lekhoba le tšepahalang le etsang bonnete ba hore u sireletsehile ka eona, ke ka hore ho be le banna ba khethoang hore e be baholo ba tla u hlokomela le ho u tataisa. (Esa. 32:​1, 2; Baheb. 13:​17; 1 Pet. 5:​2, 3) Baholo ba ikemiselitse ho etsa sohle seo ba ka se khonang ho u tšelisa le ho u thusa hore u be le kamano e haufi-ufi le Jehova. Empa ntho e ’ngoe ea bohlokoa ka ho fetisisa eo ba e etsang ke ho u thusa hore rute u batho ba bang ka Jehova.​—Baef. 4:​11-13.

17. Ho ea ka Baroma 10:​10, 13, 14, ke hobane’ng ha re ruta batho ba bang ka Jehova?

¹⁷ Thusa batho ba bang ho ithuta ho rata Jehova. Jesu o boleletse barutuoa ba hae hore ba rute batho ba bang ka Jehova. (Mat. 28:​19, 20) Re mamela taelo eo hobane re tlameha ho e mamela. Ha u ntse u rata Jehova haholoanyane u tla ikutloa joaloka moapostola Petrose le Johanne ba ileng ba re: “Re ke ke ra khaotsa ho bua ka lintho tseo re li boneng le tseo re li utloileng.” (Lik. 4:​20) Re tla thaba haholo haeba re ka thusa motho e mong hore a rate Jehova. Nahana feela hore na Filipi o ile thaba hakaakang ha a thusitse leqhalaha la Moethiopia hore le tsebe Mangolo le hore le kolobetsoe. Ha u etsisa Filipi hape u mamela taelo ea Jesu ea ho ruta batho Bibele, u bontša hore u batla ho ba Paki ea Jehova. (Bala Baroma 10:​10, 13, 14.) Ha u se u le boemong boo, u tla tšoana le Moethiopia eane ea ileng a botsa: “Ke eng se nthibelang ho kolobetsoa?”​—Lik. 8:36.

18. Re tl’o hlahloba’ng sehloohong se latelang?

¹⁸ U tla be u etsa qeto ea bohlokoa ka ho fetisisa bophelong ba hao haeba u batla ho kolobetsoa. Kaha ke qeto ea bohlokoa haholo, u lokela ho nahanisisa ka hore na ha e le hantle ho kolobetsoa ho bolela’ng. U lokela ho tseba’ng ka kolobetso? U lokela ho etsa’ng pele u kolobetsoa le ka mor’a teng? Lipotso tsena li tla arajoa sehloohong se latelang.