Mefuta ea Matlooa Mehleng ea Bibele

Barutuoa ba bang ba Jesu ba ne ba iphelisa ka ho tšoasa litlhapi. (Mar. 1:​16-20) Ba ne ba sebelisa matlooa ho tšoasa litlhapi Leoatleng la Galilea.

Matlooa a ne a etsoa ka likhoele tse lohiloeng e le hore ho sale masoba a lekaneng bakeng sa ho tšoasa litlhapi. Masoba a matlooa a ne a itšetleha ka hore na batšoasi ba batla ho tšoasa litlhapi tse kholo kapa tse nyenyane. Hangata matlooa a manyenyane a ne a e-na le majoe e le hore a khone ho teba ka har’a metsi. Matlooa a maholo a huloang ’ona a ne a e-na le lintho tse boima ka tlase le mapolanka a manyenyane ka holimo a etsang hore karolo e ’ngoe e phaphamale ka holim’a metsi.

Matlooa a ne a le turu. A ne a ka taboloa ke majoe a botlaseng ba leoatle kapa ke ho tšoasa litlhapi tse ngata haholo. (Luka 5:6) Bibele e bua ka Jakobo le Johanne “ba lokisa matlooa a bona.” Mohlomong ba ne ba sebelisa nalete le khareng. (Mat. 4:21) Ho ka etsahala hore batšoasi ba litlhapi ba ne ba lokisa matlooa kamehla ha ba qeta ho tšoasa litlhapi. Luka o boetse o hlalosa batšoasi ba litlhapi “ba hlatsoa matlooa” a bona e le hore ba tlose seretse. (Luka 5:2) Ka mor’a moo, batšoasi ba litlhapi ba ne ba aneha matlooa a bona e le hore a ome. E ka ’na eaba ba ne ba etsa joalo e le hore a se ke a bola.—Ezek. 47:10.

Jesu o ile a bitsa banna ba neng tloaetse ho tšoasa litlhapi ba sebelisa matlooa hore e tl’o ba “batšoasi ba batho.”