Tsoela Pele ho Koetlisa Letsoalo la Hao e le Hore u Thabise Jehova

1. Letsoalo ke eng, hona le ka re thusa joang hore re thabise Jehova?

JEHOVA o re file bokhoni ba ho tseba hore na maikutlo a rona le liketso tsa rona li nepahetse kapa che. Bokhoni boo ke ho ba le letsoalo, ’me ke mpho e babatsehang e tsoang ho Molimo. (Bar. 2:​14, 15) Ha letsoalo la rona le susumetsoa ke lintho tse ntle, le ka re thusa hore re etse liqeto tse tla thabisa Jehova. Empa re etsa hantle haeba re hopola hore letsoalo la rona le ka susumetsoa ke lintho tse ngata tse mpe.

2. Matsoalo a rona a ka re susumelletsa ho etsa eng?

² Letsoalo le koetlisitsoeng hantle ha le re thuse feela ho tseba hore na lintho tseo re li entseng li ntle kapa li mpe. Empa le boetse le re susumelletsa hore re qobe ho etsa lintho tse mpe ’me re “khomarele se molemo.” (Bar. 12:9) Sehloohong sena, re tl’o hlahloba hore na matsoalo a rona a ka re sireletsa joang. Re tla boela re hlahlobe lintho tse ka susumetsang matsoalo a rona.

LETSOALO LA HAO LE KA U SIRELETSA

3, 4. (a) Letsoalo le tšoana le alamo e nkhellang mosi joang, hona le fapana le eona joang? (Sheba setšoantšo.) (b) Fana ka mohlala o bontšang hore na letsoalo le koetlisitsoeng ka Bibele le ka re sireletsa joang.

³ Letsoalo le ka tšoantšoa le alamo e nkhellang mosi. Empa li boetse li fapane haholo. Joaloka letsoalo, alamo e nkhellang mosi e ka re hlokomelisa kotsi. Empa e lla feela ka mor’a hore mosi o fihle ho eona. Ka nako eo ho ka etsahala hore ebe mollo o se o bakile tšenyo. Letsoalo le koetlisitsoeng ka Bibele le sebetsa hamolemo le ho feta hobane le ka re lemosa le pele re etsa ntho ’me re senya kamano ea rona le Jehova. Letsoalo le ka re hlokomelisa likotsi tse ka bang teng ’me la re sireletsa e le hore re se ke ra etsa lintho tse fosahetseng tse ka etsang hore re qetelle re entse sebe se tebileng.

⁴ Nahana ka mohlala ona. Mor’abo rona e mocha o fallela sebakeng se seng. Hoa utloahala hore o tla batla ho etsa metsoalle e mecha moo. Ho na le bacha ba lekanang le eena phuthehong ea moo. Bacha bao ba mo memela ’mokeng ’me o lumela ho ea. Leha ho le joalo, ha a se a le ’mokeng oa hlokomela hore ho na le ba bang ba sa hlompheng melao ea Jehova e amanang le boitšoaro le tšebeliso ea tahi. Na o tla batla ho etsa setsoalle le bacha bao ba nang le mathata? A ke ke a etsa joalo. Letsoalo la hae le se le mo lemositse ’me o tla mamela temoso eo. Temoso eo e tšoana le alamo ’me ea mo sireletsa hore a se ke a etsa lintho tse ka ’nang tsa etsa hore a qetelle a entse sebe se tebileng.—Jak. 1:​14, 15.

5, 6. Ke eng e entseng hore Adama le Eva ba hlolehe ho mamela Jehova?

⁵ Maemong a mang, Jehova o re bolella ka ho toba hore na ke eng e nepahetseng le e fosahetseng. (Esa. 33:22) Ke sona seo a ileng a se etsa ka Adama le Eva. Molimo o ile a ba bolella hore ho fosahetse hore ba je litholoana tsa sefate sa tsebo ea botle le bobe. (Gen. 2:17) Ha e le hantle, o ile a ba laela hore ba se ke ba tšoara sefate seo le ho se tšoara. (Gen. 3:3) Kahoo, ha noha e bolella Eva hore ho ka ba molemo hore a se ke a mamela Jehova, o ile a khetha ho iphapanyetsa letsoalo la hae. O ne a tseba hore ho fosahetse ho ja tholoana eo. A ka be a ile a hana ha noha e leka ho mo susumetsa. Ho fapana le hoo, Eva o ile a itumella ho susumetsoa hampe eaba o siteloa Molimo.

⁶ Ho thoe’ng ka Adama? Ha aa ka a thetsoa ke noha. (1 Tim. 2:14) O ne a lokela ho mamela letsoalo la hae, a mamele Jehova ho sa tsotellehe hore na Eva o entse’ng. Ho e-na le hoo, o ile a etsa ntho eo a tsebang hantle hore e fosahetse eaba o ja tholoana ea sefate sa tsebo ea botle le bobe. Kahoo, ka lebaka la ho se mamele ha batsoali ba rona ba pele, “sebe se ile sa kena lefatšeng . . . lefu la namela ho batho bohle hobane kaofela ba ne ba entse sebe.” (Bar. 5:12) Re ka ithuta ho hong mohlaleng oa bona o mobe. E le hore re se ke ra etsa sebe, re lokela ho mamela matsoalo a rona.

TSEBA HORE NA THATO EA JEHOVA KE EFE

7. Re ka ithuta eng keletsong e hlahang ho Baefese 5:​15-17?

⁷ Maemong a mangata Jehova o re bolella ka ho toba hore na ke eng e nepahetseng le e fosahetseng, joalokaha a ile a etsa ka Adama le Eva. Leha ho le joalo, maemong a mang ha ho na molao oa Bibele o tobileng o re bolellang hore na re etse’ng. Kahoo, re hloka ho ‘lula re utloisisa hore na thato ea Jehova ke efe.’ (Bala Baefese 5:​15-17.) Liqeto tsa rona li ka thabisa Jehova kapa tsa mo utloisa bohloko. Matsoalo a rona a ka re thusa ho tseba hore na thato ea Jehova ke efe le ho etsa lintho tumellanong le eona.

8. Ke lintho life tse ka etsang hore Bakreste ba babeli ba etse liqeto tse fapaneng ka letsoalo le khutsitseng le hoja ba le boemong bo tšoanang?

⁸ Ke eng e ka re thusang ho etsa liqeto maemong ao ho se nang molao oa Bibele o tobileng? Maemong a joalo, Bakreste ba lokela ho sebelisa matsoalo a bona a koetlisitsoeng ka Bibele. Hangata ba lokela ho nahana ka lintho tse ngata, joaloka sepheo sa bona, boikemisetso ba bona le tsela eo ho etsoang lintho ka eona sebakeng seo ba lulang ho sona. Bakreste ba babeli ba boemong bo tšoanang ba ka etsa liqeto tse fapaneng. Leha ho le joalo, haeba liqeto tsa bona li lumellana le melao-motheo ea Bibele, bobeli ba bona ba ka etsa lintho ka letsoalo le khutsitseng ’me ba thabisa Jehova.

9. Maemong a mabeli a fapaneng moo ho otlanngoang likhalase, mantsoe a hlahang ho Bagalata 6:4 a ka sebelisoa joang? (Sheba litšoantšo.)

⁹ Nahana ka maemo a latelang. Bakreste ba babeli ba matla tumelong ba sebetsang libakeng tse sa tšoaneng, ba mengoa meketeng ea mosebetsing. Ha ba le moo, baokameli ba bona ba kopa basebetsi hore ba otlanye likhalase. Bobeli ba bona ba phela sebakeng seo ho nkoang e le mokhoa o motle ho otlanya likhalase liketsahalong tse joalo. Boemong bo bong, mor’abo rona o lumela ho otlanya likhalase le ba bang hobane a elelloa hore ke ho keteka katleho ea k’hamphani ea bona. Boemong bo bong teng, mor’abo rona e mong oa hana. Hobane’ng? Hobane mantsoe a mookameli oa hae a kenyelletsa litaba tsa lipolotiki. Mor’abo rona o tšaba hore a se ke a tloha a nka lehlakore. Sepheo sa bara bana ba bo rona ba babeli ke ho thabisa Jehova ka ho etsa lintho tumellanong le thato ea hae.—Bala Bagalata 6:4.

ITHUTE HO ETSA LIQETO TSE NEPAHETSENG

10, 11. Ho ea ka Baheberu 5:​13, 14, “lijo tse tiileng” li ka thusa Mokreste joang hore a koetlise letsoalo la hae?

¹⁰ Ho Baheberu 5:​13, 14, ho na le lipoleloana tse amanang le ho koetlisa letsoalo. (E bale.) Le hoja lentsoe “letsoalo” le sa hlahe litemaneng tseo, rea utloisisa hore sepheo sa litemana tseo ke ho re thusa hore re koetlise bokhoni ba rona ba “ho khetholla se nepahetseng ho se fosahetseng.” Oo ke oona mosebetsi oa letsoalo. E le hore re koetlise matsoalo a rona, re hloka “lijo tse tiileng.” Seo se bolela’ng?

¹¹ “Lijo tse tiileng” ke linnete tse tebileng tse utloisisoang ke “batho ba holileng kelellong.” (1 Bakor. 2:​14, 15) Li akarelletsa melao-motheo ea Bibele. Ha ho se na molao oa Bibele o tobileng boemong bo itseng, Mokreste a ka nahana ka melao-motheo e amehang ’me a khona ho etsa qeto e thabisang Jehova.—Liprov. 2:​4, 5.

12. Poleloana “batho ba holileng kelellong” le “ho sebelisa” tse ho Baheberu 5:14 li bolela eng?

¹² “Batho ba holileng kelellong” ke batho ba koetlisitseng matsoalo a bona ka melao-motheo ea Bibele. Kaha ba utloisisa botho ba Jehova le tsela eo a nahanang ka eona, ba ka khona hore ba lemohe hore na liketso tsa bona li ka ’na tsa ama Jehova joang. Ba itloaetsa ho nahana ka melao-motheo ea Bibele nako le nako ha ba etsa qeto. Kahoo, ba koetlisitse likelello tsa bona ka ho li sebelisa e le hore ba khetholle se nepahetseng ho se fosahetseng.

E-BA HLOKOLOSI KA LINTHO TSE KA AMANG LETSOALO LA HAO HAMPE

13. Ho tla etsahala eng haeba letsoalo la rona le sa koetlisoa?

¹³ Letsoalo le hloka ho koetlisoa. Haeba re sa koetlise matsoalo a rona ka melao-motheo ea Bibele, ho na le ntho e ’ngoe e tla a susumetsa. (1 Tim. 4:​1, 2) Letsoalo le ka susumetsoa ke lintho tse kang litumelo tsa bolumeli tsa bohata, khethollo le litakatso tse fosahetseng. (Esa. 5:20) Le ka boela la angoa ke mekhoa eo re e futsitseng kapa eo re ithutileng eona e kang meharo, boikhohomoso le ho icheba borona. Ho ekelletsa moo, haeba re re ntho e nepahetse kapa e fosahetse re ipapisitse le lintho tsena, matsoalo a rona a tla re lahla.

14. (a) E ka ’na eaba ke eng e ileng ea susumetsa Adama le Eva hore ba etse lintho tse khahlanong le matsoalo a bona? (b) Fana ka mehlala ea batho ba ileng ba hloleha ho koetlisetsa matsoalo a bona hore ba khahlise Jehova. (Sheba lebokose le reng “Ba Ile ba Hloleha ho Koetlisa Matsoalo a Bona.”)

¹⁴ Tabeng ea Eva, ho bonahala eka o ile a lumella meharo le boikhohomoso hore li foufatse pono ea hae ea hore na ke mang ea nang le tokelo ea ho khetha se nepahetseng le se fosahetseng. O ne a sa khotsofalla lintho tseo Jehova a mo fileng tsona. O ne a batla ho tšoana le Molimo. Ha e le Adama eena, o ile a icheba boeena ’me a nka ho ba le Eva ho le bohlokoa ho feta ho khahlisa Jehova. Bibele e na le litlaleho tsa batho ba neng ba tseba Jehova hantle, empa ba lumella hore matsoalo a bona a susumetsoe ke meharo, boikhohomoso kapa ho icheba bobona.

15. Ke eng hape e ka lematsang matsoalo a rona, hona re khothalletsoa hore re etse eng?

¹⁵ Matsoalo a rona a ka boela a senngoa ke litloaelo tse mpe. (1 Bakor. 15:33) Batho ba suthetseng hole le Molimo le ba se nang kutloelo-bohloko ba ka ba kotsi ho batho ba batlang ho etsa se nepahetseng. Ha se feela Bibele e re khothalletsang hore re qobe ho tsamaea le batho ba phelang feela ho ea ka “menahano ea bona e se nang thuso” le bao “likelello tsa bona li [leng] lefifing.” (Baef. 4:​17-19) Ka lebaka leo, re etsa hantle ha re ba ‘furalla.’—2 Tim. 3:​1-5.

LUMELLA JEHOVA HO KOETLISA LETSOALO LA HAO

16. Matsoalo a rona a ka re thusa haholo boemong bofe e le hore re thabise Jehova? (Sheba lebokose le reng “Tsela eo u Lokelang ho Sebelisa Letsoalo la Hao ka Eona.”)

¹⁶ Le hoja matsoalo a rona a sa phethahala, a ka re thusa hore re thabise Jehova. A ka re thusa haholo likarolong tseo ho se nang molao o tobileng o tsoang ka Lentsoeng la Molimo. (1 Bakor. 10:31) Empa ke letsoalo le koetlisitsoeng ka melao-motheo ea Mangolo feela le tla sebetsa hantle. Kahoo, letsoalo le joalo le tla re thusa ho etsa lintho hantle ’me re thabise Jehova.

17. Ho ea ka Baroma 12:​2, Jehova o re koetlisa joang?

¹⁷ Jehova a ka re ruta hore re nahane joaloka eena. A ka re thusa hore re fetole tsela eo re nahanang ka eona, haeba re mo lumella hore a re koetlise. (Esa. 64:8; bala Baroma 12:2.) Bibele e na le litlaleho tse ka re koetlisang ka ho re ruta hore na Jehova o ile a sebelisana joang le batho ba hae ka lilemo-lemo. (2 Tim. 3:16) Ho thabisang le ho feta ke hore re ka ithuta tsela eo Jehova a nahanang ka eona ka hore re ithute tsela eo Jesu a neng a ruta ka eona le mohlala oo a re behetseng oona.—1 Bakor. 2:16.

18. Re lokela ho etsa eng e le hore re lule re thabile, re atlehile ebile re e-na le “letsoalo le khutsitseng”?

¹⁸ Re ka koetlisa matsoalo a rona ka hore re qobe lintho tse ka re susumetsang hampe. Re ka koetlisa bokhoni ba rona ba ho khetholla se nepahetseng ho se fosahetseng ka hore re ithute Lentsoe la Molimo. (Pes. 1:​1-3) Qetellong, re tla thaba re be re atlehe ha re ntse re sebeletsa Jehova “ka letsoalo le khutsitseng.”—2 Tim. 1:3.