Sebelisa Melao-motheo ea Bibele ho Koetlisa Letsoalo la Hao

1, 2. (a) Adama le Eva ba ile ba fuoa mpho efe? (b) Ba ka be ba ile ba bontša joang hore ba ananela mpho eo?

LIPHOOFOLO li etsa lintho li sa nahane. Mechine e ka etsoa hore e sebetse ka tsela e itseng. Empa batho bona ha ba tšoane le liphoofolo le mechine. Re bopiloe re e-na le mpho e ikhethang eo Bakreste ba ’nete ba e nkang e le ea bohlokoa. Mpho eo ke bolokolohi ba ho ikhethela le ho iketsetsa liqeto. Bibele e re bolella hore monna oa pele e leng Adama, o ne a entsoe ka setšoantšo sa Molimo. (Gen. 1:​26, 27) Jehova o bopile Adama le mosali oa hae Eva ba e-na le bokhoni ba ho iketsetsa liqeto.

² Jehova ha aa ka a ba fa lethathamo la melao. Ho e-na le hoo, o ile a ba bolella hore ba hlokomele lefatše, ba le tlatse ka bana le hore ba hlomphe litekanyetso tseo a ba fileng tsona. (Gen. 1:28; 2:​16, 17) Ba ka be ba ile ba bontša joang hore ba ananela mpho eo Jehova a ba fileng eona ea bolokolohi ba ho iketsetsa liqeto? Ka lebaka la lintho tsohle tseo Jehova a ileng a ba fa tsona, ba ka be ba ile ba susumelletseha ho mamela melao ea hae hobane ba mo rata ba bile ba batla ho mo thabisa.—Liprov. 23:15.

3. Adama le Eva ba ile ba sebelisa mpho ea bona ea bolokolohi ba ho ikhethela joang?

³ Joalokaha Bibele e bontša, Adama le Eva ha baa ka ba sebelisa bolokolohi ba bona ba ho ikhethela hantle. Ho e-na le hoo, ba ile ba khetha ho se mamele Jehova. Ba ile ba etsa qeto eo hobane e ne e le baithati, eseng hobane ba rata Jehova kapa ba ananela lintho tseo a ba etselitseng tsona. (Gen. 3:​1-7) Le kajeno re ntse re khola litholoana tse bosula ka lebaka la qeto eo ba ileng ba e etsa.—Bar. 5:12.

4. (a) Ho ea ka Bagalata 6:​5, re lokela ho etsa eng? (b) Ke mpho efe e ’ngoe eo re tl’o e hlahloba sehloohong see?

⁴ Kajeno, bophelo ba rona bo rarahane haholo. Re lokela ho etsa liqeto tse ngata letsatsi le letsatsi. (Bala Bagalata 6:5.) Tse ling li bonolo empa tse ling li thata. Re ka etsa liqeto tse thabisang Jehova joang? Re lokela ho qala ka ho amohela hore re hloka thuso ea hae. (Liprov. 16:3; Jer. 10:23) Esita le Jesu ea neng a phethahetse o ne a tseba hore o hloka thuso ea Molimo. (Baheb. 5:7) Ha re sa bua ka batho ba sa phethahalang. A re hlahlobeng mpho e ’ngoe eo Molimo a re fileng eona e tla re thusa hore re etse liqeto tse nepahetseng, e leng letsoalo la rona.

LETSOALO KE ENG?

5. (a) Letsoalo ke eng? (b) Letsoalo le re thusa joang? (Baroma 2:​14, 15)

⁵ Letsoalo ke boikutlo bo ka hare-hare boo re nang le bona ba ho lemoha se nepahetseng le se fosahetseng. Le motho ea sa tsebeng letho ka melao ea Molimo o na le letsoalo. (2 Bakor. 4:2) Letsoalo la rona le tšoana le moahloli ea ka hare ho rona ea ka re qosang kapa a re emela linthong tseo re li nahanang le tseo re li etsang. (Bala Baroma 2:​14, 15.) Le ka re lemosa ha re batla ho etsa lintho tseo re tsebang hore li fosahetse. (1 Sam. 26:​8-11) Le ka boela la re susumelletsa ho etsa lintho tseo re tsebang hore li nepahetse. Ho ba le mpho ea bolokolohi ba ho ikhethela ha ho bolele hore qeto e ’ngoe le e ’ngoe eo re e etsang ea amoheleha ho Jehova. Letsoalo la rona le lokela ho re thusa ho lemoha phapang pakeng tsa qeto e nepahetseng le e fosahetseng.

6. Matsoalo a rona a na le bothata bofe?

⁶ Ka masoabi, matsoalo a rona a na le bothata. Kaha ha rea phethahala, le matsoalo a rona haa phethahala. Tsela eo re holisitsoeng ka eona, setso sa rona le litakatso tsa rona tsa boetsalibe li ka ama matsoalo a rona hampe. Bibele e re matsoalo a rona a ka ‘fokola,’ ‘a silafala’ kapa ‘a cha joalokaha eka a chesitsoe ka tšepe e chesang.’ (1 Bakor. 8:12; Tite 1:15; 1 Tim. 4:2) Letsoalo le joalo le ke ke la re thusa ho etsa liqeto tse nepahetseng. Le tšoana le sekala se robehileng se hlokang ho lokisoa. Kahoo, re lokela ho sebetsa ka thata e le hore re be le matsoalo a koetlisitsoeng hantle. (1 Pet.3:16) Re ka a koetlisa joang?

RE KA KOETLISA MATSOALO A RONA JOANG?

7, 8. (a) Ke eng e tla re thusa ho koetlisa matsoalo a rona? (b) Melao-motheo ea Bibele e re tataisa joang? Fana ka mohlala. (Sheba setšoantšo.)

⁷ Re ka koetlisa matsoalo a rona joang? Re lokela ho bala Bibele kamehla le ho ithuta se nepahetseng le se fosahetseng mahlong a Jehova. Ho ithuta melao ea Molimo ho tla re thusa ho utloisisa tsela eo a nahanang ka eona. Empa joalokaha re ithutile sehloohong se fetileng, melao e ka re thusa maemong a itseng feela. Ke kahoo re lokelang ho batlana le melao-motheo, hobane e re thusa hore re utloisise tsela eo Jehova a nahanang le ho ikutloa ka eona haholoanyane.—Esa. 55:9.

⁸ Bophelo ba rona bo ka tšoantšoa le motho ea tsamaeang lefeelleng. Nahana ka lefeella le se nang tsela kapa matšoao a tsela a re tataisang. Ke ’nete hore re ka khona ho tseba hore na re lokela ho tsamaea re ea hokae e le hore re fihle moo re eang ha re sheba letsatsi kapa linaleli. Empa ’mapa o bontšang lintho tse kang lithaba kapa linoka o ka re thusa hore re kholisehe hore re ntse re tsamaea hantle le ho re thusa ho hlokomela ha re lahleha. Sepheo sa rona bophelong ke ho thabisa Jehova, ke hona moo re eang teng. Bibele e tšoana le ’mapa o re thusang ho tsamaea tseleng e nepahetseng. Melao-motheo ea Bibele e tšoana le lithaba kapa linoka tse ’mapeng oo. Ho etsa lintho tumellanong le melao-motheo eo ho tla re kholisa hore re tla finyella sepheo sa rona.

9. Ho ea ka Baroma 9:​1, ke eng hape e tla re thusa ho koetlisa matsoalo a rona?

⁹ E le hore re koetlise matsoalo a rona ka tsela e nepahetseng, re hloka thuso ea moea o halalelang oa Molimo. (Bala Baroma 9:1.) O ka re thusa ho utloisisa tsela eo Molimo a nahanang ka eona mabapi le taba e itseng. O ka boela oa re susumetsa le ho re fa matla a ho etsa lintho tumellanong le thato ea Jehova. (Bafil. 2:13) Empa re ka fumana thuso ea moea o halalelang oa Jehova joang?

10. Re ka fumana thuso ea moea o halalelang joang? (Luka 11:​10, 13)

¹⁰ Rapella moea o halalelang. (Bala Luka 11:​10, 13.) Re ka kholiseha hore Jehova o tla re fa moea oa hae o halalelang ka seatla se bulehileng. (Joh. 3:34) O o fa batho ba etsang lintho tumellanong le thato ea hae ka seatla se bulehileng. (Liprov. 1:23; Jak. 1:5) Empa re ka thusoa ke’ng hape hore re koetlise matsoalo a rona?

11. (a) Pakane ea rona e ka sehloohong bophelong e lokela ho ba efe? (b) Ke hobane’ng ha re lokela ho etsa bonnete ba hore matsoalo a rona a sebetsa hantle?

¹¹ Lula u leka ho etsa lintho tse thabisang Jehova. (Liprov. 8:​34, 35) Eo e lokela ho ba pakane ea rona e ka sehloohong bophelong. Re ka koetlisa matsoalo a rona haeba re lula re hopola hore pakane ea rona ke ho thabisa Jehova maemong ’ohle ao re kopanang le ’ona bophelong. Haeba re nahana joaloka Jehova re bile re tsotella hore na o ikutloa joang re tla ba le matsoalo a sebetsang hantle. Ha re nahana kamoo bophelo bo leng boima kateng kajeno, rea bona hore na ho bohlokoa hakae ho ba le matsoalo a sebetsang hantle. Hangata re tobana le maemo ao Bibele e sa bueng ka ’ona ka ho toba. Maemo ana a ka akarelletsa boithabiso boo re bo khethang, mosebetsi, thuto kapa metsoalle eo re e khethang. Kahoo, re ka kholiseha joang hore Jehova o amohela liqeto tseo re li etsang mabapi le maemo aa?—2 Bakor. 1:12.

12. Ke eng e tla re thusa ho tseba hore na matsoalo a rona a re thusa ho etsa liqeto tse nepahetseng kapa che? (Baefese 5:10)

¹² Nahanisisa ka seo u se balang Lentsoeng la Molimo. (Pes. 49:3) Ha u bala Bibele, batlana le melao-motheo e tla u thusa ho utloisisa hore na Jehova o nahana joang. (Bala Baefese 5:10.) Ha re ntse re sebetsana le mathata bophelong, re lokela ho batlana le melao-motheo ka Bibeleng e tla re thusa ho tseba hore na matsoalo a rona a re thusa ho etsa liqeto tse nepahetseng kapa che. (Liprov. 2:​4-9, 11-13) Melao-motheo ena e ka re thusa hore re koetlise matsoalo a rona ho etsa bonnete ba hore re etsa lintho tumellanong le thato ea Jehova.—Baheb. 5:14.

13. Re lokela ho qoba ho etsa eng? Fana ka mohlala.

¹³ U se ke oa etsa qeto ebe ke hona u batlang melao-motheo e tla e tšehetsa. Ha re batle ho etsisa Baiseraele ba ileng ba sala Juda ka mor’a hore Jerusalema e felisoe ka selemo sa 607 pele ho mehla ea Jesu. Ba ile ba re ho Jeremia: “E se eka Jehova Molimo oa hao a ka re bolella tsela eo re lokelang ho tsamaea ka eona le hore na re etse’ng.” (Jer. 42:​3-6) Empa ba ne ba se ba entse qeto ea hore na ba tla etsa’ng. Kahoo, ha baa ka ba mamela ha Jehova a ba bolella hore na ba etse’ng ’me ba etsa lintho tumellanong le qeto eo ba neng ba se ba e entse. Liphello tsa qeto ea bona e ile ea e-ba tse bohloko haholo. (Jer. 42:​19-22; 43:​1, 2, 4) Re ithuta’ng? Re ithuta hore pele re etsa qeto, re lokela ho batla melao-motheo e ka Bibeleng e tla re thusa ho tseba tsela eo Jehova a nahanang ka eona ebe re etsa lintho tumellanong le eona.

14. Ke hobane’ng ha re lokela ho sebelisa melao-motheo ea Bibele ha re etsa liqeto?

¹⁴ Etsa liqeto u itšetlehile ka melao-motheo ea Bibele. (Mat. 7:​24-29; Jak. 1:​23-25) Ha re etsa liqeto re itšetlehile ka melao-motheo ea Bibele, re tla be re etsa lintho tumellanong le moea o halalelang. Kahoo, Jehova o tla tsoela pele ho re fa moea oa hae. (Lik. 5:32) Leha ho le joalo, re ka ’na ra “utloisa moea o halalelang . . . bohloko” kapa ra etsa lintho khahlanong le oona haeba re sa o lumelle hore o re tataise. (Baef. 4:30; Esa. 63:10; Lik. 7:51) Jehova a ka ba a o tlosa ho rona. (Pes. 51:11; 1 Bathes. 5:19) Seo se ka re beha kotsing hobane re hloka matla ao Jehova a re fang ’ona a sebelisa moea o halalelang.—Baef. 3:16.

RE KA FUMANA MELAO-MOTHEO EA BIBELE E KA RE THUSANG JOANG?

15, 16. (a) Re ka fumana melao-motheo ea Bibele e ka re thusang joang? (b) Ke melao-motheo efe e ka thusang motho eo u ithutang Bibele le eena ho tlohella ho tsuba?

¹⁵ Sebelisa lithulusi tsa ho ithuta. Pele re ka sebelisa melao-motheo ea Bibele, re lokela ho ba le bokhoni ba ho e fumana ka Mangolong. Ka mohlala, motho eo u ithutang Bibele le eena a ka ’na a se ke a utloisisa hore na ke hobane’ng ha ho tsuba ho le phoso. A ka ’na a re: ‘Ha ho na moo Bibele e buang ka ho tsuba. Joale ke hobane’ng ha ho fosahetse?’ U ka mo thusa joang hore a fumane melao-motheo ea Bibele e ka mo thusang tabeng ee? E ’ngoe ea lithulusi tsa bohlokoa tseo u ka li sebelisang ke buka ea Tataiso ea ho Etsa Lipatlisiso ea Lipaki Tsa Jehova. U ka mo bontša sehlooho se reng “Koae le ho Tsuba.” Tlas’a sehlooho seo, o tla bona tšupiso e mo lebisang ho Molula-Qhooa oa June 1, 2014 o nang le sehlooho se reng “Molimo o Ikutloa Joang ka ho Tsuba Koae?” O tla fumana mangolo le melao-motheo efe ha a ntse a bala sehlooho see?

¹⁶ Nahana ka melao-motheo e mehlano e hlahang sehloohong seo. (1) Ha rea lokela ho ba makhoba a ntho e ka re bolaeang. (Bar. 6:16) (2) Re lokela ho qoba ntho leha e le efe e ka re lematsang. (2 Bakor. 7:1) (3) Jehova o batla hore re mo sebeletse ka moea oohle. (Mat. 22:37) (4) Ha rea lokela ho etsa lintho tse tla utloisa ba bang bohloko. (Mat. 22:39; 1 Bakor. 10:24) (5) Jehova o re fa matla a hore re etse se nepahetseng. (Bafil. 4:13) Le hoja Bibele e sa bue ka ho toba ka ho tsuba, melao-motheo e ka Bibeleng e ka thusa motho eo u ithutang Bibele le eena hore a hlokomele hore na Jehova o ikutloa joang ka ho tsuba.

17. Batho ba ntseng ba hlophisa lenyalo ba ka fumana melao-motheo ea Bibele e ka ba thusang joang?

¹⁷ Bakreste ba ratanang ba ntseng ba hlophisa lenyalo ba ka fumana melao-motheo e ka ba thusang ho etsa liqeto tse nepahetseng joang? Buka ea Tataiso ea ho Etsa Lipatlisiso e ka boela ea thusa. Tlas’a sehlooho se reng “Lenyalo” ho na le litšupiso tsa lihlooho tse tšohlang melao-motheo ea Bibele. Nahana ka melao-motheo e tšeletseng e ka ba thusang. (1) Litlhophiso tsohle li lokela ho isa thoriso ho Jehova. (1 Bakor. 10:​31, 32) (2) Re lokela ho apara hantle le ka tsela e hlomphehang, eseng ka tsela e tla khopisa ba bang. (1 Tim. 2:9; 1 Pet. 3:​3, 4) (3) Re lokela ho qoba ho ithorisa ka lintho tseo re nang le tsona joalokaha batho ba lefatše lena la Satane ba etsa. (Joh. 17:14; Jak. 1:27; 1 Joh. 2:​15, 16) (4) Lintho li lokela ho etsoa ka tlhompho le ka tlhophiso. (1 Bakor. 14:40) (5) Mekete ea lenyalo ha ea lokela ho ba liphathi tse sa laoleheng tseo ho tsona batho ba noang joala haholo. (Bagal. 5:21) (6) Ho lokela hore ho be le motsamaisi oa mokete.—Joh. 2:​8, 9.

18, 19. (a) Ke thulusi efe e ’ngoe e ka re thusang? (b) Ke melao-motheo efe eo re ka e fumanang thulusing ena e ka re thusang ho etsa liqeto mabapi le mekete? (Sheba lebokose le reng “Na u Lemoha Melao-motheo?”)

¹⁸ Thulusi e ’ngoe eo batho ba bangata ba fumaneng e le molemo ke buka ea Litemana Tsa Bibele Tse Thusang Bakreste. E na le lethathamo la mangolo tlas’a lihlooho tse fapaneng. Sehloohong se seng le se seng, ho na le lethathamo la mangolo le lipotso tse ka re thusang ho sebelisa melao-motheo ea Bibele. Ka mohlala, Mokreste a ka ’na a ipotsa hore na o lokela ho ea moketeng o itseng kapa che. Haeba a sheba sehlooho se reng “Mekete,” o tla fumana sehloohoana se reng “Mekete eo Bakreste ba sa e ketekeng.”

¹⁹ Nahana ka tse ling tsa lintlha tseo ho buuoang ka tsona tlas’a sehloohoana seo. Ka mohlala, ho na le potso e reng: “Ke hobane’ng ha ho fosahetse ho keteka mokete o amanang le borapeli ba bohata? (1Ko 10:21; 2Ko 6:​14-18; Ef 5:​10, 11).” Ho boetse ho fanoe ka mehlala ea mekete e fosahetseng. Tlas’a sehloohoana se reng “Mekete ea naha,” ho na le melao-motheo e ka thusang Bakreste ho etsa qeto e nepahetseng mabapi le ho ea meketeng ea lintho tseo linaha tsa habo bona li li finyelletseng, ea tlholo ea ntoa ea linaha tsa habo bona kapa meketeng e fang batho tlhompho e lokelang ho fuoa Jehova. Re motlotlo hakaakang hore ebe mokhatlo oa Jehova o re fa lithulusi tse tšoanang le tsena ho re thusa ho koetlisa matsoalo a rona!

BONTŠA HORE LETSOALO LA HAO LE SEBETSA HANTLE

20. Re ka bontša joang hore matsoalo a rona a sebetsa hantle?

²⁰ Re ananela mpho ea bolokolohi ba ho ikhethela haholo. Empa re boetse rea lemoha hore re lokela ho koetlisa matsoalo a rona e le hore re ka khona ho sebelisa bolokolohi ba rona ba ho ikhethela ka tsela e nepahetseng. Ha matsoalo a rona a sebetsa hantle, a tla re thusa ho etsa liqeto tse tla tlotlisa Jehova le tse tumellanong le thato ea hae. E le hore re etse sena, re hloka thuso ea moea o halalelang oa Jehova. Kahoo, re lokela ho tsoela pele ho kopa moea o halalelang ebe re etsa lintho tumellanong le ’ona. Melao-motheo ea Bibele e tla re thusa ho tataisa matsoalo a rona. E se eka re ka sebelisa limpho tsena hantle. Ha re etsa joalo, re tla bona matla a Lentsoe la Molimo bophelong ba rona.—2 Tim. 3:​16, 17; Baheb. 4:12.