Jesu fuoa tlotla ha a kena Jerusalema a palame esele

Na Boprofeta bo Buang ka Mesia bo Paka Hore Jesu e ne e le Mesia?

Karabo ea Bibele

E, ho joalo. Ha Jesu a ntse a le lefatšeng o ile a phethahatsa boprofeta bo bongata bo buang ka “Mesia Moeta-pele,” le eo e neng e tla ba “Mopholosi oa lefatše.” (Daniele 9:25; 1 Johanne 4:14) Esita le ka mora lefu la hae, Jesu o ile a tsoela pele ho phethahatsa boprofeta bo buang ka Mesia.—Pesaleme ea 110:1; Liketso 2:34-36.

Lentsoe “Mesia” le bolela’ng?

Lentsoe la Seheberu Ma·shiʹach (Mesia) le la Segerike Khri·stos (Kreste) ka bobeli a bolela “Motlotsuoa.” Kahoo, “Jesu Kreste” e bolela “Jesu Motlotsuoa,” kapa “Jesu Mesia.”

Mehleng ea ha ho ne ho ngoloa Bibele, motho o ne a tlotsoa hlooho ka oli ha a ne a khetheloa mosebetsi o itseng oa bolaoli. (Levitike 8:12; 1 Samuele 16:13) Molimo o ile a khetha Jesu hore e be Mesia. Sena se bolela hore o fuoe matla a maholo. (Liketso 2:36) Jesu ha aa ka a tlotsoa ka oli empa Molimo o ile a mo tlotsa ka moea o halalelang.—Matheu 3:16.

Na boprofeta bo buang ka Mesia bo ne bo ka phethahatsoa ke batho ba bangata?

Che. Joalokaha khatiso ea monoana oa motho e mong le e mong e ikhethile, le boprofeta ba Bibele bo buang ka Mesia kapa Kreste, bo phethahetse ho motho a le mong. Empa Bibele e ile ea lemosa hore ho tla hlaha “bo Kreste ba bohata le baprofeta ba bohata ’me ba tla etsa lipontšo le limakatso tse kholo e le hore ba khelose esita le bakhethoa, haeba ho khoneha.”—Matheu 24:24.

Na re ka lebella hore Mesia o ntse a tla tla?

Che. Bibele e ile ea bolela esale pele hore Mesia o ne a tla tsoa lelokong la Morena Davida oa Iseraele. (Pesaleme ea 89:3, 4) Leha ho le joalo, litlaleho tsa maloko tsa Bajuda, tse neng li ka paka hore motho ke setloholo sa Davida, li ile tsa lahleha. E ka ’na eaba sena se etsahetse ha Baroma ba ne ba timetsa Jerusalema ka selemo sa 70.a Ho tloha ka nako eo, ho ne ke ke ha khoneha hore motho a pake hore o tsoa lelokong la borena la Davida. Empa ha Jesu a ntse a le lefatšeng, litlaleho tseo li ne li ntse li le teng ’me lira tsa hae li ne li sitoa ho hanyetsa hore o tsa lelokong la Davida.—Matheu 22:41-46.

Boprofeta bo buang ka Mesia bo hlaha ka makhetlo a makae ka Bibeleng?

Re ke ke ra bolela ka ho toba hore na ho profetiloe ka Mesia ka makhetlo a makae. Ka mohlala, batho ba ka bala boprofeta ka mekhoa e fapaneng, le litemaneng tseo ho hlakileng hore li bua ka Mesia. Lengolong la Esaia 53:2-7, ho buuoe ka lintlha tse ’maloa tse buang ka boprofeta ba Mesia. Batho ba bang ba nka litemana tsena e le boprofeta bo le bong, ha ba bang bona ba ka khetha ho qolla ntlha ka ’ngoe e le boprofeta bo ikemetseng.

Bo bong ba boprofeta bo buang ka Mesia boo Jesu a bo phethahalitseng

Boprofeta	Bo hlaha ho	Bo phethahala ho
E ne e tla ba setloholo sa Abrahama	Genese 22:17, 18	Matheu 1:1
E ne e tla ba setloholo sa Isaka mora oa Abrahama	Genese 17:19	Matheu 1:2
O ne a tla hlaha lelokong la Juda la Iseraele	Genese 49:10	Matheu 1:1, 3
O ne a tla hlaha lelokong la borena la Morena Davida	Esaia 9:7	Matheu 1:1
O ne a tla tsoaloa ke moroetsana	Esaia 7:14	Matheu 1:18, 22, 23
O ne a tla hlahela Bethlehema	Mikea 5:2	Matheu 2:1, 5, 6
O ne a tla bitsoa Emanueleb	Esaia 7:14	Matheu 1:21-23
O ne a tla hlahela lelapeng le futsanehileng	Esaia 53:2	Luka 2:7
Masea a ne a tla bolaoa ka mor’a hore Mesia a tsoaloe	Jeremia 31:15	Matheu 2:16-18
O ne a tla bitsoa a le Egepeta	Hosea 11:1	Matheu 2:13-15
O ne a tla bitsoa Monazarethac	Esaia 11:1	Matheu 2:23
O ne a tla etelloa pele ke lenqosa	Malakia 3:1	Matheu 11:7-10
O ne a tla tlotsoa hore e be Mesia ka selemo sa 29d	Daniele 9:25	Matheu 3:13-17
Molimo o ne a tla phatlalatsa hore ke Mora oa hae	Pesaleme ea 2:7	Liketso 13:33, 34
O ne a tla chesehela ntlo ea Molimo	Pesaleme ea 69:9	Johanne 2:13-17
O ne a tla bolela litaba tse monate	Esaia 61:1	Luka 4:16-21
Mosebetsi oo a neng a tla o etsa Galilea o ne o tla khantša leseli	Esaia 9:1, 2	Matheu 4:13-16
O ne a tla etsa mehlolo joaloka Moshe	Deuteronoma 18:15	Liketso 2:22
O ne a tla bua menahano ea Molimo joaloka Moshe	Deuteronoma 18:18, 19	Johanne 12:49
O ne a tla phekolo ba bangata	Esaia 53:4	Matheu 8:16, 17
O ne a ke ke a ipitsetsa mahlo a batho	Esaia 42:2	Matheu 12:17, 19
O ne a tla ba le kutloelo-bohloko ho batho ba nang le mathata	Esaia 42:3	Matheu 12:9-20; Mareka 6:34
O ne a tla bontša hore Molimo o na le toka	Esaia 42:1, 4	Matheu 12:17-20
E ne e tla ba moeletsi ea tsotehang	Esaia 9:6, 7	Johanne 6:68
O ne a tla tsebisa batho lebitso la Jehova	Pesaleme ea 22:22	Johanne 17:6
O ne a tla ruta ka lipapiso	Pesaleme ea 78:2	Matheu 13:34, 35
E ne e tla ba moeta-pele	Daniele 9:25	Matheu 23:10
Ba bangata ba ne ba ke ke ba lumela ho eena	Esaia 53:1	Johanne 12:37, 38
E ne e tla ba lejoe le khopang	Esaia 8:14, 15	Matheu 21:42-44
Batho ba ne ba ke ke ba mo amohela	Pesaleme ea 118:22, 23	Liketso 4:10, 11
O ne a tla hlouoa ntle ho le lebaka	Pesaleme ea 69:4	Johanne 15:24, 25
O ne a tla rorisoa ha a kena Jerusalema a palame esele	Zakaria 9:9	Matheu 21:4-9
O ne a tla rorisoa ke bana	Pesaleme ea 8:2	Matheu 21:15, 16
O ne a tla tla ka lebitso la Jehova	Pesaleme ea 118:26	Johanne 12:12, 13
O ne a tla ekoa ke motsoalle oa hae	Pesaleme ea 41:9	Johanne 13:18
Ea neng a tla mo eka o ne a tla fuoa likotoana tse 30 tsa sileverae	Zakaria 11:12, 13	Matheu 26:14-16; 27:3-10
Metsoalle ea hae e ne e tla mo lahla kherehloa	Zakaria 13:7	Matheu 26:31, 56
Lipaki tsa bohata li ne li tla fana ka bopaki khahlanong le eena	Pesaleme ea 35:11	Matheu 26:59-61
O ne a tla thola ha a qosoa	Esaia 53:7	Matheu 27:12-14
O ne a tla tšoeloa ka mathe	Esaia 50:6	Matheu 26:67; 27:27, 30
O ne a tla otloa hloohong	Mikea 5:1	Mareka 15:19
Ba ne ba tla mo shapa	Esaia 50:6	Johanne 19:1
O ne a ke ke a itoanela ha a otloa	Esaia 50:6	Johanne 18:22, 23
Baeta-pele ba ’muso ba ne ba tla mo rerela bolotsana	Pesaleme ea 2:2	Luka 23:10-12
O ne a tla kokoteloa maoto le matsoho palong	Pesaleme ea 22:16	Matheu 27:35; Johanne 20:25
Batho ba ne ba tla lahla lotho (becha) bakeng sa liaparo tsa hae	Pesaleme ea 22:18	Johanne 19:23, 24
O ne a tla balelloa har’a baetsalibe	Esaia 53:12	Matheu 27:38
O ne a tla songoa a be a rohakoe	Pesaleme ea 22:7, 8	Matheu 27:39-43
O ne a tla utloa bohloko molemong oa baetsalibe	Esaia 53:5, 6	1 Petrose 2:23-25
Ho ne ho tla bonahala eka Molimo o mo lahlile	Pesaleme ea 22:1	Mareka 15:34
O ne a tla fuoa asene le nyooko hore a li noe	Pesaleme ea 69:21	Matheu 27:34
O ne a tla nyoroa pele a shoa	Pesaleme ea 22:15	Johanne 19:28, 29
O ne a tla beha bophelo ba hae ho Molimo	Pesaleme ea 31:5	Luka 23:46
O ne a tla tela bophelo ba hae	Esaia 53:12	Mareka 15:37
O ne a tla fana ka sehlabelo e le hore sebe se ka fela	Esaia 53:12	Matheu 20:28
Masapo a hae a ne a ke ke a rojoa	Pesaleme ea 34:20	Johanne 19:31-33, 36
O ne a tla hlajoa	Zakaria 12:10	Johanne 19:33-35, 37
O ne a tla patoa le barui	Esaia 53:9	Matheu 27:57-60
O ne a tla tsosoa bafung	Pesaleme ea 16:10	Liketso 2:29-31
Moeki oa hae o ne a tla nkeloa sebaka ke motho e mong	Pesaleme ea 109:8	Liketso 1:15-20
O ne a tla lula ka letsohong le letona la Molimo	Pesaleme ea 110:1	Liketso 2:34-36

a Buka ea McClintock and Strong’s Cyclopedia e re: “Ha ho pelaelo hore litlaleho tsa maloko a Bajuda li ile tsa senyeha ha Jerusalema e timetsoa, eseng pele ho moo.”

b Lebitso lena la Seheberu Emanuele, le bolela “Molimo o na le Rona,” le hlalosa hantle mosebetsi oo Jesu a o etsang e le Mesia. Taba ea hore o ile a tla lefatšeng le mesebetsi ea hae li bontša hantle hore Molimo o na le bahlanka ba hae.—Luka 2:27-32; 7:12-16.

c Ho bonahala lentsoe “Monazaretha” le tsoa lentsoeng la Seheberu neʹtser, le bolela’ng “lehlomela.”

d E le ho bona bopaki ba Bibele ba hore Mesia o fihlile ka selemo sa 29, sheba sehlooho se re’ng, “Kamoo Boprofeta ba Daniele bo Bolela’ng ho Fihla ha Mesia Esale Pele Kateng.”

e Boprofeta bona bo hlaha lengolong la Zakaria empa Matheu o re ho ile “ha phethahala se ileng sa buuoa ka moprofeta Jeremia.” (Matheu 27:9) Ho bonahala eka ka linako tse ling buka ea Jeremia e ne e hlaha qalong karolong ea Mangolo a bitsoang libuka tsa ‘Baprofeta.’ (Luka 24:44) Ho bonahala ha Matheu a ne a bua ka “Jeremia” o ne a bolela libuka tsohle tsa baprofeta, ho akarelletsa le buka ea Zakaria.