“’Muso oa ka ha se oa Lefatše Lena”

’Muso oo Jesu a buang ka oona, o tla felisa mathata ’ohle ao batho ba tobanang le ’ona kajeno. Ha ho na ’muso oa batho o ka khonang ho etsa sena. Ke joang Jesu a ileng a bontša seo ka mantsoe le ka liketso?

Seo Jesu a ileng a se bua

• “’Muso oa ka ha se oa lefatše lena.” (Johanne 18:36) Jesu o ile a hlakisa hore matla a hae a ho busa ha a tsoe ho batho kapa lipolotiking. Ho e-na le hoo, a tsoa ho Molimo.

• “Ntate oa rona ea maholimong, . . . ’Muso oa hao o tle. Thato ea hao e etsoe lefatšeng joalokaha e etsoa leholimong.” (Matheu 6:9, 10) Thapelong ea Morena, Jesu o ile a ruta balateli ba hae hore ba tšepe hore ’Muso oa Molimo ke oona feela o tla rarolla mathata a teng lefatšeng, eseng mebuso ea batho. Qetellong ’Muso oa Molimo o tla nkela mebuso ea batho sebaka ebe o tlisa khotso ka ho sa feleng lefatšeng.—Daniele 2:44.

Ho ithuta se eketsehileng ka ’Muso oo le seo o tla se finyella, shebella video e khutšoanyane ea ’Muso oa Molimo ke Eng?

Seo Jesu a ileng a se etsa

• “Kaha Jesu o ne a tseba hore ba tl’o mo tšoara ba mo etse morena, a khutlela thabeng a le mong.” (Johanne 6:15) Ha a ne a le lefatšeng, Jesu o ne a sa kenelle lipolotiking. Ha batho ba ne ba batla ho mo etsa morena, ha aa ka a lumela.

Mohlala oa Jesu o ka thusa Bakreste hore ba talime lipolotiki joang? Ho fumana lintlha tse eketsehileng, bala sehlooho se reng: “Na Bolumeli bo Lokela ho Kenella Lipolotiking?”