Bacha Baa Botsa . . .

Ho Thoe’ng Haeba Batsoali ba ka ba sa Ntšehetse Tumelong ea ka?

BACHA ba bangata ba Bakreste ba na le batsoali ba sa lumelang. Ngoanana e mong ea lilemo li 12 o re: “Ke ’na feela ea ithutang Bibele lelapeng leso. ’Me ’mè o batla hore ke khaotse ho ithuta eona.” Ba bang ba na le batsoali ba hlōlehang ho etella pele linthong tsa moea. Maemo ana e ka ba teko ea sebele ho mocha ea tšepahalang ea batlang ho sebeletsa Molimo.

Ho thata ho leka ho ba Mokreste oa ’nete ka ntle ho thuso le khothatso ea batsoali ba hao. Empa u ka atleha! Mehlala e mengata, ea nako e fetileng le ea hona joale, e paka seo.

Bacha ba Tšepahalang Mehleng ea Bibele

Nahana ka Abele, mora oa Adama le Eva, batho ba babeli ba pele. Adama le Eva ba ne ba lokela ho neha bana ba bona tšehetso e phethahetseng ea moea. Empa ba ile ba iketsa ba sa utloeng ’me ba furalla Jehova, ba tlohela bana ba bona hore ba itšokolele litabeng tsa bolumeli. Ho e-na le ho iqenehela kapa ho lumella ho haelloa ke bomoea ha batsoali ba hae ho fokotsa kananelo ea hae bakeng sa lintho tse halalelang, ho bonahala Abele a ile a ithuta seo a neng a ka se khona ka ’Mōpi. Jehova o ile a buisana le bara ba babeli ba Adama, Kaine le Abele, ’me Abele o ile a hōlisa kamano ea hae le Molimo ’me a fetoha monna oa tumelo. “Ka tumelo, Abele o hlahisitse pel’a Molimo sehlabelo se fetisang sa Kaine; ’me ka baka la eona o pakiloe hore o lokile.”—Ba-Heberu 11:4; Genese 4:2-15.

Josiase ke mohlala oa mocha e mong ea neng a tlameha ho tsoela pele ka ntle ho tšehetso ea bolumeli ea batsoali. Ntat’ae, Morena Amone oa Juda, o ile a bolaoa ha Josiase a ne a le lilemo li robeli feela. Ha a sa ntse a phela, Morena Amone o ile a tsoela pele ho “etsa ho leng hobe mahlong a Jehova, joale ka ha ho no ho entse Manasse, ntat’ae; Amone a hlabela litšoantšo tsohle tse betliloeng, tse neng li entsoe ke Manasse ntat’ae, mahlabelo, ’me a li sebeletsa. . . . Ha e le eena Amone, a ’na a atisa melato ea hae.” (2 Likronike 33:22, 23) Ka hona, nahana ka tikoloho ea moea e senyang boitšoaro eo mora oa Amone, Josiase e tlamehang hore ebe o hōletse ho eona.

Leha ho le joalo, Josiase o ile a tsoela pele ho “etsa ho lokileng mahlong a Jehova, a tsamaea ka mehlala ea Davida ntat’ae . . . a qala ho batla Molimo oa Davida ntat’ae; ’me ka lemo sa leshome le metso e ’meli [ha a batla a le lilemo li 20], a qala ho hloekisa Juda le Jerusalema ka ho tlosa linģalo tse liphahameng, le liashera le litšoantšo tse betliloeng, le litšoantšo tse tšolotsoeng.”—2 Likronike 34:2-4.

Ke joang Josiase a ileng a fumana matla a joalo ka ntle ho thuso ea ntate? O ile a fumana tšehetso e tsoang ho banna ba bang ba moea, ba joaloka moprista e moholo Hilkia le mongoli oa hae Shafane. Tšusumetso ea bona e ntle ea moea ho Josiase e monyenyane e ile ea mo thusa hore a “phethahatse mantsoe a Molao.” (2 Marena 23:24, BPN; 2 Likronike 34:14-19) Molao oo o ne o hloka hore marena a iketsetse kopi ea ’ona ea botho le ho ithuta oona motšehare le bosiu. (Deuteronoma 17:18; Joshua 1:8) Ha ho pelaelo hore ho etsa joalo ho ile ha tlatsetsa khōlong ea Josiase ea moea.

Ho Fumana Tšehetso Kajeno

Le uena u ka hōla moeeng, esita leha u sa fumane tšehetso eo u neng u ka rata ho e fumana ho batsoali ba hao. Hangata u ka fumana tšehetso ho baena ba moea le bo-khaitseli le bo-’mè le bo-ntate liphuthehong tsa Lipaki tsa Jehova. (Mareka 10:30) Ho ka ’na ha e-ba le bacha ba amehileng ka lintho tsa moea ka phuthehong bao u ka ba etsang metsoalle ea hao. Kapa mohlomong Lipaki tse ling tse hōlileng li tla u thahasella. Ka mohlala, mocha e mong ea se nang ntate, ea bitsoang Jerry o ile a mengoa ke moholo e mong oa phutheho hore a tsamaee le eena ho ea thutong ea lehae ea Bibele. Ka mor’a thuto, ba ne ba atisa ho reka lijo lebenkeleng la lijo tse phehiloeng ka potlako le ho qoqa. Jerry oa hopola: “O ile a fetoha ntate ho ’na.” Kajeno Jerry o kene lenyalong ’me ke mohlanka ea sebeletsang. Ka mehla o leboha tšehetso eo moholo eo a mo fileng eona.

Na ho na le batho ba hōlileng ba ithaopetseng ho u thusa ka tsela e itseng? Joale ke hobane’ng ha u sa arabele hamolemo? Haeba ha ho motho ea ithaopetseng ho etsa joalo, nka bohato ba pele ba ho hlaholela likamano tse molemo. U ka leka ho atamela e mong oa balebeli phuthehong ea lōna. Mohlomong u hloka hore motho e mong a u khannele thuto ea lehae ea Bibele kapa a u thuse ho lokisetsa likabelo tsa Sekolo sa Tšebeletso sa Puso ea Molimo.a Kapa e ka ’na eaba u hloka botsoalle bo hahang ba lelapa. Ka ho utloahalang, u ka ’na ua ikutloa u tsila-tsila hore u tsebahatse litlhoko tsa hao ka tsela ena. Empa hopola, baholo ba phutheho ba khethetsoe hore ba hlokomele litlhoko tsa moea tsa motho e mong le e mong ka phuthehong—ho akarelletsa le bacha. (1 Petrose 5:2) Ba ka fetoha thuso ea sebele.

Ho Hlaholela Tšehetso Lapeng

Joale, na sena se bolela hore ha ho letho leo u ka le etsang ho ntlafatsa boemo lelapeng la heno? Le letho. Ka mohlala, nahana ka Joe. O hlalosa tšehetso eo a e fuoang ke batsoali ba hae ba sa lumelang linthong tsa moea e le e “lekanyelitsoeng.” Leha ho le joalo, Joe oa lumela hore mohlomong o hlile a tlatsetsa boemong boo. Joang? Koana, ho bonahala eka ha Joe a ne a qala ho ithuta Bibele le Lipaki tsa Jehova, o ile a sebelisa seo a ithutileng sona ka mokhoa o fokolang bophelong ba hae. Kahoo o ile a tsoela pele a sa utloe batsoali ba hae. Ka ho utloahalang, ha baa ka ba fumana lebaka le utloahalang la ho ithuta Bibele ka bobona, re se re sa bolele letho ka ho mo khothalletsa ho ithuta Bibele haholoanyane.

Ho thoe’ng ka uena? Haeba batsoali ba hao ke batho ba sa lumelang, na liketso tsa hao li ba neha lebaka la ho lumela hore u tiile ha u re u batla ho sebeletsa Molimo? Basali ba Bakreste ba bolelloa hore ba hape banna ba bona ba sa lumelang ka boitšoaro ba bona bo botle. Ka ho tšoanang, na batsoali ba hao ba ne ba ke ke ba “hapuoa, leha e ke ke ea e-ba ka lentsoe” haeba u ne u ba mamela ’me u ba hlompha? (1 Petrose 3:1; Ba-Efese 6:1-3) Haeba ho joalo, na mohlomong ba ne ba ke ke ba u tšehetsa haholoanyane?

Leha ho le joalo, ho thoe’ng haeba batsoali ba hao e le Bakreste empa ba sa etse sohle se matleng a bona ho u thusa le ho u khothatsa? Ho sa tsotellehe hore na lebaka la bona ke lefe, u ka etsa ho hongata ho hōlisa boemo ba moea bo hahang lelapeng leno ka ho beha mohlala o motle. (1 Timothea 4:12) Ha e le nako ea ho ea libokeng tsa Bokreste, apara ’me u itokisetse ho tsamaea. Ithaopele ho etsa mesebetsi ea lelapa e eketsehileng e le hore batsoali le bona ba ka itokisa e sa le nako. Ke mang ea tsebang? Mohlomong thahasello ea hao bakeng sa liboka e ka ba susumetsa ka tsela e molemo.

Na batsoali ba hao ba u khannela thuto ea lehae ea Bibele beke le beke? Haeba ha ba etse joalo, ka mosa ba kōpe hore ba u khannele eona, eseng ka ho ba emella kapa ka ho tletleba. Ha ho khannoa thuto, u se ba thatafalletse hore ba fumane litlhaloso tsa hao; itokisetse hamolemo bakeng sa ho nka karolo. Phetha karolo ea hao, ’me u etse hore sena e be ketsahalo e thabisang. Ba lebohe ka ho u khannela thuto. Sena se ka neha batsoali ba hao khothatso eo ba e hlokang hore ba khanne thuto ka mehla.

Ho thoe’ng ha ho e-na le karabelo e fokolang boitekong ba hao? U se ke ua tela. (Ba-Galata 6:9) Bontša lerato la hao ho Molimo le ’nete ea Bibele phatlalatsa. U se ke ua lahleheloa ke cheseho ea hao kapa boikutlo ba ho potlaka ha u thusa batho ba bang hore ba ithute ka Molimo. Tsoela pele ho ‘ikaha tumelong ea hao e halalelang ka ho fetisisa, le ho rapela ka moea o halalelang.’ (Juda 20) Mocha ea bitsoang Laverne o etsa hona hoo. O re: “Ke entse qeto ea ho se lumelle ntate hore a ntšitise ho ithuta ’nete. Kahoo ke ithuta Molula-Qhooa ke le mong ho e-na le ho shebella TV.b Hape ke bala temana ea Bibele hoseng ho hong le ho hong. Ke nolofalloa ho ea mosebetsing oa boboleli ka ho tsoa le baena le bo-khaitseli ba bang ba Bakreste.”

Bontša boikemisetso bo tšoanang. U se ke ua lumella hore ho haella ha tšehetso lelapeng leno ho u nyahamise. Lula u tiile linthong tseo u li lumelang. Haeba ho ka etsahala, atamela haufi le lithaka tse amehileng ka lintho tsa moea le batho ba hōlileng ka phuthehong. Empa ebang u fumana tšehetso kapa che, ikemisetse ho boloka botsoalle ba hao le Molimo. U ka lebella hore eena a u tšehetse.—Bapisa le Pesaleme ea 119:116.

[Mongolo o botlaaseng ba leqephe]

[Setšoantšo se leqepheng la 13]

Litho tsa phutheho tse hōlileng tsebong li ka thusa ka ho u thahasella