Bacha Baa Botsa

Ke Hobane’ng ha Batsoali ba ka ba sa Nkutloisise?

NAHANA KA BOEMO BONA.

Ke hora ea botšelela mantsiboea a Labohlano, Jim ea lilemo li 17 o tsamaea a potlakile a lebile monyako o tsoelang kantle. O re ho batsoali ba hae: “Ke tla le bona hamorao!” a nahana hore ba ke ke ba mo botsa potso eo ba tloaetseng ho mo botsa eona.

Empa o tseba hantle hore batsoali ba hae ba ke ke ba tlohela ho mo botsa potso eo.

’Mè oa hae oa mo botsa, “U tla khutla ka nako mang, Jimmy?”

Jim a ema ka eona nako eo. “Eh . . . e re ke bone . . . ,” o itoma leleme, “ke tla khutla ka mor’a nako, empa le se ke la tšoenyeha, ho lokile ke se ke ile!” Jim o bula lemati ’me o mothating oa ho tsoa. Empa ntate oa hae oa mo hoeletsa, “Ema hona moo James!”

Jim o boetse oa ema, ’me ntate oa hae o bua a tiisitse ka hanong ’me o re: “U tseba molao. U be u le mona ka hora ea leshome—ho fella moo!”

Jim o khutlela morao ho ntate oa hae a ntse a korotla “empa Ntate na ua tseba hore na ho tla nkenyetsa mahlo hakaakang hore ke bolelle metsoalle ea ka hore ke se ke lokela ho khutlela hae kapele hakaalo?”

Ntate ha a bontše qenehelo. O boetse o re: “Ke re u be u le mona ka hora ea leshome, ke phetho ke tu!”

MOHLOMONG u kile ua ba boemong bo tšoanang. Ebang bothata e ne e le taba ea nako eo u lokelang ho ba lapeng ka eona, ’mino, metsoalle kapa liaparo tsa hao, batsoali ba hao ba behile melao eo ba sa ikemisetsang ho e fetola. Ka mohlala:

“Ka mor’a hore ntate oa ka oa bobeli a nyale ’Mè, o ne a nyatsa ’mino oohle oo ke neng ke o rata. Ke ile ka tlameha ho lahla li-CD tsa ka kaofela!”—Brandon.a

“’Mè oa ka o lula a nkemella ka hore ha ke na metsoalle. Empa ha ke mo kōpa hore ke etse setsoalle le motho ea itseng, ha a ntumelle hobane a re ha a tsebe motho eo. Seo sea ’nyahamisa!”—Carol.

“Ntate oa ka le ’mè oa ka oa bobeli ha ba batle hore ke apare sekipa se mpenyang. ’Me Ntate o tsitlella taba ea hore borikhoe bo sa koaheleng mangole bo bo khutšoanyane ho feta tekano!”—Serena.

U ka etsa joang haeba uena le batsoali ba hao le sa bone litaba ka leihlo le le leng? Na u ka buisana le bona ka taba ee? Joanne ea lilemo li 17 o re: “Hangata batsoali ba ka ha ba batle ho mamela seo ke se buang.” Amy, ea lilemo li 15 o re: “Haeba ke bona eka batsoali ba ka ha ba nkutloisise, ke khetha ho itholela.”

Empa u se ke ua lahla tšepo kapele! Ho ka etsahala hore ebe batsoali ba hao ba ikemisetse ho u mamela ho feta kamoo u nahanang kateng.

Nahana: Esita le Molimo oa mamela ha batho ba ntša maikutlo. Ka mohlala, Jehova o ile a mamela Moshe ha a ne a buella sechaba sa Iseraele se sa mameleng.—Exoda 32:7-14; Deuteronoma 9:14, 19.

Mohlomong u ka ’na ua bona eka batsoali ba hao ha ba na kahlolo e molemo joaloka Molimo. Ke ’nete hore ho na le phapang e khōlō pakeng tsa ha Moshe a ne a bua le Jehova ka se neng se tla etsahalla sechaba sohle sa Iseraele, le ha uena u bua le batsoali ba hao ka taba ea ho fihla lapeng ka mor’a nako e behiloeng. Leha ho le joalo, ho na le molao o tšoanang tabeng ena:

Haeba taba eo u buang ka eona e utloahala, batho ba nang le matla a bolaoli—e leng batsoali ba hao—ho ka etsahala hore ba ikemisetse ho u mamela.

Ntho e ka u thusang boemong bona ke mokhoa oo u behang litaba ka oona! Mehato e latelang e tla u thusa hore u behe litaba ka tsela e tla u atlehisa:

1. Lemoha se bakang bothata. Ka tlaase mona, ngola ntho eo hangata uena le batsoali ba hao le sa lumellaneng ka eona.

․․․․․

2. Lemoha tsela eo u ikutloang ka eona. Ka tlaase mona, ngola hore na tsela eo batsoali ba hao ba bonang lintho ka eona e etsa hore u ikutloe joang—ebang u utloa bohloko, oa koata, oa soaba, oa ferekana kapa ho hong. (Ka mohlala: Ketsahalong e boletsoeng qalong ea sehlooho sena, Jim o ile a re ha batsoali ba hae ba mo behela nako eo a lokelang ho fihla ka eona lapeng, seo se mo kenyetsa mahlo a metsoalle ea hae.)

․․․․․

3. Ipehe boemong ba motsoali. Nahana u e-na le ngoana ea lilemong tsa bocha ea nang le mathata a tšoanang le ao u a ngotseng Mohatong oa #1. Ha u nahana ka boikarabelo ba motsoali, ke lintho life tseo u neng u tla khathatseha ka tsona, hona hobane’ng? (Ka mohlala: Ketsahalong e boletsoeng qalong ea sehlooho sena, batsoali ba Jim ba ne ba tšoenyehile ka hore Jim o tla be a sa sireletseha.)

․․․․․

4. Hlahloba bothata bona bocha. Araba lipotso tse latelang:

U hlokomela molemo ofe tseleng eo batsoali ba hao ba bonang litaba ka eona?

․․․․․

Ke’ng seo u ka se etsang e le hore ba khaotse ho khathatseha?

․․․․․

5. Buisana le batsoali ba hao ka bothata ’me le fane ka litlhahiso tsa kamoo le ka bo rarollang kateng. Haeba u sebelisa mehato e boletsoeng ka holimo—’me u nahana ka litlhahiso tse fanoeng lebokoseng le reng “Litlhahiso Tsa Kamoo le ka Buisanang”—u ka iphumana u khona ho buisana le batsoali ba hao ka tsela e molemo ho feta pele. Kellie le batsoali ba hae ba na le kamano e ntle. O re: “Ho pheha khang ha ho ruise molemo, ebile hangata u ke ke ua atleha ha u etsa joalo. Ntho e nthusang ke ho bolella batsoali ba ka tsela eo ke ikutloang ka eona. Kahoo, hangata re lumellana ka ntho e etsang hore kaofela ha rōna re khotsofale.”

Lihlooho tse ling tsa “Bacha Baa Botsa” li ka fumanoa mocheng oa boitsebiso oa Inthanete ho www.watchtower.org/ype

[Mongolo o botlaaseng ba leqephe]

[Lebokose le leqepheng la 20]

LITLHAHISO TSA KAMOO LE KA BUISANANG

“Ho mamela ho ka u thusa ho feta ho tleroha ka bohale. Haeba u mamela batsoali ba hao, ’me u leka ho ba utloisisa, le bona ba tla etsa se tšoanang.”—Rianne.

Bala Bafilipi 2:3, 4.

“U se ke ua arabisa batsoali ba hao! Ke ile ka etsa seo ka makhetlo, ’me ka hlokomela hore nkabe ke ile ka qoba ho pheha khang (le ho fumana kotlo) hoja ke ile ka laola leleme la ka!”—Danielle.

Bala Liproverbia 17:27; 21:23.

“Emela nako e nepahetseng, eo u nahanang hore ho ka ba bonolo hore batsoali ba hao ba u mamele.”—Collette.

Bala Liproverbia 25:11.

“Batsoali ba hao ba lokela ho tseba hore ua ba hlompha le hore u mamela e le kannete seo ba u bolellang sona. Kahoo, pele u ba bolella tsela eo u ikutloang ka eona, ba kholise hore u utloile seo ba se buileng le hore ua se utloisisa.”—Emily.

Bala Liproverbia 23:22; Jakobo 1:19.

[Lebokose le leqepheng la 20]

SEO E LENG ’NETE BOPHELONG

Hase hore le lokela ho tšohla lintho tsohle tseo le sa lumellaneng ka tsona. Maemong a mang, u ka ‘buela ka pelong, . . . ’me u khutse.’ (Pesaleme ea 4:4) Ngoanana e mong ea bitsoang Beatrice o re: “Ka linako tse ling ha ke nahana kamoo taba e sa reng letho kateng, kea e tlohela e fete. Ke khaotsa ho nahana ka eona.”

[Lebokose le leqepheng la 21]

KE HOBANE’NG HA U SA BOTSE BATSOALI?

U ne u etsa joang ha ho ne ho e-ba le ho se utloane pakeng tsa hao le batsoali ba hao? Haeba u ne u ka boela ua ba mocha, na u ne u ka etsa lintho ka tsela e fapaneng? Haeba ho joalo, ke life lintho tseo?

[Lebokose/Litšoantšo tse leqepheng la 21]

SEO BACHA BA BANG BA SE BUANG

Wyndia—Ke leka ho nahana pele ke bua. Ke nahanela maikutlo a batsoali ba ka, ebe kea rapela pele nka bua ntho leha e le efe. Haeba ke tseba hore ntho eo ke tl’o e bua e tla qala ntoa, ke khetha ho thōla ebe ke emela ho bua ha ke tseba hore ke tla khona ho bua hantle ke sa phehe khang.

Ross—Haeba ke utloa hore kea halefa, ke ipolella hore ha ke batle ho itšulafalletsa letsatsi ka lebaka la tsekisano eo ho neng ho sa hlokahale hore e be teng. Ka lebaka leo, ha ke sa halefa le feela joaloka nakong ea ha ke sa hōla.

Ramona—Ke hlokometse hore ho molemo ho mamela maikutlo a batsoali ba ka. Mohlomong seo ba se nahanang ha sea fapana hakaalo le seo ke se nahanang, ebile ho se lumellane ha ho tsose khang e khōlō joalokaha ke ne ke lebeletse.