Seo Jehova a se Batlang ho Uena ke Sefe?

“Uena motho, u tsebisitsoe se leng molemo, le seo Jehova a se batlang ho uena, ke hore u etse se lokileng, u rate bokhabane, le ho tsamaea ka boikokobetso le Molimo oa hao.”—Mik. 6:8.

1. Potso e fumanoang ho Mikea 6:8 e ne e tobisitsoe ho bo-mang, hona hobane’ng?

BATHO ba tšepahalang baa botsa: ‘Re ka etsa joang hore re khahlise Molimo?’ Empa hase ho batho ba sekametseng ho lokeng joalo ho Jehova Molimo moprofeta oa hae a ileng a tobisa taba e ho Mikea 6:8. Ho e-na le hoo, taba eo e ne e tobisitsoe ho batho bao Molimo o matla ’Ohle o neng o e-na le tseko ea molao khahlanong le bona. (Mik. 6:1, 2) Batho bana, Baiseraele, ba ne ba hlokomolohile litlameho tsa selekane sa bona le Ea Holimolimo. Pheletso ea e-ba ho oa ho nyonyehang boitšoarong. Ho qhekella, khatello, leeme, borapeli ba litšoantšo le ho tšolloa ha mali tsa e-ba ngata. Boemo bo ile ba eba bobe hoo motho a neng a ke ke a hlola a sa tšepa metsoalle ea hae ea hlooho ea khomo le beng ka eena.—Mik. 1:5; 2:1, 2; 3:1-3; 6:12; 7:2-6.

2. Ho bolela ha Jehova hore o na le qoso ho Iseraele ho ile ha ba nea monyetla oa ho etsa joang?

² Kahoo, ka ho bolela hore o na le tseko khahlanong le batho ba hae ba sa tšepahaleng, Jehova o ne a biletsa hore ho bakoe. Baiseraele ba ne ba hlokomelisoa hore ba ka ʼna ba pholoha kahlolo ka ho nka mehato e tiileng ho kena boemong bo amohelehang le Molimo oa bona. Hona ho ne ho tla hloka eng? Borapeli bo etsoang ka ntle, ho kopanyelletsa le ho nyeheloa ha mahlabelo a matle ka ho fetisisa, li ne li sa lekana. (Mik. 6:6, 7) Boprofeta ba Mikea bo ne bo ile ba bolela hore: “Uena motho, u tsebisitsoe se leng molemo, le seo Jehova a se batlang ho uena, ke hore u etse se lokileng, u rate bokhabane, le ho tsamaea ka boikokobetso le Molimo oa hao.”—Mik. 6:8.

“U TSEBISITSOE SE LENG MOLEMO”

3. Baiseraele ba ne ba rutiloe eng ka Moshe mabapi le se molemo?

³ Jehova Molimo o ne a sa tlohela batho ba hae feela mabapi le se leng molemo. Makholo a lilemo pelenyana, Moshe o itse ho Baiseraele: “Jehova, Molimo oa hao, o batla’ng ho uena, ha e se hore u tšabe Jehova, Molimo oa hao, u tsamaee tseleng tsa hae tsohle, u mo rate, ʼme u sebeletse Jehova, Molimo oa hao, ka pelo ea hao eohle, le ka moea oa hao oohle, u boloke litaelo tsa Jehova, le melao ea hae eo ke u laelang eona kajeno, hore u be u iketle?”—Deut. 10:12, 13.

4. Baiseraele ba ne ba tla fumana molemo joang ho rateng Jehova le ho utloeng melao ea hae?

⁴ Ka litsela tsohle ho ne ho le molemong o fetisisang oa Iseraele ho bontša lerato le tebileng ho Jehova Molimo le ho itšoarella ka botšepehi litaelong tsa hae. Ho mamela molao oa bomolimo ho ne ho ba tiisetsa tšireletso ea Jehova le tlhohonolofatso e tsoelang pele mosebetsing o mong le o mong oa bona. (Deut. 28:1-13) Ka lehlakoreng le leng, ho hlokomoloha molao oa bomolimo ho ne ho tla fella ka ho se sireletsehe le tšenyeho.—Deut. 28:15-68.

5. Ke hobane’ng ha ho utloa Jehova ho holisa molemo oa rona o moholo haholo?

⁵ Ka ho tšoanang, kajeno batho ba nang le lerato la ʼnete bakeng sa Molimo le ba batlang ho latela tataiso ea oona ba phehella tsela e holisang thabo ea bona e kholohali. Ho joalo hobane’ng? Kaha Jehova ke Molimo o bohlale bohle le o lerato, o fane feela ka litaelo tse ka ntšetsang pele boiketlo ba motho. (Ba-Roma 16:27; 1 Joh. 4:8; 5:3) Lerato ke oona motheo oa melao ea bomolimo kaofela e laolang likamano tsa batho. Moapostola Pauluse o ile a hatisa sena ha a ngola, a re: “Le se ke la ba le molato ho motho, ha e se oa ho ratana, hobane ea ratang ba bang ke eena ea phethileng molao. Hobane melao e reng: U se ke ua feba, u se ke ua bolaea, u se ke ua utsoa, u se ke ua bea bopaki ba bohata, u se ke ua lakatsa ntho ea e mong, leha e le melao efe le efe e sa leng teng, e akarelitsoe ke polelo ena e reng: Rata oa heno, joale ka ha u ithata. Lerato ha le etse oa habo motho hampe; ke moo lerato e leng phetho ea molao.” (Ba-Roma 13:8-10) Ka ho hlakileng, haeba batho libakeng tsohle ba ne ba ka bontša lerato la ʼnete la oa habo motho, hona ho ne ho tla fella ka thabo, khotso le tšireletseho.

6. Ke hobane’ng ha ho nepahetse ho rata Jehova le ho utloa melao ea hae?

⁶ Ho feta moo, ke ho lokileng feela hore re bontše lerato la rona bakeng sa Molimo ka ho mamela melao ea oona. (2 Joh. 6) “Ke ka eena re utloang, re sisinyehang, re leng teng.” (Lik. 17:28) Ka baka leo, boikutlo ba rona bo lokela ho tšoana le ba baholo ba 24 ba bonoeng ke moapostola Johanne ponong. Ba ile ba bolela: “Morena, u loketsoe ke ho neoa khanya, le hlompho, le matla; hobane u hlolile lintho kaofela, ʼme ke ka ho rata ha hao li leng teng, li bileng li bopiloe.”—Tšen. 4:11.

“U ETSE SE LOKILENG”

7. (a) Mabapi le toka, molao oa Molimo o ne o hloka’ng ho Baiseraele? (b) Ke hobane’ng ha ho sebelisoa ha toka ho ne ho tla fumantša batho molemo mehleng ea Mikea?

⁷ Kaha Jehova Molimo “o rata tokelo le ho loka,” o ne a batla hore Baiseraele ba mo etsise ntlheng ena. (Pes. 33:5) Molao oa hae o ne o sa lumella limpho tsa qeko ʼme o laela hore toka e etsoe ntle ho khethollo ho ba ruileng le mafutsana. Rea bala: “U se ke ua fapoha ho loka, ʼme u se ke ua ea ka tšobotsi ea batho; u se ke ua amohela limpho; hobane mpho e foufatsa mahlo a ba bohlale, ʼme e khopamisa lipolelo tsa ba lokileng. U ee ka ho lokileng ruri, u tle u phele.” (Deut. 16:19, 20) “Ha u ahlola, u se ke ua ahlola ka bokhopo; u se ke ua talima tšobotsi ea ba eisehang, ʼme u se ke ua emela kahlolong ka ho ba hlompha ba leng baholo, u mpe u ahlole oa heno ka ho loka.” (Lev. 19:15) Kannete, ho arabela ha Iseraele ho phehelleng ‘ho etsa ka ho loka’ ho ka be ho ile ha ntlafatsa maemo mehleng ea Mikea. Khatello e ne e tla felisoa. Molao le taolo li ne li tla khutlisoa, ho isa khotsong, tšireletsehong le botsitsong.

8. (a) Ke neng ho hlokoang hore baholo ba Bakreste ba etse ka ho loka, ʼme ba ka etsa joalo joang? (b) Ho loka ho ameha joang ho utloeng keletso e ho 2 Ba-Thessalonika 3:11-15?

⁸ Bakreste, le bona ba tlas’a taelo ea ‘ho etsa ka ho loka.’ Baholo ba ka ʼna ba lokela ho lekanyetsa hore na ebe moena ea itseng oa Mokreste o tšoanelehela ho sebetsa e le mohlanka ea sebeletsang kapa e le moholo na. Ke feela ka ho itšoarella ka botšepehi Lentsoeng la Molimo le ka ho itšetleha ka tataiso ea moea oa oona ba ka sebetsang taba ena ba sa ee ka tšobotsi. Hape, ba ka ʼna ba biletsoa hore ba fihle liqetong mabapi le molumeli oa habo bona ea entseng libe tse tebileng. (1 Ba-Kor. 6:1-6; 1 Tim. 5:20-22, 24, 25) Ka mokhoa o tšoanang, Bakreste ka bomong ba ka ʼna ba be ba lekanyelitse hore na ebe boitšoaro bo se nang hlompho ba batho ba itseng ba kopanelang le phutheho bo ba etsa metsoalle e lakatsehang kapa che. Mona, le teng, tšebeliso e loketseng ea toka e tla hloka hore qeto e joalo e theoe Lentsoeng la Molimo e seng khethollong ea botho kapa maikutlong ao e seng a Mangolo. Sepheo sa ho khaotsa botsoalle le balumeli hammoho ba itseng ka mokhoa oa boithabiso e lokela e be takatso ea ho thusa ho ba hlakisetsa bohlokoa ba hore ba fetole litsela tsa bona. Ho ke ke ha bolela ho hloka mohau ho batho ba joalo, ‘ba tšoaroa joaloka lira.’ Batho bana ba lokela hore ba ʼne ba ‘eletsoe joaloka baena.’ (2 Ba-Thess. 3:11-15) Koana, hona ho boetse ho sebeletsa ho sireletsa ba latelang keletso ea Bibele tabeng ena hore ba ka oela tšusumetsong e sa haheng.—2 Tim. 2:20-22.

9. Ho latela Jakobo 4:11, 12, Mokreste a ka hloleha ho etsa ho loka ho molumeli oa habo joang?

⁹ Leha ho le joalo, haeba Bakreste ba ne ba ka ahlola liketso, sepheo kapa mokhoa oa bophelo oa molumeli oa habo bona ka melao eo e leng ea bona, ba etsa litekanyetso tseo e seng tsa molao tsa ho tšoaneleha ha motho, ba ne ba tla ipea molato o tebileng oa ho sitoa ho etsa ka ho loka. Hlokomela se boleloang ke morutuoa Jakobo ha a ngola, a re: “Le se ke la sebana, banab’eso. Ea sebang ngoan’abo, kapa ea ahlolang ngoan’abo, o seba molao, o ahlola molao; ʼme ha u ahlola molao, ha u moetsi oa molao, empa u le moahloli oa oona. ʼMei oa molao o mong, ke eena ea nang le matla a ho boloka le a ho timetsa; uena u mang, ha u ahlola ba bang?” (Jak. 4:11, 12) Batho ka bomong ba ahlolang ka mokhoa o joalo ba ipea ka holim’a molao oa lerato o fanoeng ke Molimo, ba ahlola molao oo oa lerato e se o sebetsang ho bona. (Matt. 22:36-39; bapisa 1 Johanne 3:16.) Ka ho etsa joalo, ba tla be ba tlola molao oa Molimo oa ho loka, o theiloeng leratong.

10. Ke hobane’ng ha ho sa lokela ho talima sehlopha se itseng sa batho e le se tšoaneloang haholo ke ‘litaba tse molemo’ ho feta sehlopa se seng?

¹⁰ Ho feta moo, e tla ba ho sa lokang hore Mokreste a talime sehlopha se itseng sa batho e le se tšoaneloang ke ‘litaba tse molemo’ haholo ho feta sehlopha se seng se itseng. Jesu Kreste o shoetse batho bohle, ʼme ke thato ea Molimo hore ho se ke ha bontšoa ho ea ka tšobotsi ha ho tsebahatsoa molaetsa oa poloko. (1 Tim. 2:3-6) Kahoo, linaheng tseo ho tsona ho leng bonolo ho etela batho malapeng a bona ka molaetsa oa Bibele, ka sebele e ka ba ho tumellanong le moea oa ho se ee ka tšobotsi ho kena monyakong o mong le o mong. Le hoja lihlopha tse itseng tsa batho li ka ʼna tsa sekamela ho mameleng haholo, ho hlokahala hore re ikalose ho ikutloeng re e-na le ho ea ka tšobotsi.—Bapisa Jakobo 2:1-9.

“U RATE BOKHABANE”

11. Tlhaloso ea polelo ‘ho rata bokhabane’ ke efe?

¹¹ Ntle ho ho hlokoa hore ho etsoe ka ho loka, Baiseraele ba ne ba laetsoe ‘ho rata bokhabane.’ Polelo ‘ho rata bokhabane’ hape e ka ʼna ea ngoloa e le ‘ho rata mosa o lerato,’ kapa, ‘ho rata lerato le tšepahalang.’ “Mosa o lerato” joalo ke kameho e sebetsang ea qenehelo kapa ho nahanela ba bang. Ke bokhabane bo iponahatsang ka liketso. (Bapisa Ruthe 2:8-20; 3:10.) ‘Ho rata bokhabane’ ho ne ho tla bolela ho nyakallisoa kapa ho thabisoa ke ho bontša bokhabane, ka thabo u phallela ba bang.

12. Ke’ng se bontšang hore Jesu Kreste o ile a fela a ‘rata bokhabane’?

¹² Jesu Kreste o ile a bea mohlala o motle haholo ntlheng ena. Leha a ne a khathetse ʼme a khathatsoa boinotšing, ka thabo o ne a arabela ho se hlokoang ke batho ba naha ea habo. Mabapi le lekhetlo le leng, Mangolo a ea tlaleha: “A ea le bona [baapostola] kathoko, lefeelleng le bapileng le motse o bitsoang Bethsaida. Eitse hobane batho ba tsebe, ba mo latela. Jesu a ba amohela, a ba bolella taba tsa ʼmuso oa Molimo, ʼme a folisa ba batlang pholiso.” (Luka 9:10, 11) Ho bontša bokhabane bo bokaalo ho ne ho thabisa Jesu.

13. Rona kajeno re ka bontša joang hore re ‘rata bokhabane’?

¹³ Haeba u morutuoa oa Jesu Kreste, na ‘u rata bokhabane’? Na u suthisetsa khatholoho ea botho le litakatso sebakeng sa bobeli e le hore u ka ba ka pelo eohle ho faneng ka thuso e bonahalang le ea moea ho ba e hlokang? Joaloka tabeng ea Jesu, na boikutlo ba qenehelo bo fehleha ka ho uena ha u bona boemo bo soabisang ba moea ba ba haelloang ke tsebo e nepahetseng? (Mar. 6:34) Na ka cheseho le ka tlhasimoloho u isetsa ba bang matšeliso a moea, ho kopanyelletsa metsoalle le beng ka uena? Na u beetse kathoko nako e utloahalang khoeli e ʼngoe le e ʼngoe ho ba le karolo e molemo bopaking ba pontšeng? (Bapisa Tšenolo 22:1, 2, 17.) Ha u bona balumeli hammoho le uena kapa ba bang ba hlile ba hloka nameng, na u susumeletseha hore u ba phallele? (Liprov. 3:27, 28; 2 Ba-Kor. 8:1-4; 9:6-12) Ka sebele, hona e lokela hore e be taba haeba kannete re ‘rata bokhabane.’

“TSAMAEA KA BOIKOKOBETSO LE MOLIMO OA HAO”

14. Kutloisiso ea lentsoe la Seheberu le ngotsoeng e le “boikokobetso” ke efe?

¹⁴ Boprofeta ba Mikea bo boetse ba khothatsa Baiseraele hore: “tsamaea ka boikokobetso le Molimo oa hao.” Kaha lentsoe la Seheberu le ngotsoeng e le “boikokobetso” ho Mikea 6:8 le hlaha feela mona le ho Liproverbia 11:2, tlhaloso e feletseng ea lentsoe ha e lemohehe habonolo. Hamorao mengolo ea Bajode e supa hore lentsoe lena la Seheberu le fetisa khopolo ea tlhoeko le tlhompheho. Septuagint Version le “Syriac” li fana ka maikutlo a ho “lokela” le “ho itokisetsa” ho tsamaea le Molimo. Kahoo, ho e-na le hore e be feela taba ea boikokobetso, ho tsamaea le Jehova ka boikokobetso ka ho totobetseng ho akarelletsa ho ba ea loketseng, ea sa iphahamisang, ea seng boemong ba ho itšepa bo uena pel’a hae.

15. Joalokaha ho bontšitsoe tabeng ea Henoke le Noe, ho boleloang ka ‘ho tsamaea le Molimo’?

¹⁵ Polelo ‘ho tsamaea le Molimo,’ e hlaha qalehong haholoanyane tlalehong ea Bibele. Ka mohlala, moprofeta Henoke le mopatriareka Noe ho boleloa e le ba tsamaileng le Molimo. Mabapi le Noe, rea bala: “Noe e ne e le motho ea lokileng, ea khabane mehleng ea hae; ʼme Noe o na a tsamaea le Molimo.” (Gen. 5:24; 6:9) Henoke, le eena “o khahlisitse Molimo.” (Ba-Heb. 11:5) Ka baka leo, ho tsamaea le Molimo ho akarelletsa ho itšoara joalokaha e ka re moo o leng teng, re lumellana le thato ea oona. Henoke hammoho le Noe ba ile ba thabela katamelano e khethehileng le Jehova Molimo ka baka la tumelo ea bona le boitšoaro bo otlolohileng.

16. (a) Haeba re tla ba le boikokobetso ho tsamaeeng le Molimo, ʼnete e lokela ho ba efe ka boitšoaro ba rona? (b) Ke molemo ofe o ka hlahisoang ke mohlala o rorisoang oa ho phela oa Mokreste?

¹⁶ Hore Bakreste ba “ne ba be boemong bo tšoanelehang ho ʼna ba thabela katamelano le Jehova Molimo, ba tlameha ho ikokobetsa ho isa ntlheng ea ho tsamaea le oona, ba lula ba halalela, ba sa iphahamise ba bile ba hlompheha mahlong a hae. Mangolo a ea eletsa: “Le be le motsamao o motle har’a bahedene, hore tabeng tseo ba le sebang ho tsona, joale ka hola le le lisinyi, ba rorise Molimo mohla o ba etelang, ha ba bontšisa mesebetsi ea lona e metle.” (1 Pet. 2:12) E, mohlala o motle bophelong ba Bokreste o phaella matla boboleling ba pontšeng ba ‘litaba tse molemo.’ O paka hore borapeli ba ʼnete bo ama bophelo ba batho hore bo be molemo ʼme o ka ’na oa khutsisa batho ba emelang hampe barutuoa ba ʼnete ba Jesu Kreste. (1 Pet. 2:13-16) Ha e le hantle, ba emelang Bakreste hampe joalo ba ka ʼna ba ananela ho fosahala ha tsela ea bona ʼme, ka nako ea teng, bona ka bobona ba fetoha barorisi ba Jehova Molimo.

17, 18. (a) Joalokaha ho totobala boprofeteng ba Mikea le Jakobo 1:22-25. ke’ng seo Jehova a se batlang ho bohle ba tla khahleha mahlong a hae? (b) Ho tsamaea le Molimo ha Henoke le Noe ho bontšitse ntlha eona eo joang?

¹⁷ Mantsoe a bululetsoeng a boprofeta ba Mikea ha a siee pelaelo ka ʼnete ea hore ketso e ea hlokahala ho bohle ba batlang ho khahlisa Jehova Molimo. Ntlha eona eo e etsoa ke morutuoa Jakobo, a re: “Le be baetsi ba lentsoe, e seng bautloi feela ba ithetsang. Hobane motho, ha e le moutloi oa lentsoe, e seng moetsi oa lona, o joale ka motho ea iponang seiponeng tšobotsi eo a tsoetsoeng ka eona. Ere hobane a ipone, o ee a tlohe, a lebale hang hore ke motho ea joang. Empa ea shebisisang molaong o phethehileng, e leng oa tokoloho, ʼme a tiisetsa teng, e se moutloi ea hakoang, empa e le moetsi ea sebetsang, motho eo o tla ba le lehlohonolo ho etseng ha hae.”—Jak. 1:22-25.

¹⁸ Ho hang ha hoa lekana ho rapela, ho bala Bibele, ho ba teng libokeng tsa Bokreste ʼme ha u le moo u mamele ka hlonepho se boleloang. Bophelo ba rona bo lokela ho bontša hore re etsa ka ho loka, re rata bokhabane ʼme re tsamaea ka boikokobetso le Jehova. Ho tsamaea ha Henoke le Noe ka bokhabane ba tsamaea le Ea Holimo-limo ho ne ho akarelletsa le tšebetso e chesehang. Henoke o ne a profeta ntle ho tšabo, a bolella banyefoli ba mehleng ea hae hore Jehova o ne a tla liha kahlolo ka likete-kete tsa mangeloi. (Juda 14, 15) Noe ha a ka a nka karolo feela ho haheng areka e tla pholosa lelapa la hae le mefuta e meholo ea liphoofolo, empa hape ‘e ne e le ʼmoleli oa ho loka,’ a utloahatsa temoso ea timetso e tlang ho lithaka tsa hae.—2 Pet. 2:5.

19. Ke lipotso life tseo re ka ʼnang ra ipotsa tsona ho lekanyetsa hore na re phela tumellanong le Mikea 6:8?

¹⁹ Kannete, barutuoa ba Jesu Kreste ha ba rate ho ithetsa hore ba nahane hore ho ba ha motho le botho bo khahlisang le ho kopanela borapeling ba pontšeng li lekane hore motho e be ea amoheloang ke Jehova Molimo. Qenehelo e sebetsang bakeng sa ho ameha ka batho ba bang e lokela ho totobala. Na ke ʼnete ka uena? Na u ithaopela le ho chesehela ho arabela ho se hlokoang ke ba bang nameng le moeeng, u etsa joalo ntle ho khethollo? Na ka cheseho u ntšetsa pele taelo ea ho bolela le ho etsa barutuoa? (Matt. 28:19, 20) Na boitšoaro ba hao u le mohlanka oa Molimo ke bo tšoanelehang hore bo ka etsisoa? Haeba ho le joalo, u phela tumellanong le mantsoe a bululetsoeng a ngoliloeng ho Mikea 6:8.

[Setšoantšo se leqepheng la 11]

Ho etela lelapa le leng le le leng ka ‘litaba tse molemo’ ho bontša ho se ee ka tšobotsi

[Setšoantšo se leqepheng la 12]

Jesu o ne a thabisoa ke ho bontša bokhabane ka ho phekola ba kulang

[Setšoantšo se leqepheng la 13]

E le ‘ʼmoleli oa ho loka,’ Noe a fana ka temoso e sale pele ka Moroallo