Thapelo ‘Mehleng Ena ea Bofelo’
“Falimehang ke hona, ʼme le rapele ka mehla.”—Luka 21:36.
1. (a) Ke hokae moo Luka ka lekhetlo la pele a bolelang thapelo? (b) Jesu o arabetse kōpo joang: “Morena, re rute ho rapela”?
LE HOJA ho boleloa ka thapelo pelenyana Evangeling ea Luka mabapi le “thapelo” ea Zakaria ho Molimo (ho khaolo ea 1, temana ea 13), ke khaolong ea 11 moo Jesu a buang ka taba ena haleletsana. Ha a qala, Jesu o arabela kōpo e entsoeng ke morutuoa e mong oa hae, a re: “Morena, re rute ho rapela, joale ka ha Johanne le eena a rutile barutuoa ba hae.” (Luka 11:1) Jesu a arabela:
“Ha le rapela, le n’o re: Ntat’a rōna ea maholimong, lebitso la hao a le ke le khethehe; ho tle ʼmuso oa hao; thato ea hao e etsoe lefatšeng joale ka ha e etsoa leholimong; u re fe, ka matsatsi ʼohle, bohobe ba rōna, bo lekanang letsatsi le leng le le leng; u re tšoarele libe tsa rōna, hobane le rōna re tšoarela bohle ba re sitetsoeng; u se ke ua re isa molekong.”—Luka 11:2-4.
2. (a) Lebitso la Molimo le hlomphuoa joang kahoo, hona tumellanong le mangolo afe? (b) Ke boemo bofe bo hananang le boo bo teng lefatšeng, hona bo tla phekoloa joang?
2 Ho tšoana le mangolo a ho 1 Marena 8:41-43 le Esaia 56:6-8, a boletsoeng sehloohong se fetileng, hlokomela ho etelletsoa pele ha lebitso la Ntate ho etsoang ke Jesu. Lebitso la Jehova ruri ha lea halaletsoa lefatšeng la kajeno. Moea oa bochaba, oa ho iketelletsa pele le oa ho ikhotsofatsa, khotso e le teng ka ‘sebopeho sa borapeli empa ho latoloa matla a bona,’ le maemo a mang a joalo a etsa hore lebitso la Molimo le rohakoe le ho hlompholloa kapa le hlokomolohuoe ho hang. (2 Tim. 3:5) Kahoo Molimo o tlameha ho halaletsa lebitso la oona karabelong ea thapelo ena. (Ezek. 36:23) Boemo bo hlabisang lihlong ba litaba bo tla phekoloa ha ʼmuso oa Molimo, matsohong a Kreste Jesu, o nka bohato ho loantša lichaba le babusi ba tsona, joalokaha ho hlalositsoe ka ho hlakileng ho Pesaleme ea 2.
3. Ntlheng ena, ke temoso efe le pallo tse fanoang ke Petrose?
3 Lintho tsena li etsahala ka letsatsi la Jehova, leo hona joale le leng haufi haholo, joalokaha boprofeta ba Bibele bo ntseng bo phethahala bo bontša ka ho hlakileng. Ka baka leo ke hantle ha re ela hloko keletso e bululetsoeng ea Petrose le temoso, a re:
“Le ntse le lebeletse ʼme le akofisa ho tla ha letsatsi la Molimo, leo maholimo a tla felisoa ke ho cha ka Iona, ʼme metheo e tla qhibiliha ke ho cha! Empa re lebeletse, ka pallo ea oona, maholimo a macha le lefatše le lecha moo ho loka ho ikahetseng teng. Ka baka leo, baratuoa, ereka ha le lebeletse tse joalo, itiiseng hore le tle le fihleloe ke eena le e-na le khotso, le se na letheba le sekoli.”—2 Pet. 3:12-14.
4. Likōpo tse peli tsa pele li amahane joang haholo Thapelong ea Morena, ʼme hona ho re thusa joang mabapi le likōpo tse ling?
4 Ha ho finyelloa lintho tsena kaofela, lebitso la Molimo le tla tumisoa le ho halaletsoa ka ho feletseng. Ke ka baka leo likopo tse peli tse ho Luka 11:2 li matahaneng hammoho ʼme li tla pele Thapelong ea Morena. Tsena ke tsona liketsahalo tse khōlō ka sebele bakeng sa mehla ea rōna le nako e tlang e haufinyane. Ho li hopola haholo ho tla thusa ho ba le pono e lekalekaneng ea seo re se hlokang tsatsi le leng le le leng le mathata ao joale a boleloang thapelong eo. Ho e-na le ho ikhaba bōrōna, e leng ho bonolo haholo, pele re tla ipotsa: Ke boikutlo bofe le ketso tse etsoang ke ʼna tse tla lumellana le thato ea Molimo, joalokaha e thathamisitsoe Lentsoeng la oona, ʼme, kahoo, tse tla tlotlisa lebitso la hae?
HO TIISETSA KA SEBETE HOA PUTSA
5. (a) Molao o akaretsang ke ofe setšoantšong sa Jesu mabapi le ba sebelisitsoeng? Qotsa mohlala. (b) Ho Luka 11:5-8, ho bonoa batho bafe, hona ba nka karolo efe?
5 Kamorao ho sena, Luka joale o bolela ka papiso e ileng ea etsoa ke Jesu, e nang le tšobotsi e sa tloaelehang. Ka kakaretso, ha ho sebelisoa motho a le mong kapa ba bangatanyana papisong, e mong le e mong o lumellana haufi le motho ea joalo. Haeba, ka mohlala, ho tšoantšetsoa Ntate oa leholimo, joaloka papisong ea ngoana ea lehlasoa ho Luka 15:11-32, joale ha ho bothata boo re thulanang le bona ho bona kamoo ntate oa ngoana eo, seo a se buileng le ho se etsa, ka ho loketseng a tšoantšetsang Ntate oa leholimo. Hoo ho ke ke ha boleloa joalo, leha ho le joalo, tabeng e latelang ea setšoantšo sa Jesu:
“Ekare ha e mong ho lōna a e-na le motsoalle, ʼme a ea ho eena bosiu bo boholo, a re ho eena: Motsoalle, nkalime mahobe a mararo; hobane molekan’a ka oa moeti o fapohetse ha ka, ʼme ke hloka see nka se beang pel’a hae; ʼme eo, ea leng kateng, ha a ka a mo fetola, a re: Se nkhathatse, hobane monyako o se o koetsoe, ʼme bana ba ka ba banyenyane ba robetse le ʼna liphateng, ke sitoa ho tsoha ho u fa; ke re ho lōna: Leha a na a ke ke a tsoha ho mo fa kahobane ke motsoalle oa hae, o tla tsoha, a mo fe hohle hoo a ho hlokang ka baka la phehello ea hae.”—Luka 11:5-8.
6. Motho e mong o hlile a ema a fapane le Jehova joang moo, ʼme moo Jesu o ne a hatisa eng?
6 Mona re bona hore ea neng a le boemong ba ho nea ea hlokang pele o ne a tiile a hana ho nka bohato leha e le bofe, a re: “Se nkhathatse.” Ho hang o ne a sa utloisise. Ho e-na le ho iponahatsa a tšoana le Ntate oa leholimo, o ema a fapane ho hang. Ka ho etsa joalo, taba kholo ea setšoantšo ea tiisoa haholoanyane. Hoja monna eo ea neng a se a le liphateng le lelapa la hae a ne a utloisisa hore a ka tsoha ʼme a fana ka se hlokoang, ho ne ho ke ke ha hlokahala “phehello” ea ea kōpang. Ke sona se neng se hatisoa ke Jesu.
7, 8. Mantsoe a tsoelang pele a Jesu a tiisa hona joang, ʼme hona ho re khothatsa haholo joang?
7 Hona ho tiisoa ka ho hlakileng ke mantsoe a latelang a Jesu, a re: “Le ʼna ke re ho lōna: Kōpang, ʼme le tla fuoa; batlang, ʼme le tla fumana; kokotang, ʼme le tla buleloa.” (Luka 11:9) Joale, ha ho bapisoa, o qetella ka ho re, “ʼMe ha esita lōna ba lonya, le tseba ho nea bana ba Iona lintho tse molemo, Ntat’a lōna ea leholimong o tla fetisa hakakang ka ho nea Moea o Halalelang ho ba o kōpang ho eena!”—Luka 11:13.
8 Ak’u inahanele monna eo, “ka baka la phehello ea hae,” a ileng a fumana seo a neng a se batla bosiu bo boholo! Phehello ea hae ea mo putsa. Ke ho khothatsang hakaakang ho sebelisa seo Jesu a se sebelisitseng papisong eo: ‘Le ʼne le kōpe—le batle—le kokote.’ U se ke ua tela ho rapela kapa ua fokola tumelong ka baka la khanyetso e phehellang mosebetsing oa hao oa boboleli ba ʼmuso kapa oa ho etsa barutuoa, kapa ka baka la ho phela lelapeng le arohaneng, kapa ka baka la ho loana le bofokoli ba botho bo tebileng haholo ho feta kamoo u nahanang kateng.
9. Ke mehlala efe ea ho phehella thapelo le ketso a hlokomeloang ho Liketso 4:24-30 le Liketso 5:41, 42?
9 Mohlala o motle oa ho phehella joalo thapelong, o tšehelitsoe ke bohato bo loketseng, o bonoa mehleng ea pele ea phutheho ea Bokreste. Ha Petrose le Johanne ba tlaleha khanyetso eo ba bileng le eona pel’a Sanhedrin, hlokomela thapelo e kopaneng e ileng ea etsoa ho Liketso 4:24-30, haholo mantsoe a temana ea 29, a reng: “Joale, Morena, bona litšokelo tsa bona, ʼme u nee bahlanka ba hao matla a ho bolela lentsoe la hao, ba sa tšabe letho.” Nakoana kamorao ho moo, ha baapostola bohle ba shapiloe kamor’a hore ba boele ba be ka pel’a Sanhedrin, tlaleho, ho Liketso 5:41, 42, e re: “Baapostola ba tloha khotla, ba thabile kahobane ba entsoe ba tšoaneloang ke ho hlabisoa lihlong ka baka la lebitso la Jesu. Ha ba ka ba phetsa ka matsatsi ʼohle ho ruta le ho bolela tempeleng le ka matlung, hore Jesu ke Kreste.” Ha ho moapostola le ea mong ea kileng a utloa khanyetso e phehellang ho feta moapostola Pauluse, ʼme o bile a ngola hore: “Nka etsa tsohle ka Kreste ea mphang matla.”—Ba-Fil. 4:13.
‘BOHLOKOA BA HO RAPELA KA MEHLA HO SA KHATHALOE’
10. A kenyelletsa setšoantšo se seng se phahamisang thapelo, Luka o tlaleha Jesu a itse’ng, a supa phethahatso efe e habeli?
10 Ha a le haufi le ho qeta tšebeletso ea hae ea lefatšeng, Jesu o ile a fana ka mohlala o matla haholoanyane oa ho sebelisa papiso setšoantšong e le hore a ka hatisa, joalokaha Luka a hlokomela, a re: “Le hona Jesu a ba bolella setšoantšo sa hore, e ka khona ba rapele ka mehla, ʼme ba se ke ba khathala.” (Luka 18:1) Pele, leha ho le joale, re tla nahana ka hore na ke eng e entseng hore ho etsoe setšoantšo sena. (Hangata, ka ho thahasellisang, Luka o ne a bolela lebaka la ho etsoa ha litšoantšo tse itseng, joalokaha ho ka hlokomeloa ho Luka 18:9 le 19:11.) Ha re sheba hape ho Luka 17:22-37, re hlokomela hore Luka o ne a tlaleha ka se boletsoeng ke Jesu mabapi le maemo a neng a tla busa ha a ‘lahloa ke moloko ona.’ (Luka 17:25) Le hoja mantsoe ana a Jesu, a lumellanang ka karolo e ʼngoe le Mattheu khaolo ea 24, a ile a phethahala mehleng ea hae, a isa bofelong ba tsamaiso eo ea Sejode ea lintho, a na le phethahatso e kholoanyane mehleng ena ea rōna ea joale, ‘mehla ea bofelo’ bakeng sa tsamaiso ea hona joale ea lintho.—Dan. 12:4.
11. (a) Maemo kajeno a tšoana le a mehleng ea Noe le Lota joang? (b) Jesu o hlile a hlokomela eng ka ho khethehileng, ʼme na hona ho na le ho tšoanang le hona kajeno?
11 ʼMe maemo a busang ke afe har’a batho ba moloko ona oa kajeno? E, tsatsi le leng le le leng ho ntse ho tšoana haholoanyane le mehleng ea Noe ha ‘Molimo o talima lefatše, ʼme o bona hoba le bolile, le hoba nama eohle e sentse mokhoa oa eona lefatšeng’ ʼme lefatše le ne le “tletse ho bolaeana.” (Gen. 6:12, 13) Leha ho le joalo Jesu ha a ka a supa lintho tseo, empa, ho e-na le hoo, a bolela ntho e ʼngoe hape ea bohlokoa haholoanyane. Ke efe eona eo? Batho ka nako eo ba ne ba tšoarehile ka ho feletseng ʼme ba khotsofetse ke mokhoa oa bophelo oa tsatsi le leng le le leng ka lintho tse kang ‘ho ja le ho noa, ho nyala le ho nyalisa.’ ‘Ho tšoana le mehleng ea Lota’ ha lintho tse ling hape tse kang ho reka, ho rekisa, ho lema le ho haha li thathamisitsoe. (Luka 17:26-29) Ho e-na le ho ameha le ho nyarosoa ke maemo a busang a bokhopo le pefo, boikutlo ba bona ba tšoauoa ka boiphapanyo. Ha e le ka bopaki bo ileng ba fanoa ke Noe, ka polelo le ka ketso ho hahoeng ha areka, “[batho] ha ba ka ba lemoha.” (Matt. 24:39; 2 Pet. 2:5) Ruri ho ka ʼna ha boleloa joalo ka boikutlo ba batho ka kakaretso kajeno, haholo mabapi le bopaki bo etsoang lefatšeng lohle bo matla ba ʼmuso oa Molimo, joalokaha bo hlile ba boleloa ho Mattheu 24:14. Ba bangata ho hang ha ba thahaselle; ba na le ho hongata hoo ba ka sebelisang nako ea bona le tlhokomelo ho hona. Hlokomela, hape, ntlha e entsoeng ke Jesu mabapi le linako tse boletsoeng ka holimo, hore ho phethahatsoa ha kahlolo ea ho qetela ho ile ha tla ka tšohanyetso e sa lebelloang “ba ba ba timetsoa kaofela.”—Luka 17:27, 29.
12. Ho theiloe ho Luka 17:31-37, re ka ithuta eng le ho e sebelisa?
12 Re na le tšepo ea hore u har’a ba ʼmaloa ba amehileng ka boemo bo lefatšeng kajeno ʼme u utloisisa ho hlokomela seo Lentsoe la Molimo le se buang ka lintho tsena. Haeba, joalokaha ho bontšoa ho Luka 17:31-37, u bona ho hlokahala hore u khaotse ho ba karolo kapa motšehetsi oa tsamaiso ea hona joale ea lintho ʼme u se u sa batle ‘ho ipolokela moea (bophelo) ba hao’ bakeng sa hao u le mong, se ka senya nako, he. Ema ka lehlakoreng la Jehova le ʼmuso oa hae. Neelana ka litebello tsa bophelo ba hao, tsa hona joale le tsa nakong e tlang, boineelong ho Jehova ho etsa thato ea hae. U se ke ua hetla morao ka ho hlōloheloa seo u se siileng morao. “Hopola mosali oa Lota.” (Luka 17:32, NW) Ho e-na le hoo, itsebahatse le bao, joaloka Jesu a boletse, “hase ba lefatše, joale ka ha le ʼna ke se oa lefatše.”—Joh. 17:14-17.
13. Lintlha tse ka sehloohong ke life setšoantšong se ho Luka 18:2-5?
13 Joale re fihla setšoantšong se ho Luka 18:2-5, ho sa na le mokopi hape, ka lekhetlo lena oa mohlolohali, hape le monna ea boemong ba ho fana ka seo mohlolohali a se hlokang, a tšoantšoa le “moahloli . . . ea sa tšabeng Molimo, ʼme le batho a sa re letho ka bona.” Qetellong ka ho teneha a bona hore o etsa toka, joalokaha moahloli a itse, “kahobane mohlolohali eo oa nkhathatsa.” Ha ho pelaelo ka phehello ea hae, e bontšang ‘bohlokoa ba ho rapela ka mehla ho sa khathaloe.’
14. (a) Ha ho bapisoa le moahloli “ea sa lokang,” Jesu o itse Molimo o tla etsa joang? (b) Re ka ithuta eng ka see ha ho talingoa nako?
14 Moahloli eo o tšoana le monna ea ho Luka 11:7, hobane mona le teng re bona papiso e feletseng ea hore na Molimo o joang. Hlokomela, hape, lithlaloso tse tsoelang pele tsa Jesu ka hore na Molimo o tla etsa joang, a mo bapisa le Moahloli eane ea sa ‘lokang.’ Molimo ‘o ahlolela bakhethoa ba hae ka ho loka, leha o lieha ho halefa ka baka la bona.’ Hona o tla ho etsa ka ‘potlako.’ (Luka 18:6-8) Re ka ithuta ho hongata litlhalosong tsena. Ke ka baka leo re tlamehang ho talima lintho tsohle ka pono ea Molimo, le haeba ke tabeng e itseng ea botho kapa ho sebetsahaleng ha morero oa oona. Joalokaha Petrose a hlalositse: “Morena ha a liehise lipallo tsa hae, joale ka ha ba bang ba lekanya hobane tieho e teng; empa o sa mameletse ka baka la rōna [batho ba Jehova]; hobane ha a rate ha ba bang ba ka timela empa o rata hore bohle ba finyelle pakong.” Le joalokaha moprofeta a ile a ngola mantsoe a Jehova mabapi le ho phethahala ha pono, a re: “Ha e ka lieha, u e lebelle, hobane e tla etsahala ruri, e ke ke ea [lieha].”—2 Pet. 3:9; Hab. 2:3, bapisa le NW; bona hape Tšenolo 6:10, 11.
15. Hona ho ama mathata a botho joang, ʼme ho ka qojoa eng?
15 Mathateng a botho, re ka tiisetsoa hore tieho leha e le efe e ka bonahalang eka e teng karabelong ea likōpo tsa rōna ha e tsoaloe ke ho hlōleha kapa ho se ithaopele ha Molimo. Haeba, joaloka mohlolohali, re tlatlapuoa kapa re hlorisoa, re ee re bontše joang hore re lumela hore toka e tla etsoa? Ha rea lokela ho ʼna re rapela feela, empa hape re sebetse ka botšepehi. Haeba re sekisetsa e le hore re ka qoba ho hlorisoa, he, koana, ho ke ke ha hlokahala hore re ʼne re rapele. Hona ho ke ke ha bontša ho haelloa ke tumelo feela, empa hape ho ka fella ka ho lahleheloa ke bopaki ba ho ba e mong oa bahlanka ba Molimo ba Bakreste.—2 Ba-Kor. 11:23-27; 2 Tim 3:12.
16. Potso e ho Luka 18:8 e ka nkoa e le phephetso ea botho joang ka molemo ho rōna?
16 Ho ka ʼna ha bonahala ho makatsa hore Jesu a ka qetella litlhaloso tsa hae ka potso e reng: “Leha ho le joalo, etlare ha Mor’a motho a e-tla, na o tla fumana tumelo e le teng lefatšeng na?” (Luka 18:8) A e tlohela e le potso e ahlameng joalo. Le hoja hona ho ka ʼna ha bonahala ho kenyelletsa hore tumelo e ne e ke ke ea e-ba ngata ka nako eo, re ke ke ra fihlela qeto ea hore tumelo ea ʼnete e ke ke ea fumanoa ho hang kae kapa kae lefatšeng. Ho e-na le hoo, re ka e nka e le phephetso ea botho. Ha rea lokela ho itšepa haholo ka bōrōna, ho sa tsotellehe hore na re bile bahlanka ba ineetseng ba Jehova ka nako e telele hakae. (1 Ba-Kor. 10:12, 13) Hase feela hore re tlameha ho ela hloko keletso e ho Luka 11:9 ho ʼna re ‘kōpa—re batla—re kokota,’ empa hape, joalokaha Jesu a hatisitse tlhokahalo ea kajeno, re tlameha ho ‘batla, ho ’na re falimeha ho lebela.’ Hona ho biletsa ho phehella kahohle, ho tiisetsa likhatello tsa boiphapanyo le khanyetso tse tsoang ka ntle, hape le ho hlōla mefokolo e hlahang ka hare.—Mar. 13:32-37; 14:38.
17. Ho feta tsohle, re ka rapella eng, re latela mohlala oa mang?
17 U ʼne u rapele ka tumelo hore u ka ipaka u tšepahala ʼme u se ke ua checha. (Ba-Heb. 10:39) Tekong e matla, u ʼne u rapele, joalokaha ho entse Jesu ka hora eo a neng a tsielehile haholo ka eona, hore ho feta tsohle thato ea Molimo e etsoe. (Matt. 26:38-44) Molimo o khahlisoa haholo ke lithapelo tse joalo. O re lumella joaloka bakōpi hore re bontše botebo ba kameho ea rōna, botebo ba takatso le bonnete ba tšusumetso. Eena, le hoja a mamella, o tla ahlola ka toka ka potlako ha nako e fihlile.—Pes. 55:16, 17; Ba-Roma 1:9-12.
‘LE FALIMEHE KA MEHLA, LE NTSE LE RAPELA’
18. (a) Ke temoso efe le khothatso tse tobileng tse fanoeng ke Jesu qetellong ea boprofeta ba hae? (b) Ke ka tsela efe re ka phonyohang tsohle “tse tla etsahala”?
18 Tumellanong le sena, Evangeli ea Luka e tlaleha kamoo Jesu, ha a phetha boprofeta ba hae bakeng sa mehla ea hae le ea rōna, a ileng a lemosa ka ho etsa lintho ka ho tlolisa le ka ho imeloa ha lipelo tsa rōna “ke ho ja le ho noa hampe, le ke lipelaelo tsa bophelo bona, ʼme letsatsi leo [la kahlolo ea ho qetela] la [re] tšoara sehlōhō.” Joale a totobatsa hore: “Falimehang ke hona, ʼme le rapele ka mehla [le rapella eng?], le tle le neoe tokelo ea ho phonyoha ho tseo tsohle tse tla etsahala, le ea ho ema pel’a Mora motho.” (Luka 21:34-36) Hona ha ho bolele hore re tlosoa ponahalong ea se etsahalang, empa, ho ena le hoo, hore re qoba ‘ho tšoasoa hampe,’ joaloka sefing, kapa ra fumanoa re le har’a basele. Ho e-na le hoo, ka tieo eohle re tlameha hore ka linako tsohle re rapele le ho leka ho sebetsa tumellanong le lithapelo tsa rōna hore eke re ka fumanoa ‘re eme re amoheleha pel’a Mor’a motho.’
19. Ke lipotso life tse molemo tseo re ka ipotsang tsona ka thapelo, ʼme mohlala oa Nehemia ke thuso joang ho rōna?
19 Ha ho talingoa likhopotso tsena tse ngata kaofela tsa ho phehella le ho se tele, re rapela hangata hakae? Na ke feela ka linako tse boletsoeng tse kang lijong kapa libokeng? Na lithapelo tsa hao li tsoa kelellong ʼme li boleloe ka molomo, kapa na ‘u rapela ka mehla’ ʼme ka tieo u kope ho tloha pelong, mohlomong ka linako tse ling le ka “mefehelo e ke keng ea boleloa”? (Ba-Roma 8:26) Ho sa tsotellehe hore na ho hlokahala eng, u ka etsisa Nehemia joalokaha a ile a etsa a sa hlokomeloa ka pel’a morena: “Eaba ke rapela Molimo oa maholimo.” (Neh. 2:4) Thapelo ea hae ea tumelo ea arabeloa. Hopola, hape, hore le hoja u ka thusoa le ke lithapelo tsa ba bang, ha ho e mong ea ka hlang a u emela ho nka sebaka sa hao thapelong.