Khanya ea Mokete
1. Jerusalema e ne e fumana khanya e khethehileng joang ka mokete oa metlotloane, ’me Bajode ba ne ba itšoara joang tlas’a khanya ee?
MOKETE oa metlotloane e ne e le nako ea khanya e khethehileng bakeng sa “motse oa morena e moholo,” Jehova. (Matt. 5:35) Bosiu tempeleng ea Heroda, ka Lebaleng la Basali le neng le le ka bochabela ho aletare, ho ne ho le teng pontšo e sa tloaelehang. Liluloana tse khōlō haholo tsa mabone tse ’nè li ne li hlongoa moo. Se seng le se seng se e-na le merifi e meholo e mene. Hore ho tlatsoe merifi ka oli e tukang, ho ne ho sebelisoa lilere ho nyolohela ho tsona. Liaparo tsa khale tsa baprista li ne li sebelisoa e le likhole bakeng sa oli ea merifi. Khanya e neng e bontšoa ke merifi ena e 16 ea oli e tukang e ne e le matla ka ho lekaneng ho khantša Jerusalema eohle bosiu. Tlas’a khanya ena e hōlisitsoeng, banna ba Baiseraele ba ka Lebaleng la Basali ba ne ba tjeka kapa ba etsa menyakoe, ha basali ba shebelletse ba le holimo. Libini li ne li utloahatsa lipesaleme tse 15 (khaoh 120-134) ka liletsa tse letsoang ke Balevi. Thabo ena e ne e tšoarella ho fihlela hoseng.
2. Balichaba ba neng ba e-ea moketeng ba ne ba fumanoa hokae ka nako ee?
2 Balichaba ba sa bollang ba neng ba e-ba teng moketeng ba ne ba fella Lebaleng la Balichaba, le arotsoeng Lebaleng la Iseraele ka Mokoallo oa Majoe le Lebala le Ka ntle.—Hlokomela Liketso 21:28, 29, ho bontša lithibelo tse neng li etsetsoa Balichaba tempeleng.
3, 4. (a) Jesu o ile moketeng joang ka 32 C.E., ’me moo a re’ng e neng e ka hopotsa Bajode ka metsi a Siloe? (b) Ho ea ka Johanne 7:39, moo Jesu o ne a supa eng?
3 Ha ho talingoa litšobotsi tse tsebisahalang tse ileng tsa ekeletsoa moketeng oa metlotloane, re ka ananela lipolelo tse ling tse nakong tsa Jesu Kreste moketeng ona. O ketekile mokete ona ka lekhetlo la ho qetela hoetla ka 32 C.E. Kaha Bajode ba Jerusalema ba ne ba batla ho mo bolaea, Jesu o tlohile Galilea a le mong ’me a nyolohela moketeng ka ho ipata. Hoo e ka bang bohareng ba oona, ha re re, ka la 18 Tishri, a iponahatsa ’me a qala ho ruta batho, matšoele a ketekang tempeleng.
4 Letsatsi la ho qetela la mokete, Tishri 21, le ne le bitsoa ‘letsatsi le leholo la mokete.’ Ka letsatsi leo mohlomong Jesu a hopotsa batho ka ho tšeloa ha metsi a Siloe ha a re: “Ekare ha e mong a nyoriloe, a tle ho ’na, a noe. Ea lumelang ho ’na, linōka tsa metsi a kollang li tla kolla mpeng ea hae, joale ka ha Lengolo le boletse.” Ka seo Jesu a se boletseng moo, moapostola Johanne o etsa tlhaloso ena: “Ka taba eo, o na a lekanya Moea oo ba lumelang ho eena ba tlang ho o neoa; hobane Moea o halalelang o no o e-so ho hlahe, kahobane Jesu a na a e-so ho tlotlisoe.”—Joh. 7:37-39.
5. Mantsoe ao a hlollang a qalile ho fetoha ’nete neng, hona joang?
5 Mantsoe ana a hlollang a qala ho fetoha ’nete ka letsatsi la Pentekonta selemong se latelang, ha barutuoa ba ka bang 120, ba bokaneng tlung e ka holimo Jerusalema, ba fumana tšollelo ea moea o halalelang. Ho bona, ka sebele, linōka tsa metsi a bophelo tsa qala ho phala ha, ka lipuo tse ngata tse fanoeng ka mohlolo, ba bolela ‘limakatso tsa Molimo’ ho Bajode ba likete ba maketseng ba neng ba bokane hammoho ho tla ipontša se etsahalang.—Lik. 2:1-41.
6. Ka letsatsi la ho qetela la mokete, Jesu o itse’ng e neng e ka ’na ea hopotsa barutuoa ba hae ka khanya e khethehileng ea tempele?
6 Ka letsatsi la bosupa e leng letsatsi la ho qetela la mokete oa metlotloane, Jesu a bua ho ea pele ka seo mohlomong se ileng sa hopotsa barutuoa ba hae ka khanya e khethehileng e neng e bonahatsa mokete, e leng, ea liluloana tse ’nè tse telele tsa mabone tse ka lebaleng la Basali la tempele. Jesu a re: “Ke ’na leseli la lefatše; ea ntatelang a ke ke a tsamaea lefifing, empa o tla ba le leseli la bophelo.”—Joh. 8:12.
7. Ke hobane’ng ha Jesu a ne a ipitsa “leseli la lefatše” e ne e le ho loketseng moketeng oa metlotloane?
7 Hore Jesu a ipitse “leseli la lefatše” e ne e le ho loketseng haholo moketeng ona oa metlotloane, joalokaha mokete o ne o e-na le litšobotsi tsa mokete oa lefatše. Joang? Hobane molaong oa Molimo “molichaba” ea menyakong ea Baiseraele o ne a boleloa e le ea nang le tokelo ea ho kopanela moketeng, a thaba hammoho le batho ba khethiloeng ba Molimo.—Deut. 16:14.
8. (a) Ke’ng e neng e khethehile ka ho nyeheloa ha lipoho moketeng oa metlotloane? (b) Ka palo, hona ho lumellana joang le se ngotsoeng ho Genese khaolo ea 10, ho supa eng?
8 Ho ea ka Numere 29:12-34, palo e sa tloaelehang ea lipoho e ne e nyeheloa e le sehlabelo. Ka letsatsi la pele ho ne ho nyeheloa lipoho tse 13, ’me palo e theoloa ka e le ’ngoe ka matsatsi a latelang a tšeletseng, ho fihlela ha ho nyeheloa lipoho tse supileng ka letsatsi la bosupa le la ho qetela, e leng letsatsi leo ka lona Jesu a itseng: “Ke ’na leseli la lefatše.” Kahoo ka letsatsi la ho qetela la mokete ho ne ho tla be ho nyehetsoe lipoho tse 70. Palo 70 e ka aroloa ka 7 le 10, lipalo tsena ka bobeli li emela phetheho, ntho e feletseng, 7 e le phetheho ea moea ’me 10 e le ntho e phethehileng lefatšeng. Ka la 10 Tishri, Letsatsi la Lipheko, ho ne ho ile ha nyeheloa poho e le ’ngoe feela e le sehlabelo sa pheko. Empa nakong ea mokete oa metlotloane oa matsatsi a supileng, la 15 ho ea ho 21 Tishri, ho ne ho nyeheloa lipoho tse 70. E le tšoantšetso, tsena li ne li tla fana ka mali a lekaneng bakeng sa ho hloekisoa le ho pholosoa ha lefatše lohle la batho. Hona ho lumellana le se boletsoeng ho Genese khaolo ea 10. Mono mabitso a lihlooho tsa malapa le lichaba a fanoe, ho qaloa ka Noe ’me ho theosoa ho tla fihla ho bara ba hae ba bararo ho ea ho Jobabe. Hona ho fihla mabitsong a 70, ’me ho bonahala a koahela baahi ba lefatše ba nakong eo ea kamorao ho moroallo.
9. Jesu o itse ke “leseli” la mang, ’me batho bohle ba hloka eng bakeng sa ho fumana bophelo?
9 Kahoo, ka nako e tšoanelehang, e ne e le ho loketseng ka ho fetisisa hore Jesu Kreste a bolele, “Ke ’na leseli la lefatše,” e seng feela leseli la balateli ba tlotsitsoeng ba mehato ea hae. Ka melemo ea leseli, re hopola hore e bile kamor’a hore Molimo o re, “leseli ha le be teng,” le kamor’a hore a bōpe letsatsi, khoeli le linaleli ’me a etse hore li hlahise khanya e theohelang lefatšeng la rōna, moo a ileng a bōpa liphoofolo ’me qetellong monna le mosali ba phethahetseng, hore ba thabele leseli la bophelo. Kajeno, lefatšeng lena le fifetseng ke sebe le le arohileng ho Molimo, batho bohle ba boemong ba ho fumana molemo leseling le khanyang le tsoa ho Jesu Kreste, “leseli la lefatše.” Bohle ba hloka “leseli la bophelo.”—Joh. 8:12; Gen. 1:3.
MOKETE OA SEBELE OA METLOTLOANE
10. Ke ntlheng efe moo mokete oa metlotloane o tšoanang le mekete e meng e ’meli e tlileng pele, ’me ho hlokahala hore mona re nahanele mabaka afe?
10 Ho tšoana le mekete e ’meli e tlileng pele e khethiloeng ke Molimo bakeng sa batho ba oona, mokete oa metlotloane o lokela ho ba le tlhaloso ea sebele bakeng sa mehla ea rōna. Ka thabo o fela o e-na le phethahatso ea sebele. Joale, he, e qalehile neng? Hona re ka ho lekanyetsa joang? Ka mabaka a tšoantšetsang le a sebele, a pale.
11. Linnete tsa pale li bontša eng ka hore na ebe “kotulo” e boletsoeng ho Mattheu 13:39 e qalile ka selemo sa 1914 kapa che?
11 Ho Mattheu, khaolo ea 13, Jesu Kreste o re neile setšoantšo seo ho sona ho bontšoang ho bokelloa ha litholoana tsa masimo. Sena ke setšoantšo sa koro le mofoka. Ha a hlalosa litšobotsi tsa setšoantšo, Jesu o itse: “Kotulo ke bofelo ba lefatše.” (Matt. 13:39) Boprofeta ba Bibele le kemiso ea linako, hammoho le liketsahalo tsa pale, li paka hore bofelo ba tsamaiso ea kajeno ea lintho bo qalile ka 1914 C.E., hoetla leo ka lona, selemo seo ka sona ho ileng ha felella “mengoaha e baloang hasupa” ea puso ea Balichaba ea lefatše ntle ho ho kena-kena ha ’muso oa Molimo oa Messia. (Dan. 4:23-25) Na “kotulo” kapa pokello ea sehlopha sa “koro” sa Bakreste ba ’nete e qalile ka selemo sona seo? Che, hobane pale e bontša hore barapeli ba ineetseng ba Bakreste ba Jehova ba ile ba qhalanngoa nakong ea ntoa ea I ea lefatše e qalileng ka 1914. Phutheho ea bona e lefatšeng lohle ea senngoa ke lira tsa ’muso oa Jehova oa Messia, ’muso oa leholimo o neng o boleloa ka cheseho ke barutuoa bao ba tsoetsoeng ka moea ba tlotsitsoeng ba Jesu Kreste, Morena ea busang. Ho qhalanngoa ha phutheho ha qetella ho fihlile le hona ntlo-kholo ea batho ba ineetseng ba Jehova Brooklyn, New York, U.S.A., ka 1918.
12. Pokello e hlileng ea boleloa ke Jesu ho Mattheu 24:31 e qalile neng, ’me hona ha tšoaea ho qaleha ha mokete ofe?
12 Boprofeteng ba Jesu ba “pontšo” ea ho ba teng ha hae le ea bofelo ba lefatše lena, o itse, ho Mattheu 24:31: “O tla roma mangeloi a hae a letsang literompeta tse molumo o moholo, hore a bokelle bakhethoa ba hae meeeng e mene, ho qala pheletsong e ’ngoe ea maholimo ho isa ho e ’ngoe.” Mantsoe ao a hlile a bolela ho bokelloa ha “bakhethoa” ba Kreste ho tsoa libakeng tsohle tseo ba neng ba qhalanyelitsoe ho tsona. Ho bokelloa hona ho qalile selemong sa kamor’a ntoa sa 1919, hang-hang kamorao ho moo basebeletsi ba ntlo-kholo ea Brooklyn ba lokolloa teronkong ea nako ea ntoa ea Atlanta, Georgia, U.S.A. ka la 25 Tlhakubele, 1919. Kahoo e bile ka selemo seo se hopolehang mokete oa sebele oa kotulo, kapa oa metlotloane, o ileng oa qala ho sebetsa. Hona ha tšoauoa ka thabo e khōlō ea masala a tlotsitsoeng a “bakhethoa” ba Kreste lefatšeng ka bophara.
13. (a) Ha Jesu a bua ka kotulo ho Mattheu 13:39 o ne a bua ka ho kotuloa ha batho bafe? (b) Ke bafe ho ba joalo ba kotutsoeng kamor’a 1919?
13 Ho tiisa sena, re tlameha ho hopola lenane la lintho tse boimanyana. Ha Jesu a ne a re, “kotulo ke bofelo ba lefatše,” o ne a bua ka’ng? Ka ho bokelloa ha “bana ba ’muso,” ke hore majalefa a tsoetsoeng ka moea a ’muso oa leholimo. Seo ke sehlopha se tlotsitsoeng ka moea, se tšoantšelitsoeng ka koro, ’me ho bokelloa ha sona ho fela ho qalile selemo ka 1919. Ha nako e ntse e tsoela pele ho ile ha bokelloa ba bang ntle ho majalefa ao a ’Muso a neng a qhalantsoe ke liketsahalo tsa Ntoa ea I ea Lefatše. Nakong ea ho tloha ka 1919 ho ea pele ba bang ba likete ba emela ’muso o theiloeng oa Molimo ’me ba ineela ho Jehova, ba kolobetsoa, ba tsoaloa ka moea ’me ba tlotsoa ka moea oa Molimo, eaba ba ekelletsoa ho masala a pele. Bana ba ekellelitsoeng bocha, e le sehlopha, ba ile ba tšoantšetsoa pele ke batho ba totobetseng ba litšoantšiso tsa Bibele tsa pele ho Bokreste. Batho bana ba beang mohlala e bile Ruthe oa Moabe, eo e bileng molekane ea tšepahalang oa Naomi oa Mojode, matsal’ae, hape le Mofumahali Esthere, motsoal’a Mojode Mordekai, eo e bileng tona kholo ea ’Muso oa Persia tlas’a ’Musisi Assueruse, kapa Xerxese.
14. Kahoo, ke eng se tšoaeang ho qaleha ha mokete oa sebele oa kotulo, kapa oa metlotloane?
14 Ruthe le Esthere ka bobeli ba ile ba amana le lesika la borena la Davida le ho bolokoa ha lona ho theosa ho tla fihla ho tleng ha pele ha Jesu, “mor’a Davida.” (Matt. 1:1, 5; Ruthe 4:18-22; Esthere 4:13, 14) Ho bokelloa ha sehlopha sa Ruthe le Esthere, hammoho le masala a pele a tlotsitsoeng, ho tšoaea ho buloa ha mokete oa sebele oa kotulo, kapa oa metlotloane.
15. Mokete oa hoetla, e ne e le mokete oa bo-mang, ’me ke bo-mang ba neng ba laetsoe ho lula metlotloaneng nakong ea mokete?
15 Ntho e ’ngoe: Mehleng ea pele ho Bokreste ke Bajode ba tlhaho ba neng ba keteka mokete oa tšoantšetso oa metlotloane. Ke bona ba neng ba laetsoe ke Jehova ka Moshe hore ba o keteke. Kahoo nakong ea hoetla ha ho bokelloa ba ne ba bokana Jerusalema ’me ba lula metlotloaneng. Le bona baahi ba lulang Jerusalema ba ne ba etsa joalo. Mokete ona oa metlotloane o ne o hopotsa ka ntho e ’ngoe ea pelenyana. Efe? Levitike 23:42, 43 e-ea arabela, e re: “Ka matsatsi a supileng, le tla hlola metlotloaneng; bohle ba tsoaletsoeng naheng ea Iseraele ba tla hlola metlotloaneng, hore litloholo tsa lona li tsebe hoba ke ahellisitse bana ba Iseraele metlotloaneng, ha ke se ke ba ntšitse naheng ea Egepeta. Ke ’na Jehova, Molimo oa lona.” Bajode ba ahileng naheng ba etsa joalo.
16. (a) Tseleng e eang lefatšeng la Pallo, “letšoele le kopakaneng” le ne le phela joang le Baiseraele? (b) Tempeleng ea Heroda mehleng ea Jesu, khethollo e ne e bolokoa joang pakeng tsa Balichaba le Baiseraele?
16 Koana, “letšoele le kopakaneng” la bao e seng Baiseraele le ileng la ema le Baiseraele ’me la “ea le bona” le ile la tlameha ho lula litenteng le lona tseleng e eang Lefatšeng la Pallo. (Ex. 12:38) Empa taelo ea ho keteka mokete oa metlotloane ha e-ea ka ea tobisoa ho “letšoele le kopakaneng” empa ea neoa Iseraele. Leha e le hore Lefatše la Pallo le ne le neiloe “letšoele le kopakaneng” hore le le leme, empa le ile la aroleloa meloko e 12 eo e seng ea Balevi ea Iseraele, ’me molao oa tsosoloso ea naha oa Jubile o ne o sebetsa ho Baiseraele. Kahoo mokete oa kotulo ka ho khethehileng e ne e tla ba oa Baiseraele. Ka mohau “molichaba” o ne a lumelloa ho kopanela ho oona. Nakong ea mokete mehleng ea Jesu Kreste, bao e seng Bajode, kapa Balichaba, ba ne ba fella ka Lebaleng la Balichaba, Lesira la Majoe le Lebala le Ka ntle le ba arola Lebaleng la Iseraele. Sebaka sa bona se ne se le tlase-tlase mohahong ’ohle oa tempele ea Heroda.
BAKETEKI BA NKILENG MAKALA
17, 18. Ke bo-mang ba neng ba nka “lulab,” ’me maikutlo a eona a nkoa lengolong lefe?
17 Moketeng ka booona ke Baiseraele ba jarang hoo ho bitsoang “lulab” le ethrogs. Ho ba leseling la hore na ho ne ho le joang mehleng ea Jesu, re ka bala tlhaloso ea mokete oa Sejode joalokaha e fanoe ho Nehemia 8:14-18. “Lulab” e ne e le sehlopha sa makala a tsoang lifateng tse sa tšoaneng ’me moketeki oa Mojode o ne a e nka ka letsoho. Maikutlo a eona ho boleloa a fumanoa ho Levitike 23:40.
18 “Ka tsatsi la pele, le tla inkela litholoana tsa lifate tse ntle, le makala a lipalema, le mahlaku a matenya a lifate le a meluoane ea nōka, ’me le tla ithabela pel’a Jehova, Molimo oa lōna, ka matsatsi a supileng.”
19. (a) “Lulab” e ne e etsoa ka’ng? (b) Baiseraele ba ne ba nka “lulab” ka mokhoa ofe, le ka pina efe?
19 “Lulab” e ne e etsoa ka (1) mahlomela a sefate sa palema a sa fupile, (2) makala a mararo a “myrtle” a nang le makhapetla a harahaneng, le (3) makala a mabeli a sefate sa moluoane, ao thupa ea oona e nang le bofubelu le seo makala a sona a lelefetseng a feletseng hantle. Baiseraele ba neng ba nkile “lulab” ba ne ba li tsokotsa ’me ba li lahla qetellong ea mokete. “Lulab” ena le ethrog (tholoana ea mofuta oa soere feela e se na ntlha e kang tlhoko joaloka soere) li ne li nkuoa mokolokong o neng o potoloha aletare ka Lebaleng la Baprista, ha ho potolohuoa hang tsatsi le leng le leng ho a pele a tšeletseng ’me ka makhetlo a supileng ka letsatsi la bosupa le la ho qetela. Kamor’a moo tholoana ea ethrog e ne e jeoa. Ho phaella mokolokong ho ne ho binoa ka mokhoa o pheta-phetang Pesaleme ea 118:25: “Oho Jehova, kea u rapela, u boloke! Oho Jehova, kea u rapela, u hlohonolofatse!” Balichaba, ka lebaleng la bona, ba ne ba ke ke ba kopanela ho sena sohle.
20. Mehleng ea ’musisi Nehemia, o ile a bolella Baiseraele hore ba be moeeng ofe Jerusalema moketeng oa bona oa metlotloane?
20 Moketeng oa metlotloane mehleng ea Nehemia, eena e le ’musisi a re ho Baiseraele ba khutlileng botlamuoeng Babylona: “Tsatsi lena ke le khethetsoeng Morena oa rōna; hape, le se ke la itlhomolisa; hobane thabo ea Jehova ke matla a lōna.” (Neh. 8:10) Baiseraele ba moea ba kajeno ba lokela ho ba le boikutlo bo tšoanang ho tloha ha ba lopolotsoe Babylona e Moholo ka selemo sa 1919 C.E.
21. (a) Ke hobane’ng ha masala a Baiseraele ba moea a ile a thaba selemo ka 1919? (b) A ne a hopotse hore ke mosebetsi ofe o teng, empa oa bonahala o le joang?
21 Ho totobetse hore ho phethahala ha mokete oa metlotloane ho qalile selemong seo sa kamorao ho ntoa. Ha ho talingoa seo ba neng ba se lebelletse pele ho selemo seo sa ntoa, “bana ba ’muso” ba moea ba ile ba makala ho se hokae ka ho kenngoa nakong eo e kamor’a ntoa. Empa ba thaba haholo ha ba lopolotsoe Babylona e Moholo selemo ka 1919. Ka potlako ba ikenya mosebetsing oa kotulo oo joale o neng o le ka pel’a bona. Pele ba nahana hore e tla ba feela “mosebetsi oa ho khoahlapisa.” Ka sena, bona Watch Tower ea May 1, 1919, le sehlooho sa eona “Kotulo e Felile—Ho tla Latela Eng?,” leqephe 138, serapa 1. Leha ho le joalo, ho fapana le mosebetsi oa ho khoahlapisa, oa fetoha kotulo e feletseng.
22. Na masala a tlotsitsoeng a ne a rerile ho lula lefatšeng la paradeise ka ho sa feleng, ’me a italima joang har’a tsamaiso ee ea lintho?
22 Masala a tlotsitsoeng a bakotuli a ne a phela, kamoo ho leng kateng, “metlotloaneng,” hobane lerato la oona a ne a sa le tiisa linthong tsa lefatšeng lena. A ne a sa lebella ho phela paradeiseng ea lefatšeng ka mehla le mehla. A ne a lebelletse ho kena lefeng la oona la leholimo le Morena Jesu Kreste ea tlotlisitsoeng. Kahoo, pono ea bona litabeng e ne e tšoana le e ngotsoeng ho Ba-Heberu 13:13, 14: “Ka baka leo, re ke re tsoeleng ho eena ka ntle ho setša sa litente, re ntse re jere sekhobo sa hae. Hobane mona, ha re na motse o tieang, empa re batla o tlang ho hlaha.” ’Neteng eo, ba inka e le baeti, ‘basele le bajaki’ har’a tsamaiso ena ea lintho, joaloka Abrahama, Isaaka, le Jakobo.—1 Pet. 2:11; Gen. 47:9; Ex. 6:4; Ba-Heb. 11:13; Pes. 119:54.
23. (a) Na ho keteka ha masala mokete oa sebele oa metlotloane ho ile ha elisoa ka khanya ea moea ka 1923? (b) Setšoantšo sa Mattheu 25:31-46 se bonoe se sebetsa joang?
23 Ho masala a tlotsitsoeng a neng a qalile ho kena moketeng oa sebele oa kajeno oa metlotloane, leseli la moea le tsoang tempeleng ea Jehova ea leholimo la qala ho khanya. Ke nakong ea ho bokelloa ha sehlopha sa moea se hlileng sa tšoantšetsoa ke Ruthe le Esthere moo setšoantšo sa Jesu sa linku le lipōli, joalokaha se tlalehiloe ho Mattheu 25:31-46, se ileng sa khantšoa ka ho khethehileng ho se bea leseling hore ba se utloisise. Kopanong ea 1923 e akaretsang e ileng ea tšoareloa Los Angeles, California, U.S.A., mookameli oa Watch Tower Society, e le lilemo tse ’ne joale a lokolohile litlamong teronkong ea nako ea ntoa ea Atlanta (Ga.), a bua ka setšoantšo sa linku le lipōli. Ho ne ho sa hlokahale hore se emele puso ea lilemo tse sekete ea Kreste Jesu hore se qale ho phethahala. Sehlopha sa ba kang linku se ne se qala ho ipōpa ka nako eo. Litho tsa sona li ne li se ntse li bonahala ’me li etsa masala a “baena” ba moea ba Jesu Kreste ea tlotlisitsoeng hantle. Puo ea phatlalatsa “Limillione tse Phelang Hona Joale li ke ke tsa Shoa” e ne e ee e sebelisetsoe bona. E ne e le ba “linku tse ling” tse boletsoeng ke Jesu ho Johanne 10:16.
24. Na ka nako eo ho ne ho le teng boiteko leha e le bofe bo khethehileng ho bokella baetsi bao ba botle ho “baena” ba moea ba Kreste?
24 Nakong ea ha ho hlalosoa setšoantšo sa Mattheu 25:31-46, ha ho boiteko bo khethehileng bo neng bo entsoe ho bokella “linku tse ling.” Empa kananelo a bontšoa bakeng sa mosa oo ba neng ba o etsetsa masala a “baena” ba Kreste ba moea. Ho feta moo khanya ea moea nakong ea mokete oa sebele oa metlotloane e ne e emetse nako e loketseng.
[Setšoantšo se leqepheng la 17]
(Ha u batla ho bona boitsebiso bo hlophisitsoeng hantle, sheba sengoliloeng)
Monyako
Mathule
Monyako
Monyako
Borena Mathule
Mathule a Salomone
Monyako
Mathule a Leboea
Lebala la Balichaba
Lebala la ka ntle
Mokoallo oa Majoe
Lebala la Basali
Lebala la Iseraele
Lebala la Baprista
Tempele
“Le leseli la lefatše. Motse o beiloeng holim’a thaba, ha o na ho patoa. Lebone la lōna ha le hoteletsoe ho kenngoa ka tlas’a morula, empa e le ho hlongoa kandelareng, le tle le bonesetse bohle ba leng tlung. Leseli la lōna le ke le khanyetse batho joalo, ba tle ba bone mesebetsi ea lōna e molemo, ’me ba rorise Ntat’a lōna ea maholimong.”—Matt. 5:14-16.