Batsoali ba se Nang Balekane ba Loana ka Katleho Lefatšeng la Kajeno

“Eo e leng mohlolohali ruri, ea siiloeng a ’notši, o itšepetse Molimo, ’me o tiisetsa liqelong le merapelong, bosiu le motšehare.”—1 Tim. 5:5.

1-3. (a) Mohlolohali e mong o kile a ngola hore’ng? (b) Na malapa a batsoali ba se nang balekane a eketsehile, ’me a mang a mathata ao ba talimanang le oona ke afe?

“KE mohlolohali ea lilemo li 28 ea nang le bana ba babeli. Ke tepeletse haholo hobane ha ke batle ho hōlisa bana ba ka ho se ntate. Ho bonahala eka ha ho lea ntsotellang. Bana ba ka ba mpona ke lla hangata ’me hoa ba ama. Kea tseba hore ha kea lokela ho ’na ke ikutloa ka tsela ena, empa nka etsa joang?” Lengolo lena le hlalosa sello se tloaelehileng se tsoang ho ba bang ba talimaneng le mathata a mangata—batsoali ba se nang balekane.

² Litlaleho tse tsoang lefatšeng lohle li bontša keketseho e potlakileng ea malapa a nang le motsoali a le mong. Linaheng tse Kopaneng tsa Amerika palo e imenne habeli kamor’a lilemo tse 10, ’me e phahame ho feta moo Canada. A nka karolo e le ’ngoe ho tse leshome Australia le Great Britain. Ho hakanngoa hore bana ba babeli ho ba bahlano ba phelang Linaheng tse Kopaneng tsa Amerika hona joale ba tla phela karolo e ’ngoe ea bophelo ba bona lelapeng le nang le motsoali a le mong.

³ Ho na le mabaka a mangata a keketseho ena. Lintoa le likotsi tsa makoloi li amohile malapa a mangata bo-ntate. Ha bophelo ba lelapa bo ntse bo senyeha, tahlo, tlhalano le karohano li tloaelehile. Bo-’mè ba bang ba sa nyaloang, ho e-na le ho ntša limpa kapa ho fana ka bana ba bona, ba ikhethetse ho hōlisa ngoana. Motsoali ea se nang molekane o tlameha ho loana ka katleho le mathata a mangata. Bolutu, ho hōlisa bana, ho iphelisa, litakatso tsa likamano tsa botona le botšehali le ho laola lelapa ke a ’maloa feela.

BOKRESTE BOA KHATHOLLA

4. Ke maemo afe lekholong la pele la lilemo a neng a hlahisa malapa a mangata a batsoali ba se nang balekane?

⁴ Lekholong la pele la lilemo, boseeeng ba Bokreste, ho senya ha lintoa, ho kula le ho oa boitšoarong ka mokhoa o tšoanang li ne li hlahisa bahlolohali le bana ba se nang bo-ntate ka bongata. Tlhalano le tahlo hangata e ne e le molao. Ka tloaelo bana ba tlase lilemong ba ne ba siuoa le ’mè eo joale a neng a tlameha ho ba hōlisa a le mong. Lefatše la ’Muso oa Roma e ne e le tsamaiso e “pelo e tšehla” e nyelisang ba fokolang. Kahoo bahlolohali ba tšoaroa hampe haholo. Ba bang ba ne ba bile ba iphelisa ka bootsoa.

5. Bokreste bo ne bo thusa ka litsela life tse peli?

⁵ Bokreste ba tlisa phetoho ea sebele. Ba qenehela ba malimabe. Empa le ho feta moo, ka lithuto tsa bona, batsoali ba se nang balekane ba kenngoa matla a boitšoaro hore ba lokolohe limpeng tsa nako eo. Ho e-na le ho hlahisa basali ba hlabisang lihlong, Bokreste ba hlahisa basali ba tsebang ho itšoara, ba khabane, ba ratang malapa a bona. Le bao e seng Bakreste ba hlokomela phapang, joalokaha e mong a ile a tsota: “Bakreste ba na le basali ba bohlokoa.”

6. Ke metheo efe ea Bokreste e ka thusang batsoali ba se nang balekane, hammoho le Bakreste bohle, ho loana ka katleho le likhatello tsa kajeno?

⁶ Ke metheo efe ea Bokreste e thusang? Moapostola Pauluse, ha a eletsa ka bahlolohali, o boletse hore mohlolohali ea beang mohlala “o itšepetse Molimo, ’me o tiisetsa liqelong le merapelong, bosiu le motšehare.” A bolela hore mohlolohali eo lilemo tsa hae li seng ka tlase ho 60 a ka beoa lenaneng la thuso haeba, har’a lintho tse ling, ‘a tumile ka mesebetsi e metle.’ (1 Tim. 5:5, 9, 10) Mona, bonyane ho totobala metheo e meraro: (1) Ho tšepa Molimo hona joale le ho lebella tšepo ea bophelo bo sa feleng boo o bo tšepisitseng; (2) boloka kamano e haufi haholo ea botho le Molimo; (3) ho tšoareha mosebetsing o molemo. Re tla bona hore na metheo ena e meraro, haeba e sebelisoa kannete, e thusa e seng batsoali ba se nang balekane feela empa Bakreste bohle hore ba loane ka katleho le likhatello tsa kajeno.

HO HLŌLA BOLUTU

7. (a) Ke hobane’ng ha bolutu e hlile e le bothata ho batsoali ba bang ba se nang balekane? (b) Motheo o boletsoeng ho 1 Timothea 5:10 o thusa joang?

⁷ Motsoali e mong ea se nang molekane o ile a hlomoha: “Ha ke fihla lapeng ’me ke bona marako ao a mane, haholo ha bana ba se ba robetse, ruri bolutu boa tla.” E, bolutu hangata ke bothata bo boholo boo motsoali ea se nang molekane a talimanang le bona. Le hoja ho ba haufi le bana ho thusa, ba bangata ba labalabela botsoalle ba motho e moholo. Ho tšoareha ‘mesebetsing e metle’ ke pheko e ’ngoe e lekiloeng. Bahlolohali ba lekholong la pele la lilemo ba Bakreste ba ne ba “amohela baeti, le ho hlatsoa bahalaleli maoto [ka liketso tsa botho tsa tšebeletso], le ho thusa ba mahlomoleng.” (1 Tim. 5:10) A hlokometse sena, mohlolohali e mong oa Mokreste oa mehleng ena ea lilemo li 68 a ikhethela ho etela bahlolohali ba bang ba haufi le matlo a phomolo neng le neng ha a ikutloa a tšoaroa ke bolutu. O re: “Ke fumana hore ka maeto ana, ho itlhokomella ntlo le ho itlhokomela moeeng ha ke na sebaka sa ho hlora.”

8. (a) Ke hobane’ng ha boboleli ba ’Muso bo re thusa ho loantša bolutu le khatello? (b) Na bo hlile boa sebetsa?

⁸ Boboleli ba ’muso ke ‘mosebetsi o motle’ o laetsoeng ke Jesu, mosebetsi o ka khathollang bolutung le khatellong. (Matt. 24:14; 28:19, 20) Motsoali e mong ea se nang molekane ea neng a itšeka a le bolutung le ho tepella a khothalletsoa ke metsoalle ea hae ho qalisa bopaki ba ntlo le ntlo. A ho etsa. Monyako oa pele a arabeloa ke mosali ea holofetseng hampe, empa leha ho le joalo a thabile ka ho fetisisang. Ke’ng ha a ne a thabile hakaale? “Ke hobane kea phela, moratuoa, ke na le bophelo ba ka,” ke kamoo a arabetseng ka thabo kateng. E bile moo Paki e fetohang teng, e inahana: “Ke phela hantle ’meleng, ke ratoa ke phutheho, bana ba babeli ba batle ’me ka holim’a tsohle ke Jehova. Nka sareloa hobane’ng?” Ho thusa ba bang moeeng ho ka thibela hore re be baikhabi le ho iqenehela. Ho ruta ba bang ho phelisa tšepo ea rōna le ho e boloka e le ncha; kahoo re tsoela pele ho ‘tšepa Molimo oa rōna.’—1 Tim. 5:5.

9. Na bolutu bo tla felisoa ke mosebetsi o boima kamehla? Ke eng hape e thusang?

⁹ Leha ho le joale mohlolohali e mong oa monna o kile a bolela tjena ka ho utloahalang: “Bolutu ha bo tlosoe feela ke ho sebetsa ka thata. Hangata u tlameha ho phela le bona. Bo tlameha feela hore bo mamelloe ka thuso le matla tse tsoang ho Jehovah.” Matla a joalo a tla ha motho a “tiisetsa liqelong le merapelong, bosiu le motšehare.” (1 Tim. 5:5) Ho lokolisa ka thapelo liketso tsa rōna letšehare lohle, le ho tseba hore kamehla Jehova o teng o mametse le hore o tsotella ka lintlha tsa bophelo ba rōna kannete ke ho tšelisang. Ho mo tšollela lipelo tsa rōna “bosiu le motšehare” hoa thusa—haholo bosiu ha, ho ea kamoo ba bangata ba tlalehang, bothata ba bolutu bo ba matla haholo.

HO LOANA KA KATLEHO LE LITAKATSO TSA BOTONA LE BOTŠEHALI

10. (a) Ke neng takatso ea botona le botšehali e ka fetohang bothata? (b) Ke joang motho a ‘ikhotsofatsang nameng,’ ’me hona ho ka isa kae?

¹⁰ Batsoali ba bangata ba se nang balekane ba laba-labela botsoalle bo mofuthu ba lenyalo le ba katamelano e haufi ea liphate tsa lenyalo. Ruri boikutlo bo joalo ha bo phoso ka bobona. Takatso ea ho kena lenyalong hape ke ea tlhaho. Bothata bo hlaha ha motho a etsa qeto ea ho khotsofatsa ‘tšusumetso ena ea botona kapa botšehali’ ho sa tsotellehe se tla hlaha. Hona ho etsahetse mehleng ea moapostola Pauluse. Bahlolohali ba bang ba banyenyane ba ne ba lumella ‘litakatso ho ba ngalisa Kreste.’ (1 Tim. 5:11, 12) Hona ho ne ho le hobe hobane, ha e le hantle, motho ea joalo o ne a re: ‘Seo ke se hlokang likamanong tsa botona le botšehali se seholo haholo. Ke tlameha ho etsa ho hong ho lopolla ’mele oa ka!’ Litakatso tsena tsa ’mele kapa tsa nama li fetoha butle-butle ntho e khōlō bophelong, e khōlō le ho feta lithahasello tsa moea. Litakatso tsena li ka hōla ho fihla ntlheng eo ho eona motho ‘a ka ineelang ho ikhotsofatseng nameng’ ’me kahoo a ‘shoa leha a sa phela.’ (1 Tim. 5:6) Thahasello ea motho eo linthong tsa moea e ea shoa. Ntho eo e ka etsahalla Mokreste ofe kapa ofe (e motona kapa e motšehali) kajeno. Motho a ka ‘ipolaea moeeng’ ka ho hlokomoloha melao ea boitšoaro ea Bibele, ka baka la ho nkeha haholo ke ho khotsofatsa ‘litakatso tsa botona le botšehali.’

11. Motho a ka ‘bolaea takatso ea hae ea botona kapa botšehali’ joang?

¹¹ Ka baka leo, Bibele e ea phehella: ‘Le bolaee ke hona litho tsa ’mele ea lona ke hore, takatso ea botona le botšehali.’ (Ba-Kol. 3:5) Empa joang? Ka ho alosa pelo ea hae le kelello. Haeba u ne u leka ho theola ’mele le ho theola takatso ea hao ea lijo, na u tla bala limakasine tse nang le litšoantšo tsa lijo tse hlabosang, kapa u shebelle lipontšo tsa TV tsa ho pheha? Na u tla tloaelana le batho bao puo ea bona e leng lijo? Le hanyenyane! Ho joalo le ka ‘takatso ea botona le botšehali.’ Mohlolohali e mong ka kotloloho o itse: “Re lefatšeng leo ho seng mohla le khaotsang ho bua ka likamano tsa botona le botšehali. Ke seli haholo hore na ke khetha ho ithabisa kang le hore na ke tloaelana le bomang. Motho oa lefu la tsoekere ruri a ke ke a rata ho fofonela fenstereng ea lebenkele la lipompong.”

12, 13. (a) Ho hlaolela kamano ea botho le Jehova, ho hlokahala eng? (b) Ke hobane’ng ha “liqelo” e le tsa bohlokoa hakana, ’me re ka sebetsa tumellanong le tsona joang?

¹² Leha ho le joalo, hore litakatso tsena li ’ne li hlōloe, letsatsi le leng le le leng, motho o tlameha ho hōlisa kamano e haufi ea botho le Molimo. Ntle ho boithuto ba botho le ho nahanisisa, hona ho hloka ho tiisetsa “liqelong.” (1 Tim. 5:5) Pauluse ha a bolele lithapelo feela ka kakaretso, empa o re ‘liqelo.’ Tsena ke likōpo tse eang ho Molimo tse fetisang ntho e batloang ka matla. Ke likōpo tse tiileng, e, ho qeloa ha thuso, mohlomong ka “mohoo o moholo le ka meokho.”—Ba-Heb. 5:7.

¹³ Na lithapelo tsa hao bakeng sa boitšoaro le matla li matla ka tsela eo? Na ua li phehella? Na u rapela ka oona motsotso oo litakatso tsee li bang matla? Na u tobile taba, mohlomong u senolela Ntate oa hao lintho tseo u ke keng ua li amela motho e mong? Hape, na u sebetsa tumellanong le lithapelo tsa hao? Mosali e mong oa Mokreste o itse: “U se ke ua kōpa Jehova thuso ea ho hlōla litakatso tsa botona le botšehali ebe joale ka linako tsohle u nahana ka botona le botšehali. Ke ’nete, ka linako tse ling ka khoeli tšusumetso ea hao ea botona kapa botšehali e ka ba matla haholo. Sebelisa kelello ea hao ka ho etsa ntho e ’ngoe. Etela motho e mong. Thapolla maoto kapa u etse ntho e ’ngoe e tla fetola taba. Tšoareha ka matla kamoo u ka khonang nakong ena ea khoeli.” E mong ea ileng a bona bohlokoa ba ho tšoareha “mesebetsing e metle” a lumela, a re: “Hlatsoa lifenstere tsa hao. Koropa fatše. U khoathe litšila hohle. Ke ho entse. Hoa sebetsa!” Ha u bona Jehova a u thusa ka bothata bona—che, e seng ka ho etsa mohlolo, empa bonyane ka ho u nea matla a ho loana le bona ka katleho tsatsi le leng le le leng—u tla atamela haufi le eena haholo.

14. (a) Ho ka etsahala joang ha motho a hlōleha ho ba le kamano e haufi le Jehova? (b) Batsoali ba se nang balekane ba ka etsa joang ha ba sa emetse molekane oa Mokreste?

¹⁴ Ntle ho ‘lekunutu lena le Jehova’ motho a ka qala ho batla molekane oa lenyalo ho sa tsotellehe hore na ho tla hlaha eng, mohlomong a bile a laetsana le batho ba lefatše. (Pes. 25:14) E mong ea ileng a ho etsa oa lumela: “Bothata ba ka ba sebele e bile hose be haufi le Jehova. Eitse ha ke fumana monyetla oa ho nyaloa, ha utloahala ho le monate. Ka lebala litekanyetso tsa boitšoaro tseo ke li rutiloeng. Joale ka tsatsi le leng ka hlokomela hore monna enoa o ne a ichebile boeena feela e seng lenyalo. Joale ka tlameha ho phela ka letsoalo le molato.” Ke ’nete, bosoha bo ka ba thata, empa joalokaha mosali e mong ea hlalileng oa Mokreste a lemosa hore: “Ho na le ntho e mpe le ho feta bosoha. Ke ho nyalana le motho ea fosahetseng!” Kamehla ho na le monyetla oa ho fumana molekane e mong har’a Bakreste ba ineetseng “Moreneng.” (1 Ba-Kor. 7:39) Ba bang ba ’nile ba ema ka lilemo tse telele ba emetse molekane ea joalo. Ho sa le joalo, ha ba koata kapa hona ho imeloa ke boemo ba bona. Ka bohlale ba sebelisitse nako ho hōlisa litšoaneleho tsa hore e be balekane ba molemo. Joalokaha motsoali e mong ea se nang molekane a itse: “Kea ipotsa, ’Na ke mosali oa moea eo motho e mong a ka mo khethang? Ha ke hlomohile ha ke le mong, nka ’na ka etsa motho e mong molekane ea hlomohileng.”

HO LAOLA LELAPA LE HO HŌLISA BANA

15. (a) Batsoali ba bang ba se nang balekane ba entse joang ho laola lelapa ka katleho? (b) Na u na le litlhahiso tse eketsehileng?

¹⁵ Le hoja e le mosebetsi o boima, batsoali ba bangata ba se nang balekane ba etsisitse mosali ea khabane ea hlalosoang ho Liproverbia 31. Le hoja a ne a nyetsoe, lelapa le ne le tsamaisoa ke eena kakaretsong ea lona. O ne a boloka chelete ka ho reka ka hloko, a iketsetsa liaparo ’me a sa senye lijo, kaha o ne a lokisa ‘karolo e loketseng.’ (Pr 31 Litem. 13-15, 19) O ne a tsoha e sa le hoseng ’me a sebetse ho fihlela bosiu. (Pr 31 Litem. 15, 18) O ne a etsa lintho ’me a li rekisa (Pr 31 Tem. 24) O ne a sebelisa “matsoho a hae” ho hlokomela mesebetsi. (Pr 31 Litem. 17, 19) Kajeno, ho ithuta ho sebelisa “matsoho” a bona ka bohlale, batsoali ba bang ba se nang balekane ba ’nile ba bala libuka tse ba rutang ho etsa lintho ’me ba bonana le litsebi bakeng sa keletso. (Hangata, kamor’a ho hlalosa boemo ba bona, ba fumana thuso ea litsebi e sa lefelloeng.) Ba bang ba bolela seo ba se hlokang ho lipaki tse ling tsa Jehova tse nang le “tsebo” eitseng ’me ha sebaka se le teng, bana ba thusa ka mosa. Hona hohle ho theola litšenyehelo.

16. Ke hobane’ng ha ho hlokahala ho tšepa Molimo, ’me ke mohlala oa mang o bontšang tlhokahalo ee?

¹⁶ Leha ho le joalo, ho sa tsotellehe sohle seo mohlolohali a ka se etsang, ha linako li ntse li mpefala, o tlameha ho tšepa Molimo bakeng sa litokisetso tsa letsatsi ka leng. Mohlala o motle oa ea ileng a ‘tšepa Molimo’ ke motsoali ea neng a se na molekane ea neng a phela motseng oa Sarepta mehleng ea moprofeta oa Molimo Elia. Ka taelo ea Jehova, Elia a mo kōpa lijo tsa hae tsa ho qetela, a mo tšepisa hore Molimo o tla fana. U ka be u entse joang? O ne a e-na le ho lekaneng sejo sa ho qetela. Bonyane sejo seo e ne e le sa ho qetela seo a ipitsang ka sona. Leha ho le joalo, ka baka la tumelo ea hae, a fana ka se teng ka baka la seo a neng a sa tsebe bonnete ba sona. Lentsoe la Molimo ka moprofeta la fetoha ’nete. Eena le mora oa hae ha ho mohla ba ileng ba lapa. Ka ho tšoanang kajeno, batsoali ba se nang balekane, hammoho le Bakreste ba bang bohle, ba tlameha ho tšepa Molimo ka ho batla ’muso oa oona pele le ka ho lumellana le melao e lokileng ea oona. Joale ba tla bona hore oa lokisetsa.—1 Mar. 17:8-16; Luka 4:25, 26; Matt. 6:31-33.

17. Batsoali ba se nang balekane ha ba lokela ho lebala eng haeba ba tla hōlisa bana ba bona ka katleho, hona hobane’ng?

¹⁷ Mosebetsi o boima oa ho ba “ntate” le “’mè” ho bana le ho ba hōlisa ka nepo o ka finyelloa feela haeba motsoali ho se mohla a lebalang hore na ke eng seo e lokelang hore e be sa bohlokoa haholo ka lapeng. Hlokomela karabelo ea Bibele:

“Leruonyana le lenyenyane la ea tšabang Jehova le fetisa maruo a maholo a nang le lipelaelo. Ho ja meroho feela moo lerato le leng teng, ho monate ho e-na le ho ja khomo e nonneng, moo ho nang le hloeano.” (Liprov. 15:16, 17)

Bohlokoa ba sebele ba lijo hase hore na ke eng e beoang tafoleng, empa hore na ke eng se ka lipelong tsa ba jang hammoho. Lerato le tšabo e molemo ho Molimo ke tsona tsa bohlokoa.

18. (a) Batsoali ba bang ba se nang balekane ba entse joang hore ba be le chelete leha ho le joalo ba be le nako ea ho hlokomela bana ba bona? (b) Ke eng hape eo u ikutloang hore e ka etsoa?

¹⁸ Ho ba le nako ea ho thusa bana ba bona ho tšaba Molimo leha ho le joalo ba be le chelete, batsoali ba bang ba se nang balekane, hangata ba thusoa ke bana ba bona, ba ’nile ba rekisa lintho tseo ba li entseng lapeng kapa ba sebeletsa lapeng.a Ba bang ba fumane molemo ka thuso leha e le efe ea ’muso eo ba nang le tokelo ea molao ho eona. Ba bangata ba theotse mokhoa oo ba phelang ka oona hore ba tsoelle ka mosebetsi oa nakoana, joaloka mosali e mong oa Mokreste ea nang le bana ba bane. O re: “Ke ne ke rata ho ba le bana boholo ba nako kamoo ho ka khonehang. Ho ne ho le hobe haholo hore ebe ha ba na ntat’a bona ntle ho hore ke ba amohe le ’mè.” Koana, hase bohle ba ka fumanang mosebetsi o joalo o tšoanelehang. Empa ka ho ipua le bana, u ba hlalosetsa hore na ke hobane’ng ha mosebetsi oa boipheliso o hlokahala le ka ho ipha sebaka se sengata u na le bona, batsoali bana ba ka boloka moea o mofuthu oa lerato lapeng.

19. (a) ‘Ho rata bana ba bona’ ho bolela eng ho batsoali? (b) Ke hobane’ng ha hona ho se bonolo ka mehla bakeng sa motsoali ea se nang molekane?

¹⁹ ‘Ho rata bana ba bona,’ ho akarelletsang ho ba khalemela kamoo ho hlokahalang, ke habohlokoa. (Tite 2:4; Liprov. 13:24) Hoa thusa ho thibela bana, ba seng ba lahlehetsoe ke motsoali a le mong, hore ba se ke ba ikutloa ba sa sireletseha. Kaha basali ba bang ba hlōloa ke “lerato,” ho ka hlokahala boiteko ba sebele ho khalemela. Empa hopola, khalemelo, e ka ’nang ea akarelletsa kotlo, e bolella ngoana hore u mo rata hoo u sa batleng ha a kena khathatsong.

20. (a) Ba bang ba entse joang ho ba haufi le bana ba bona? (b) Ke lehlohonolo lefe le habeli le tlisoang ke ho ba haufi le bana le ho ba hōlisa ka nepo?

²⁰ Batsoali ba se nang balekane ba haufi le bana ba bona ba khothalletsa hore:

“Bea nako e tobileng ea ho ba le bana ’me u se ke ua lumella eng kapa eng e khathatsane le eona. Mosebetsi oa ntlo ha o fele; empa bana ha u be le bona ka mehla. Nahana ka taba ea ho haha bana moeeng.” “Ke ne ke tlameha ho khalemela ka moea o nang le kutloisiso ka baka la letsoalo la ho lahleheloa ke ‘mè oa bona. Ke bua le bona ha ho hlaha monyetla o mong le o mong, ho sa tsotellehe hore na ke ka nako efe motšehare kapa bosiu. Re na le ‘linako tse monate’ ha re lokisetsa lijo tsa mantsiboea. Ke ka nako eo ba hleng ba mpolelle makunutu.”

Lerato le joalo lea teba. Bana ba le utloa le ho le phopholetsa. Le hoja boiteko bona bohle ba ho hōlisa bana bo le boima, motsoali o khotsofala haholo ke ho ba bona ba hōla ho ba barorisi ba nang le boikarabelo ba Jehova. Hape, mosebetsi o joalo ke tšireletso ea boitšoaro bakeng sa batsoali.—1 Tim. 2:15.

KARABO E FELETSENG—TAOLO E NCHA

21. (a) Na mathata a motsoali ea se nang molekane a rarolleha habonolo? (b) Tsela e tšepahalang e phetha eng?

²¹ “Ke kopanela mosebetsing oa boboleli hoo e ka bang tsatsi le leng le le leng. Kea ithuta le ho rapela ka mehla,” kamoo ho ileng ha bolela mohlolohali e mong, ea ileng a ipolela: “Leha ho le joalo, e ntse e le ntoa ho robala bosiu bo bong le bo bong.” E, mathata ao motsoali ea se nang molekane a tlamehang ho thulana le oona a thata ho rarolleha. Hangata ke ntoa ea tsatsi le leng le le leng. Leha ho le joalo, letsatsi le leng le le leng leo Mokreste a bontšang mamello ke kotlo e ’ngoe sefahlehong sa Satane ea ileng a nqosa hore batho ba tla khaotsa ho sebeletsa Molimo ha maemo a thatafala. (Jobo 1:9-11; Liprov. 27:11) Hlokomela hore ha ho motho ea nang le kabelo e phethahetseng bophelong hona joale. ‘Banab’eno ba lefatšeng’ ba ntse ba le mahlomoleng. (1 Pet. 5:9) Mathata a motho e mong a ka ’na a fapana le a hao, empa ke a matla hakaalo ho motho eo. Ho sa tsotellehe hore na mathata a hao ke afe, maemo a ka ’na a mpefala. Kahoo leka ho hlola lintlheng tse molemo tsa bophelo ba hao haholo kamoo ho ka khonehang.

22. (a) Re lokela ho boloka mahlo a rōna hokae, hona hobane’ng? (b) Ho tla buuoa ka’ng sehlohong se latelang?

²² Ho feta tsohle, re tlameha ho tsepamisa mahlo a rōna tšepong e phelang ea tsamaiso e tlang e tla tlisa khotsofalo e phethahetseng. Joalokaha moapostola Pauluse a re: “Re mpa re talima tse sa bonahaleng [tšepo ea bophelo bo sa feleng]; hobane tse bonahalang [mahlomola a ka ’nang a re khopisa ’me a re liha] ke tsa mehla ena feela, empa tse sa bonahaleng ha li ka ke tsa e-ba le bofelo.” E, likhatello tsa tsamaiso ea kajeno e tsietsang li tla qetella li felile. Mahlohonolo a taolo e ncha, e haufi hakana, e tla ba a sa feleng. Bona tsena ka ho hlakileng ’me u ke ke ‘ua tela.’ (2 Ba-Kor. 4:8, 9, 16-18) Empa ba bang ba ka etsa joang ho thusa bao e leng batsoali ba se nang balekane? Ho tla buisanoa ka hona sehlohong se latelang.

[Mongolo o botlaaseng ba leqephe]

[Lebokose le leqepheng la 24]

KAMOO U KA LOANANG KA KATLEHO

□ Tšepa Molimo hona joale ’me u lebelle tšepo ea bophelo bo sa feleng eo o e tšepisitseng

□ Boloka kamano e haufi haholo ea botho le Molimo

□ Tšoareha mosebetsing o molemo

[Setšoantšo se leqepheng la 20]

Batsoali ba se nang balekane ba ka ruta bana ba bona ho thusa ka mesebetsi ea lelapa

[Setšoantšo se leqepheng la 22]

“Khetha nako ea ho ba le bana . . . Bua le bona ka linako tsohle”