Ka Boikokobetso Hlompha Tokisetso ea Jehova Joaloka Mangeloi
LEBOTHO la Assyria, la banna ba 185 000, le ne le eme phuleng ea Libna ka lehlakoreng le leng ho sehlaba sa Judea, hole ka lik’hilomithara tse ka bang 40. Letoto la metse e sentsoeng le litopo tse khabetsoeng li ne li rapaletse phalimehong ea lebotho. Sera se qetellang e ne e le Jerusalema.
Morena oa Mojudea Ezekiase a tseba hore topollo e tlisoang ke mohloli oa motho ke ntho e thōko. ’Muelli oa Assyria o ne a bilelitse hore ho ineheloe eaba joale o khutlela kampong ea Assyria e Libna. Empa Ezekiase a etsa qelo e matla: “Joale, Jehova, Molimo oa rōna, u re namolele matsohong a hae, mebuso eohle ea lefatše e tle e tsebe hobane uena Jehova, u Molimo u ’notši.” (2 Mar. 19:19) Karabelo e ne e potlakile, hona bosiung ba thapelo ea Ezekiase.
Kamor’a nako tlaleho ea fihla ho Ezekiase hore bosiung bo fetileng lengeloi la Jehova le ile la otla bahlabani ba 185 000 kampong ea Assyria e Libna. (2 Mar. 19:35) Ka baka leo, Morena Sankeribe a khutlela Assyria ka ho toba. O ne a bone pontšo e tšosang hakaakang ea matla!
Bahlanka ba Ikokobelitseng
Banna ba bohlale lintoeng ba ’nile ba ithorisa ka lintho tse tlase ho tseo tse finyelletsoeng. Empa boikutlo ba mangeloi ke bofe? ‘Bara bana ba Molimo’ ba moea ke mehlala e fetisisang ea boikokobetso. (2 Pet. 2:11; Jobo 38:7) Nka taba ea moromuoa oa lengeloi ea ileng a itlhahisa ho moapostola Johanne ponong. Eare ha Johanne a tloha a mo khumamela, lengeloi la lemosa hore: “U se ke ua etsa hoo; hobane ke molekane oa hao oa tšebeletso, le oa banab’eno ba nang le bopaki ba Jesu.” (Tšen. 19:10; 22:8, 9) Kahoo lengeloi ka boikokobetso la lumela hore hase letho ha e se feela mohlanka oa Ea Holimolimo. Le hoja le ile la neoa tokelo ea ho fetisa tšenolo ea bomolimo, la elelloa hore ho ka ba phoso hore le amohele hlompho leha e le efe ea borapeli ha le phetha karolo ea lona e le mohlanka oa Molimo.
Jesu Kreste o bontšitse hore mangeloi a thaba haholo ha moetsalibe e mong a baka a le mong feela. (Luka 15:7, 10) Hona hoa tsoteha ka sebele, kaha motho ea joalo o ne a tla ba moleng oa puso ’musong oa leholimo. Ho e-na le ho ba mona ka lerato le sa tšoanelang le neoang bao e neng e le baetsalibe, mangeloi a ananela ho lokela ha hore Molimo o sebelise batho bao, ka seo ba se utloileng lefatšeng, ba hlomelletsoeng ho sebeletsa e le marena le baprista ba nang le kutloelo bohloko. (Bapisa Ba-Heberu 4:15; 5:8, 9.) A nka tokelo ea ho lumelloa ho sebeletsa Jehova boemong bofe kapa bofe, mangeloi ka boikokobetso a sebeletsa ka hlompho bao e tlang ho ba majalefa a ’Muso. (Ba-Heb. 1:14) Ha e le hantle, a bile a tsamaisa baboleli ba evangeli ho fumana ba batlang Molimo.—Bapisa Liketso 8:26-38.
Mangeloi a hlokomela hore ha ho sebaka sa boiphahamiso lelapeng la Molimo, leha e le leholimong kapa lefatšeng. Na hona ha ho re susumelletse hore re iteke ka sebele ho se etse “letho ka khang, leha e le ka boithoriso ba lefeela, empa e mong le e mong, ka boikokobetso, a lekanye hobane ba bang ba mo fetisa.” (Ba-Fil. 2:3) Na re amohela tokisetso ea Jehova ka phuthehong ea Bokreste ka boikokobetso, re hlompha banna ba sa phethahalang ba sebeletsang e le balebeli? (Ba-Heb. 13:17) Ho thoe’ng ka boikutlo ba rōna ho balumeli ba bang? Na rea ba hlompha le ho ba mosa ho bona, ho sa tsotellehe ho se phethahale ha bona? Ha le buisana le Abrahama; lengeloi la Jehova le neng le mo emetse la re, “Ak’u.” (Gen. 13:14) Na re hlompha bana, basali, balumeli ba bang? Mangeloi a ne a sa iphe bolokolohi bo tlōtseng ha a sebelisana le batho ba sa phethahalang. Ho be joalo le ho rōna.
Tabeng ea ho patoa ha Moshe, re boetse re fumane taba ea ho itiha ho ikokobelitseng. Ho ile ha thulana Diabolose le lengeloi le leholo Mikaele ea neng a tseka setopo e le thepa ea Jehova. Mikaele a sebetsa taba joang? Na o ile a tšollela linyefolo ho mohanyetsi oa hae ea neng a ikarabelletse bakeng sa malimabe a batho? (Gen. 3:1-5) Che, “o tšabile ho mo ahlola [Diabolose] ka nyefolo, a mpa a re: Morena [Jehova] a u khalemele.” (Juda 9) Lengeloi le leholo le ne le hlompha tokisetso ea Jehova ea kahlolo, le qoba boikhohomoso.—Bapisa Johanne 5:19, 30.
Ba latela mohlala oa Mikaele, banna ba Bakreste le bo-ntate ba lokela ho qoba ho sebelisana ka thata le ka khatello ha ba rarolla likhang tsa lelapa, ’me baholo ba phutheho ba hlokomele hore ha ba sebelise matla a bona hampe ka ho tšoara ba fosang hampe. (1 Pet. 3:7; 5:1-3) Ba abang linnete tse pholosang bophelo tse tsoang Lentsoeng la Molimo ruri ba ke ke ba lakatsa ho bua hampe ka batho ba sa arabeleng empa ba tla tlohela kahlolo ho Jehova “hobane . . . eena o talima pelo.”—1 Pet. 3:8-12; 1 Sam. 16:7.
Mamello e Tšepahalang
Hlompho e ikokobelitseng bakeng sa tokisetso ea Jehova e ile ea nolofaletsa mangeloi ho tšepahala litokisetsong tsa oona tsa tšebeletso. Ha le le tseleng e eang ho moprofeta Daniele ka molaetsa o khethehileng o tsoang ho Molimo, lengeloi le leng la thulana le khanyetso e matla. “Khosana ea ’muso oa ba-Persia e hanyetsane le ’na ka matsatsi a mashome a mabeli a motso o mong,” kamoo lengeloi le ileng la bolella Daniele hamorao. Le ananela bohlokoa ba ho fihla ho mohlanka oa Molimo oa lefatšeng ka molaetsa, la loantša khanyetso e sa bonahaleng ea morena oa ledemona ea busang Persia ka matsatsi a 21, ho fihlela lengeloi le leholo Mikaele le tla ho tla le thusa.—Dan. 10:12-14.
Ho tšoana le lengeloi leo, “ntoa ea rōna ha e loane le nama le mali empa . . . le meea e bolotsana e sebakeng sa leholimo.” (Ba-Ef. 6:12) Boiteko bo matla boa hlokahala ho hanyetsa matla a bodemona a sekametseng ho senya botsoalle ba rōna le Jehova le ho re thibela ho bolela ’muso oa Molimo. Ho hlompha le ho ananela borena ba Jehova ho tla re thusa ho hlōla ka thuso ea moea o halalelang.—Tšen. 12:17.
Ka nako e ’ngoe, re ka ’na ra nyahamisoa ke boikutlo bo seng botle ba metsoalle kapa litho tsa lelapa. Mangeloi le oona a ’nile a ba tlas’a likhatello tsa marabele. Pele ho moroallo o moholo oa mehleng ea Noe mangeloi a mang a ineela litakatsong tse fosahetseng. A tlohela ‘sebaka se a loketseng’ maholimong, a iphetolela ’meleng ea nama ’me a kena likamanong tseo e seng tsa tlhaho le basali. (Juda 6) Boholo ba bara ba Molimo ba moea, bona ba hana ho susumetsoa ke tsela ea oona e sa tšepahaleng ea litho tsena tsa borabele tsa lelapa la Jehova. Lilemo tse ka fetang 2 000 hamorao, Daniele a bona pono ea makhotla a leholimo. A bona mangeloi a makae a tšepahalang? “O na a sebeletsoa ke likete tsa likete, limillione tsa limillione li ne li eme pel’a hae.” (Dan. 7:10) Ho tšoana le mangeloi a lokileng, a hana ho susumetsoa ke boikutlo ba batho ba ikhahlisang. Khothatsoa ke mehlala e tšepahalang joalo.—1 Ba-Thess. 1:7.
Ho Ananela Lerato la Molimo
Jehova o bōpile mangeloi le batho ka matla a ho hōlisa lerato bakeng sa oona e le Ntate oa bona le Morena. Sera se seholo sa Molimo ke lengeloi le leng le kileng la thabela melemo ea lerato la Jehova; leha ho le joalo la hlōleha ho arabela ka kananelo. Ho haelloa ke boikokobetso ha isa takatsong ea bophahamo ’me ha qetella ka borabele.—1 Tim. 3:6.
Na hona hohle ha hoa lokela ho sebeletsa e le temoso le khothatso ho rōna? Haeba mangeloi, a sitiloeng ho nahanisisa ka kananelo ka lerato la Jehova ho oona a ile a ineela takatsong e fosahetseng, ho ka ba joalo hakaakang ka rōna? Ho tšoana le bongata bo boholo ba mangeloi a tšepahalang ponong ea Daniele, na re tla falimehela ho bona mabaka a teboho ho Jehova bakeng sa lerato la hae la letsatsi le leng le le leng ho rōna? A re nkeng menyetla ea rōna ea ho atamela ho Molimo e le ea bohlokoa.
“Ke mang, ea tšoanang le Morena, har’a bara ba Molimo?” ho botsa mopesaleme. “Phuthehong ea bahalaleli Molimo o tšajoa haholo, o hlomphuoa haholo ke bohle ba mo teetseng hare.” (Pes. 89:6, 7, phet. e ncha) Hlompho e nang le tšabo joalo e hōla joang lipelong tsa mangeloi le batho? Ka ho nahanisisa tsatsi le leng le le leng ka litšoaneleho tse babatsehang tsa Morena oa Bokahohle joalokaha li senoloa mesebetsing ea oona ea pōpo le ka mosa oa oona oa lerato.
Lipaki tsa Jehova kajeno hase sehlotšoana feela se sa bonahaleng borapeling ba sona ba Molimo oa ’nete. Bibele e re tiisetsa hore “ba nang le rōna ba feta ba nang le bona ka bongata.” (2 Mar. 6:16) Boitekong ba rōna ho khahlisa Jehova, re na le bongata ba mangeloi bo rapelang oona Molimo oo. Libopuoa tse matla hakaalo li bontša thahasello e mosa ho rōna, li lokile ka mehla ho re thusa le ho emela Jehova ka tieo. (Pes. 34:7) Khothala ke hona, ka mohlala oa bara bana ba Molimo ba hlomphang tokisetso ea Jehova ka boikokobetso. Ha re tsoeleng pele ho ipea tlas’a thato ea Ntate oa rōna ea fanang oa leholimo le oona.